Global Press

Georgia

Global PressGlobal PressGlobal PressGlobal Press

USD
2.7798
EUR
3.1442
RUR
0.0441
GBP
3.522

ისრაელის საჰაერო ძალებმა სირიაში ტერორისტული დაჯგუფება „ჰეზბოლასა“ და ირანის ისლამური რევოლუციის გუშაგთა კორპუსის სამხედრო ობიექტებზე იერიში მიიტანეს.

 

როგორც სირიული მედია იუწყება, საჰაერო იერიშის შედეგად განადგურებულია სულ მცირე სამი სამხედრო ობიექტი, მათ შორის „ჰეზბოლას“ სამხედრო დანიშნულების საწყობები.

 

სირიული მედიის ინფორმაციით, ისრაელის მიერ გაშვებული რვა რაკეტა სირიის საჰაერო თავდაცვის სისტემების მეშვეობით განადგურებულია. არსებული ინფორმაციით, იერიშის მიტანისას ისრაელმა ასევე გამოიყენა უპილოტო მფრინავი აპარატები.

 

როგორც პროსამთავრობო ტელეარხი Syria იუწყება, ისრაელის საჰაერო ძალებმა იერიში ლიბანის საჰაერო სივრციდან განახორციელეს.

 

სირიული საინფორმაციო სააგენტო SANA ასევე იუწყება, რომ დასავლეთ დამასკოს დაბომბვისას სამი სირიელი სამხედრო დაშავდა.

HUB Georgia-ს აღმასრულებელი დირექტორი ვასო ურუშაძე მიწისზედა და მიწისქვეშა ტრანსპორტზე რეკლამის განთავსების უფლების 20 წლით ექსკლუზიურად გაცემის გადაწყვეტილებას ანტისახელმწიფოებრივს უწოდებს.

 

როგორც ურუშაძემ „ბიზნესპრესნიუსთან“ საუბრისას განაცხადა, ზოგადად მსგავსი გადაწყვეტილებები სახელმწიფო კომპანიების განვითარებაზე არ არის ხოლმე ორინტირებული. მისივე თქმით, როცა საუბარია მომგებიან სერვისზე და თბილისის სატრანსპორტო კომპანიას დამატებითი ძალისხმევა/ხარჯი არ სჭირდება, მას შეუძლია თავად გასწიოს ეს მომსახურება და დამატებითი შემოსავალი მიიღოს, რომლითაც დაასუბსიდირებს მგზავრობის ტარიფს სოციალურად დაუცველებისთვის, სტუდენტებისთვის, განაახლებს სატრანსპორტო სისტემას და ა.შ.

 

„მიწისქვეშა და მიწისზედა ტრანსპორტზე, მათ შორის, ლიცენზირებულ ტაქსებზე რეკლამის განთავსების უფლების 20 წლით გაცემა ნიშნავს, რომ სატრანსპორტო კომპანია მომგებიან სერვისს იჯარით მინიმალურ, ფიქსირებულ ფასად ასხვისებს, ხოლო ის კომპანია, რომელიც აუქციონში გაიმარჯვებს და ერთგვარი შუამავალი იქნება რეკლამის დამკვეთსა და სატრანსპორტო კომპანიას შორის, ბევრად მომგებიანი იქნება. მაშინ, როცა თბილისის სატრანსპორტო კომპანიას შეუძლია თავად განახორციელოს ეს მომგებიანი მომსახურება და დამატებითი შემოსავალიც მიიღოს.

 

ამასთან, აქ პირდაპირ იკვეთება ანტისახელმწიფოებრივი და შესაძლოა, კორუფციული გარიგების ნიშნებიც და ვფიქრობ, ამ საკითხით გამოძიება უნდა დაინტერესდეს. გარდა ამისა, მაშინ, როცა მსგავსი უფლება ექსკლუზიურად გადაიცემა, კომპანია ფაქტობრივად, მონოპოლისტი ხდება, რაც არ არის მიზანშეწონილი, რადგან მას შესაძლოა, ჰქონდეს გარკვეული შეხედულება და დამოკიდებულება სხვადასხვა სუბიექტებთან და კომპანიებთან მიმართებაში“, - აღნიშნა ურუშაძემ.

