Global Press

English

Global PressGlobal PressGlobal PressGlobal Press

USD
2.9776
EUR
3.2956
RUR
0.0466
GBP
3.8444

რაც შეეხება პროკურატურის გამოძიებას ფულის გათეთრების მუხლით, კატეგორიულად უარვყოფთ ასეთი ფაქტის არსებობას, - ამის შესახებ „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ მის მოადგილესთან, ბადრი ჯაფარიძესთან ერთად გამართულ პრესკონფერენციაზე განაცხადა.

 

როგორც ხაზარაძემ აღნიშნა, მათ უკვე გადასცეს ყველა საჭირო დოკუმენტი შესაბამის ორგანოებს, რაც ცხადყოფს ასეთი დანაშაულის არარსებობას.

 

„მაღალი საჯარო ინტერესიდან გამომდინარე გვინდა აღვნიშნოთ, რომ ყველა მასალა გაგზავნილია საერთაშორისო საფინანსო ინსტიტუტებთან, ჩვენს პარტნიორებთან. ჩვენ გვაქვს საერთაშორისო იურიდიული ფირმის -„ენტონსის“ დასკვნა, რომელშიც საკითხთან დაკავშირებით მკაფიოდ არის აღნიშნული, რომ ამ ტრანზაქციებს არათუ ფულის გათეთრებასთან, არამედ საბანკო რეგულაციის, ან ინტერესთა კონფლიქტის დარღვევასთან არანაირი კავშირი არ აქვს. მზად ვართ, აღნიშნული დასკვნა და ტრანზაქციის შესახებ ინფორმაცია გავუზიაროთ ყველა დაინტერესებულ მხარეს, პარლამენტის შესაბამის კომიტეტებს, არასამთავრობო ორგანიზაციებს, და ა.შ. ასევე მზადყოფნას გამოვთქვამთ, არჩეულ იქნას თქვენს მიერ არჩეული ადგილობრივი თუ უცხოური იურიდიული კომპანიები, „ენჯეოები“, საელჩოს წარმომადგენლები და შედგეს სპეციალური კომისია, რომელსაც ჩვენ გადავცემთ ნებისმიერ ინფორმაციას, ნებისმიერ ამონაწერს ამ საკითხთან დაკავშირებით“, - განაცხადა მამუკა ხაზარაძემ.

ანაკლიის პორტს თავისი კანონმდებლობა ექნება, რომლის საშუალებითაც ინვესტორები ნებისმიერ სამართლებრივ დავას ადგილზე მოაგვარებენ. ამის შესახებ ბიზნესმენმა, „თიბისი ბანკის“ ერთ-ერთმა დამფუძნებელმა მამუკა ხაზარაძემ კავკასიის უნივერსიტეტის სტუდენტებთან შეხვედრისას განაცხადა.

 

მისი თქმით, თავისუფალი ვაჭრობის ზონაში საჭიროა ისეთი კანონმდებლობის შეტანა, რომელიც თანამედროვე ქვეყნიდან ჩამოსულ ნებისმიერ ინვესტორს მისცემს საშუალებას, რომ ბიზნესი გასაგებ, სამართლებრივ ჩარჩოში აწარმოოს. ქართულ კანონდებლობას კი ამ მხრივ, ბევრი ხარვეზი აქვს.

 

გარდა ამისა, მამუკა ხაზარაძემ ანაკლიის პორტის მნიშვნელობაზე და იმ უპირატესობებზე გაამახვილა ყურადღება, რომელიც სხვა ქვეყნებთან მიმართებით აქვს.

 

„საქართველოს და ამ შემთხვევაში ანაკლიას აქვს აბსოლუტურად უნიკალური პოზიციონირება, რომ ჰქოდეს ღრმაწყლოვანი პორტი, მიიღოს ნებისმიერი ზომის გემი, ამასთან, მოხდეს ამ პროდუქციის გადამუშავება და შემდეგ, როგორც ქართული პროდუქტის ისე გადაგზავნა, ჩინეთის, ევროპის და ა.შ. მიმართულებით. იმედია, აშშ-სთან შეთანხმებაც მალე იქნება. ეს არის ჩვენი დიდი კონკურენტული უპირატესობა, სხვა ქვეყნებთან შედარებით. იმიტომ, რომ თუ ევროკავშირის არა წევრ ქვეყნებს გადავხედავთ, თუნდაც, დსთ-ს და ცენტრალური აზიის ქვეყნებს, მათთვის ეს არის იგივე ჩინეთი, რადგან აქ დამზადებული პროდუქტი ევროპის ბაზარზე შევა, დაბეგვრის გარეშე. სწორედ ეს არის მთავარი გასაღები.

 

თუმცა, ეს არ არის საკმარისი. იქ საჭიროა ისეთი კანონმდებლობის შეტანა, რომელიც თანამედროვე ნებისმიერი ქვეყნიდან ჩამოსულ ინვესტორს მისცემს საშუალებას, რომ აწარმოოს ბიზნესი გასაგებ, სამართლებრივ ჩარჩოში. ეს არის ყველაზე მთავარი. ამისთვის ჩვენ უკვე მეორე წელია ვმუშაობთ მსოფლიოში საკმაოდ ცნობილ იურისტებთან. სულ რაღაც ერთი თვის წინ გავაფორმეთ ხელშეკრულება დიდი ბრიტანეთის და ირლანდიის იურისტთა ასოციაციის პრეზიდენტთან. ამ ასოციაციაში გაერთიანებულია 180 000 იურისტი და სწორედ მათთან ერთად ვამუშავებთ კანონდებლობას.

