Global Press

Georgia

Global PressGlobal PressGlobal PressGlobal Press

USD
3.0651
EUR
3.5049
RUR
0.0431
GBP
3.8715

ჩინეთი თანახმაა, ჯანდაცვის მსოფლიო ორგანიზაციამ (WHO), რაც შეიძლება სწრაფად გაუგზავნოს საერთაშორისო ექსპერტები, რომ ახალი კორონავირუსის შესწავლა მოხდეს და გლობალურ დონეზე ეპიდემიის საწინააღმდეგო საპასუხო ზომები იქნეს მიღებული.

 

ორგანიზაციის სახელით გავრცელებულ განცხადებაში ნათქვამია, რომ აუცილებელია, სასწრაფოდ მოხდეს ვირუსის ადამიანიდან ადამიანზე გავრცელების უნარის შესწავლა, რომ სხვა ქვეყნების რჩევებით მომარაგება გახდეს შესაძლებელი.

 

შეგახსენებთ, დღეს ჩინეთის პრეზიდენტი კორონავირუსის ეპიდემიის საკითხზე ჯანდაცვის მსოფლიო ორგანიზაციის გენერალურ დირექტორს შეხვდა. აღნიშნული გადაწყვეტილება ამ შეხვედრის შემდგომი ნაბიჯია.

რუსეთი არ ასრულებს მის ვალდებულებებს და არღვევს რეზოლუციებს,- ამის შესახებ საქართველოს პრეზიდენტმა, სალომე ზურაბიშვილმა ევროსაბჭოს საპარლამენტო ასამბლეაზე უკრაინელი დეპუტატის კითხვის საპასუხოდ განაცხადა.

 

ოლექსეი გონჩარენკომ საქართველოს პრეზიდენტს ჰკითხა, დაუჭერს, თუ არა მხარს საქართველო რუსეთისადმი ახალ სანქციებს, მათ შორის იმის გამო, რომ მას აქვს საქართველოს ტერიტორიები ოკუპირებული.

 

„რუსეთი არ ასრულებს ვალდებულებებს და არღვევს რეზოლუციებს. ეს დიდი ისტორიაა, რასაც ჩვენ იმაზე უფრო ადრე განვიცდიდით, ვიდრე უკრაინა. პრობლემა, რომელზეც მსურს ყურადღება გავამახვილო არის ორმაგი სტანდარტები-არიან ქვეყნები, რომლებიც არ სცემენ პატივს ჩართულობას, სადაც მონიტორინგი არაა ისე ეფექტური, როგორც სხვაგან. რაც უფრო დიდები არიან ისინი, ნაკლებად ხდებიან სანქციების თუ სხვა გამკაცრებების ობიექტი. მე მინდა ამ ორგანიზაციას მოვუწოდო, რომ იყოს ერთნაირი სტანდარტი ყველა ქვეყნისთვის. ჩვენ პატივს ვცემთ ყველა შეთანხმებას, მათ შორის მე აღვნიშნე, რომ ჩვენ ცალმხრივად ვთქვით უარი ომზე. თუმცა, პასუხი არ მიგვიღია იმ ნაბიჯებზე, რომელიც გადავდგით“,-განაცხადა ზურაბიშვილმა.

ევროკავშირმა ყირიმში რუსეთის მიერ მხარდაჭერილი მოხელეები, ე.წ. ადგილობრივი არჩევნების ორგანიზების გამო, შავ სიაში შეიყვანა. სიაში ბოლოს დამატებულ 7 პიროვნებას შორის არის ყირიმის დე ფაქტო მთავრობის მეთაური იური გოცანიუკი.

 

შეგახსენებთ, ევროკავშირმა ყირიმის ნახევარკუნძულის ანექსიის გამო რუსეთს 2014 წლიდან სანქციები დაუწესა. შავ სიაში უკვე არის ყირიმში რუსეთის მმართველობასთან დაკავშირებული 177 ადამიანი და 44 ორგანიზაცია. სანქციების ფარგლებში, ევროკავშირში გაყინულია მათი ანგარიშები და შავ სიაში მყოფ ადამიანებს ევროკავშირის ტერიტორიაზე შესვლა ეკრძალებათ.

