Global Press

Georgia

Global PressGlobal PressGlobal PressGlobal Press

USD
3.0651
EUR
3.5049
RUR
0.0431
GBP
3.8715

ერთმნიშვნელოვნად, მსგავსი გადაწყვეტილებები საქართველოს კანონმდებლობის შესაბამისად მიიღება. ამ შემთხვევაშიც გადაწყვეტილება მიღებული იქნება საქართველოს კანონის შესაბამისად, - ამის შესახებ პრემიერ-მინისტრმა გიორგი გახარიამ საქართველოს პრეზიდენტის, სალომე ზურაბიშვილის განცხადების კომენტირებისას განაცხადა, რომლის თანახმადაც, საქართველო მზადაა უმასპინძლოს რუსეთის დელეგაციას ევროპის საბჭოს მინისტერიალზე, რომელიც მაისში, თბილისში გაიმართება.

 

„საქართველოს კანონმდებლობას ვერავინ აუვლის გვერდს, ეს ერთი და მეორე, საქართველო ევროსაბჭოს პრეზიდენტი ქვეყანა გახლავთ და სამწუხაროდ, ესეც ფაქტია, რომ ევროსაბჭოში რუსეთს აღუდგა წევრის სტატუსი. ახლა უკან დავბრუნდეთ და ხაზგასმით აღვნიშნავ, რომ ვერავის, ვინც ეს არ უნდა განაცხადოს, საქართველოს კანონმდებლობას გვერდს ვერ აუვლის, მოვა ის დროც და ყველაფერი კანონმდებლობის შესაბამისად გაკეთდება“, - აცხადებს გახარია.

 

კითხვაზე, მთავრობა ეძებს თუ არა შუალედურ ვარიანტს საერთაშორისო ვალდებულებების შესრულებასა და ეროვნული ინტერესების დაცვას შორის, პრემიერი ასე პასუხობს:

 

„მე არაფერს ვეძებ. ჩვენ საქართველოს კანონმდებლობის შესაბამისად ვიქცევით და თუ ეს კანონმდებლობა შესაძლებლობას გვაძლევს, ჩვენს საერთაშორისო ვალდებულებებს ვასრულებთ. თუ არ გვაძლევს, მივდივართ ჩვენს პარტნიორებთან და რაღაც სხვა გამოსავალს ვპოულობთ“, - აღნიშნა პრემიერმა.

 

ცნობისთვის, საქართველომ, როგორც თავმჯდომარე ქვეყანამ, მაისში ევროპის საბჭოს მინისტერიალს და ორგანიზაციის წევრი ქვეყნების დელეგაციებს უნდა უმასპინძლოს. არსებული ინფორმაციით, რუსეთის დელეგაციას სერგეი ლავროვი წარმოადგენს, რომელსაც თავის მხრივ, „საქართველოს ოკუპირებული ტერიტორიების შესახებ“ კანონი არაერთხელ აქვს დარღვეული.

საბოლოო ჯამში, ფინალურ სერიაში გაიმარჯვებს ქვეყანა, - ამის შესახებ პრემიერ-მინისტრმა გიორგი გახარიამ ჟურნალისტებს სამთავრობო ცვლილებებთან დაკავშირებით უპასუხა.

 

მისივე თქმით, ყველა უნდა დაელოდოს მოვლენების განვითარებას.

 

„ცხოვრება მოძრაობაა, ყველაფერს უნდა დაველოდოთ. „დასპოილერება“ მე ხომ არ მომიგონია?! ეს არის ძალიან კარგი თანამედროვე ცნება და მინდა, რომ ამ პოზიციაზე დავრჩე. უახლოეს პერიოდში აქტიურ პოლიტიკურ სეზონში შევდივართ. წერილიც ბევრი იქნება, სიხარულიც ბევრი იქნება, „დასპოილერებაც“ ბევრი იქნება, საინტერესო ცხოვრება გველის“, - განაცხადა გახარიამ.