 

HUB Georgia-ს აღმასრულებელ დირექტორს გარკვეული კითხვები და ეჭვები აქვს აუქციონის გამოცხადების ფორმასთანაც. კერძოდ, როგორც ურუშაძე აღნიშნავს, ასე სწრაფად, მოკლე ვადით და ინფორმაციის გავრცელების გარეშე აუქციონის გამოცხადება პირდაპირ მიუთითებს, რომ წინასწარ არის შერჩეული კომპანია, რომელიც ამ აუქციონში გაიმარჯვებს.

 

„აუქციონის ამ ფორმით გამოცხადება მიუთიებს, რომ კომპანიაც და ყველაფერიც წინასწარ არის შერჩეული და უბრალოდ ფორმალურად ტარდება აუქციონი. ასეთი გადაწყვეტილებები სახელმწიფო კომპანიების მხრიდან ყოველთვის წინასწარ არის ხოლმე დაგეგმილი. მაგრამ გამომდინარე იქიდან, რომ კანონი ავალდებულებთ, აუქციონს მოკლე ვადებში ფორმალურად და ბარიერებით აცხადებენ, რათა სხვა კომპანიას მონაწილეობის სურვილი არ გაუჩნდეს. როგორც წესი მსგავს აუქციონებში მონაწილეობას ბაზრის კვლევა, ანალიზი და სფეროს შესწავლა სჭირდება. ამ ფორმით გამოცხადებული აუქციონი კი კომპანიას არ უტოვებს დროს, რომ ბაზარი შეისწავლოს“, - განაცხადა ურუშაძემ.

 

შეგახსენებთ, რომ მერიის ქონების მართვის სააგენტომ მიწისზედა და მიწისქვეშა ტრანსპორტზე რეკლამის 20 წლით ექსკლუზიურად განთავსების უფლებაზე აუქციონი გამოაცხადა. აუქციონში მონაწილეობისთვის კომპანიებს საკმაოდ მოკლე პერიოდი აქვთ განსაზღვრული, აუქციონი 19 დეკემბერს გამოცხადდა და 28 დეკემბერს სრულდება. სამაგიეროდ, აუქციონში გამარჯვებული კომპანია რეკლამის განთავსების გრძელვადიან - 20-წლიან, ექსკლუზიურ უფლებას მიიღებს. დოკუმენტაციის მიხედვით, ელექტრონულ აუქციონში მონაწილეობის მიღებისათვის კომპანიამ ქალაქ თბილისის მუნიციპალიტეტის სსიპ - ქონების მართვის სააგენტოში 3 000 000 ლარი „ბე"-ს სახით უნდა გადაიხადოს. ამასთა, საპრივატიზებო თანხა - 11847124,99 ლარს, ხოლო სავაჭრო ბიჯი 100 000 ლარს შეადგენს.

საახალწლოდ გამოყოფილი 1 778 800 ლარიდან, ძირითადი ნაწილი მომღერლების ჰონორარებზე დაიხარჯება, - ამის შესახებ თბილისის მერმა კახა კალაძემ მუნიციპალიტეტის მთავრობის სხდომაზე განაცხადა. როგორც კალაძემ განმარტა, ჩატარდა გამარტივებული შესყიდვა, რადგან მომღერლების მომსახურებას მერია ტენდერით ვერ შეისყიდდა.

 

„საახალწლო ღონისძიებებთან დაკავშირებით გამარტივებული შესყიდვა იყო მოთხოვნილი და გუშინ, სხვათა შორის, ამაზე შეკითხვაც დაისვა საკრებულოს სხდომაზე. უბრალოდ, ვინც შეკითხვა დასვა, აღარ დაესწრო სხდომას და ვერ შევძელი პასუხი გამეცა, თუმცა ახლა ავხსნი, რომ 1 778 800 ლარი არის მოთხოვნილი გამარტივებული შესყიდვებისთვის და ეს თანხა ძირითადად ორიენტირებულია კრეატიულ გადაწყვეტილებებზე, ამ ტიპის მომსახურების შესყიდვა, რა თქმა უნდა, ტენდერით ვერ მოხდებოდა და ამ თანხის ძირითადი ნაწილი არის მომღერლების ჰონორარები.