 

ჩვენ გვინდა, რომ ამ ზონაში იყოს ლონდონის არბიტრაჟის ანალოგი. პირველ ეტაპზე არ გამოვრიცხავთ, რომ წორედ ამ 180 000 იურისტიდან, წამყვანი იურისტები ჩამოვიყვანოთ მოსამართლეებად, რათა ვთქვათ, რომ აქ გაკეთებული ბიზნესი იგივეა, რაც ჰონგ-კონგში, სინგაპურში, ლონდონში ან ნებისმიერ სხვა განვითარებულ ქალაქში გაკეთებული ბიზნესი. იმიტომ, რომ შენ ხარ ყველაზე დახვეწილ, სამართლებრივ ჩარჩოში და ნებისმიერი დავების გადაწყვეტას შეძლებ ადგილზე, ყოველგვარ ქართულ კანონდებლობაში ჩახედვის გარეშე, რომელიც ძალიან დასახვეწია და ბევრი პრობლემა აქვს“,-განაცხადა მამუკა ხაზარაძემ.

ეკონომიკისა და მდგრადი განვითარების მინისტრმა, გიორგი ქობულიამ ქუთაისში დასავლეთ საქართველოს რეგიონული ბიზნესფორუმის მუშაობაში მიიღო მონაწილეობა, რომელსაც მინისტრთან ერთად საქართველოში ევროკომისიის წარმომადგენლობის პროექტების განყოფილების უფროსი ვინსენტ რეი, ეკონომიკისა და მდგრადი განვითარების მინისტრის მოადგილე გენადი არველაძე და სავაჭრო-სამრეწველო პალატის პრეზიდენტი ნინო ჩიქოვანი ესწრებოდნენ.

 

ეკონომიკისა და მდგრადი განვითარების სამინისტროს პრესსამსახურის ინფორმაციით, ღონისძიებაში, რომელიც საქართველოს სავაჭრო-სამრეწველო პალატის ორგანიზებით იმერეთის განახლებულ რეგიონულ ოფისში ჩატარდა, დასავლეთ საქართველოს რეგიონებიდან 200-მდე მეწარმე მონაწილეობდა. მათ საშუალება ჰქონდათ, მოესმინათ ეკონომიკის მინისტრის ხედვები ქვეყანაში მიმდინარე ეკონომიკური პროცესების, DCFTA-ის მიმდინარეობის, ასევე მცირე და საშუალო ბიზნესის განვითარების პერსპექტივების შესახებ.

 

ფორუმზე სიტყვით გამოსვლისას მინისტრმა რამდენიმე მნიშვნელოვან მიმართულებაზე გაამახვილა ყურადღება, მათ შორის ვრცლად ისაუბრა ექსპორტის წახალისების, საკრედიტო-საგარანტიო მექანიზმისა და პროფესიული გადამზადების მასშტაბურ პროგრამაზე, რომელიც საქართველოს რეგიონებში არსებული პროფესიული სასწავლებლების ბაზაზე განხორციელდება.

 

„ჩვენი ეკონომიკის განვითარების ერთ-ერთი ძირითადი დაბრკოლება არის ის, რომ ქვეყანაში არ არის საკმარისი კვალიფიციური მუშახელი. ეს არ ეხება უმაღლეს განათლებას - ვსაუბრობთ საბაზისო პროფესიების ათვისებაზე. იმ ადამიანებს, რომლებსაც სურთ მუშაობა, უნდა დავეხმაროთ, მოძებნონ შესაფერისი სამუშაო და მივცეთ შესაძლებლობა, მიიღონ ტექნიკური და პროფესიული განათლება“, - აღნიშნა მინისტრმა ფორუმზე სიტყვით გამოსვლისას.

 

როგორც გიორგი ქობულიამ განმარტა, პრაქტიკულად უკვე შესრულების ფაზაშია ძალიან დიდი პროგრამა, სადაც სახელმწიფო უფასოდ გადაამზადებს პროფესიულ კადრებს.

 

„ასეთი საგანმანათლებლო კურსები და ტრენინგები დიდი რაოდენობით ჩატარდება საქართველოს რეგიონებში, მათ შორის იმერეთშიც და მოგიწოდებთ ყველას, მაქსიმალურად გაავრცელოთ ინფორმაცია ამ პროგრამის შესახებ. ჩვენ გვსურს, რომ ხალხი მოვიზიდოთ, მივცეთ მათ პროფესიული განათლება და დავეხმაროთ სამუშაოს მოძიებაში. იმისთვის, რომ მივაღწიოთ ამ ერთ-ერთ უმნიშვნელოვანეს მიზანს და შევქმნათ სამუშაო ადგილები, გვჭირდება კვალიფიციური მუშახელი და მთავრობას გვაქვს აღებული ვალდებულება, რომ შექმნათ ეს კვალიფიკაცია ჩვენს ქვეყანაში“, - განუცხადა მეწარმეებს გიორგი ქობულიამ.