ევროსაბჭოს საპარლამენტო ასამბლეაში ვიზიტისას, საქართველოს პრეზიდენტმა სალომე ზურაბიშვილმა თავი აარიდა პასუხს კითხვაზე, რომელიც რუსეთის წინააღმდეგ ახალ სანქციებს უკავშირდებოდა. ამის შესახებ უკრაინული გამოცემა „ევროპეისკაია პრავდა“ იუწყება.

 

„გამოსვლისა და დეპუტატებთან ურთიერთობისთვის, ზურაბიშვილს, 60 წუთი ჰქონდა. როგორც წესი, უცხო ქვეყნის ლიდერები ამ დროის უმეტეს ნაწილს კითხვებზე პასუხისთვის იყენებენ. ამ ტრადიციის საპირისპიროდ, ზურაბიშვილმა 50 წუთი ისაუბრა, მინიმალური დრო კი კითხვებს დაუთმო. რუსეთის დასჯის საკითხზე დასმულ კითხვას, მან პასუხი მაინც არ გასცა“ ,- წერს გამოცემა.

 

მედიასაშუალების თანახმად, უკრაინის დელეგაციის წარმომადგენელმა ალექსეი გონჩარენკომ ზურაბიშვილს სთხოვა, აეხსნა, დაუჭერს თუ არა ოფიციალური თბილისი მხარს იდეას რუსეთის წინააღმდეგ ახალი სანქციების დაწესების შესახებ.

 

საქართველოს ლიდერმა თავი აარიდა არსებით კომენტარებს და აღნიშნა, რომ „რუსეთი მართლაც არ ასრულებს თავის ვალდებულებებს. პრობლემა იმაშია, რომ რაც უფრო დიდია სახელმწიფო, მით ნაკლებია მისდამი ყურადღება მონიტორინგის პროცედურების ფარგლებში“.

 

გამოცემა ასევე აღნიშნავს, რომ საქართველოს საგარეო საქმეთა მინისტრი დავით ზალკალიანი საპარლამენტო ასამბლეაზე გამოსვლისას, ასევე, თავს არიდებდა რუსეთის დასჯის ხსენებას საქართველოსა და უკრაინაში აგრესიის გამო.

საქართველოს პრეზიდენტმა, სალომე ზურაბიშვილმა, ევროსაბჭოს საპარლამენტო ასამბლეაზე სიტყვით გამოსვლის დროს ქართული ოცნების ლიდერი ბიძინა ივანიშვილი პრეზიდენტ ივანიშვილად მოიხსენია.

 

"რაც შეეხება კითხვებს პრეზიდენტ ივანიშვილის ბოლო განცხადებაზე, მე ვფიქრობ, რომ ჩვენ ყველა საქართველოში და პირადად მეც, მუდმივად ყალბი ახალი ამბებისა და დეზინფორმაციის წნეხის ქვეშ ვარ იმის შესახებ, თუ რა ვთქვი, ან არ ვთქვი,"- თქვა ზურაბიშვილმა.

 

ზურაბიშვილმა ეს სლოვაკი პარლამენტარის, მარტინ პოლიაჩიკის კითხვის პასუხად თქვა, რომელმაც პრეზიდენტს 2019 წლის დეკემბერში Facebook-ის მიერ ქართულ ოცნებასთან დაკავშირებული, ანტი-დასავლური პროპაგანდის გამავრცელებელი ანგარიშების წაშლის ფაქტი შეახსენა. პოლიაჩიკმა ზურაბიშვილს ჰკითხა, რა გაკეთდა ამის საპასუხოდ.

 

ზურაბიშვილს მიმართვისთვის ერთი საათი ჰქონდა გამოყოფილი. აქედან, ნაწილი მის სიტყვას უნდა დათმობოდა, შემდეგ ზურაბიშვილისთვის პარლამენტარებს შეკითხვები უნდა დაესვათ, მას კი პასუხი გაეცა.

