Global Press

English

Global PressGlobal PressGlobal PressGlobal Press

USD
2.7798
EUR
3.1442
RUR
0.0441
GBP
3.522

აქციის მონაწილეები თბილისის ქუჩებში აღარ იმყოფებიან. მათი ნაწილი სამართალდამცველებმა დააკავეს, ნაწილი კი - გაიქცა.

 

მანამდე აქციის მონაწილეები რამდენიმე ქუჩაზე იმყოფებოდნენ, კერძოდ, მელიქიშვილის გამზირზე, კოსტავას გამზირზე, ვარაზისხევში და მიმდებარე ქუჩებზე.

 

საავტომობილო მოძრაობა ამ წუთებში ყველა ქუჩაზე აღდგენილია.

 

შეგახსენებთ, რომ რუსთაველის გამზირზე, მოქალაქეები რუსი დეპუტატის საქართველოში ჩამოსვლას და სერგეი გავრილოვის მიერ, პარლამენტის თავმჯდომარის სავარძლის დაკავებას აპროტესტებდნენ. პარლამენტის წინ სიტუაცია 20 ივნისს დაახლოებით 22:00 საათზე დაიძაბა, მას შემდეგ, რაც დემონსტრანტები პარლამენტის შენობის შესასვლელისკენ დაიძრნენ. სიტუაციის დაძაბვის შემდეგ პარლამენტში მივიდნენ პრემიერ-მინისტრი, შინაგან საქმეთა მინისტრი და „ქართული ოცნების“ ლიდერები. აქციის მონაწილეების დასაშლელად გამოყვანილ იქნა სპეცრაზმი. მათ აქციის მონაწილეების მისამართით ცრემლსადენი გაზი, რეზინის ტყვიები და წყლის ჭავლი გამოიყენეს. მომხდარის შედეგად დაშავებულები თბილისის სხვადასხვა კლინიკებში გადაიყვანეს. მათ სხეულის სხვადასხვა არეში დაზიანებები აღენიშნებათ, მათ შორის რამდენიმემ თვალი დაკარგა.

რუსთაველის გამზირზე სამართალდამცველებმა საპროტესტო აქცია თითქმის სრულად დაშალეს. დემონსტრანტების მცირე ნაწილმა ცოტა ხნით გმირთა მოედანზე გადაინაცვლა, შემდეგ კი უნივერსიტეტისკენ გაემართა.

 

ამ დროისთვის პარლამენტის შენობის წინ მხოლოდ სპეციალური დანიშნულების რაზმი იმყოფება, რომელიც ნელ-ნელა ტოვებს ტერიტორიას. პარლამენტის შენობის წინ და ფილარმონიასთან მხოლოდ პოლიციელები იმყოფებიან.

ქუთათელ-გაენათელი მიტროპოლიტი მეუფე კალისტრატე,   კლინიკაში გარდაიცვალა.  მეუფე ქუთაისის ინტერვენციული მედიცინის ცენტრში უგონო მდგომარეობაში იმყოფებოდა. ის 10 დღეზე მეტი რეანიმაციულ განყოფილებაში მკურნალობდა.

 

ქუთათელ-გაენათელი მიტროპოლიტი, მეუფე კალისტრატე (მარგალიტაშვილი) 1938 წლის 20 ოქტომბერს, თელავის მუნიციპალიტეტის სოფელ ვარდისუბანში დაიბადა. 1982 წლიდან ბეთანიის მონასტრის მორჩილია. ამავე წელს აღიკვეცა ბერად. 1983 წლის აპრილიდან დაინიშნა ალავერდის ჯვართამაღლების სახელობის ტაძრის წინამძღვრად, რამოდენიმე თვეში აკურთხეს ეპისკოპოსად.

 

სრულიად საქართველოს კათოლიკოს-პატრიარქის უწმინდესისა და უნეტარესის ილია II-ისა და წმინდა სინოდის გადაწყვეტილებით დაინიშნა ქუთაის-გაენათის ეპარქიის მმართველად.

 

1989 წლის 8 თებერვალს მეუფე კალისტრატე აღყვანილ იქნა მთავარეპისკოპოსის, 1992 წლის 25 დეკემბერს კი - მიტროპოლიტის ხარისხში.

 

მეუფის ცხედარი ბაგრატის ტაძარშია დასვენებული.