რა თქმა უნდა, თქვენგან და ზოგადადაც სიხარული მნებავს. საერთოდ, რომ იცოდეთ, ამ კითხვაზე საავტორო უფლებები ჩემია, ისევე როგორც თვალის ჩაკვრაზე, - ასე პასუხობს პრემიერ-მინისტრი გიორგი გახარია ჟურნალისტის რიტორიკულ შეკითხვას: „წერილი უნდა თუ სიხარული?“

 

გახარია კონგრესმენების კრიტიკულ წერილებთან დაკავშირებულ საკითხს გამოეხმაურა და აღნიშნა, რომ მზადაა, ნებისმიერ მწვავე კითხვას პასუხი გასცეს როგორც ქვეყნის შიგნით, ისე გარეთ.

 

„როგორი მწვავე კითხვებიც არ უნდა დაისვას, ყოველთვის მზად ვართ, დავსხდეთ და ამ კითხვებზე ვისაუბროთ. როგორც ქვეყნის შიგნით, ისე გარეთ, სადაც არ უნდა დაისვას მწვავე კითხვები, რომლებიც ეხება ქვეყნის დემოკრატიულ განვითარებას, საგარეო ორიენტაციას, ორ ქვეყანას შორის სტრატეგიულ ურთიერთობას“, - აღნიშნა გახარიამ ამერიკელი კონგრესმენების კრიტიკულ წერილებზე კომენტირებისას.

დეპუტატებს, რომლებიც „ქართული ოცნებიდან“ წამოვიდნენ, მინდა ვთხოვო, მხარი დაუჭირონ პარლამენტში დროებითი საგამოძიებო კომისიის შექმნას, - ამის შესახებ მალხაზ მაჩალიკაშვილმა ჟურნალისტებს განუცხადა. უმრავლესობიდან წამოსული დეპუტატების მისამართით თხოვნა მაჩალიკაშვილმა პარლამენტის შესასვლელთან გააჟღერა, ვინაიდან მას შენობაში შესვლის უფლება არ მისცეს.

 

„როგორც ამ ქვეყნის მოქალაქემ, მინდა დეპუტატებს ადამიანური თხოვნით მივმართო. ჩვენ კარგად ვიცით, რომ გაერთიანებული ოპოზიცია მხარს მიჭერს, პარლამენტში დროებითი საგამოძიებო კომისია შეიქმნას. შესაბამისად, მინდა იმ ადამიანებს მივმართო თხოვნით, რომლებიც „ქართული ოცნებიდან“ უკვე წამოვიდნენ. ბრიფინგის პარლამენტში გამართვის საშუალება არ მოგვეცა და აქედან გამომდინარე, გარეთ გვიწევს ამ მიმართვის გაჟღერება. დიდი იმედი მექნება, რომ პარლამენტის დროებითი საგამოძიებო კომისიის შექმნას მხარს დაუჭერთ. მინდა ყველა კითხვას გაეცეს პასუხი, თუ რატომ იქნა თემირლან მაჩალიკაშვილი მოკლული,“ - განაცხადა მაჩალიკაშვილმა.

 

მან აღნიშნული თხოვნით თამარ ჩუგოშვილს, თამარ ხულორდავას, დიმიტრი ცქიტიშვილს, ირინა ფრუიძეს, მარიამ ჯაშს, ზვიად ძიძიგურს, ბიძინა გეგიძეს, კობა ნარჩემაშვილს, ლევან კობერიძეს, ლევან გოგიჩაიშვილს, ნინო გოგუაძეს, გიორგი მოსიძეს, გიორგი ბეგაძეს, გედევან ფოფხაძეს, ზვიად კვაჭანტირაძეს, ეკა ბესელიას, ბექა ნაცვლიშვილს, დავით ჭიჭინაძეს, ალექსანდრე ერქვანიას და ზაზა ხუციშვილს მიმართა.

ჩვენ არ უნდა გამოგვრჩეს შიდა უსაფრთხოების კომპონენტი, რომელიც ასევე მნიშვნელოვანია და რომელიც მოიცავს, როგორც მართლმსაჯულების სისტემის გამართულ ფუნქციონირებას, ასევე ქვეყანაში სისხლის სამართლის პოლიტიკის ერთიანი სისტემის შექმნას, - ამის შესახებ საქართველოს პრემიერ-მინისტრმა გიორგი გახარიამ დონორთა ყოველწლიურ კონფერენციაზე სიტყვით გამოსვლისას განაცხადა.