 

ზურაბიშვილმა კი 50 წუთის განმავლობაში ისაუბრა, კითხვა-პასუხისთვის კი 10 წუთი დატოვა. სიტყვის დასრულების შემდეგ, ბრიტანელმა დეპუტატმა, ჯონ ჰაუელმა დროის უკმარისობის გამო უკმაყოფილება გამოთქვა და დროის დამატება მოითხოვა, რაზეც თანხმობა მიიღო.

 

ზურაბიშვილს კრიტიკული შეკითხვები დაუსვეს, რომლებიც, მათ შორის, ყალბი ინფორმაციის გავრცელებას, საქართველოს საგარეო პოლიტიკასა და გავრილოვის ღამეს ეხებოდა.

„ეიპიემ ტერმინალს ფოთი“ აგრძელებს ღრმაწყლოვანი პორტის მშენებლობის პროექტზე აქტიურ მუშაობას , - ამის შესახებ „ეიპიემ ტერმინალს ფოთის” მიერ გავრცელებულ განცხადებაშია აღნიშნული.

 

„ეიპიემ ტერმინალს ფოთში” იმედს გამოთქვამენ, რომ ყველა საჭირო ნებართვას დროულად მიიღებენ და 2022 წლის მეორე კვარტლის ბოლოს ღრმაწყლოვანი პორტის მშენებლობის პირველი ფაზა დასრულდება.

 

კომპანიის განცხადებით, “ეიპიემ ტერმინალსი“ მიჰყვება ახალი ღრმაწყლოვანი პორტის განვითარების გეგმას პირველ ფაზაში 250 მილიონ დოლარზე მეტი კერძო კაპიტალის და მეორე ფაზაში დამატებით სოლიდური მოცულობის თანხის ინვესტირებით, ნავსადგურის ინფრასტრუქტურისა და ტექნიკური ბაზის მასშტაბური განვითარებისათვის.

 

„აღნიშნული ინვესტიცია სტრატეგიულად მნიშვნელოვან ფოთის საზღვაო ნავსადგურში არის ნათელი მაგალითი ჩვენი ერთგულებისა და რწმენისა საქართველოს, როგორც ქვეყნისა და ცენტრალური აზიის მიმართულებით სატრანსპორტო კორიდორის განვითარების ძალისხმევისადმი. ნავსადგურის გაფართოების პროექტი, რომლის ხარჯიც უმნიშვნელოა ქართველი გადასახადების გადამხდელებისათვის, იქნება ქვეყნისა და რეგიონის ეკონომიკის განვითარების საწინდარი, შესთავაზებს რა ჩვენს მომხმარებლებს საუკეთესო ლოგისტიკურ მომსახურებებს და გამოიყენებს მსოფლიო დონის კომპანიის გამოცდილებასა და რესურსებს, ასევე, შექმნის ათასზე მეტ დამატებით სამუშაო ადგილს და სხვადასხვა ბიზნეს შესაძლებლობას ნავსადგურსა თუ მის გარეთ“, - განმარტავს კელდ ქრისტენსენი, „ეიპიემ ტერმინალს ფოთის“ გენერალური დირექტორი.

 

კომპანიის განცხადებით, ფოთის საზღვაო ნავსადგურის გაფართოების გეგმა, რომელიც საქართველოს მთავრობას წარედგინა, მოიცავს მშენებლობისა და განვითარების ორ ეტაპს. პირველი ეტაპი გულისხმობს 1,700 მეტრი სიგრძის მოლოსა და მრავალფუნქციური ნავმისადგომის მოწყობას ზომებით 400მ. [სიგრძე] - 13.5მ. [სიღრმე]. აღნიშნულ ნავმისადგომს შეეძლება 9,000 TEU-მდე მოცულობის გემების მიღება და ის შექმნის ნაყარი ტვირთებისა და დამატებით 150,000 TEU-ს დამუშავების შესაძლებლობას. მეორე ეტაპით გათვალისწინებულია 300 მეტრი სიგრძის საკონტეინერო ნავმისადგომის აშენება, რომელზეც 3 თანამედროვე STS (გემი-ნავმისადგომი) ტიპის ამწე განთავსდება. აღნიშნული ინფრასტრუქტურის წყალობით გაორმაგდება ფოთის საზღვაო ნავსადგურის საკონტეინერო გამტარუნარიანობა და გადააჭარბებს 1 მილიონ TEU-ს წელიწადში.