 

თუ ვინმე მეტყვის ტენდერით როგორ შევარჩიო მომღერალი, არ ვიცი ხმით შევარჩიო, ხმის ტემბრით შევარჩიო თუ არის ამის საშუალება და ვინმე მომაწვდის ინფორმაციას, რა თქმა უნდა, ჩემთვის უკეთესი იქნება, რომ ტენდერის გზით წავიდეთ და რაიმე კითხვები არ გაჩნდეს გამარტივებულ შესყიდვასთან დაკავშირებით. თუმცა, ესეც ყოველგვარი კანონიერების ფარგლებში მიმდინარეობს და ზოგადად მინდა გითხრათ, რომ აღნიშნული თანხით 1200-მდე მუსიკოს-შემსრულებელი, 270 მომსახურე პერსონალი სხვადასხვა სახის საახალწლო ატრიბუტიკა და ბუტაფორია და 50-მდე კონცერტი, აქტივობა და გალა კონცერტის მომზადება ფინანსდება",- განაცხადა კალაძემ.

შეიქმნება საგამოძიებო ჯგუფი, რომელსაც შალვა თადუმაძე უხელმძღვანელებს, ამიტომ მე ვწყვეტ შიმშილობას, - ამის შესახებ მთავარ პროკურატურაში გენერალურ პროკურორ შალვა თადუმაძესთან შეხვედრის შემდეგ ჟურნალისტებს საქართველოს პირველი პრეზიდენტის ვაჟმა ცოტნე გამსახურდიამ განუცხადა.

 

მისივე თქმით, შალვა თადუმაძესთან საუბრის დროს მან საკმარისი გარანტიები მიიღო.

 

"მე და ჩვენი ადვოკატი ამირან გიგუაშვილი შევხვდით შალვა თადუმაძეს, ვესაუბრეთ მას საქმეში არსებული ვითარების შესახებ და ამ საქმის გახსნის შესაძლო სტრატეგიებზე. გვქონდა ასევე საუბარი ჩვენს მთავარ მოთხოვნაზე - შეიქმნას საგამოძიებო ჯგუფი, რომელსაც ექნება უფლებამოსილება და კვალიფიკაცია, განახორციელოს შესაბამისი საგამოძიებო ქმედებები. იქნება ეს ქართველი თუ უცხოელი ექსპერტებით დაკომპლექტებული. თადუმაძე შეგვპირდა, რომ გააკეთებს ყველაფერს, რათა ეს ჯგუფი შეიქმნას. ის პირადად უხელმძღვანელებს ამ ჯგუფს. შემდეგი სამუშაო შეხვედრა იანვრის ბოლოს დავგეგმეთ. ჩემთვის მთავარი პროკურორის ის დამოკიდებულება და სიტყვები, რომლებიც დღეს მოვისმინე, არის იმის გარანტია რომ ეს ყველაფერი შესრულდება და შესაბამისად მე ვწყვეტ შიმშილობას",- განაცხადა გამსახურდიამ.

სემეკ-ის გადაწყვეტილებით, რეგიონებში ბუნებრივი აირის სამომხმარებლო ტარიფი მცირდება. იმ რეგიონებში, სადაც „სოკარ ჯორჯია გაზი" ოპერირებს, ბუნებრივი აირის სამომხმარებლო ტარიფი 0.011 თეთრით მცირდება.

 

„სოკარ ჯორჯია გაზის" აბონენტებისთვის ამჟამად მოქმედი ტარიფი 56.940 თეთრია. შესაბამისად, 2019 წლის 1-ლი იანვრიდან, 1 კუბურ მეტრზე ახალი სამომხმარებლო ტარიფი 56.929 თეთრი იქნება.

 

რაც შეეხება იმ რეგიონებს, სადაც „საქორგაზი" ოპერირებს, იქ ტარიფი 0.012 თეთრით შემცირდა. "საქორგაზის" აბონენტებისთვის ამჟამად მოქმედი ტარიფი 57.011 თეთრია, ხოლო 1-ელი იანვრიდან მათთვის ახალი ტარიფი ამოქმედდება 56.999 თეთრის ოდენობით.

