Global Press

Georgia

Global PressGlobal PressGlobal PressGlobal Press

USD
2.9275
EUR
3.2445
RUR
0.0438
GBP
3.5385

მესმის იმ ადამიანების, ვინც არ იცის, რას ნიშნავს ფასეულობებისა და მორალური სტანდარტებისთვის თანამდებობის დათმობა, - ამის შესახებ იურიდიული კომიტეტის ჯერ კიდევ თავმჯდომარე ეკა ბესელიამ პარლამენტის თავმჯდომარე ირაკლი კობახიძესთან შეხვედრის დასრულების შემდეგ ჟურნალისტებს განუცხადა. მისი თქმით, პოლიტიკაში არიან ადამიანები, ვისაც მორალური კრიტერიუმების დაცვას კომფორტი და თანამდებობა ურჩევნია. მან კიდევ ერთხელ გააკეთა განმარტება თანამდებობის დატოვების მიზეზთან დაკავშირებით და აღნიშნა, რომ ეს გადაწყვეტილება რა მიზეზით მიიღო, მასზე უკეთ არავინ იცის.

 

რაც შეეხება გუნდის შიგნით არსებულ შესაძლო დაპირისპირებას, ბესელიამ განაცხადა, რომ ის არ აპირებს გუნდის მიმართ საჯარო კრიტიკას, თუმცა, მისივე თქმით, თუ არასწორი განცხადებები გაკეთდება, მას მოუწევს პასუხის გაცემა და ეს პასუხი არ იქნება ტკბილი.

 

"ჩემი ყველა განცხადება არის ძალიან მოზომილი, კორექტული და ეთიკის ფარგლებში. ცალკეული რამდენიმე განცხადება ჩვენი უმრავლესობის წევრთაგან არ იყო კორექტული და ამაზე, რა თქმა უნდა, რეაქცია მქონდა. უმჯობესია ეს დასრულდეს. მე რა გადაწყვეტილება რა მიზეზით მივიღე, ეს ჩემზე უკეთესად არავინ იცის. ამიტომ მგონია უკეთესია, ახლა საჯარო ინტერესზე ვიფიქროთ. მე არ მჩვევია და არასოდეს გამიკეთებია გუნდის მიმართ კრიტიკული განცხადებები საჯაროდ იმიტომ, რომ ამის სივრცე მაქვს შიგნით და ვერავინ დამიშლის ვთქვა, რაც მინდა, რაც არ მომწონს და რაც არ მიმაჩნია სწორად. ამის პრობლემა არ მაქვს. არც მომავალში ვაპირებ ვისაუბრო იმაზე, რაც გუნდის შიგნით ხდება, მაგრამ თუ ისეთი გამონათქვამები იქნება, რომელიც არ იქნება რეალური და მართალი, მე მომიწევს ამაზე პასუხის გაცემა და ჩემი პასუხი არ იქნება ტკბილი. ასე რომ, ჯობია, ამ თემებზე ვილაპარაკოთ შიგნით.

 

მიზეზების ძებნა სადმე სხვაგან არ არის მართებული. ვთქვი ის, რაც იყო რეალობა. ახალი ვერსიების შემოტანა და ახალი ვერსიების გაჩენა მესმის კარგად, ეს არის ერთგვარი მეთოდი. ასევე, მესმის იმ ადამიანების, ვინც არ იცის, რას ნიშნავს ფასეულობებისთვის და მორალური სტანდარტებისთვის თანამდებობის დათმობა. მათ რომ უკვირთ ასეთი გადაწყვეტილება რატომ შეიძლება მიიღო, ასეთი ადამიანებისაც მესმის იმიტომ, რომ არიან პოლიტიკაში ადამიანები, ვისაც მორალური კრიტერიუმების დაცვას კომფორტი და თანამდებობა ურჩევნია. ნებისმიერ ადამიანს აქვს თავისი არჩევანი და ადამიანის ღირსება არის მის არჩევანში. დამიტოვეთ მე ამ არჩევანის უფლება“,- განაცხადა ეკა ბესელიამ.