 

პრემიერ-მინისტრმა ყურადღება გაამახვილა შიდა უსაფრთხოების კომპონენტზე, როგორც მთავრობის სამოქმედო გეგმის ერთ-ერთ მნიშვნელოვან ნაწილზე.

 

„ეს ჩვენთვის არის კრიტიკულად მნიშვნელოვანი და ჩვენ დარწმუნებული ვართ, დღესაც, სამუშაო ჯგუფებში ჩვენ შევძლებთ, ჩვენს კოლეგებს დავუდასტუროთ ის პროგრესი და ვისაუბროთ იმ აუცილებელ გეგმებზე, რომლებიც გაგვაჩნია და რომლებსაც ჩვენ ვხედავთ“, - განაცხადა მთავრობის მეთაურმა.

პრემიერ-მინისტრ გიორგი გახარიას განკარგულებით, საქართველოში ახალი კორონავირუსის შესაძლო გავრცელების თავიდან აცილების მიზნით, საქართველოში ჩინეთის სახალხო რესპუბლიკიდან პირდაპირი საერთაშორისო რეისები მიმდინარე წლის 28 იანვრიდან ზამთრის სანავიგაციო სეზონის ბოლომდე, 2020 წლის 29 მარტამდე დროებით შეწყდა.

 

როგორც „გლობალპრესს“ საქართველოს მთავრობის ადმინისტრაციიდან აცნობეს, ახალი კორონავირუსის შესაძლო გავრცელების თავიდან აცილებისა და შესაძლო გავრცელების შემთხვევაში ეფექტიანი რეაგირების მიზნით, საქართველოს მთავრობამ შესაბამისი განკარგულება (N164) გამოსცა და სამოქმედო გეგმა დაამტკიცა.

 

განკარგულების თანახმად, თითოეულ უწყებას, კომპეტენციის ფარგლებში დაევალა შესაბამისი ნაბიჯების გადადგმა. ღონისძიებებს კოორდინაციას უწევს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო. ამასთან, საქართველოს ფინანსთა სამინისტროს დაევალა საჭიროების შემთხვევაში ფინანსური რესურსების გამოყოფა სათანადო ასიგნებებიდან, მათ შორის საქართველოს მთავრობის სარეზერვო ფონდიდან.

 

მთავრობის მიერ შემუშავებული სამოქმედო გეგმა ითვალისწინებს ახალი კორონავირუსით გამოწვეული დაავადების შესაძლო გავრცელების წინააღმდეგ მიმართულ პრევენციულ ღონისძიებებს და ასევე დაავადების გამოვლენის შემთხვევაში მასზე რეაგირებისთვის აუცილებელ ღონისძიებებს ეროვნულ დონეზე.

 

გეგმის მიხედვით გაწერილ ღონისძიებებში კომპეტენციის ფარგლებში ჩართულები არიან შინაგან საქმეთა სამინისტრო, ფინანსთა სამინისტროს სსიპ შემოსავლების სამსახური, საქართველოს ეკონომიკისა და მდგრადი განვითარების სამინისტრო, საგარეო საქმეთა სამინისტრო და სხვა სამთავრობო უწყებები.

 

აღსანიშნავია, რომ სამოქმედო გეგმა ითვალისწინებს საზოგადოების და მედიის სწორად ინფორმირების უზრუნველყოფასაც, რისთვისაც საქართველოს საზოგადოებრივ მაუწყებელს ეთხოვა კორონავირუსის და მისი ზემოქმედების რისკის შემცირების შესახებ ფართო საზოგადოებისთვის ზუსტი და საჭირო ინფორმაციის მიწოდება.

ჩვენ ყველას კარგად გვესმის, რომ საქართველო არის განვითარებადი დემოკრატია, გვაქვს საკმაოდ მძიმე პოსტსაბჭოთა წარსული და ისიც ყველას კარგად გვესმის, რომ შეიძლება დაგვჭირდეს ბევრი წლები რეფორმებისთვის, რათა ჩვენ დავუახლოვდეთ და შევესაბამებოდეთ იმ ევროპულ სტანდარტებს, როგორი ამბიციებიც ჩვენ გაგვაჩნია, - ამის შესახებ საქართველოს პრემიერ-მინისტრმა გიორგი გახარიამ დონორთა კონფერენციაზე სიტყვით გამოსვლისას განაცხადა.