 

საქართველოს ენერგეტიკისა და მარეგულირებელი კომისიის დღევანდელ სხდომაზე მიღებული გადაწყვეტილებით, ბუნებრივ აირზე სამომხმარებლო ტარიფი თბილისშიც შემცირდა. დედაქალაქში ცვლილება 0.014 თეთრს შეადგენს.

 

ახალი ტარიფები 2019 წლის 1-ლი იანვრიდან 31 დეკემბრის ჩათვლით იქნება ძალაში და "ყაზტრანსგაზ თბილისის", "სოკარ ჯორჯია გაზისა" და "საქორგაზის" მილიონამდე აბონენტს შეეხება, როგორც თბილისში და ასევე რეგიონებში.

ბუნებრივი გაზის სამომხმარებლო ტარიფი მცირედით, მაგრამ მაინც შემცირდა,- ამის შესახებ სემეკ-ის წევრმა გოჩა შონიამ ჟურნალისტებს განუცხადა. მისი განმარტებით, განაწილებისა და ტრანსპორტირების ტარიფების შემცირებამ გამოიწვია ის, რომ ბუნებრივ აირზე სამომხმარებლო ტარიფი 0.014 თეთრით შემცირებულიყო.

 

„ტარიფების დეპარტამენტმა წარმოადინა პროექტი, რომელიც ითვალისწინებდა "ყაზსტრანსგაზ-თბილისისთვის" სამომხმარებლო ტარიფის დადგენას. ტარიფი მცირედით, მაგრამ მაინც შემცირდა. განაწილების ტარიფი შემცირდა დაახლოებით 1.3 თეთრით და ეს შემცირება გამოწვეული იყო ძირითადად მაინც ნორმატიული დანაკარგების ღირებულების შემცირებით. თქვენ იცით, რომ კომისია ადგენს დანაკარგების განაკვეთებს კომპანიებისთვის 5 წლიან პერიოდზე. მომდევნო ერთი წლის განმავლობაში ეს დანაკარგები შემცირდა და, შესაბამისად, ამ შემცირებამ გამოიწვია თვითონ განაწილების ტარიფის შემცირება. თუმცა გაიზარდა მიწოდების ტარიფი. მიწოდების ტარიფის ზრდა იყო დაახლოებით 1.3 თეთრი და შესაბამისად, ამ ორმა კომპონენტნა ერთმანეთი დააბალანსა, თუმცა ტრანსპორტირების ტარიფის შემცირებამ საბოლოო ჯამში გამოიწვია სამომხმარებლო ტარიფის შემცირებაც. ასე რომ, სამომხმარებლო ტარიფი შემცირდა 0.014 თეთრით 1 კუბურ მეტრზე,"- განაცხადა გოჩა შონიამ.

 

საქართველოს ენერგეტიკისა და წყალმომარაგების მარეგულირებელი კომისიის გადაწყვეტილებით, თბილისში ბუნებრივი გაზის ტარიფი მცირდება. ცვლილება 0.014 თეთრს შეადგენს.

 

ცნობისთვის, ამჟამად ბუნებრივ აირზე თბილისში მოქმედი სამომხმარებლო ტარიფი 46.153 თეთრია. აქედან გამომდინარე, ახალი გადაწყვეტილებით, დედაქალაქში სამომხმარებლო ტარიფი 1 კუბურ მეტრზე 46.139 თეთრი იქნება.

 

დღეს დადგენილი ახალი ტარიფი 2019 წლის 1-ლი იანვრიდან 31 დეკემბრის ჩათვლით იქნება ძალაში და შპს „ყაზტრანსგაზ თბილისის“ აბონენტებს შეეხება

დატოვე პარლამენტი ქუთაისში“ - ამ შინაარსის პლაკატი პარლამენტის პლენარულ სხდომის დროს გამოფინეს. საინიციატივო ჯგუფის „დატოვე პარლამენტი ქუთაისში" წევრებმა და ჟურნალისტებმა პერფორმანსით პარლამენტის ქუთაისიდან თბილისში გადატანა გააპროტესტეს. მათი თქმით, ქუთაისმა დაკარგა სტატუსი და ამით მნიშვნელოვნად დაზარალდება.

