Global Press

Georgia

Global PressGlobal PressGlobal PressGlobal Press

USD
2.7756
EUR
3.1001
RUR
0.0432
GBP
3.5153

ვწუხვარ, რომ დარბაზში ცარიელი ადგილებია. იმედი მაქვს, გაიგეს, რომ მე მათაც მივმართავ და შეუძლიათ ჩათვალონ, რომ მე ვარ მათი პრეზიდენტი, - ასე მიმართა პარლამენტის ტრუბუნიდან საქართველოს პრეზიდენტმა სალომე ზურაბიშვილმა ოპოზიციას, რომლებიც მის გამოსვლას პარლამენტში არ დაესწრნენ.

 

„ძალიან ვწუხვარ, რომ აქ არის ცარიელი ადგილები, როცა ამ დარბაზში გამოდის ქვეყნის პრეზიდენტი. ეს პირადად ჩემთვის რაიმე შეურაცხყოფა არ არის, ეს არის შეურაცხყოფა ქვეყნის ერთ-ერთი სიმბოლოსი. გვიყურებს ხალხი და მე მათ მივმართავ იმიტომ, რომ ამ ცარიელი სკამების უკან არსებობენ ჩვენი თანამოქალაქეები, რომლებიც ასევე არიან ჩემთვის მნიშვნელოვანი და არანაკლებად მნიშვნელოვანი, ვიდრე სხვები. იმედი მაქვს, გაიგეს, რომ მე მათაც მივმართავ და შეუძლიათ ჩათვალონ, რომ მე ვარ მათი პრეზიდენტი და ვიცი, რომ იმათმა არ გამოაცხადეს რამე ბოიკოტი“,- განაცხადა ზურაბიშვილმა.

 

შეგახსენებთ, რომ სალომე ზურაბიშვილი საკანონმდებლო ორგანოში პრეზიდენტის ყოველწლიური მოხსენების ფარგლებში პირველად წარსდგა.

ჩვენ გვჯერა, პრეზიდენტი სალომე ზურაბიშვილი მონაწილეობას მიიღებს ჩვენი ეროვნული ინტერესების შესაბამისად, რუსეთთან ურთიერთობების დარეგულირებაში, - ამის შესახებ საპარლამენტო უმრავლესობის ლიდერმა, არჩილ თალაკვაძემ პარლამენტში პლენარულ სხდომაზე სიტყვით გამოსვლისას განაცხადა.

 

თალაკვაძე სიტყვით გამოვიდა პრეზიდენტ სალომე ზურაბიშვილის მიერ ყოველწლიური მოხსენების გაკეთების შემდეგ.

 

„ერთ-ერთი მთავარი მიზეზი, რის გამოც ჩვენმა პარტიამ მხარი დაუჭირა არჩევნებში სალომე ზურაბიშვილს, იყო მისი საერთაშორისო გამოცდილება, ნდობა და რწმენა მისი პროფესიონალიზმის მიმართ დიპლომატიის სფეროში. ჩვენ გვჯერა, საერთაშორისო ასპარეზზე ის თავის სიტყვას მკაფიოდ იტყვის და აგრეთვე მონაწილეობას მიიღებს ჩვენი ეროვნული ინტერესების შესაბამისად, რუსეთთან ურთიერთობების დარეგულირებაში, მით უმეტეს იმ რეალობაში, როცა საერთაშორისო ფორმატებში ჩვენ უფრო ქმედითი გადაწყვეტილებები გვჭირდება და ამაზე ისაუბრა თავად პრეზიდენტმაც“, - განაცხადა არჩილ თალაკვაძემ.

შევახსენებ ყველა მოსამართლეს - მათ პროფესიის შესაფერისი თავშეკავება ევალებათ, მიუღებელია მათგან პოლიტიკური განცხადებები, - ამის შესახებ საქართველოს პრეზიდენტმა სალომე ზურაბიშვილმა პარლამენტის პლენარულ სხდომაზე სიტყვით გამოსვლისას განაცხადა.

 

პრეზიდენტი დარწმუნებულია, რომ მოსამართლეების უვადოდ დანიშვნისას მთავარი მამოძრავებელი პრინციპი არის სასამართლოს მიმართ ნდობის გამყარება და გაძლიერება.