 

პრემიერ-მინისტრის პრესსამსახურის ინფორმაციით, გახარიამ ყურადღება გაამახვილა საქართველოს მთავრობის ძირითად პრიორიტეტებზე, რომელთა შორისაა: უსაფრთხოება, ეკონომიკური განვითარება, ინფრასტრუქტურა და ვაჭრობა, ადამიანური კაპიტალის განვითარება და ღია მმართველობა.

 

„ჩვენთვის უდიდესი პატივია, დღეს ჩავატაროთ ეს კონფერენცია და გვქონდეს მჭიდრო ურთიერთობა სამუშაო რეჟიმში პარტნიორებთან. ეს ჩვენთვის კრიტიკულად მნიშვნელოვანია. სამწუხაროდ, მიუხედავად იმისა, რომ ეს ღონისძიება არ ჩატარებულა დაახლოებით ორ წელიწადზე მეტია, უნდა ვთქვათ, რომ ეს არის ტრადიციული ღონისძიება ჩვენს და ჩვენს დონორ პარტნიორებს შორის ურთიერთობაში. დღეს გვაქვს საშუალება, მჭიდროდ, სამუშაო რეჟიმში გავიაროთ თითოეული ის საკითხი, რომელიც აუცილებელია როგორც ქვეყნის შემდგომი რეფორმირების, ასევე რაც მთავარია თქვენი მხრიდან ამ რეფორმების მხარდაჭერისთვის“, - განაცხადა გიორგი გახარიამ.

 

ამასთან,პრემიერ-მინისტრმა ხაზგასმით აღნიშნა, რომ ამ ფორმატის ფარგლებში სხვადასხვა სახის საერთაშორისო ორგანიზაციების თუ ფინანსური ინსტიტუტების მხრიდან საქართველოს რეფორმირების ფარგლებში 2018 წლის ჩათვლით 7 მილიარდ დოლარზე მეტი იყო დახარჯული.

 

„როდესაც ჩვენ ვსაუბრობთ დონორთა კონფერენციაზე, ჩვენთვის კრიტიკულად მნიშვნელოვანია თანხვედრა იყოს იმ სფეროებს და სტრატეგიულ მიმართულებებს შორის, რომელიც არის გაფორმებული და დაფიქსირებული მთავრობის სამოქმედო გეგმაში და ამაზე უნდა ვისაუბროთ დღეს, რადგან ჩვენი თანხვედრა იყოს მაქსიმალურად ეფექტური და ზუსტი. ამ მიმართულებით მოგეხსენებათ, რომ საქართველოს მთავრობა მის ყოველდღიურ და გრძელვადიან გეგმაში გამოყოფს ოთხ პრიორიტეტულ მიმართულებას. ეს გახლავთ, პირველი - უსაფრთხოება, მეორე - ეკონომიკური განვითარება და სამუშაო ადგილები, მესამე - განათლება და ადამიანური კაპიტალის განვითარება და მეოთხე, რაც ჩვენთვის ყველაზე მნიშვნელოვანია, როგორც მთავრობისთვის - ღია მმართველობა“, - განაცხადა გიორგი გახარიამ.

 

სტრატეგიული დიალოგი დონორი ქვეყნებისა და ორგანიზაციების ხელმძღვანელებთან, მათი ინფორმირებულობის გაზრდა სახელმწიფო პრიორიტეტების, მიმდინარე რეფორმებისა და ახალი ინიციატივების შესახებ იყო დონორთა ყოველწლიური ფორუმის მიზანი, რომელიც საქართველოს პრემიერ-მინისტრ გიორგი გახარიას ხელმძღვანელობით დღეს სახელმწიფო ცერემონიების სასახლეში გაიმართა.

 

ღონისძიებაში საქართველოს მთავრობის წევრები, პარლამენტის თავმჯდომარე, დეპუტატები, საქართველოში აკრედიტებული დიპლომატიური კორპუსის ხელმძღვანელები და დონორი ორგანიზაციების წარმომადგენლები მონაწილეობდნენ.