 

ეკონომიკისა და მდგრადი განვითარების მინისტრმა განსაკუთრებული მადლობა გადაუხადა ფორუმის თანაორგანიზატორებს - ევროკავშირისა და გერმანიის საერთაშორისო თანამშრომლობის საზოგადოების პროექტს „მცირე და საშუალო მეწარმეობის განვითარება და DCFTA საქართველოში“ და მიუნხენისა და ზემო ბავარიის სავაჭრო-სამრეწველო პალატის აკადემიას.

მზად ვართ დიალოგის რეჟიმში განვაგრძოთ ამ სიტუაციიდან ეროვნულ ბანკთან ერთად გამოსავლის ძიება, რომ ავიცილოთ თავიდან პოტენციური ნეგატიური ზეგავლენა ქვეყნის საინვესტიციო გარემოზე და ქვეყნის ეკონომიკაზე, - ამის შესახებ „თიბისი ბანკის“ სამეთვალყურეო საბჭოს თავმჯდომარემ, მამუკა ხაზარაძემ სპეციალურად გამართულ პრესკონფერენციაზე განაცხადა.

 

როგორც მამუკა ხაზარაძემ აღნიშნა, „თიბისი ბანკმა“ სასამართლოში გაასაჩივრა 11 წლის წინანდელ საქმეზე გამოტანილი რეგულატორის ყველა გადაწყვეტილება და ელოდებიან მართლმსაჯულებას.

 

„ჩვენ დღეს შევიკრიბეთ, რომ საზოგადოებას, პარტნიორებს, აქციონერებს, თანამშრომლებს და ყველა დაინტერესებულ მხარეს გაცნობოთ, რომ ვართ ძლიერი ფინანსური ინსტიტუტი, ძლიერი ერთიანი გუნდი და ერთად ვდგავართ ამბიციური მიზნების მისაღწევად. პირველ რიგში მინდა ხაზგასმით ვთქვა, რომ პატივს ვცემთ სახელმწიფო ინსტიტუტებს და კანონს. თიბისის დაარსების დღიდან ჩვენს მთავარ ღირებულებას წარმოადგენს გამჭვირვალობა, პატიოსნება და კანონმორჩილება. როგორც თქვენთვის ცნობილია, „თიბისი ბანკმა“ სასამართლოში გაასაჩივრა 11 წლის წინანდელ საქმეზე გამოტანილი რეგულატორის ყველა გადაწყვეტილება, ველოდებით მართლმსაჯულებას. მიუხედავად ამისა, ჩვენ მზად ვართ დიალოგის რეჟიმში განვაგრძოთ ამ სიტუაციიდან ეროვნულ ბანკთან ერთად გამოსავლის ძიება, რომ ავიცილოთ თავიდან პოტენციური ნეგატიური ზეგავლენა ქვეყნის საინვესტიციო გარემოზე და ქვეყნის ეკონომიკაზე“, - განაცხადა მამუკა ხაზარაძემ.

 

ეროვნული ბანკი "თიბისი ბანკისგან" სამეთვალყურეო საბჭოს თავმჯდომარისა და თავმჯდომარის მოადგილის მიერ საბჭოს წევრობის დატოვებას ითხოვს. რეგულატორის მოთხოვნა უკავშირდება 2007-2008 წელს შესრულებულ კონკრეტულ ტრანზაქციებს, რომლებიც ეროვნული ბანკის მიერ კლასიფიცირდება როგორც ინტერესთა კონფლიქტის მარეგულირებელი კანონმდებლობის დარღვევა.

 

შეგახსენებთ, რომ საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე.

 

როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.

რამდენიმე არასამთავრობო ორგანიზაცია „თიბისი ბანკის“ გარშემო განვითარებული მოვლენების შესახებ ერთობლივ განცხადებას ავრცელებს.

 

როგორც ორგანიზაციების მიერ გავრცელებულ განცხადებაშია აღნიშნული, სს „თიბისი ბანკის“ გარშემო განვითარებული მოვლენები ბევრ კითხვას აჩენს. „გლობალპრესი“ განცხადებას უცვლელად გთავაზობთ.

 

„ხელმომწერი ორგანიზაციები ვეხმაურებით ბოლო პერიოდში, სს „თიბისი ბანკის“ გარშემო მიმდინარე მოვლენებს. საჯაროდ ხელმისაწვდომი ინფორმაციიდან გამომდინარე, მიგვაჩნია, რომ კერძო საკუთრების, განსაკუთრებით წარმატებული ფინანსური ორგანიზაციის წინააღმდეგ მიღებული ნაჩქარევი გადაწყვეტილებები კითხვის ნიშნებს აჩენს, რაც თავის მხრივ, საფრთხეს უქმნის ქვეყნის ეკონომიკურ განვითარებასა და ფინანსურ სტაბილურობას.