 

სალომე ზურაბიშვილი იმედოვნებს, რომ მხოლოდ ამ საზომით იმსჯელებს საკანონმდებლო ორგანო, რომელიც მოსამართლეების განწესებისათვის აუცილებელ კრიტერიუმებზე მუშაობს.'

 

„მოსამართლეების შერჩევის პროცესში პრეზიდენტის პირადი შეხედულებების გაჟღერება მიუღებელია, რამეთუ, ეს იქნება ჩარევა სასამართლო და საკანონმდებლო ორგანოების კომპეტენციაში. ერთადერთი რამ, რაც პრეზიდენტს შეუძლია, - შეახსენოს ყველა მოსამართლეს, რომ მათ პროფესიის შესაფერისი თავშეკავება ევალებათ. მიუღებელია მათგან პოლიტიკური განცხადებები. ეს უარყოფითად აისახება სასამართლოს მიმართ ნდობაზე. მოგეხსენებათ, რომ მოსამართლეთა უვადოდ დანიშვნას მხარს უჭერს ვენეციის კომისიაც. ასევე, უვადოდ დანიშვნის პრაქტიკა არსებობს რიგ ქვეყნებში, თუმცა მათი შერჩევის პროცედურები ძალიან მაღალი მოთხოვნებითა და კრიტერიუმებით ხასიათდება. ამ საკითხის სიფაქიზიდან გამომდინარე, სამუშაო პროცესში ნაჩქარევი გადაწყვეტილებების მიღება არ ივარგებს. საბოლოოდ, საკანონმდებლო ორგანო პასუხისმგებელია, მიიღოს ისეთი გადაწყვეტილება, რომელიც, ერთი მხრივ, გაითვალისწინებს საერთაშორისო სტანდარტებს, ხოლო მეორე მხრივ, ყველაზე უკეთ მოერგება ქართულ რეალობას. ამის შედეგი სასამართლოს მიმართ ნდობის ამაღლება იქნება. ჩვენი საზოგადოების კონსოლიდაცია და ქვეყნის ეკონომიკური განვითარება სასამართლო სისტემის გაძლიერებაზე გადის“, - განაცხადა სალომე ზურაბიშვილმა.

 

პრეზიდენტის თქმით, საზღვარგარეთ გამართული ყველა შეხვედრის დროს პარტნიორები ხაზს უსვამენ სასამართლო რეფორმის გაგრძელებისა და სასამართლო სისტემის მდგრადობის მნიშვნელობას.

 

„მე ამ პროცესს დიდი ყურადღებით ვაკვირდები“, - განაცხადა სალომე ზურაბიშვილმა.

საქართველოს პრეზიდენტმა პირველი საპარლამენტო გამოსვლისას რამდენიმე ინიციატივა წამოაყენა, რომელიც ქართველოლოგიური და კავკასიოლოგიური კვლევების ცენტრის აღდგენას, არქეოლოგიის დარგის გაძლიერებას, საკონფერენციო ტურიზმის ხელშეწყობას, დიასპორის ჩართულობის გამყარებას, საზოგადოებაში შერიგების პროცესის ხელშეწყობას და ონკოლოგიური დაავადებების მქონე ბავშვებისთვის თანამედროვე დიაგნოსტიკური და სამკურნალო შესაძლებლობის გაჩენას ეხება.

 

,,წლების განმავლობაში ჩვენთან არსებობდა ქართველოლოგიური და კავკასიოლოგიური კვლევების მთავარი ცენტრი. აქ ჩამოდიოდნენ ქართველოლოგის პროფესიის დაუფლების მსურველები; აქ ვზრდიდით ჩვენს უძლიერეს მეცნიერებს. ეს არის დარგი, რომელშიც ჩვენს ქვეყანას კონკურენტი ვერ ეყოლება. ეს ადგილი უნდა დავიბრუნოთ. ენათმეცნიერებისა და ქართველოლოგიის გარდა, ეს ცენტრი უნდა აწარმოებდეს ინტერდისციპლინარულ კვლევებს საქართველოსა და კავკასიის შესახებ. ეს საშუალებას მოგვცემს, ჩვენ მივაწოდოთ საერთაშორისო საზოგადოებას სრულყოფილი ინფორმაცია საქართველოსა და რეგიონის შესახებ. ასეთი ცენტრის არსებობა საქართველოს მომავლისთვის უაღრესად მნიშვნელოვანია. იგი ვერ აღდგება და ვერ იარსებებს ძლიერი სახელმწიფო ნებისა და მხარდაჭერის გარეშე. ამ იდეის მხარდაჭერა პატრიარქის მხრიდან გადამწყვეტია“, - განაცხადა სალომე ზურაბიშვილმა.