 

„პარლამენტი გადაიტანეს ქუთაისიდან და წაართვეს სტატუსი. საინიციატივო ჯგუფი აპროტესტებს პარლამენტის გადატანას, ვგეგმავთ 30 000 ხელმოწერის შეგროვებას და პარლამენტში პეტიციის შეტანას, რათა გადაიხედოს გადაწყვეტილება, რომელიც ქუთაისის განვითარებას შეაფერხებს", -განაცხადა საინიციატივო ჯგუფის წევრმა ეკა ფხაკაძემ.

 

პერფორმანსს "ევროპული საქართველოს" წევრები ტაშით შეხვდნენ.

თბილისის სატრანსპორტო კომპანიამ მის ბალანსზე რიცხულ ინფრასტრუქტურაზე, მოძრავ და უძრავ ქონებაზე არსებულ სარეკლამო ადგილებზე რეკლამის განთავსების ვადიანი, სასყიდლიანი უფლების გადაცემისა და ნებართვის მქონე თეთრ ტაქსებზე რეკლამის განთავსების აუქციონი გამოაცხადა.

 

აუქციონში მონაწილეობისთვის კომპანიებს საკმაოდ მოკლე პერიოდი აქვთ განსაზღვრული - აუქციონი 19 დეკემბერს გამოცხადდა და 28 დეკემბერს სრულდება. სამაგიეროდ, აუქციონში გამარჯვებული კომპანია რეკლამის განთავსების გრძელვადიან - 20-წლიან უფლებას მიიღებს.

 

სატენდერო დოკუმენტაციის მიხედვით, ელექტრონულ აუქციონში მონაწილეობის მიღებისათვის კომპანიამ ქალაქ თბილისის მუნიციპალიტეტის სსიპ - ქონების მართვის სააგენტოში 3 000 000 ლარი „ბე"-ს სახით უნდა გადაიხადოს. სავაჭრო ბიჯი შეადგენს 100 000 ლარს. ამავე დოკუმენტაციის მიხედვით, საფასურის გადახდის ვალდებულება განისაზღვრება ხელშეკრულებაზე ხელმოწერის მომენტიდან არაუმეტეს 15 კალენდარული დღით. თანხის გადახდა უკვე გადახდილი ბე-ს თანხის გამოკლებით უნდა მოხდეს შპს “თბილისის სატრანსპორტო კომპანიის“ ანგარიშზე.

 

„იმ შემთხვევაში თუ აუქციონში გამარჯვებული 15 კალენდარული დღის ვადაში არ გადაიხდის განთავსების უფლების საფასურს, მას დამატებით განესაზღვრება 60 დღიანი ვადა ვალდებულების შესასრულებლად. თუ აღნიშნულ ვადაშიც განთავსების უფლების საფასური არ იქნა გადახდილი უფლების გამცემი უფლებამოსილია შეწყვიტოს ხელშეკრულების მოქმედება ხელშეკრულებით დადგენილი წესით“, - აღნიშნულია სატენდერო დოკუმენტაციაში.

საქართველოს პრეზიდენტმა სალომე ზურაბიშვილმა დღეს მრჩეველთა გუნდი წარადგინა. როგორც სალომე ზურაბიშვილმა დღეს გამართულ ბრიფინგზე განაცხადა, ჯერჯერობით, მხოლოდ გუნდის ნაწილი ჰყავს დაკომპლექტებული. 

 

„წარმოგიდგენთ მრჩეველთა გუნდის ნაწილს, რომელიც დღეს ინიშნება. როგორც იცით, საკმაოდ შეზღუდულები ვართ ამ მომენტში და სანამ არ ჩატარდება სრული რეორგანიზაცია და კონკურსი იმისთვის, რომ დავაკომპლექტოთ ბოლომდე ის ადგილები, რაც შტატით გვეკუთვნის, მაგრამ ჩვენ ვიწყებთ ამ ფორმატში მუშაობას", - აღნიშნა სალომე ზურაბიშვილმა.