 

ფორუმის მეორე ნაწილი მრგვალი მაგიდის ფორმატში წარიმართა, რომელსაც საქართველოს მთავრობის ადმინისტრაციის უფროსი ნათია მეზვრიშვილი უძღვებოდა. დისკუსიისას, რომელშიც მინისტრების მოადგილეები, დონორი ორგანიზაციების ხელმძღვანელი პირები და საქართველოს მთავრობის ადმინისტრაციის წარმომადგენლები მონაწილეობდნენ, საგარეო დახმარების საკოორდინაციო მექანიზმების გაუმჯობესების შესაძლებლობები განიხილეს. ასევე, დაიგეგმა თემატური საკოორდინაციო შეხვედრების ციკლი და განისაზღვრა კონკრეტული ვადები. ღონისძიებას თანათავმჯდომარეობდა გაეროს მუდმივი კოორდინატორი საქართველოში საბინე მახლი.

საპარლამენტო უმრავლესობის ლიდერის, მამუკა მდინარაძის განმარტებით, მალხაზ მაჩალიკაშვილის პარლამენტში არშეშვებაზე გადაწყვეტილება პარლამენტის თავმჯდომარემ მიიღო.

 

მისივე თქმით, ეს პროვოკაციების თავიდან ასაცილებლად მოხდა. მდინარაძის განცხადებით, "ნაციონალური მოძრაობის" წევრები პარლმენტში მალხაზ მაჩალიკაშვილთან ერთად რომ შევიდნენ, მეტი შანსია, რომ პროვოკაციაზე წავიდნენ.

 

"არჩილ თალაკვაძეს ამის უფლება აქვს შესაბამისი ბრძანებით, რომ როდესაც არსებობს გარკვეული რისკები უსაფრთხოებისა და პროვოკაციების კუთხით, პარლამენტის თავმჯდომარეს შეუძლია შეზღუდოს საშვების დაშვება და პარლამენტში ადამიანის შემოშვება. აქედან გამომდინარე მიიღო არჩილ თალაკვაძემ ეს გადაწყვეტილება და ვფიქრობ, სწორია.

 

ხედავთ, თუ როგორ პროვოკაციაზე მოდიან ის ადამიანები, რომლებიც ამ სპექტაკლებს გეგმავენ. ასეთ დროს მეტი შანსია, რომ მალხაზ მაჩალიკაშვილთან ერთად მათ მეტი მოინდომონ და მეტად პროვოკაციულები იყვნენ. მათ ამის საშუალება არ მივეცით. თინა ბოკუჩავას ვუთხარი, რომ თუ ბრიფინგის ჩატარება სურს ისე, რომ მალხაზ მაჩალიკაშვილი გვერდით დაიყენოს, ამის გაკეთება შეუძლია მას პარტიის ოფისში. ამას არ აკეთებს იმიტომ, რომ პარლამენტში მოაწყოს პროვოკაცია," - განაცხადა მდინარაძემ.

 

მისივე თქმით, ის თემირლან მაჩალიკაშვილის საქმეზე პარლამენტის დროებითი საგამოძიებო კომისიის შექმნის წინააღმდეგია. მდინარაძის განცხადებით, ფაქტობრივი გარემოებებიდან გამომდინარე, პროკურატურის გადაწყვეტილებაში ეჭვის შეტანის საფუძველი არ არსებობს.

 

"საგამოძიებო კომისიის შექმნას არათუ არ ვეთანხმები, არამედ ამის წინააღმდეგი ვარ. როდესაც სუს-ის წევრებთან ამ საქმეზე დახურული შეხვედრა შედგა, მაშინ შეუძლებელი მეგონა ამ შეხვედრიდან გამოსვლის შემდეგ კიდევ პოლიტიკური სპეკულაციების მოწყობა. თუმცა "ნაციონალურ მოძროაბას" შეუძლია, რომ ამაზეც კი ყოველგვარ მორალს მიღმა ისაუბროს. მათ იმ შეხვედრაზე ისეთი ინფორმაცია მიიღეს, რომლის შემდეგაც არავის ეგონა თუ კიდევ სპეკულირებას გააგრძელებდნენ. მათ პასუხგაუცემელი კითხვები მაშინ არ დარჩენიათ.