გმირთა მოედანთან პოლიციელებსა და დემონსტრანტებს შორის მორიგი შეტაკება მოხდა, დაშავებულია რამდენიმე სამართალდამცველი. ახალგაზრდების ჯგუფმა პოლიციელებს ქვები და ხელკეტები ესროლა, ადგილზე გამოჩნდა სპეცრაზმი.

რუსთაველის გამზირზე საპროტესტო აქციაზე განვითარებული მოვლენების შედეგად დაშავებული 16 ადამიანი რესპუბლიკურ საავადმყოფოშია გადაყვანილი. როგორც "გლობალპრესს" რესპუბლიკურ საავადმყოფოში განუცხადეს, მათთან შეყვანილი პაციენტებიდან 4 გაწერეს. დამატებით კომენტარს კლინიკაში არ აკეთებენ და აცხადებენ, რომ დამატებითი ინფორმაციისთვის ჟურნალისტებმა პრესსამსახურს ხვალ უნდა მიმართონ..

სრულიად საქართველოს კათოლიკოს-პატრიარქი ილია მეორე მართლმადიდებლობის საპარლამენტთაშორისო 26-ე ასამბლეის მონაწილეებს მიმართავს, რომელსაც „გლობალპრესი“ უცვლელად გთავაზობთ.

 

„გულითადად მოგესალმებით მართლმადიდებლობის საპარლამენტთაშორისო 26-ე ასამბლეის მონაწილეთ, მოგესალმებით უფლის დედის,- ყოვლადწმინდა მარიამის წილხვედრი ქვეყნის სახელით, იმ ქვეყნის სახელით, სადაც მაცხოვრის ნებით და ღვთისმშობლის დავალებით ქრისტიანობა ჯერ კიდევ I საუკუნეში იქადაგა წმ. ანდრია პირველწოდებულმა და დაარსა პირველი ეპარქიები და ეკლესია. მან სამჯერ იმოგზაურა საქართველოში მოციქულ მატათასა და სვიმონ კანანელის თანხლებით.

 

მოციქული მატათა ბათუმის ახლოს, გონიოშია, დაკრძალული, სვიმონ კანანელი კი, -აფხაზეთში, კომანში.

 

თქვენ ჩამოხვედით ქვეყანაში, სადაც 1700 წლის წინ, ასევე ღვთისმშობლის დავალებით, მოვიდა კაპადოკიელი ქალწული, წმ. ნინო, რომლის ქადაგებით და ღვთის შეწევნით აღსრულებულ სასწაულთა მადლით მოექცა ჩვენი მეფე-დედოფალი, მთელი ერი და ქრისტიანობა გამოცხადდა სახელმწიფო რელიგიად. ეს IV საუკუნის 30-იან წლებში მოხდა; V საუკუნეში საქართველოს ეკლესია გახდა ავტოკეფალური, XI საუკუნიდან მისი საჭეთმპყრობელი კათოლიკოს-პატრიარქის ტიტულს ატარებს.

 

თქვენ ჩამობრძანდით ქვეყანაში, სადაც ჩვენს სულიერ დედაქალაქ მცხეთაში დაფლულია ძველი და ახალი აღთქმის უდიდესი სიწმინდენი,- კვართი უფლისა ჩვენისა იესო ქრისტესი და ხალენი წმ. ილია წინასწარმეტყველისა, სადაც დაცულია ღვთისმშობლისა და მაცხოვრის ხელთუქმნელი ხატები, ღვთისმშობლის კვართი და მრავალი სხვა სიწმინდე.

 

საქართველომ, კავკასიის ამ პატარა ქრისტიანულმა ოაზისმა, დიდი მსხვერპლის ფასად 2000 წლის მანძილზე შეურყვნელად დაიცვა უცვალებელი სწავლება ეკლესიისა. არაერთი მაგალითი გვაქვს, ათასობით ბერის, მონოზვნის, სასულიერო პირისა და ერისკაცთა თავდადებისა. ჯალალედინის დროს მარტო ერთ დღეს 100 000 მართლმადიდებელს მოკვეთეს თავი, რომელთაც არ შეურაცხყვეს მაცხოვრისა და ღვთისმშობლის ხატები.

 

თუმცა გვქონდა დიდი ჩავარდნის პერიოდიც – ათეისტური რეჟიმის ხანა, როდესაც თითქმის ყველაფერი განადგურდა: ხელნაწერები, ხატები, ტაძრები, საეკლესიო ნივთები; გადაასახლეს, დაარბიეს და დახვრიტეს თითქმის მთელი სასულიერო დასი, რის შედეგადაც 25 000 მოქმედი ეკლესიიდან XX საუკუნის სამოციანი წლებისთვის 48-ღა დარჩა.