 

პრეზიდენტმა ისაუბრა არქოლოგიის განვითარებაზეც და სფეროს მხარდაჭერა გამოუცხადა.

 

,,მხარდაჭერა, პატრონაჟის სახით, გამოვუცხადე ქართულ-პოლონურ არქეოლოგიურ ექსპედიციას, რომელიც ქუთაისში ძველი კოლხეთის კულტურის კვლევას ისახავს მიზნად. ასევე, გერმანულ მხარეს შევთავაზე ჩვენთან გერმანული არქეოლოგიური ინსტიტუტის ფილიალის დაფუძნება, რაც ხელს შეუწყობს „ქუთაისის ძველი კოლხური კულტურული ლანდშაფტის“ კვლევას და შემდეგ - იუნესკოში ნომინაციის წარდგენას. კოლხეთი, რომელიც უძველესი დროიდან გვაკავშირებს ევროპასთან, ევროპაში ჩვენი ერთგვარი სავიზიტო ბარათი შეიძლება იყოს. მდიდარი არქეოლოგიური მემკვიდრეობის ქვეყანაში აუცილებელია, რომ არქეოლოგიის მიმართულება განვითარდეს და ეს პროფესია მიმზიდველი გახდეს. იმ დროს, როცა ბევრი არქეოლოგიური კერა ომებისა და ნგრევის შედეგად მსოფლიოში მიუწვდომელი გახდა, საქართველოს თავისი უნიკალური როლის დამკვიდრება შეუძლია“- განაცხადა სალომე ზურაბიშვილმა.

 

კიდევ ერთი თემა რასაც პრეზიდენტი შეეხო საკონფერენციო ტურიზმის ხეშეწყობაა.

 

,,ჩვენი ქვეყნის მიმართ შექმნილი მაღალი ინტერესიდან და მისი ადგილმდებარეობიდან გამომდინარე, საიმედო და სწრაფად გასავითარებელ მიმართულებას წარმოადგენს საკონფერენციო ტურიზმი. ამ კუთხით ქუთაისში, პრაქტიკულად, უკვე გვაქვს საერთაშორისო მასშტაბის საკონფერენციო ცენტრი - კერძოდ, ყოფილი პარლამენტის შენობა. საკონფერენციო დანიშნულებისთვის მას არ სჭირდება რადიკალური ტრანსფორმაცია. ამავე დროს, ეს იქნება ყველაზე სწორი გზა ადგილობრივი მოსახლეობის დასაქმებისათვის. ქუთაისის ინფრასტრუქტურა - აეროპორტი, რკინიგზა და ავტობანი აკმაყოფილებს ასეთი ცენტრისთვის საჭირო ყველა მოთხოვნას. წყალტუბოს სასტუმროთა ქსელი კი ბუნებრივად მიუერთდება ამ ახალ კომპლექსს და საინვესტიციო მიმზიდველობასაც შეიძენს“, - განაცხადა პრეზიდენტმა.

 

ყოველწლიურ გამოსვლაში პრეზიდენტმა ისაუბრა დიასპორის ჩართულობის გამყარებაზე. პრეზიდენტმა კიდევ ერთხელ გააჟღერა ინიციატივა, რომ დიასპორას პარლამენტში უნდა ჰყავდეს წარმომადგენელი და ინტერესების დამცველი.