"მიუხედავად იმისა, რომ შეიძლება განსხვავებული მოსაზრებები გვქონდეს მე და ირაკლი კობახიძეს, ეს არანაირად არ მიშლის ხელს, რომ მნიშვნელოვან საკითხებზე ვისაუბრო“,- ამის შესახებ იურიდიულ საკითხთა კომიტეტის ჯერ კიდევ თავმჯდომარე ეკა ბესელიამ პარლამენტის თავმჯდომარე ირაკლი კობახიძესთან შეხვედრის დასრულების შემდეგ განაცხადა.

 

ბესელიას თქმით, შეხვედრაზე საუბარი შეეხო რამდენიმე მნიშვნელოვან თემას, მათ შორის მისი გადადგომის შემდეგ წარმოქმნილ პროცედურულ საკითხებს.

 

"მიუხედავად იმისა, რომ შეიძლება განსხვავებული მოსაზრებები გვქონდეს მე და ირაკლი კობახიძეს, ეს არანაირად არ მიშლის ხელს, რომ მნიშვნელოვან საკითხებზე ვისაუბრო. აქ საქმე ეხება საჯარო ინტერესსა და პრლამენტის მუშაობას, რომელიც არ შეიძლება შეფერხებული იყოს იმის მიუხედავად, ვის რა განწყობა აქვს ერთმანეთის მიმართ. შეხვედრაზე ვისაუბრეთ რამდენიმე საკითხზე. მათ შორის არის თემები, რომელიც მე მიმყავდა, როგორც კომიტეტის თავმჯდომარეს და არის საკითხები, რომელიც პირადად მე უნდა მივიყვანო ბოლომდე. ასევე, არის საკითხები, რომელიც შესაძლებელია, რომ გადავაბარო იმ ადამიანს, ვინც შეასრულებს კომიტეტის თავმჯდომარის მოვალეობას", - განაცხადა ბესელიამ.

 

როგორც მან აღნიშნა, მას და ირაკლი კობახიძეს იურიდიულ საკითხთა კომიტეტის თავმჯდომარის პირველ მოადგილესთან დაკავშირებით განსხვავებული შეხედულებები აქვთ. როგორც ცნობილია, ბესელია გედევან ფოფხაძის კანდიდატურას უჭერს მხარს. ბესელიას თქმით, ორშაბათს ბიუროს უკვე ექნება მისი გადადგომის შესახებ განცხადება.

 

"დროებით პირველი მოადგილის საკითხთან დაკავშირებით ჩვენ განსხვავებული მოსაზრებები გვაქვს. მე დავასახელე გედევან ფოფხაძის კანდიდატურა და წინა სხდომა გადაიდო, არ დასრულებულა კენჭისყრით. ეს სხდომა უნდა დასრულდეს. ბიუროს მიუვა თუ არა ჩემი განცხადება, იურიდიული ფაქტი შედგება. ასე რომ, ორშაბათს ბიუროს სხდომას ჩემი განცხადება ექნება გადადგომის თაობაზე. იქამდე ეს სხდომა დასასრულებელია. ამიტომ შეხვედრაზე ამ პროცედურებზეც ვსაუბრობდით. შევჯერდით, რომ ბიუროს სხდომამდე კიდევ ერთი კონსულტაცია იქნება საჭირო", - განაცხადა ეკა ბესელიამ.

 

ჟურნალისტების კითხვაზე, ვის კანდიდატურას უჭერს მხარს ირაკლი კობახიძე, ბესელიამ უპასუხა, რომ ამაზე მისი მხრიდან საუბარი არაკორექტული იქნება. ამასთან, კითხვაზე, გაიჟღერა თუ არა შეხვედრაზე ანრი ოხანაშვილის გვარმა, ბესელიამ აღნიშნა, რომ მისმა გვარმა ბევრჯერ გაიჟღერა ბოლო დღეებშიც და მანამდეც.