 

მადლობა ღმერთს, დღეს სხვა მდგომარეობაა. სიტუაცია რადიკალურად შეიცვალა, მაგრამ პრობლემები, შიდა თუ გარე, მრავლად გვაქვს. ყველაზე მოუშუშებელი და მტკივნეული კი მაინც ის არის, რომ მართალია, საქართველოს ეკლესიის საზღვრები შენარჩუნებულია, მაგრამ ცხინვალის რეგიონსა და აფხაზეთში სახელმწიფო თავის იურისდიქციას დღეს ვერ ანხორციელებს, რადგან ეს ტერიტორია (ქვეყნის 20%) ოკუპირებულია.

 

ძვირფასო სტუმრებო, თქვენც იმ ქვეყნების წარმომადგენლები ბრძანდებით, რომელთა წარსულიც ქრისტესთვის თავდადების მაგალითია, რომელთა კულტურა, აზროვნება და ცხოვრების წესი ქრისტიანობითაა განმსჭვალული. დღეს, მსოფლიო გლობალიზაციის პირობებში, ჩვენ ყველანი და, ზოგადად, კაცობრიობა მრავალი საერთო სერიოზული პრობლემების წინაშე აღმოვჩნდით. ამიტომაც ძალიან მნიშვნელოვანია თქვენი შეფასებების მოსმენა თანამედროვე ტენდენციებზე, თქვენეული ანალიზი გამოწვევების თაობაზე და ხედვა მომავლისა“, - აღნიშნულია პატრიარქის მიმართვაში.

დემონსტრანტების ჯგუფსა და პოლიციელებს შორის ფილარმონიასთან ფიზიკური დაპირისპირება მოხდა. მათ პოლიციის მანქანა მოატრიალეს. აქციის მონაწილეებმა პოლიციელებს ქვები და ხელკეტები ესროლეს.

 

დემონსტრანტები ვარაზისხევიდან რუსთაველისკენ მიდიოდნენ და გზის გადაკეტვას აპირებდნენ, თუმცა პოლიციელებმა მათ გზის გაგრძელების საშუალება არ მისცეს.

რუსთაველის გამზირზე, პარლამენტის შენობასთან დაშავებული პოლიციელები ჯანდაცვის მინისტრმა ეკატერინე ტიკარაძემ და შინაგან საქმეთა მინისტრის მოადგილემ ლევან კაკავამ საავადმყოფოში მოინახულეს.

 

როგორც "გლობალპერესს" შინაგან საქმეთა სამინისტროდან აცნობეს, დაშავებული პოლიციელები თბილისის რამდენიმე კლინიკაში გადიან სტაციონარულ მკურნალობას. ზუსტი რიცხვი, რამდენი სამართალდამცველია დაშავებული ჯერ დაზუსტებული არ არის, თუმცა მათი რაოდენობა საკმაოდ დიდია.

სახელმწიფო ცერემონიების სასახლესთან საპროტესტო აქცია იმართება. აქციის მონაწილეები საქართველოში რუსი დეპუტატის სერგეი გავრილოვის ჩამოსვლას აპროტესტებენ, რომელიც მართლმადიდებლობის საპარლამენტთაშორისო გენერალური ასამბლეის 26-ე სესიას ესწრება.

 

მათი თქმით, სერგეი გავრილოვი რუსეთის დუმის დეპუტატია და ის იბრძოდა ქართველების წინააღმდეგ აფხაზეთის ომში. ამასთან, აქციის მონაწილეების თქმით, რუსი დეპუტატის ინიცირებული კანონპროექტით 2011 წელს აფხაზეთისა და ე.წ. სამხრეთ ოსეთის რეჟიმებს დიდი დახმარება გაეწიათ. აქციის მონაწილეების თქმით, ეს ადამიანი პუტინის იდეოლოგიური მოკავშირეა და არ უნდა ჩამოდიოდეს საქართველოში.

 

შეგახსენებთ, მართლმადიდებლობის საპარლამენტთაშორისო გენერალური ასამბლეის 26-ე სესია სახელმწიფო ცერემონიების სასახლეში მიმდინარეობს.