 

„დარწმუნებული ვართ მთავრობის მხარდაჭერაში და გავაგრძელებთ ჩვენს თანამშრომლობას ოფიციალურ სტრუქტურებთან, რათა ფოთის საზღვაო ნავსადგურმა შეინარჩუნოს კავკასიისა და მის მიღმა მდებარე რეგიონის სატრანსპორტო კარიბჭის სტატუსი“ ,- დასძინა კელდ ქრისტენსენმა.

 

მშენებლობის სავარაუდო ვადები განისაზღვრება 24-30 თვით, რაც მოითხოვს მჭიდრო თანამშრომლობას საქართველოს მთავრობასთან და მათ მხარდაჭერას, რათა ყველა საჭირო ნებართვა მიღებულ იქნას დროულად. და თუ ეს ასე იქნება, რისი მოლოდინიც გვაქვს, პროექტის პირველი ფაზა დასრულდება 2022 წლის მეორე კვარტლის ბოლოს.

 

მათივე ინფორმაციით, “ეიპიემ ტერმინალსი“, “ეი. პი. მოლერ–მერსკის“ ჯგუფის წევრი გლობალური კომპანიაა, რომელიც მსოფლიოში წარმოდგენილია 74 მოქმედი პორტების და ტერმინალების ქსელით და 117 სახმელეთო მომსახურების ოპერაციებით, რომელსაც 58 ქვეყანაში ახორციელებს. „მერსკი“ საქართველოში წარმოდგენილია 1994 წლიდან, როცა მისი შვილობილი კომპანია „სილენდი“ (SeaLand) პირველად ჩაერთო ფოთის საზღვაო ნავსადგურის გავლით ჰუმანიტარული ტვირთების გადაზიდვაში.

ქალაქ უხანიდან საქართველოს მოქალაქეების გადმოსაყვანად სამოქმედო გეგმის შემუშავებაზე პარლამენტში მსჯელობენ. შეხვედრას ჯანდაცვის კომიტეტის თავმჯდომარე დიმიტრი ხუნდაძე, საგარეო საქმეთა მინისტრის მოადგილე, ჯანდაცვის მინისტრის მოადგილე, დაავადებათა კონტროლის ცენტრის ხელმძღვანელი და საგანგებო სიტუაციების მართვის წარმომადგენელი ესწრებიან. შეხვედრა დახურულ ფორმატში მიმდინარეობს.

 

როგორც შეხვედრის დაწყებამდე ჯანდაცვის კომიტეტის თავმჯდომარე დიმიტრი ხუნდაძემ ჟურნალისტებს განუცხადა, საქართველო კვლავ დაბალი რისკის ქვეყნებს შორისაა. მისივე თქმით, მოქალაქეების საქართველოში გადმოყვანა ყველა წესის, მათ შორის უსაფრთხოების და საკარანტინო წესების დაცვით მოხდება.