 

,,ასეთი პრაქტიკა არსებობს ევროპის ყველა ქვეყანაში, სადაც დიასპორა მრავალრიცხოვანია. უნდა ვიმსჯელოთ ამ გამოცდილების გაზიარებაზე. ასევე სასურველია ერთი ფანჯრის პრინციპზე აგებული „ემიგრანტის სახლის“ დაარსება, რათა ჩამოსული თანამემამულეებისათვის ხელმისაწვდომი გახდეს ყველა საჭირო ინფორმაცია“, - განაცხადა სალომე ზურაბიშვილმა.

სალომე ზურაბიშვილი არის გაყალბებული არჩევნების, ამომრჩეველზე ზეწოლის, მასობრივი მოსყიდვის სიმბოლო, მას არ აქვს ხალხის მანდატი, - ამის შესახებ „ევროპული საქართველოს“ ლიდერმა, დავით ბაქრაძემ პარლამენტში პრეზიდენტ სალომე ზურაბიშვილის გამოსვლასთან დაკავშირებით განაცხადა.

 

მისივე თქმით, სწორედ აღნიშნული მიზეზების გამო იყენებს „ევროპული საქართველო“ პოლიტიკური ბოიკოტის უფლებას და არ ესწრება მის გამოსვლას პარლამენტში.

 

„ქალბატონი სალომე ზურაბიშვილი არის სიმბოლო გაყალბებული არჩევნების, არის სიმბოლო იმ არჩევნების, რომელიც ჩატარდა ამომრჩეველზე მასობრივი ზეწოლით, ამომრჩევლის მასობრივი მოსყიდვით, რომელიც ჩატარდა კრიმინალური და ქუჩის ელემენტების ჩართულობით. ის არის სიმბოლო იმ არჩევნების, რომელსაც წითელ ხაზად გასდევდა სიძულვილის ენა და ოპონენტების მიუღებლობა. არავინ დღემდე არ დასჯილა ძალადობის, მოსყიდვის და სხვა დარღვევების გამო. არავინ დღემდე პასუხს არ აგებს იმ უმძიმესი დასკვნების გამო, რომლებიც საერთაშორისო ორგანიზაციებმა გამოაქვეყნეს საქართველოსთან დაკავშირებით. არავინ პასუხს არ აგებს იმ ზიანის გამო, რომელიც მიადგა ქართულ დემოკრატიას და საქართველოს იმიჯს. სწორედ ამიტომ, ევროპული საქართველო იყენებს პოლიტიკური ბოიკოტის უფლებას და ჩვენ, პროტესტის ნიშნად, არ ვაპირებთ დავესწროთ დღეს პარლამენტში სალომე ზურაბიშვილის გამოსვლას, რადგან სალომე ზურაბიშვილი გახდა სიმბოლო იმ არჩევნების, როდესაც არჩეულ პირს არ აქვს ხალხის მანდატი და ეს არჩევნები არ იყო ამომრჩევლის თავისუფალი ნების გამოხატვა. მიგვაჩნია ეს არის ერთადერთი მორალურად და პოლიტიკურად გამართლებული ნაბიჯი“, - განაცხადა დავით ბაქრაძემ. 

 

შეგახსენებთ, რომ სალომე ზურაბიშვილი ამ წუთებში პარლამენტის წინაშე ყოველწლიური მოხსენებით გამოდის.

სპორტშიც ასეა, როცა დიდი ხანი ზის ადამიანი სათადარიგო სკამზე და შემდეგ შეგყავს მოედანზე, ის ვერ ეწყობა თამაშს, - ასე გამოეხმაურა მმართველი გუნდის ყოფილი წევრი ლევან გოგიჩაიშვილი ირაკლი ღარიბაშვილის პოლიტიკაში დაბრუნებას.

 

ლევან გოგიჩაიშვილმა ღარიბაშვილის იმ განცხადებასაც უპასუხა, რომლის თანახმადაც, ირაკლი ღარიბაშვილს განცდა რჩება, რომ ეკა ბესელია და ლევან გოგიჩაიშვილი თავისუფლები არ არიან და დამოუკიდებლად არ იღებენ გადაწყვეტილებებს.

 

გოგიჩაიშვილის აზრით, სწორედ ღარიბაშვილის გამოსვლა იყო გზავნილებით მართული.