აქციის მონაწილეთა მცირე ნაწილი ამ დრომდე რჩება თბილისის სახელმწიფო უნივერსიტეტის ეზოს მიმდებარე ტერიტორიაზე. ადგილზე შეკრებილმა დემონსტრანტებმა ვარაზისხევი გადაკეტეს და ავტომობილებს მოძრაობის საშუალებას არ აძლევენ. რაც შეეხება რუსთაველის გამზირზე, პარლამენტის შენობასთან არსებულ სიტუაციას, იქ მხოლოდ პოლიცია რჩება.

აქციის მონაწილეების ნაწილი სასტუმრო „რედისონთან“ მივიდნენ. ანტისაოკუპაციო მოძრაობის ლიდერის, დავით ქაცარავას თქმით, ისინი დააზუსტებენ, იმყოფება თუ არა რუსი დეპუტატი, სერგეი გავრილოვი "რედისონში", რის შემდეგაც ისინი კვლავ პარლამენტის შენობასთან გადაინაცვლებენ.

 

მათივე ინფორმაციით, გავრილოვი სწორედ „რედისონში“ იყო დაბინავებული და ეჭვი, რომ რუსი დეპუტატი ამ წუთებში სასტუმროშია, აღნიშნულიდან გამომდინარე გაჩნდა.

 

„ორი ძირითადი მოთხოვნა გვაქვს- სასწრაფო დეპორტაცია ამ ადამიანის და საორგანიზაციო ჯგუფმა მკაფიო ბოდიში მოიხადოს საქართველოს ყველა მოქალაქის წინაშე. ეს არის უდიდესი შეურაცხყოფა. ამაზე მწარე ოკუპაცია არ არსებობს. ერთადერთი, რაც დარჩათ, არის პარლამენტის შენობაზე რუსეთის დროშის აღმართვა და რუსეთის ჰიმნის აჟღერება",-აცხადებს ქაცარავა.

„თბილისი პრაიდის“ ოფისი გეგმავს დესტაბილიზაციას და ჩვენი შვილების სიბილწეში ჩათრევას, ამიტომ როგორც მავნებელი ორგანიზაცია, უნდა დაიხუროს, - ამის შესახებ გურამ ფალავანდიშვილმა ჟურნალისტებს აქციაზე განუცხადა, რომელიც ამ წუთებში „თბილისი პრაიდის“ ოფისთან მიმდინარეობს. მისივე ინფორმაციით, აქცია 15 წუთში დაიშლება, რათა ვნებათაღელვაში არ გადაიზარდოს. გურამ ფალავანდიშვილმა აქციის მონაწილეებს მოუწოდა, ფიზიკურად არ შეეხონ „თბილისი პრაიდის“ არც ერთ წევრს.

 

მისი განცხადებით, თუ მთავრობა მათ ოფისს არ დახურავს, ისინი ორგანიზაციის წევრებს სამსახურში სიარულის საშუალებას არ მისცემენ.

 

„აუცილებელია ამათი ოფისის დაკეტვა. ეს ოფისი გეგმავს დესტაბილიზაციას და ჩვენი შვილების სიბილწეში ჩათრევას. ამიტომ როგორც მავნებელი ორგანიზაცია, უნდა დაიხუროს. არც არაფერს ვამტვრევთ, უბრალოდ გვინდა, რომ დაიხუროს. თუ არ დახურა მთავრობამ, ბოლოს და ბოლოს, ეს კარი მაინც აიჭედოს. თუ გაგრძელდა რომელიმე ოფისიდან ჩვენი ბავშვების დატერორება, ვიზამთ ისე, რომ მათ მშიდად არ იარონ სამსახურში. ასევე, მოვუწოდებ ჩვენს მხარდამჭერებს ფიზიკურად არ შეეხოთ ამ ორგანიზაციის არც ერთ წევრს. ვნახოთ რა იქნება. ჩვენ ხელისუფლებიდან კარგი მესიჯი გვაქვს.

 

დაკითხვაზე ყოფნისას ვნახეთ, რომ იქ ძალიან დიდი ზიზღის განწყობაა. სამართალდამცავს ეზიზღება ეს სიბილწე. აქედან გამომდინარე, შეუძლებელია, რომ წყლის ჭავლი მიუშვან პოლიციელებმა იქ შიშველი ხელებით და თეთრი ცხვირსახოცებით მისულ ხალხს,“ - განაცხადა გურამ ფალავანდიშვილმა.

არქივი

« « » » June 2019
Mon Tue Wed Thu Fri Sat Sun
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?