 

„საქართველო რჩება დაბალი რისკის ქვეყნებს შორის. ეპიდემიის გავრცელების რისკი პრაქტიკულად არ არსებობს, მაგრამ თეორიული რისკები ცხადია, არის. სწორედ ამიტომ, პრევენციული ღონისძიებები ხორციელდება ჯანდაცვის მსოფლიო ორგანიზაციის რეკომენდაციების მიხედვით. დღევანდელი შეხვედრა დაიგეგმა იმისათვის, რომ გავეცნოთ როგორია ეპიდცენტრში ეპიდემიოლოგიური სიტუაცია, შევაფასოთ როგორ ხორციელდება პრევენციული ღონისძიებები ჩვენს ქვეყანაში და განვიხილოთ ქალაქ ვუხანიდან ჩვენი მოქალაქეების უსაფრთხოდ გადმოყვანის შესაძლო ვარიანტი უსაფრთხოების ყველა წესის - როგორც ჯანდაცვის მსოფლიო ორგანიზაციის რეკომენდაციების, ასევე საკარანტინო წესების დაცვით. ჩინეთში მყოფი მოქალაქეების საქართველოში შემოყვანა მოხდება აქ მყოფი მოქალაქეების უსაფრთხოების გარანტიის დაცვით. ჩვენ დღეს ამ სამოქმედო გეგმას და კონკრეტულ ნაბიჯებს განვიხილავთ,"- განაცხადა ხუნდაძემ.

 

ჟურნალისტების კითხვაზე, შეხვედრის დახურულ ფორმატში წარმართვის მიზეზი ხომ არ არის მოსახლეობაში პანიკის გაჩენის რისკის თავიდან არიდება, ხუნდაძე პასუხობს, რომ პანიკის საფუძველი არ არსებობს, თუმცა პროფესიული საკითხები დახურულ ფორმატში უნდა იქნას განხილული.

ჩვენ ყველა საქართველოში და მათ შორის მეც ვართ მუდმივად „ფეიქ ნიუსების“ ზეწოლის ქვეშ - ამის შესახებ საქართველოს პრეზიდენტმა, სალომე ზურაბიშვილმა ევროსაბჭოს საპარლამენტო ასამბლეის სხდომაზე, სლოვაკი დეპუტატის კითხვის საპასუხოდ განაცხადა.

 

მარტინ პოლიაჩიკმა პრეზიდენტს შეკითხვა „ფეისბუქის“ მიერ გაუქმებული ასობით გვერდისა და ანგარიშის შესახებ დაუსვა, რომლებიც ანტი-დასავლურ პროპაგანდას ეწეოდნენ და „სავარაუდოდ მთავრობასთან იყვნენ დაკავშირებულნი“.

 

„ჩვენ ყველა საქართველოში და მათ შორის მეც ვართ მუდმივად „ფეიქ ნიუსების“ ზეწოლის ქვეშ. ვრცელდება ინფორმაცია, თუ რა ვთქვი და რა არა. ვრცელდება ინფორმაცია, სადაც ნაწილობრივ არის გადმოცემული თუ რა ვთქვი. დიახ, სოციალური მედია სავსეა სხვადასხვა ანგარიშებით და პირადად ჩემი გვერდები ხდება ხოლმე ბოტების თავდასხმის მსხვერპლი. ასეთი რაღაცები დარწმუნებული ვარ თქვენს ქვეყნებშიც ხდება. ახლა ჩვენ გვაქვს არჩევანი, ან ვცეთ პატივი სოციალური მედიის თავისუფლებას, ანდა დავიწყოთ მისი შეზღუდვა. ჩვენ არ ვართ იმ ქვეყნებს შორის, რომლებიც მსგავს შეზღუდვებს აწესებენ. სხვათა შორის, მე, ვარ ერთ-ერთი ინიციატორი, რომ ჩვენი პრეზიდენტობის დროს მოხდეს ბრძოლა „ფეიქ ნიუსებისა“ და სიძულვილის ენის წინააღმდეგ, რადგან ეს ყველაფერი ერთიანობაში მოდის. ჩვენ შევდივართ საპარლამენტო არჩევნების ფაზაში, რომელიც ოქტომბერში გაიმართება. ჩვენ გვყავს ძალიან ძლიერი მეზობელი, რომელსაც შეუძლია გამოიყენოს და ასე იქცევა კიდეც სხვა ქვეყნებში დეზინფორმაცია და ყალბი ამბები. ჩვენ გარკვეული ფორმა გვესაჭიროება, რომლითაც ასევე პატივს ვცემთ გამოხატვის თავისუფლებას, ეს რთული საკითხია. მე ზად ვარ მხარი დავუჭირო ნებისმიერ მცდელობას, რომელიც მიმართული იქნება ამ საკითხის წინააღმდეგ ბრძოლისკენ“,-განაცხადა ზურაბიშვილმა.