 

ადმინისტრაციის უფროსის თანამდებობაზე დაინიშნა ლაშა ჟვანია.

 

ადმინისტრაციის უფროსის მოადგილედ ქეთევან მახარაშვილი, რომელსაც დაევალა ეთნიკური უმცირესობებისა და გენდერული თანასწორობის საკითხებში პრეზიდენტის საქმიანობის კოორდინაცია და იგი ასევე შეითავსებს პრესსპიკერის ფუნქციებს. საპარლამენტო მდივნის თანამდებობაზე იმუშავებს დიმიტრი გაბუნია.

 

შეზღუდული შესაძლებლობების მქონე პირთა საკითხებში მრჩევლად დაინიშნა სიმონ პეტრიდისი.

 

,,პრეზიდენტის სასახლე არ არის ბოლომდე ადაპტირებული შშმ პირებისთვის და ჩვენ ამ ცვლილებებს დავიწყებთ პრეზიდენტის სასახლიდან'', - აღნიშნა სალომე ზურაბიშვილმა.

 

საქართველოს პრეზიდენტმა დიასპორისა და მოქალაქეობის საკითხებში მრჩევლად ნათია სულავა დანიშნა, სამხედრო საკითხებში მრჩევლად ალექსი ბარბაქაძე, საზოგადოებასთან და მედიასთან ურთიერთობების საკითხებში მრჩევლად ირინა შენგელია, კულტურის, განათლებისა და მეცნიერების საკითხებში მრჩევლად კოტე ნაცვლიშვილი.

 

საქართველოს პრეზიდენტმა, გუნდის წევრებთან ერთად, წარადგინა ასევე, პიერ ალექსანდრ კრევუ, რომელიც ემიგრაციაში, ქართულ-ფრანგულ ოჯახში დაბადებული ქართველია. ის იქნება ჯერ სტაჟიორი.

 

 

თბილისში, ხორავას ქუჩაზე მომხდარი მკვლელობის საქმის ერთ-ერთი ფიგურანტი პირი მიხეილ კალანდია მთავარ პროკურატურაში იმყოფება.

 

როგორც „გლობალპრესს“ მთავარ პროკურატურაში განუცხადეს, კალანდია საგამოძიებო უწყებაში ადვოკატთან ერთად იმყოფება.

 

„კალანდია და მისი ადვოკატი მთავარ პროკურატურაში ხორავას ქუჩაზე მომხდარი მკვლელობის ძირითადი საქმიდან გამოყოფილი საქმის ფარგლებში სასამართლო პროცესზე დაკითხვის პროცედურებთან დაკავშირებით იმყოფებიან“, - განმარტეს მთავარ პროკურატურაში.

ინდონეზიაში ცუნამის შედეგად დაღუპულთა რიცხვმა 373 მიაღწია, დაშავებულია 1.400 ადამიანი.

 

ცუნამი სუმატრასა და იავას კუნძულებზე ვულკან „ანაკ კრაკატაუს“ ამოფრქვევამ გამოიწვია. სანაპირო რეგიონებში მცხოვრებ მოსახლეობას კიდევ ერთი ცუნამის შესახებ აფრთხილებენ.

 

„მეტეოროლოგების, კლიმატოლოგებისა და გეოფიზიკის სააგენტოს რეკომენდაციაა, რომ მოსახლეობამ სანაპიროზე ნებისმიერი ქმედებებისგან თავი შეიკავოს და სანაპირო ზოლს გაეცალოს“, - განაცხადა ბუნებრივ კატასტროფათა მართვის ეროვნული სააგენტოს პრესსპიკერმა.

 

ცუნამის შედეგად საცხოვრებელი სახლები და სხვა ინფრასტრუქტურა განადგურდა.

 

სამაშველო ჯგუფები ნანგრევებში მოყოლილებს ეძებენ. ვარაუდობენ, რომ მსხვერპლი კიდევ გაიზრდება.

 

ვულკანი კრაკატაუ კვირას ამოიფრქვა.