 

მაღალი საზოგადოებრივი ინტერესის გამო, მნიშვნელოვანია, საქართველოს ეროვნულმა ბანკმა განმარტოს მიღებული გადაწყვეტილება სს „თიბისი ბანკის“ სამეთვალყურეო საბჭოდან კონკრეტული პირების გაწვევის თაობაზე. ამადროულად, შესაბამისმა სამართალდამცავმა უწყებებმა საზოგადოებას მიაწოდონ ინფორმაცია სს „თიბისი ბანკის“ ან/და მისი აქციონერების წინააღმდეგ მიმდინარე გამოძიების შესახებ. ვფიქრობთ, მნიშვნელოვანია, პროცესი წარიმართოს ისე, რომ არ შეფერხდეს სს „თიბისი ბანკის“ საქმიანობა და სხვა, მნიშვნელოვანი პროექტების განხორციელება. ამავდროულად, პასუხის გაეცეს საზოგადოებაში არსებულ კითხვებს, რათა გამოირიცხოს ყოველგვარი ეჭვი შერჩევითი მართლმსაჯულების გამოყენების თაობაზე. სხვადასხვა სახელმწიფო ინსტიტუტის ერთობლივი ქმედებები კონკრეტული ფინანსური დაწესებულების წინააღმდეგ, სწორედ ამგვარ შთაბეჭდილებას ქმნის“,- ნათქვამია განცხადებაში, რომელსაც ხელს აწერენ ღია საზოგადოების ფონდი (OSGF), საქართველოს დემოკრატიული ინიციატივა (GDI), ინფორმაციის თავისუფლების განვითარების ინსტიტუტი (IDFI), სამართლიანი არჩევნები (ISFED) და საერთაშორისო გამჭვირვალობა საქართველო (TI).

„ჩემი შეფასებით, აქ არის ძალიან დიდი სამართლებრივი კომპონენტი. მე იმედი მაქვს, რომ ჩვენი სამართალდამცავი უწყებები, პროკურატურა დეტალურად გაერკვევიან ამ საკითხში. ეს არის მათი პრეროგატივა, - ამის შესახებ ეკონომიკისა და მდგრადი განვითარების მინისტრმა გიორგი ქობულიამ „თიბისი ბანკთან“ დაკავშირებით განაცხადა, როდესაც უპასუხა კითხვას, ხომ არ შეასრულა ეროვნულმა ბანკმა ბიძინა ივანიშვილის დაკვეთა, როდესაც „თიბისი ბანკისგან“ სამეთვალყურეო საბჭოს თავმჯდომარისა და თავმჯდომარის მოადგილის მიერ საბჭოს წევრობის დატოვება მოითხოვა.

 

„ბრალდებები, რაც გაჟღერდა, არის სერიოზული. ამაში გარკვევა არის საჭირო და ამას ჩვენ ვერანაირად ვერ დავაბრალებთ მთლიანად პოლიტიკურ პროცესს. დღესდღეობით არ მაქვს შთაბეჭდილება, რომ ეს კონკრეტული შემთხვევა არის ბიზნესზე ზეწოლა, იმიტომ, რომ აქ არის საკმაოდ სერიოზული ბრალდებები, რომელსაც აქვს განსაზღვრული ფაქტობრივი მტკიცებულებები. ამიტომ, ამ საკითხში უნდა გაერკვნენ კომპეტენტური ორგანოები“, - განაცხადა გიორგი ქობულიამ.

 

ეროვნული ბანკი „თიბისი ბანკისგან“ სამეთვალყურეო საბჭოს თავმჯდომარისა და თავმჯდომარის მოადგილის მიერ საბჭოს წევრობის დატოვებას ითხოვს. მათივე ინფორმაციით, რეგულატორის მოთხოვნა უკავშირდება 2007-2008 წელს შესრულებულ კონკრეტულ ტრანზაქციებს, რომლებიც ეროვნული ბანკის მიერ კლასიფიცირდება როგორც ინტერესთა კონფლიქტის მარეგულირებელი კანონმდებლობის დარღვევა.

 

თავის მხრივ, „თიბისი ბანკის“ სამეთვალყურეო საბჭოს თავმჯდომარის, მამუკა ხაზარაძის ადვოკატი ზვიად კორძაძე საქართველოს ეროვნული ბანკის მოთხოვნას, რომლის მიხედვითაც სებ-ი ბანკის სამეთვალყურეო საბჭოდან მამუკა ხაზარაძისა და ბადრი ჯაფარიძის გადადგომას ითხოვს, სასამართლოში გაასაჩივრებს.

 

შეგახსენებთ, რომ საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე. როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.

საერთაშორისო სავაჭრო პალატის ეროვნული კომიტეტის თავმჯდომარის ფადი ასლის განცხადებით, ანაკლიის პორტთან დაკავშირებით ორი სცენარი არსებობს.

 

„ჩვენი ინფორმაციის მიხედვით, პირველი სცენარი მოიცავს ანაკლიის პორტის სრულად შეჩერებას, ვინაიდან ეს არის პროექტი, რომელიც რუსეთის ინტერესებთან წინააღმდეგობაში მოდის. ეს პროექტი უფრო აახლოვებს აფხაზეთსა და საქართველოს. მეორე სცენარის მიხედვით, ივანიშვილი შეეცდება დააშინოს ანაკლიის პორტის პოტენციური პარტნიორები - ჯაფარიძისა და ხაზარაძის რეპუტაციის დაზიანებისა და ფულის გათეთრებაში მძიმე ბრალდებების წაყენების გზით. მოგეხსენებათ, საინვესტიციო ჯგუფები სწავლობენ თუ ვინ არიან მათი პარტნიორები. ივანიშვილის თამაშის მიზანია ბანკის აქციონერების რეპუტაციის შელახვა, პროექტის დაფინანსების შეწყვეტა“,- განაცხადა მან. ფადი

 

ასლიმ ასევე ისაუბრა ეროვნულ ბანკზე და აღნიშნა, რომ ეროვნული ბანკის ქმედებები „თიბისი ბანკთან“ მიმართებაში არაკანონიერია.