საქართველოს პრეზიდენტმა, სალომე ზურაბიშვილმა ევროსაბჭოს საპარლამენტო ასამბლეის სხდომაზე 2019 წლის 20 ივნისის ღამეზე ისაუბრა და აღნიშნა, რომ „საფრთხე პარლამენტის აღების“ მას შემდეგ დაიწყო, რაც მისი თავმჯდომარე გადადგა.

 

ამით საქართველოს პრეზიდენტმა, პოლონელი დეპუტატის ალექსანდერ პოსიეჟის კითხვის პასუხად განაცხადა, რომელმაც ზურაბიშვილს ოპოზიციის ლიდერების დევნისა და საქართველოში მიმდინარე „შემაშფოთებელი ტენდენციების“ შესახებ კითხვა დაუსვა.

 

„საქართველოს ბევრმა მეგობარმა, მათ შორის აშშ-ის კონგრესსა და ევროპარლამენტში გააჟღერეს წუხილი და შეშფოთება იმ ტენდენციების გამო, რომელსაც საქართველოში აქვს ადგილი, განსაკუთრებით ე.წ. გავრილოვის ღამის შემდეგ. ბატონმა ივანიშვილმა, რომელიც „ქართული ოცნების“ თავმჯდომარეა, გამოაქვეყნა განცხადება, რომ კიდევ ბევრი ოპოზიციური ლიდერის დაჭერა მოხდებოდა“,-განაცხადა დეპუტატმა.

 

„რაც შეეხება გავრილოვის საკითხს, ჩემი აზრით, ის ორ ნაწილად უნდა გავყოთ. პირველად იყო სპონტანური გაღიზიანება, რომ რუსი პარლამენტარები იმყოფებოდნენ საქართველოს პარლამენტში და წარმოთქვამდნენ გარკვეულ სიტყვებს, რომლებიც არ იყო მისაღები ჩვენი ქვეყნისთვის. საუბარია ქვეყანაზე, რომელსაც აქვს ჩვენი ტერიტორიების 20% ოკუპირებული. მე და არავინ არ ეთანხმება იმ ფაქტს, რომ ვინმეს ცემა შეიძლება, თუმცა ზოგმა თავიც უნდა შეიკავოს. მეორე ნაწილი ეხება როცა ბატონი გავრილოვი საქართველოდან წავიდა. იმ ფაქტის შემდეგ, როცა საქართველოს პარლამენტის თავმჯდომარე გადადგა, რადგან მან აიღო პასუხისმგებლობა ამ ინციდენტების გამო. ამის შემდეგ დაიწყო მეორე ეტაპი, მეორე ფაზა, რომელმაც საფრთხე შეუქმნა პარლამენტს, რადგანაც იყო აშკარა მცდელობა, რომ მასზე კონტროლი დაემყარებინათ. მსგავსი განცხადებები გააჟღერეს კიდევაც გარკვეულმა ლიდერებმა. მე მაქვს ბევრ ქვეყანაში წარსული და არ ვიცი არც ერთი ევროპის ქვეყანა, რომელშიც მიღებული იქნებოდა პარლამენტში ძალისმიერი შეჭრა და მეტიც-როცა ჩვენ ვიცით, რომ ქვეყნის 20% ოკუპირებულია და 40 კილომეტრში რუსები იმყოფებიან, ვიცით რა მარტივად შეუძლიათ რუსებს დესტაბილიზაცია ქვეყანაში შესასვლელად გამოიყენონ“,-განაცხადა ზურაბიშვილმა.