 

ზოგადად, ჩვენ მაჩალიკაშვილის საქმეზე ხისტი განცხადებების კეთებას ვერიდებით. ამის საფუძველი მხოლოდ ერთია - გარდაცვლილ ადამიანზე საუბარი არის უმძიმესი. კომისია მაშინ უნდა შეიქმნას, როდესაც არსებობს საეჭვო გარემოებები და როდესაც გამოსაძიებელია რაღაცა. ფაქტობრივი გარემოებებიდან გამომდინარე, პროკურატურის გადაწყვეტილებაში ეჭვის შეტანის საფუძველი არ გვაქვს," - განაცხადა მდინარაძემ.

 

შეგახსენებთ, რომ დღეს დილით მალხაზ მაჩალიკაშვილი და თინა ბოკუჩავა პარლამენტში ერთობლივი ბრიფინგის გამართვას გეგმავდნენ, თუმცა დაცვის თანამშრომლებმა მაჩალიკაშვილი შენობაში არ შეუშვეს.

 

პარლამენტის შენობასთან ადგილი ჰქონდა შეხლა-შემოხლასაც, რა დროსაც მაჩალიკაშვილი შეუძლოდ გახდა. სასწრაფო სამედიცინო დახმარების ბრიგადამ მას ადგილზე აღმოუჩინა დახმარება.

 

მალხაზ მაჩალიკაშვილს უმრავლესობიდან წამოსული დეპუტატებისთვის ინდივიდუალურად წერილების გადაცემა სურდა, რომლითაც იგი მისი შვილის საქმეზე საგამოძიებო კომისიის შექმნას ითხოვს.

მალხაზ მაჩალიკაშვილი არათუ პარლამენტში, არამედ სახელმწიფო დაწესებულებებში და ზოგადად, დაწესებულებებში არ უნდა დაუშვან ამ პერიოდში, ვიდრე სასამართლო არ მიიღებს გადაწყვეტილებას, - ამის შესახებ პარლამენტის პირველმა ვიცე - სპიკერმა გია ვოლსკიმ ჟურნალისტებთან განაცხადა, რითაც დღეს პარლამენტთან მომხდარ ინციდენტს გამოეხმაურა.

 

ამასთან, გია ვოლსკი მიიჩნევს, რომ თინა ბოკუჩავას ქმედებები დამაზიანებელია და სხვა ქვეყანაში შესაძლოა, „უფრო მკაცრი გადაწყვეტილებაც კი მიეღოთ''.

 

„საერთოდ, პარტიული ბრიფინგები ჩვენ არც ერთხელ არ ჩაგვიტარებია პარლამენტში, პარტიის ოფისში ტარდება, მაგრამ არსებობს განსაკუთრებული შემთხვევები. პარლამენტის წევრია თინა ბოკუჩავა, მას პარლამენტში შემოსვლის უფლება აქვს.

 

რაც შეეხება მაჩალიკაშვილს, სრულიად პრაგმატულად, ყოველგვარი ემოციის გარეშე, სამწუხაროდ, ემოციაც მახრჩობს ხოლმე, როცა ახალგაზრდა ადამიანის გარდაცვალებას, სიკვდილს და მით უმეტეს ესეთ ტრაგიკულ გარემოებებში ვხედავ, მაგრამ იმდენად თვალსაჩინოა იმ მასალაში წარმოდგენილი ფაქტები, რაც ტერორიზმს ეხება, რომ მე ვფიქრობ, მალხაზ მაჩალიკაშვილი არათუ პარლამენტში, არამედ სახელმწიფო დაწესებულებებში და ზოგადად, დაწესებულებებში არ უნდა დაუშვა ამ პერიოდში, ვიდრე არ მიიღებს სასამართლო შესაბამის გადაწყვეტილებას, რა დოზით არის ამ ადამიანის კავშირი იმ ფაქტებთან, რასაც ჰქვია ტერორისტული ჯგუფის გადმოსვლა საქართველოში და იმ ოპერაციისთვის მზადება, რომელსაც შეეძლო საქართველო სამუდამოდ მუხლებზე დაეყენებინა და დაემარცხებინა.