 

"უმჯობესია, მან თავად ისაუბროს ამაზე. არ არის კორექტული, რომ მე მის ნაცვლად ვისაუბრო. საერთოდ ამ დღეებში ხშირად ისმის ოხანაშვილის გვარი და უფრო ადრეც ისმოდა", - განაცხადა ბესელიამ.

სირიის არმიის შენაერთები ქალაქ მანბიჯში შევიდნენ, - ნათქვამია სირიის შეიარაღებული ძალების გენერალური შტაბის წარმომადგენლის განცხადებაში.

 

სირიის სამთავრობო ძალებმა ქალაქზე კონტროლი დაამყარეს და სირიის ეროვნული დროშა აღმართეს.

 

„სირიის არმიის ჯარისკაცები მანბიჯში შევიდნენ მოსახლეობის მოწოდების საპასუხოდ და ქვეყნის მთელ ტერიტორიაზე სახელმწიფო სუვერენიტეტის აღდგენის ამოცანის შესაბამისად. სირიის არმია მანბიჯისა და მიმდებარე რეგიონის მოსახლეობის უსაფრთხოებას უზრუნველყოფს“, - ნათქვამია განცხადებაში.

 

შეგახსენებთ, რომ აქამდე „ეროვნული თავდაცვის ძალებმა“ (ქურთული „დემოკრატიული პარტიის“ შეიარაღებული ფრთა) მზაობა გამოხატეს მათ მიერ კონტროლირებადი ტერიტორიები დამასკოსთვის გადაეცათ.

 

„სამთავრობო ძალებს მოვუწოდებთ კონტროლი დაამყარონ იმ ტერიტორიებზე, რომლებსაც ჩვენი ძალები ტოვებენ, კერძოდ, მანბიჯზე და დაიცვან ეს რაიონები თურქეთის შემოჭრისგან“, - განაცხადეს ქურთულმა დაჯგუფებებმა.

აშშ-ს პრეზიდენტი დონალდ ტრამპი აშშ-ს სამხრეთ საზღვრის სრული ჩაკეტვის შესაძლებლობას არ გამორიცხავს.

 

„იძულებული ვიქნებით სრულად ჩავკეტოთ სამხრეთ საზღვარი თუ ობსტრუქციონისტი „დემოკრატები“ არ მოგვცემენ ფულს კედლის მშენებლობის დასრულებაზე და არ მოგვცემენ საშუალებას სულელური საიმიგრაციო კანონები შევცვალოთ, რომელიც ტვირთად აწევს ჩვენს ქვეყანას. დაუჯერებელია, რომ შეიძლება არსებობდეს პრეზიდენტი და კონგრესი, რომელმაც ეს დაამტკიცა!“ - დაწერა აშშ-ს პრეზიდენტმა „ტვიტერის“ საკუთარ გვერდზე.

 

შეგახსენებთ, რომ აშშ-ს პრეზიდენტმა დონალდ ტრამპმა განაცხადა, რომ აშშ-ს ფედერალური მთავრობა მუშაობას არ განაახლებს, ვიდრე „დემოკრატები“ კონგრესში მექსიკასთან საზღვარზე კედლის აშენებისთვის დაფინანსებას არ გამოყოფენ.

კაიროში, ტურისტული ავტობუსი აფეთქდა. ამის შესახებ BBC წერს.

 

ეგვიპტის შინაგან საქმეთა სამინისტროს ინფორმაციით, მომხდარს ოთხი ტურისტი ემსხვერპლა. დაშავდა 12 ადამიანი. მათ შორის ორი ეგვიპტელი, სადაინაც ერთი მძღოლი იყო.