საქართველოს პრეზიდენტმა, სალომე ზურაბიშვილმა ევროსაბჭოს საპარლამენტო ასამბლეაზე ევროპარლამენტის დეპუტატის, ფრენკ შვაბეს კითხვას უპასუხა, რომელიც საქართველოში LGBT თემის უფლებების დაცვას ეხებოდა.

 

შვაბემ ზურაბიშვილს ჰკითხა, თუ რა ზომების გატარება შეუძლია სახელმწიფოს და თავად პრეზიდენტს, რომ ქვეყანაში არსებული ვითარება ამ მიმართულებით შეიცვალოს.

 

„არ მიმაჩნია, რომ ეს თემა უნდა გავაზვიადოთ. ცენტრალური დისკრიმინაცია არც ჩემი და არც სხვა ადმინისტრაციის პირობებში არ ყოფილა. არის ინდივიდუალური შემთხვევები. შემთხვევები როცა შეიქმნა პრობლემები საჯარო დემონსტრაციების მიმართ, რომელიც საზოგადოების გარკვეულმა ნაწილმა წახალისებად აღიქვა. ჩვენ ვპროგრესირებთ ამ მიმართულებით და ვუზრუნველვყოფთ სხვადასხვა ჯგუფების უსაფრთხოებას. ვფიქრობ, რომ უახლოეს მომავალში მსგავსი პროგრესი გაგრძელდება“,-განაცხადა ზურაბიშვილმა.

მოსამართლეების შერჩევის პროცესი დემოკრატიულ გარემოში მიმდინარეობდა ,- ამის შესახებ საქართველოს პრეზიდენტმა ევროსაბჭოს საპარლამენტო ასამბლეაზე ფრანგი დეპუტატის, მარია დალოოზის კითხვის საპასუხოდ განაცხადა.

 

ცნობისთვის, ევროპული სახალხო პარტიის წევრმა საქართველოს პრეზიდენტს შეკითხვა სასამართლო სისტემასა და უზენაესი სასამართლოს მოსამართლეების დანიშვნის საკითხზე დაუსვა.

 

მისი თქმით, აღნიშნულმა პროცესებმა დიდი კრიტიკა დაიმსახურა.

 

„რა ზომების მიღებას აპირებს საქართველო, რომ უზრუნველყოს სასამართლო სისტემის დამოუკიდებლობა?“-განაცხადა დალოოზმა.

 

„მოსამართლეების არჩევის პროცესი დემოკრატიულ გარემოში მიმდინარეობდა. ყველას ჰქონდა შესაძლებლობა ეყურებინა სატელევიზიო შეკითხვებისთვის და პასუხებისთვის, თუმცა ამავდროულად გაჩნდა გარკვეული კითხვები კრიტერიუმებთან და ზოგიერთი მოსამართლის კომპეტენციასთან დაკავშირებით. ჩვენ არ უნდა დაგვავიწყდეს სად ვიმყოფებით, ჩვენ ვართ ქვეყანა ყოფილი საბჭოთა სისტემის ქვეყანა, შემდეგ პოსტ საბჭოთა პერიოდი გავიარეთ, რომლის დროსაც სასამართლო სისტემა სრულიად დისკრედიტირებული იყო. ჩვენ ახლა ამ ყველაფრიდან გამოვდივართ. მე ვფიქრობ, კრიტერიუმები გაუმჯობესდება და ახლა ჩვენ ვდგამთ წარმატებულ ნაბიჯებს, რომ გავაუმჯობესოთ ჩვენი სასამართლო სისტემა“,-უპასუხა სალომე ზურაბიშვილმა კითხვაზე.

დამოუკიდებლობის შემდეგ საქართველომ საკუთარ ტერიტორიაზე თავისი წილი დაძაბულობა, კონფლიქტი და ომი გადაიტანა. ამ კონტექსტში ის კი არ უნდა გაგვიკვირდეს, რომ საქართველომ ჯერ ვერ მიაღწია ყველა მიზანს, უნდა გაგვიკვირდეს ის, თუ რამდენს მიაღწია მან ამ პირობებში, - ამის შესახებ საქართველოს პრეზიდენტმა სალომე ზურაბიშვილმა ევროსაბჭოს საპარლამენტო ასამბლეაზე სიტყვით გამოსვლისას განაცხადა.