უზენაესი სასამართლოს მოსამართლე კანდიდატების წარდგენასთან დაკავშირებით გადაწყვეტილება ჩვენ, მოსამართლე წევრებმა გუნდურად მივიღეთ, - ამის შესახებ იუსტიციის უმაღლესი საბჭოს მდივანმა გიორგი მიქაუტაძემ ჟურნალისტებს განუცხადა.

 

მისი თქმით, სასამართლოს უმაღლეს ინსტანციაში წარსადგენ მოსამართლეთა კანდიდატურებზე მას შემდეგ იმსჯელეს, რაც კონსტიტუციის ახალი რედაქცია ძალაში შევიდა. კითხვაზე, რამ განაპირობა განახლებული კონსტიტუცის ძალაში შესვლიდან უმოკლეს ვადაში პარლამენტისთვის წარედგინათ უზენაეს სასამართლოში მოსამართლეთა 10 კანდიდატი, საბჭოს მდივნის განმარტებით, უზენაეს სასამართლოში წლებია, რაც მოსამართლეთა სიმცირის პრობლემაა, რის გამოც დიდი რაოდენობით საქმე დაგროვდა, რამაც თავისთავად, მოქალაქეთა უკმაყოფილება წარმოშვა. მისივე თქმით, ყველა წარდგენილი კანდიდატი შესაბამის კრიტერიუმებს აკმაყოფილებს.

 

"უზენაესი სასამართლოს კანდიდატურების დასახელება განპირობებულია იმ სიტუაციით, რომელიც შექმნილია უზენაეს სასამართლოში. არის 11 მოსამართლე, სისხლის პალატაში ერთი შემადგენლობაც კი არ არის, რომ საქმეები განიხილონ. ეს არის შეფერხებული პროცესი, ან შეიძლება ითქვას, უფრო უარესი, უზენაესი სასამართლო თავის ფუნქციას ვერ შეასრულებს, თუ ჩვენ გადაწყვეტილებას არ მოვიღებთ და არ იქნებიან მოსამართლეები წარდგენილები. ახალი კონსტიტუციის ძალაში შესვლის შემდეგ, ეს პასუხისმგებლობა გადმოვიდა იუსტიციის უმაღლს საბჭოზე. ვფიქრობ, რომ სწორად მოქმედების და იმ აუცილებელი ნაბიჯების გადადგმის დროა, რომელიც უნდა გადაიდგას, ვინაიდან უზენას სასამართლოში არ შეფერხდეს სამართალწარმოების პროცესი. ნაბიჯი იუსტიციის უმაღლესმა საბჭომ უნდა გადადგას. ეს არის ძალიან დიდი პასუხისმგებლობა, რომელსაც ვაცნობიერებთ და ვფიქრობთ, რომ მივიღეთ სწორი გადაწყვეტილება", - განაცხადა გიორგი მიქაუტაძემ.

 

რაც შეეხება არასამთავრობო სექტორისა და საბჭოს არამოსამართლე წევრების მხრიდან გამოთქმულ პროტესტს, რომელიც წარდგენილ კანდიდატურას უკავშირდება, გიორგი მიქაუტაძე ამბობს, რომ ყველა კანდიდატი სასამართლო სისტემაში მაღალი ნდობითა და რეპუტაციით სარგებლობს, მათ შორის, სააპელაციო სასამართლოს თავმჯდომარე მიხეილ ჩიჩალაძე.

 

"ჩვენ დავასახელეთ სააპელაციო სასამართლოს ორივე თავმჯდომარე. რაც შეეხება მიხეილ ჩინჩალაძეს, მას უზენაეს სასამართლოში მუშაობის 10-წლიანი გამოცდილება აქვს, მათ შორის ხელმძღვანელ თანამდებობაზე. ის ძალიან მაღალი დონის პროფესიონალია", - განაცხადა მიქაუტაძემ.

 

იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა. შესაბამისი განცხადება იუსტიციის უმაღლესის საბჭოს მდივანმა გიორგი მიქაუტაძემ დღევანდელ სხდომაზე გააკეთა. ესენი არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.

ექსკლუზიური

არქივი

« « » » ივნისი 2019
ორშ სამ ოთხ ხუთ პარ შაბ კვი
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?