 

„ჩვენი წყაროებიდან მიღებული ინფორმაციით ვიცით, რომ ეროვნული ბანკის თავმჯდომარე ზეწოლის ქვეშ იყო. ჩვენ კონსულტაციები გავიარეთ იურისტებთან და ეროვნული ბანკის აღნიშნული მოთხოვნა „თიბისი ბანკთან“ მიმართებაში არაკანონიერია. ეროვნულმა ბანკმა კიდევ ერთი არაკანონიერი ქმედება ჩაიდინა. მათ გამოიძიეს საქმე, რომელიც ეროვნული ბანკის წინა ადმინისტრაციის მიერ იყო გამოძიებული, ხოლო კანონის თანახმად, არ შეიძლება იმ საქმის გამოძიება, რომელიც უკვე გამოძიებული იყო. ეროვნული ბანკის თავმჯდომარეს მოვუწოდებთ არ დანებდეს ამ ზეწოლას, რათა შეინარჩუნოს ეროვნული ბანკის დამოუკიდებლობა. თუმცა, თუ ზეწოლა დიდია და ვერ უძლებს მას, მაშინ რეპუტაციის შენარჩუნების მიზნით გადადგომას ვურჩევთ. სხვაგვარად, მისი რეპუტაცია სამუდამოდ შელახული იქნება, რაც გავლენას მოახდენს მის სამომავლო პროფესიულ ცხოვრებაზე“, - დასძინა ფადი ასლიმ.

ჟურნალი „ეკონომისტი“ ანაკლიის ღრმაწყლოვან პორტზე შარლ მაგნის სტატიას აქვეყნებს. სტატია „გლობალპრესს“ „ანაკლიის განვითარების კონსორციუმმა“ მიაწოდა.

 

„ახლა ანაკლიაში სეზონი არ არის. სწრაფი კვების პატარა დახლები უქმად დგას, სასტუმროები ცარიელია, პალმის ხეებს თებერვლის სუსტი ნიავი არხევს. საქონელი მანდარინისა და თხილის ბაღებს შორის მინდვრებში ძოვს. მაგრამ საქართველოს ამ მთვლემარე კურორტის შემოგარენში უცნაური სურათი იშლება. ზღვის ფსკერიდან შავი ქვიშა ამოუღიათ, 80 ჰექტარზე რვა მეტრის სიმაღლის პლატო გაუკეთებიათ და ჭაობიანი მიწიდან წყალს 2,500-კილომეტრიანი მილებით ტუმბავენ, რაც ღრმაწყლოვანი პორტის მშენებლობის პირველი ეტაპია. საკმარისია, ამ ადგილზე დადგე და სხვადასხვა მიმართულებით გაიხედო, რომ მისი მდებარეობის უდიდეს მნიშვნელობას მიხვდე. სანაპირო ზოლზე ჩრდილოეთით აფხაზეთია, საქართველოს სეპარატისტული რეგიონი, რომელსაც რუსეთი უჭერს მხარს, შემდეგ რუსეთი, შემდეგ კი ომის ცეცხლში გახვეული უკრაინა. თუ პირდაპირ გაიხედავ, შენ წინ შავი ზღვა იშლება, ჰორიზონტს მიღმა კი ევროკავშირია.

 

„საქართველოსთვის გეოგრაფიული მდებარეობა ერთდროულად კურთხევაცაა და წყევლაც“, - ამბობს სალომე ზურაბიშვილი, ქვეყნის ახალი პრეზიდენტი. კურთხევა, რადგან ის ევროპასა და აზიას შორის აბრეშუმის გზის გზაჯვარედინია. წყევლა, რადგან ის მუდამ ძლევამოსილი იმპერიების სამიზნეს წარმოადგენდა: სამხრეთიდან - სპარსეთის, თურქეთისა და არაბეთის, ხოლო ჩრდილოეთიდან - მონღოლეთისა და რუსეთის. მოსკოვი საქართველოს თითქმის მთელი მეცხრამეტე და მეოცე საუკუნე მართავდა, 2008 წელს კი მის საზღვრებში შემოიჭრა. ის დღემდე აკონტროლებს აფხაზეთსა და სამხრეთ ოსეთს, რომელიც, აფხაზეთის მსგავსად, საქართველოს სეპარატისტული რეგიონია. რუსეთმა საქართველო გააფრთხილა, რომ იმ შემთხვევაში, თუ ის ნატოში გაწევრიანებას შეეცდება, არ უნდა დაავიწყდეს ეს „საშინელი კონფლიქტი“. თუმცა, ქართველებს არა მხოლოდ ნატოში, არამედ ევროკავშირში გაერთიანების სურვილიც აქვთ. „ჩვენ საკუთარ თავს ევროპელებად მივიჩნევთ, ალბათ, ევროპელებზე უფრო მეტადაც“, - ხუმრობს ქალბატონი სალომე ზურაბიშვილი.