 

ერთ-ერთი ვერსიით, ხელნაკეთი ასაფეთქებელი მოწყობილობა მაშინ ამოქმედდა, როდესაც ტურისტული ავტობუსი ეგვიპტის პირამიდებთან ახლოს იყო.

 

ავტობუსს 14 ვიეტნამელი ტურისტი გადაჰყავდა. მომხდარზე სხვა დეტალები ჯერ უცნობია.

აშშ-ში ფედერალური მთავრობის მუშაობის შეჩერება კვლავ გრძელდება. აშშ-ს კონგრესის ორივე პალატა გუშინ კვლავ შეიკრიბა, თუმცა არანაირი ნაბიჯები არ გადაუდგამთ იმისთვის, რომ ე.წ. შათდაუნი დაესრულებინათ.

 

აშშ-ს სენატი და წარმომადგენლობითი პალატა 31 დეკემბერს შეიკრიბება. თეთრი სახლის აპარატის ხელმძღვანელის მოვალეობის შემსრულებელმა მიკ მალვენიმ განაცხადა, რომ „შათდაუნი“ შესაძლოა, კონგრესის ახალი სესიის გახსნამდე გაგრძელდეს, რომელიც 3 იანვარს არის დანიშნული.

 

ამერიკელ კანონმდებლებს ჯერ კიდევ არ მიუღიათ 2019 წლის ბიუჯეტი. აღნიშნულის მიზეზი „დემოკრატებსა“ და „რესპუბლიკელებს“ შორის უთანხმოებაა მექსიკის საზღვართან კედლის აშენების დაფინანსების საკითხზე.

 

შეგახსენებთ, რომ აშშ-ს პრეზიდენტმა დონალდ ტრამპმა განაცხადა, რომ აშშ-ს ფედერალური მთავრობა მუშაობას არ განაახლებს, ვიდრე „დემოკრატები“ კონგრესში მექსიკასთან საზღვარზე კედლის აშენებისთვის დაფინანსებას არ გამოყოფენ.

ჯერ გაიწერება პროცედურა, კრიტერიუმები და ამის შემდეგ წარმოდგენილი იქნება განახლებული სია, - ამის შესახებ პარლამენტის თავმჯდომარემ ირაკლი კობახიძემ იუსტიციის უმაღლესი საბჭოს მდივანთან შეხვედრის დასრულების შემდეგ ჟურნალისტებს განუცხადა. მისი თქმით, შეხვედრაზე საუბარი შეეხო უზენაესი სასამართლოს მოსამართლეობის კანდიდატების სიას, რომელიც იუსტიციის უმაღლესმა საბჭომ წარადგინა. როგორც კობახიძემ აღნიშნა, უზენაესი სასამართლოს ფორმირების პროცესი სასწრაფოდ საჭიროებს ბოლომდე მიყვანას.

 

"პრინციპული მნიშვნელობა აქვს პარლამენტსა და იუსტიციის უმაღლეს საბჭოს შორის თანამშრომლობას. დღეს ჩვენ შევთანხმდით იმაზე, რომ გაგრძელდება მჭიდრო თანამშრომლობა სხვადასხვა მიმართულებით, იქნება ეს კანონშემოქმედება თუ სხვა მიმართულება, სადაც აუცილებელია თანამშრომლობა. ასევე, რა თქმა უნდა, ჩვენი საუბარი შეეხო იმ პროცესს, რომელიც დაკავშირებულია უზენაესი სასამართლოს ფორმირებასთან. როგორც მოგეხსენებათ, ეს პროცესი სასწრაფოდ საჭიროებს ბოლომდე მიყვანას, იქიდან გამომდინარე, რომ პრობლემაა უზენაეს სასამართლოში. 10 მოსამართლეა წარმოდგენილი 28-ის ნაცვლად, რაც, ბუნებრივია, პრობლემებს ქმნის საქმეთა დროული განხილვისა და გადაწყვეტის კუთხით. ასევე საუბარი გვქონდა პროცედურასა და კრიტერიუმებზე. ვიდრე განახლდება პროცესი, საჭიროა პროცედურის და კრიტერიუმების გაწერა. ჯერ გაიწერება პროცედურა, კრიტერიუმები და ამის შემდეგ წარმოდგენილი იქნება განახლებული სია. ჩვენთვის მართლმსაჯულების დამოუკიდებლობა ერთ-ერთი ფუნდამენტური მიღწევაა 2012 წლის შემდეგ", - განაცხადა კობახიძემ.