 

ეს ფაქტი მოხდა, რეალურია, კავშირები დადასტურებულია, ახლა ჯერი სასამართლოზეა, რამდენად არის ეს ადამიანი კავშირში იმ ტერორისტულ აქტივობებთან, რომელსაც ადგილი ჰქონდა ჩვენს დედაქალაქში. თინა ბოკუჩავას და სხვების პოზიცია ამ შემთხვევაში, ვფიქრობ, ემოციური არის, მინდა მჯეროდეს, რომ ემოციურია, მაგრამ ფაქტობრივად იმდენად დამაზიანებელია, რომ ნებისმიერ სხვა ქვეყანაში გაცილებით მკაცრი გადაწყვეტილებებიც მიეღოთ“, - განაცხადა გია ვოლსკიმ.

 

შეგახსენებთ, თინა ბოკუჩავა და მალხაზ მაჩალიკაშვილი საკანონმდებლო ორგანოში ბრიფინგის ჩასატარებლად შესვლას ცდილობდნენ, თუმცა, მალხაზ მაჩალიკაშვილი ადგილზე მობილიზებულია პოლიციამ არ შეუშვა, რის შემდეგაც მალხაზ მაჩალიკაშვილი წაიქცა და ცუდად გახდა. მას პირველადი სამედიცინო დახმარება სასწრაფო დახმარების ავტომობილში გაუწიეს.

განცხადებები, რომელსაც ჩვენ ვისმენთ, ცდება ყოველგვარ ჩვენს მეგობრულ ურთიერთობას. კატეგორიულად მიუღებელია ეს ტონი და ასეთი ტიპის განცხადებები, - ასე უპასუხა თბილისის მერმა კახა კალაძემ ჟურნალისტებს ამერიკელი კონგრესმენების წერილების სერიასთან დაკავშირებით დასმულ შეკითხვებს. როგორც კალაძემ აღნიშნა, სტრატეგიული პარტნიორი კანონმდებლები მეგობარ ქვეყანას ასე არ უნდა ესაუბრებოდნენ.

 

„განცხადებები, რომელსაც ჩვენ ვისმენთ ცდება ყოველგვარი ჩვენს მეგობრულ ურთიერთობას. იცით, რომ ამერიკა არის ჩვენი სტრატეგიული პარტნიორი ქვეყანა, შესაბამისად, სტრატეგიული პარტნიორის კანონმდებლები ასე არ უნდა ესაუბრებოდნენ მეგობარ ქვეყანას. მითუმეტეს, როდესაც საქმე ეხება ერთი საეჭვო რეპუტაციის მქონე კომპანიას. ჯერ კიდევ ჩემი მინისტრობის დროს არსებობდა ეს პრობლემა და ძალიან კარგად ვიცი რას წარმოადგენს ეს კომპანია. მხედველობაში მაქვს „ფრონტერა“. ჩვენ დავიწყეთ საარბიტრაჟო საქმის წარმოება და დარწმუნებული ვარ, კარგად იციან, რომ ისინი აუცილებლად წააგებენ ამ საქმეს, რის გამოც თავიანთი ლობიზმი გააძლიერეს. თუმცა, ჩვენ აუცილებლად დავიცავთ ჩვენი ქვეყნის სახელმწიფო ინტერესებს და აუცილებლად დავიცავთ ჩვენს კომპანიებს, როდესაც მართალი ვართ. ზუსტად ამიტომ არის საქმე არბიტრაჟში, განიხილება და დარწმუნებული ვარ, ნავთობის და გაზის კორპორაცია ამ დავაში გაიმარჯვებს. კატეგორიულად მიუღებელია ეს ტონი და კატეგორიულად მიუღებელია ასეთი ტიპის განცხადებები“, - განაცხადა კალაძემ.

თბილისში აალებადი ნივთიერებებით და მეორადი საბურავებით ვაჭრობა აიკრძალება. აღნიშნულის შესახებ თბილისის მერიამ კანონპროექტი მოამზადა.