 

უნდა ითქვას, რომ ბრიუსელში, ბერლინსა და პარიზში ლიდერები რომელიმე ზემოხსენებულ კავშირში საქართველოს გაწევრიანებას ჯერჯერობით ნაკლებად სარწმუნოდ მიიჩნევენ, მიუხედავად იმისა, რომ საქართველო ისეთ მნიშვნელოვან კომპონენტში, როგორიცაა გამჭვირვალობა, ევროკავშირის ზოგიერთ ქვეყნებს უსწრებს. მაგრამ საქართველო შავი ზღვის „არასწორ“ (აღმოსავლეთ) სანაპიროზე მდებარეობს და რუსეთის ერთ-ერთ მეზობლად განიხილება. ანაკლიის პორტის მშენებლობა მიზნად ისახავს ქვეყნის ამგვარად აღქმის ცვლილებას და შედეგად, შავი ზღვის შემცირებას, რაც დასავლეთ ევროპას საქართველოზე ზრუნვის დამატებით საფუძველს მისცემს.

 

როგორ? დღეს ჩინეთსა და ევროპას შორის სამი სახმელეთო კორიდორი არსებობს: სამხრეთის - ირანის გავლით, რომელიც ერთობ არაპრაქტიკულია ამერიკის სანქციების გამო; შუა - ჯერ კასპიის ზღვის და შემდეგ საქართველოს გავლით შავი ზღვისკენ, რაც, ასევე, არაპრაქტიკულია, რადგან საქართველოში თანამედროვე ღრმაწყლოვანი პორტი არ არსებობს; და ჩრდილოეთის - რუსეთის გავლით, რომელზეც დღევანდელი სახმელეთო სავაჭრო საქმიანობის მეტი წილი ხორციელდება. ანაკლია ნამდვილად შეცვლის არსებულ ვითარებას, რადგან ის შუა კორიდორის ღრმაწყლოვან პორტს აშენებს, რომელიც სასიცოცხლოდ აუცილებელია ვაჭრობის გასაფართოებლად.

 

ანაკლიის პორტის მშენებლობის პირველი ფაზის ფარგლებში აშენდება ორი ნავსადგომი საკონტეინერო ტვირთის მისაღებად, და ერთიც ისეთი დიდი მოცულობის ნაყარი ტვირთისთვის, როგორიცაა, მაგალითად, სასუქი. ამას დამატებული, ევროკავშირის მიერ დაფინანსებული სამანქანო და სარკინიგზო გზა, რომლის მშენებლობა 2021 წლისთვის უნდა დასრულდეს. ასევე, აზიის ინფრასტრუქტურის საინვესტიციო ბანკის (ჩინეთის მხარდაჭერით), ქართული კონსორციუმისა და ევროპელი და ამერიკელი ინვესტორების დაფინანსებით, პორტის სიმძლავრე მილიონი TEU წელიწადში, მიაღწევს, რაც დაახლოებით ორჯერ აღემატება დღეს საქართველოში არსებული ყველა პორტის სიმძლავრეს (1 TEU უდრის ერთ საშუალო კონტეინერს). გრძელვადიანი გეგმა ითვალისწინებს ტვირთბრუნვის გაფართოებას, რაც ოთხი დეკადის განმავლობაში 5 მილიონ TEU-ს შეადგენს და ანაკლიას შავი ზღვის სანაპიროზე ყველაზე დიდ პორტად აქცევს. ანაკლიის პორტს საშუალება ექნება, მიიღოს 10,000-TEU გემი, რაც ბოსფორის სრუტეში გამავალი გემების მაქსიმალური რაოდენობაა. საქართველოში არსებული პორტების სიმძლავრე ლიმიტირებულია და ანაკლიის გამტარუნარიანობის დაახლოებით მეათედს შეადგენს. ამჟამად ტვირთი მცირე გემებზე იტვირთება და სტამბულში იგზავნება, სადაც მას უფრო დიდ გემებზე ტვირთავენ და ხმელთაშუა ზღვაზე გააქვთ. ანაკლია დიდ გემებს პირდაპირ საქართველოდან გამგზავრებისა და აღნიშნულ მარშრუტზე ტვირთბრუნვის მკვეთრად გაზრდის საშუალებას მისცემს. ანაკლიის კონსორციუმი, საქართველოს მთავრობა და ევროპელი პარტნიორები აცხადებენ, რომ ეს ფაქტორი საქართველოს დასავლეთისთვის უფრო მისაღებ პარტნიორად აქცევს, გაიზრდება მიმოსვლა ზღვის საშუალებით და (მოსალოდნელია) რუსეთის მომავალი ინტერვენციის დიპლომატიური ფასის ზრდაც. „კარგად ვიცით, რომ ევროკავშირი არ არის მზად ჩვენი გაწევრიანებისთვის, - ამბობს ნატალი საბანაძე, საქართველოს ელჩი ბრიუსელში, - მაგრამ ჩვენ გვსურს, მოვემზადოთ იმ დროისთვის, როდესაც ისინი ამისთვის მზად იქნებიან“.