ვუსამძიმრებ ჩვენს მოსახლეობას, რომ დღეს იუსტიციის საბჭომ მიიღო ეს გადაწყვეტილება და მურუსიძე უვადო მოსამართლედ განწესდა, - ასე აფასებს მოსამართლე ლევან მურუსიძის უვადოდ განწესებას იუსტიციის საბჭოს არამოსამართლე წევრი ანა დოლიძე.

 

მისი თქმით, კონკრეტული გუნდი, რომელიც არის საქართველოს პარლამენტში, პირდაპირ პასუხისმგებელია ამ შედეგზე. დოლიძე მმართველ პარტიას

 

"გამოფხიზლებისკენ" მოუწოდებს. "დღეს მოხდა ძალიან სამარცხვინო რამ. იუსტიციის საბჭო ყოველდღე გვაოცებს კიდევ უფრო სამარცხვინო გადაწყვეტილებების მიღებით და სად აღმოვჩნდებით ბოლოში, არ ვიცი. ლევან მურუსიძე აღმოჩნდა საბჭოს თვალში ყველანაირი პროცედურის და კანონის დარღვევით კეთილსინდისიერი მოსამართლე. ის ფორმალურად რომ ვთქვათ, დაინიშნა უვადოდ, თუმცა ლევან მურუსიძე სასამართლოში იპარპაშებს მანამ, სანამ საქართველოში იპარპაშებს აი ეს ჯგუფი, რომელიც ერთმანეთთან გადაბმულია და რომელთა მთავარი ამოცანა, როგორც ჩანს, არის ნელ-ნელა დააზიანოს და გამოშიგნოს ჩვენი სახელმწიფო ინტერესი. მე ვუსამძიმრებ ჩვენს მოსახლეობას, რომ დღეს საბჭომ მიიღო ეს გადაწყვეტილება. ვფიქრობ, ჩვენი ხელისუფლება, კონკრეტული გუნდი, რომელიც არის საქართველოს პარლამენტში, პირდაპირ არის პასუხისმგებელი ამ შედეგზე და ჩვენ რომ საბოლოო ჯამში ამ შედეგამდე მივედით. თუ არ გამოფხიზლდა "ქართული ოცნება" და პარლამენტის შემადგენლობა, ეს არ იქნება დასასრული იუსტიციის საბჭოს თავხედობის, უარეს ქმედებას მომავალში უნდა ველოდოთ. ჩვენ მაქსიმალურად, რაც შეგვეძლო გავაკეთეთ მე და ქალბატონმა ნაზიმ, მაგრამ ახლა სიტყვა არის პოლიტიკურ ძალებზე, რამდენად მისცემენ საშუალებას, რომ ამ ჯგუფმა სრულად გაშალოს ფრთები სასამართლოს ფარგლებში და შესაბამისად, სახელმწიფოს მასშტაბებით", - განაცხადა ანა დოლიძემ.

ჭყონდიდელი მიტროპოლიტი მეუფე პეტრე საქართველოს კათოლიკოს-პატრიარქს ილიას მეორეს დაუპირისპირდა. ამის შესახებ მან „tv პირველთან" სატელეფონო ჩართვისას ილაპარაკა.