 

როგორც დედაქალაქის ვიცე-მერმა, ირაკლი ხმალაძემ ჟურნალისტებს განუცხადა, უახლოეს დღეებში საკრებულო იმსჯელებს კონკრეტულ ადგილებზე, რასაც აკრძალვა შეეხება.

 

„კანონპროექტი მომზადებული და მიღებულია. ის ითვალისწინებს, რომ საკრებულომ წესი დაადგინოს და განსაზღვროს ადგილები, სად არის დასაშვები რეალიზაცია და სად არ არის დასაშვები. ეს წესიც მომზადების პროცესშია და უახლოეს პერიოდში იქნება წარდგენილი საკრებულოსთვის“, - განაცხადა ხმალაძემ.

 

კითხვაზე: შეეხება თუ არა აკრძალვა ელიავას ბაზრობის ტერიტორიას? ხმალაძემ განაცხადა, რომ ელიავას ბაზრობასთან დაკავშირებით ერთი ან ორი კვირის განმავლობაში გააკეთებენ განცხადებებს და გააცნობენ საზოგადოებას მათ პოზიციას.

 

„რაც შეეხება აალებად და გარემოს დამაბინძურებელი საქონლით ეკონომიკურ საქმიანობას, ეს თემა არ ეხება მხოლოდ ელიავას ბაზრობას და ეხება ყველა იმ ადგილს, სადაც ასეთი ტიპის საქონლით ვაჭრობა და გარემოს დაბინძურება, ასევე ნორმალური საცხოვრებლის პირობების დაზიანება ხდება“, - განაცხადა ხმალაძემ.

საკანონმდებლო ორგანოში ხმაურია. „ერთიანი ნაციონალური მოძრაობის“ წევრი თინა ბოკუჩავა პარლამენტში მალხაზ მაჩალიკაშვილის შეშვებას ითხოვს. ამასთან დაკავშირებით მას მამუკა მდინარაძესთან შეხვედრა ჰქონდა და განმარტებას სთხოვდა რის საფუძველზე არ უშვებენ მალხაზ მაჩალიკაშვილს პარლამენტში. აღნიშნული შეხვედრისას დეპუტატებს შორის სიტყვიერი დაპირისპირება მოხდა. მათ ერთმანეთს შეურაცხმყოფელი ფრაზებით მიმართეს.

 

როგორც მდინარაძემ ბოკუჩავას განუმარტა, მაჩალიკაშვილი პარლამენტში იმის გამო არ შეუშვეს, რომ პროვოკაციის საფრთხე თავიდან აეცილებინათ. მისივე თქმით, ამის თაობაზე გადაწყვეტილება პარლამენტის თავმჯდომარემ მიიღო.

 

„ნუ სპეკულირებ, გარდაცვლილ ადამიანს შენი პოლიტიკური მიზნებისთვის იყენებ და ეს არის სამარცხვინო. შენ ხარ მიშას „ტიტუშკა“. თქვენ ხართ პროვოკატორები და უზნეო ხალხი, მიშას მონები“, - მიმართა მდინარაძემ ბოკუჩავას.

 

თინა ბოკუჩავამ კი, თავის მხრივ, მდინარაძეს „მატყუარა და სამარცხვინო“ უწოდა.

 

„შენ მანდატს არ იმსახურებ. შენ ხომ არავინ არ ხარ, ჩვეულებრივი ჭანჭიკი ხარ“,-მიმართა თინა ბოკუჩავამ მდინარაძეს.

 

შეგახსენებთ, რომ დღეს დილით მალხაზ მაჩალიკაშვილი და თინა ბოკუჩავა პარლამენტში ერთობლივი ბრიფინგის გამართვას გეგმავდნენ, თუმცა დაცვის თანამშრომლებმა მაჩალიკაშვილი შენობაში არ შეუშვეს.

 

პარლამენტის შენობასთან ადგილი ჰქონდა შეხლა-შემოხლასაც, რა დროსაც მაჩალიკაშვილი შეუძლოდ გახდა. სასწრაფო სამედიცინო დახმარების ბრიგადამ მას ადგილზე აღმოუჩინა დახმარება.

ექსკლუზიური

არქივი

« « » » ივლისი 2019
ორშ სამ ოთხ ხუთ პარ შაბ კვი
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ამინდი

Tbilisi

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?