 

არსებობს კიდევ ერთი განზომილებაც. ანაკლიიდან ხუთი წუთის სავალზე ქართველი ჯარისკაცები სათვალთვალო კოშკურებიდან აფხაზეთის დემარკაციის ხაზსმიღმა იყურებიან. მდინარე ენგურის მეორე ნაპირზე, ამაღლებულ ადგილას აფხაზეთის მხარის სათვალთვალო კოშკურებია განთავსებული. მათ შორის კი, აფხაზეთის ეთნიკურად ქართველი მოსახლეობა ყოველდღე ჭრის საფეხმავლო ხიდს და გადმოდის საქართველოს კონტროლირებად მხარეს, რომელიც სავსეა ტაქსებითა და მაღაზიებით. ისინი თავის კუთვნილ პენსიას იღებენ, წამალს ყიდულობენ და ბავშვები სკოლაში დაჰყავთ. როგორც ქართველი ოფიციალური პირები იმედოვნებენ, სამუშაო ადგილები და გაუმჯობესებული ეკონომიკური სიტუაცია, რომელსაც ანაკლიის პორტის მშენებლობა მოიტანს, აუცილებლად გაზრდის ზეწოლას აფხაზ და რუს ოფიციალურ პირებზე მოსახლეობისთვის გადაადგილების გაადვილების მიზნით - წინა თვეში მათ „საზღვარი“ 26 დღით ჩაკეტეს - და შესაძლოა, საბოლოოდ პროცესი მოლაპარაკებებისკენ დაიძრას.

 

ახალი აბრეშუმის გზა - ამგვარი ამბიციური პროექტის განხორციელება ასეთ არამდგრად რეგიონში ადვილი არ არის. ანაკლიის მშენებლობა 2016 წელს უნდა დაწყებულიყო, მაგრამ დაფინანსება შეფერხდა და პროცესები ხელისუფლების ცვლილებამაც შეანელა. რუსი ჟურნალისტების აზრით, პორტმა შესაძლოა, ნატოს საიდუმლო საზღვაო ბაზის როლი შეასრულოს. ახლა კი, თიბისი ბანკი, პროექტის ერთ-ერთი დიდი დამფინანსებელი, ფულის გათეთრების ბრალდებით, გამოძიების ინტერესის საგანი გახდა, (თიბისი ბრალდებას უარყოფს.) კონსორციუმის თანამშრომლები კი საბოტაჟის მცდელობაზე საუბრობენ, თუმცა აღნიშნავენ, რომ პორტის მშენებლობისთვის საჭირო თანხა - 600 მილიონი დოლარი მოძიებულია და სამშენებლო სამუშაოები უკვე მიმდინარეობს“, - ნათქვამია სტატიაში.

 

სტატიის ავტორი შარლ მაგნი ჟურნალი „ეკონომისტი“

„თიბისი ბანკის“ აქციონერებს უნდა ჰქონდეთ საშუალება, რომ შეკითხვებს გასცენ შესაბამისი პასუხები, - ამის შესახებ ბიზნესომბუდსმენმა ირაკლი ლექვინაძემ „თიბისი ბანკის“ ირგვლივ მიმდინარე პროცესებზე საუბრისას განაცხადა.

 

ირაკლი ლექვინაძე მიიჩნევს, რომ იმ ვითარებაში, როდესაც არსებობს შეკითხვები, ბანკის ხელმძღვანელი პირების ბანკიდან განცალკევება გამართლებული ნაბიჯია.

 

„ბანკის აქციონერების მიმართ ბუნებრივია შეკითხვები შეიძლება არსებობდეს. ბუნებრივია ბანკის აქციონერებს უნდა ჰქონდეთ საშუალება რომ ამ შეკითხვებს გასცენ შესაბამისი პასუხები.

 

როდესაც მიმდინარეობს პროცესი და ეს შეიძლება გრძელვადიან პერიოდში იქცეს უფრო მეტ დამაზიანებელ ფაქტორად, ასეთ შემთხვევაში განრიდება და განცალკევება ბანკის ხელმძღვანელი პირების და იმ პირების ვის მიმართაც არის შეკითხვები, შეიძლება იყოს გარკვეულწილად ახსნილი ამ მიმართულებით“, - განაცხადა ირაკლი ლექვინაძემ.

 

ეროვნული ბანკი „თიბისი ბანკისგან“ სამეთვალყურეო საბჭოს თავმჯდომარისა და თავმჯდომარის მოადგილის მიერ საბჭოს წევრობის დატოვებას ითხოვს. მათივე ინფორმაციით, რეგულატორის მოთხოვნა უკავშირდება 2007-2008 წელს შესრულებულ კონკრეტულ ტრანზაქციებს, რომლებიც ეროვნული ბანკის მიერ კლასიფიცირდება როგორც ინტერესთა კონფლიქტის მარეგულირებელი კანონმდებლობის დარღვევა.

 

თავის მხრივ, „თიბისი ბანკის“ სამეთვალყურეო საბჭოს თავმჯდომარის, მამუკა ხაზარაძის ადვოკატი ზვიად კორძაძე საქართველოს ეროვნული ბანკის მოთხოვნას, რომლის მიხედვითაც სებ-ი ბანკის სამეთვალყურეო საბჭოდან მამუკა ხაზარაძისა და ბადრი ჯაფარიძის გადადგომას ითხოვს, სასამართლოში გაასაჩივრებს.

 

შეგახსენებთ, რომ საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე. როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.

საერთაშორისო სავაჭრო პალატის ეროვნული კომიტეტის თავმჯდომარის ფადი ასლის განცხადებით, „ივანიშვილს სურს დაეუფლოს „თიბისი ბანკს“ და ანაკლიის პორტს, ბანკის სამეთვალყურეო საბჭოს თავმჯდომარისა და მისი მოადგილის თავიდან მოშორებით.