 

მისივე განმარტებით, გასაოცარია დემოკრატიის ის დონე, რასაც 70- წლიანი საბჭოთა მმართველობის შემდეგ საქართველომ მიაღწია.

 

„საუკუნეების განმავლობაში საქართველო წარმოადგენდა ევროპის აღმოსავლეთ საზღვარს, რომელიც აღმოსავლეთსა და დასავლეთს - აზიასა და ევროპას აკავშირებდა. საუკუნეების განმავლობაში, საქართველო იზიარებდა და იცავდა თავისუფლებისა და შემწყნარებლობის იმავე ღირებულებებს, რომელიც ამ ორგანიზაციის მიზნებს წარმოადგენს.

 

დამოუკიდებლობის შემდეგ, საქართველომ საკუთარ ტერიტორიაზე თავისი წილი დაძაბულობა, კონფლიქტი, ომი გადაიტანა; დაიძაბა მდგომარეობა ჩვენს რეგიონში; გლობალურმა გამოწვევებმა ჩვენამდეც მოაღწიეს. ამ კონტექსტში ის კი არ უნდა გაგვიკვირდეს, რომ საქართველომ ჯერ ვერ მიაღწია ყველა მიზანს, რეფორმების პროცესშია და პროგრესი უნდა გვაჩვენოს, - უნდა გაგვიკვირდეს ის, თუ რამდენს მიაღწია მან ამ პირობებში. გასაოცარია ამ პატარა ქვეყნის მდგრადობა; გასაოცარია დემოკრატიის ის დონე, რაც 70- წლიანი საბჭოთა მმართველობის შემდეგ იქნა მიღწეული; გასაოცარია მისი შესაძლებლობა - ოკუპაციის მიუხედავად, შეინარჩუნოს სტაბილურობა და მშვიდობა; გასაოცარია მისი სწრაფვა დემოკრატიისკენ და ევროპული ღირებულებების დაცვა. საქართველოში ვერ დამკვიდრდა ექსტრემიზმი, გარე მტრებმა იზოლაციაში ვერ მოგვაქციეს”,-განაცხადა სალომე ზურაბიშვილმა.

 

როგორც ქვეყნის პრეზიდენტმა სიტყვით გამოსვლისას აღნიშნა, 21-ე საუკუნემ ახალი გამოწვევები წარმოაჩინა, რომლებსაც ვერც ერთი სახელმწიფო მარტო ვერ გაუმკლავდება. ესენია: კლიმატის ცვლილება, ხანდაზმული მოსახლეობა, მიგრაცია, ციფრული რევოლუცია და პოპულიზმი/პოლარიზაცია.

 

„გამოწვევების დასაძლევად ჩვენ ყველა მრავალმხრივ ფორმატში უნდა გავერთიანდეთ. მთელი ძალისხმევით უნდა განვსაზღვროთ, რა არის გასაკეთებელი. უნდა დავდოთ პირობა, რომ მხოლოდ დიალოგით გადავწყვეტთ მათი გადაჭრის გზებს. უნდა ვუზრუნველყოთ, რომ ყველა ჩვენი გადაწყვეტილება და ქმედება დაეფუძნოს დემოკრატიის, ადამიანის უფლებებისა და კანონის უზენაესობის პრინციპებს. თითოეული ჩვენგანის მიზანდასახულობა გააძლიერებს ევროპის საბჭოს, ეფექტიანს გახდის მის ინსტიტუტებს და წარმატებას მოუტანს მის წევრებს”,-აღნიშნა ზურაბიშვილმა.

ექსკლუზიური

არქივი

« « » » ივლისი 2019
ორშ სამ ოთხ ხუთ პარ შაბ კვი
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ამინდი

Tbilisi

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?