 

"მაშინ როდესაც ვსაუბრობდი ჯერ უკრაინის თემაზე და შემდეგ ვთქვი, რომ უკრაინის საკითხის გარდა აუცილებლად მიმაჩნია, რომ წმინდა სინოდზე იქნას განხილული, ჩვენი უდანაშაულო მღვდლის თემა და ციანიდის საქმე, მითხრეს რეპლიკებით, რომ როდესაც ამოიწურება საკითხი უკრაინის შესახებ, შემდეგ გადავალთ სხვა საკითხებზე. სხვა საკითხებიც გაგრძელდა და ბოლოს, როდესაც მივედი მიკროფონთან და დავიწყე საუბარი, მინდა საჯაროდ ვთქვა და იცოდეს ქართულმა საზოგადოებამ, რომ პატრიარქი წამოდგა და შებრუნდა ღვთისმშობლის ხატისკენ, ანუ სინოდის დასრულების ლოცვა დააწყებინა მის გვერდით მყოფ მღვდელმთავარს. მე დღეს სრული პასუხისმგებლობით ვაცხადებ, რომ გაჩენილი ბზარი, რომელიც ჩემში არსებობდა გარკვეული პერიოდი და განსაკუთრებით ბოლო მოვლენების შემდეგ, გუშინ საბოლოოდ დაიმსხვრა მითი პატრიარქის მწყემსი კეთილობის შესახებ, ჩემთვის პირადად, როგორც ჭყონდიდელი მიტროპოლიტისთვის,"- განაცხადა მეუფე პეტრემ.

 

2017 წლის 5 სექტემბერს, მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენი ორივე მხარემ გაასაჩივრა. პროკურატურა განაჩენის დამძიმებას, დაცვა კი გამამართლებელ განაჩენს ითხოვს.

 

გიორგი მამალაძე მკვლელობის მომზადების ბრალდებით თბილისის აეროპორტში 10 თებერვალს დააკავეს. ის ბერლინში მიფრინავდა, სადაც საქართველოს პატრიარქს ოპერაციისთვის ამზადებდნენ.

პარლამენტის იურიდიულ საკითხთა კომიტეტის ჯერ კიდევ მოქმედი თავმჯდომარე ეკა ბესელია საკუთარ გეგმებთან დაკავშირებით ახალი წლის შემდგომ ისაუბრებს. ამასთან, ეკა ბესელია „გლობალპრესთნ“ საუბარში მმართველი გუნდის დატოვებას გამორიცხავს.

 

„ჩემს გეგმებზე ვისაუბრებ მოგვიანებით. ჩემთვის მთავარია, რომ უზენაეს სასამართლოში მოსამართლეების უვადოდ განწესების ეს პროცესი შეჩერდა, ჩემთვის მთავარია ასევე, არ შეჩერდეს კომიტეტის საქმიანობა. ბევრი მიმდინარე პროექტია დაწყებული, ბევრი მიმდინარე კანონპროექტია, რომელზეც ვმუშაობდი და ეს საკითხები რომ არ დაზიანდეს, უნდა გავიარო თავმჯდომარის მოვალეობის შემსრულებელთან. ამის შემდეგ, ახალი წლების შემდეგ, მექნება დრო, რომ ვისაუბრო ჩემს გეგმებზე. მე ვარ იმ გუნდში, რომლის ერთ-ერთი პირველი დამფუძნებელი ვარ. გუნდურობასთან დაკავშირებით რაიმე მინიშნებებიც არის არაკორექტული. მე ვარ ამ გუნდში, რომლის ერთ-ერთი დამფუძნებელი ვარ. თუმცა მომავლის გეგმებზე, სად გავაგრძელებ საქმიანობას პარლამენტში, ამაზე ახალი წლის შემდეგ ვისაუბრებ“, - განაცხადა ბესელიამ.

 

ამასთან, ბესელიას თქმით, კომიტეტის თავმჯდომარის დატოვების საკითხზე კომუნიკაცია „ქართული ოცნების“ ლიდერთან, ბიძინა ივანიშვილთანაც ჰქონდა.