 

როგორც მან დღეს გამართულ პრესკონფერენციაზე განაცხადა, ბიძინა ივანიშვილი ამ ყველაფრისთვის ეროვნულ ბანკს იყენებს.

 

„ჩვენი ინფორმაციით, ბიძინა ივანიშვილის საბოლოო მიზანია დაეხმაროს სანქციების ქვეშ მყოფ რუსულ კომპანიებს, რათა მათ „თიბისი ბანკის“ და საქართველოში დაფუძნებული ყალბი კომპანიების საშუალებით, სანქციების გვერდის ავლა შეძლონ. არავინაა სულელი. მსოფლიოს მასშტაბით ყველა ხვდება თუ რა არის მისი საბოლოო მიზანი „თიბისი ბანკთან“ მიმართებაში. ახლო მომავალში უნდა ველოდოთ ხაზარაძის და ჯაფარიძის მოშორების მცდელობას. თუ ამ პირველ ეტაპს წარმატებით განახორციელებს, შემდგომში უნდა ველოდოთ ბანკის მენეჯმენტის შეცვლას. ჩანაცვლება მოხდება ისეთი მენეჯმენტით, რომელიც ივანიშვილის ბრძანებებს შეასრულებს. ეს შემაშფოთებელია, ვინაიდან ეს საქართველოში ერთ-ერთ უმსხვილეს ბანკს მოაქცევს დაკვირვების ქვეშ უცხოეთიდან და ეს საქართველოს თავისი რეპუტაციის ფასად დაუჯდება. ეს ძალიან სახიფათო თამაშია“, - განაცხადა ფადი ასლიმ.

მაშინ, როცა ზუსტი დეტალები ჩვენთვის უცნობია, მიგვაჩნია, რომ ეროვნული ბანკი, როგორც საქართველოს საფინანსო სისტემის ზედამხედველი, თავის საქმეს აკეთებს, თავისი პასუხისმგებლობების გათვალისწინებით, - ამის შესახებ საერთაშორისო სავალუტო ფონდის მუდმივმა წარმომადგენელმა საქართველოში ფრანსუა პეშომ განაცხადა, რითაც „თიბისი ბანკთან“ დაკავშირებულ საკითხს გამოეხმაურა.

 

მისივე თქმით, „ღონისძიების არგატარება მაშინ, როდესაც არსებობს ამ ღონისძიების გატარების იურიდიული საფუძველი, დააზიანებდა ეროვნული ბანკის, როგორც საფინანსო სექტორის ეფექტიანი ზედამხედველის მიმართ სანდოობას და საფინანსო სექტორის ზედამხედველობის პრაქტიკას“.

 

„და ბოლოს, აღვნიშნავ, რომ „თიბისი ბანკი“ არის ფინანსურად ძლიერი და კაპიტალით კარგად უზრუნველყოფილი. რამდენადაც ვიცით, ამჟამად ბანკის ფინანსურ მაჩვენებლებთან და სტაბილურობასთან დაკავშირებით არანაირი კითხვა არ არსებობს“, - განაცხადა ფრანსუა პეშომ.

 

 

შს მინისტრის თქმით, მას მამუკა ხაზარაძესთან ბიძინა ივანიშვილის დავალებით არანაირი საუბარი არ ჰქონია, - ამის შესახებ გიორგი გახარიამ იმ კითხვის საპასუხოდ განაცხადა, ჰქონდა თუ არა მას საუბარი "თიბისი ბანკის" საქმეზე ხაზარაძესთან და სთხოვა თუ არა მას წილების დათმობა.

 

"არ მქონია ასეთი საუბარი. მეორე - ჩვენ ახლა ვსაუბრობთ მარეგულირებლის ფინანსური რეგულაციების ფარგლებში მიღებულ გადაწვეტილებაზე. ამ გადაწყვეტილებაზე მე კომენტარს არ და ვერ გავაკეთებ", - აღნიშნა გახარიამ.

 

ამასთან, გახარია აცხადებს, რომ „თიბისი ბანკის“ მნიშვნელობა ეროვნულ ბანკს კარგად ესმის.

 

"ეს გახლავთ მარეგულირებლის მიერ ფინანსური ბაზრის რეგულაციის ფარგლებში მიღებული გადაწყვეტილება და ამაზე კომენტარს ვერ გავაკეთებ. თუ მეკითხებით, როგორც ყოფილ ბიზნესომბუდსმენს, რა თქმა უნდა, გიპასუხებთ, რომ "თიბისი ბანკი" არის სისტემური ბანკი ქვეყნისთვის. დარწმუნებული ვარ, რომ ეს ყველაზე კარგად ესმის ეროვნულ ბანკს და მარეგულირებელს. არ არსებობს ქვეყანაში ინსტიტუცია, რომელსაც უკეთ ესმოდეს „თიბისი ბანკის“ სისტემის მნიშვნელობა, ვიდრე ეს არის რეგულატორი, ამიტომ აქ ვერანაირი კითხვის ნიშნები ვერ იქნება, მითუმეტეს ჩემი მხრიდან",- განაცხადა გახარიამ.

 

გახარიას მიერ მამუკა ხაზარაძესთან "თიბისი ბანკის" წილების დათმობაზე მოლაპარაკებების გამართვის შესახებ ინფორმაციას "რუსთავი 2" ავრცელებს.

არქივი

« « » » November 2019
Mon Tue Wed Thu Fri Sat Sun
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?