 

„პარტიის თავმჯდომარესთან მქონდა საუბარი და მაქვს კომუნიკაცია. გადაწყვეტილების მიღებამდეც მქონდა მასთან საუბარი. არ მინდა ამ თემებზე საუბარი“, - აღნიშნა ბესელიამ.

განსაკუთრებით დიდი ოდენობით ნარკოტიკული საშუალებების საქართველოს ტერიტორიაზე შემოტანის ორგანიზებაში ბრალდებული მსახიობი, გიორგი გიორგანაშვილი თბილისის საქალაქო სასამართლომ უდანაშაულოდ ცნო. ამავე ბრალდებით დაკავებული ირაკლი ქორიძე კი დამნაშავედ ცნო და 15 წლით თავისუფლების აღკვეთა შეეფარდა.

 

აღნიშნული გადაწყვეტილება თბილისის საქალაქო სასამართლოს მოსამართლე გიორგი არევაძემ რამდენიმე წუთის წინ გამოიტანა.

 

შეგახსენებთ, რომ ნარკოდანაშაულში მსჯავრდებულ ბახალას შსს-მ მიმდინარე წლის 2 აპრილს ბრალი დაუმძიმა. გიორგანაშვილს ბრალი წარედგინა საქართველოს სისხლის სამართლის კოდექსის 260-ე და 262-ე მუხლებით, ორგანიზებული ჯგუფის მიერ განსაკუთრებით დიდი ოდენობით ნარკოტიკული საშუალებების უკანონო შეძენა-შენახვის და საქართველოს ტერიტორიაზე უკანონოდ შემოტანის ფაქტზე. აქვე აღსანიშნავია, რომ გიორგი გიორგანაშვილი უკვე მსჯავრდებულია სხვა სისხლის სამართლის საქმეზე, სადაც ნარკოტიკული საშუალებების შეძენისთვის რვა წლით თავისუფლების აღკვეთა აქვს მისჯილი. შესაბამისად, საერთო ჯამში, ის პატიმრობაში რჩება.

ახალქალაქისა და კუმურდოს ეპარქიის დასახელებაში ცვლილება განხორციელდა. აღნიშნულის შესახებ წმინდა სინოდის განჩინების გამოქვეყნების შემდეგ გახდა ცნობილი. როგორც გავრცელებულ ვიდეომიმართვაში ალავერდელმა მიტროპოლიტმა, მეუფე დავითმა განაცხადა, ეპარქიას დღედან მისი ისტორიული სახელი - ახალქალაქის, კუმურდოსა და კარის ეპარქია ეწოდება. როგორც განჩინებაშია აღნიშნული, საკითხი ეპარქიის მიტროპოლიტმა, ნიკოლოზმა დააყენა და მსჯელობის შემდეგ, მისი მოთხოვნა დაკმაყოფილდა.

 

„ახალქალაქისა და კუმურდოს მიტროპოლიტმა ნიკოლოზმა წარმოადგინა ისტორიული დოკუმენტაცია, მისდამი რწმუნებული ეპარქიის სახელის ცვლილებასთან დაკავშირებით. მსჯელობაში მონაწილეობა მიიღეს, მიტროპოლიტებმა ისტორიის დოქტორმა, პროფესორმა ანანია ჯაფარიძემ – მანგლისისა და თეთრიწყაროს და თეოდორე ჭურაძემ – ახალციხისა და ტაო-კლარჯეთის. კრებამ მოისმინა, იმსჯელა და დაადგინა: აღდგეს ისტორიული ეპარქია და ეწოდოს შემდეგი სახელი - ახალქალაქის, კუმურდოსა და კარის ეპარქია“, - აღნიშნულია განჩინებაში, რომელიც საზოგადოებას მეუფე დავითმა წარუდგინა.

ექსკლუზიური

არქივი

« « » » აგვისტო 2019
ორშ სამ ოთხ ხუთ პარ შაბ კვი
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?