 

„ღარიბაშვილის გუშინდელი გამოსვლა იყო კიდევ უფრო გამყოფი, ვიდრე გამაერთიანებელი. ზუსტად მაგ ლოგიკას გავემიჯნეთ, რომ ადრე იყვნენ ცუდები და დღეს არიან კარგები და რომ შესაძლებელია ყოფილი დამნაშავეებით საქართველოს მომავალი შეიქმნას. ვფიქრობ, სპორტშიც ასეა, როცა დიდი ხანი ზის ადამიანი სათადარიგო სკამზე და შემდგ შეგყავს მოედანზე ის ვერ ეწყობა თამაშს", - განაცხადა ლევან გოგიჩაიშვილმა.

 

ის ასევე შეეხო იმ განცხადებებს, რაც ჩინჩალაძის მხარდასაჭერად კეთდება.

 

„გუშინდელი გამოსვლა იყო ძალიან სუსტი და აბსოლუტურად არ პასუხობდა იმ კითხვებს, რომლებიც არის საზოგადოებაში. ის პასუხობდა იმ გზავნილებს, რომელიც ჩინჩალაძის მხარდასაჭერი გზავნილები იყო. ახლა ჩინჩალაძის მხარდასაჭერად ვინ გეყოლება ზარდიაშვილი, კობახიძე, ღარიბაშვილი თუ რემბო, ფაქტობრივი მნიშვნელობა ამას არ აქვს", - განაცხადა ლევან გოგიჩაიშვილმა.

შეწყალების კომისია იუსტიციის სამინისტროში გადავა. ამის შესახებ საქართველოს პრეზიდენტმა სალომე ზურაბიშვილმა საპარლამენტო გამოსვლისას განაცხადა.

 

მისივე თქმით, კომისიაში დამატებით ჩართულნი იქნებიან სხვადასხვა ადმინისტრაციული ორგანოს წარმომადგენლები.

 

„შეწყალება, სასამართლო სისტემა და მასთან დაკავშირებული გამოწვევები, ეროვნული უსაფრთხოების საბჭოს შექმნა სწორედ ისეთი საკითხებია, რომლებიც დღეს საზოგადოების მაღალ ინტერესს იწვევს.

 

შეწყალების ის პრაქტიკა, რომელიც წინა პრეზიდენტების დროს არსებობდა, ზოგჯერ უფრო ამნისტიას ემსგავსებოდა, ვიდრე იმ კონცეფციას, რომელიც საფუძვლად უდევს პრეზიდენტის დისკრეციულ უფლებას.

 

ამნისტია ზოგად კრიტერიუმებზე დაფუძნებული სრულიად სხვა სამართლებრივი ფორმაა, რომელიც მოიცავს სასჯელისგან გასათავისუფლებელ პირთა ფართო წრეს.

 

პრეზიდენტის დისკრეციული უფლება არც პირობით ვადამდე ადრე გათავისუფლების შემცვლელია და არც სასამართლოს ხარვეზების გამოსწორების მექანიზმი.

 

შეწყალების დისკრეციული უფლება ნიშნავს პრეზიდენტის მიერ განსაკუთრებული და გამორჩეული ინდივიდუალური საქმის შერჩევას, სადაც უპირატესობა ჰუმანურ პრინციპებს ენიჭება.

 

ამ პრინციპების ზედმიწევნით დაცვა ნიშნავს იმას, რომ შეწყალების აქტების რაოდენობა საგრძნობლად შემცირდება. ეს ასევე შეამცირებს რისკებს საზოგადოებისთვის, რომლებიც ყოველთვის თან ახლდა მასობრივ შეწყალებას.

 

გათვალისწინებულია შეწყალების კომისიის იუსტიციის სამინისტროში გადასვლა. კომისიაში დამატებით ჩართულნი იქნებიან სხვადასხვა ადმინისტრაციული ორგანოს წარმომადგენლები.

 

იგი განიხილავს იმ განცხადებებს, რომლებიც დააკმაყოფილებს ახალ კრიტერიუმებს და მოამზადებს შესაბამის რეკომენდაციებს. საბოლოო გადაწყვეტილება კი რჩება პრეზიდენტის პრეროგატივად.

 

გადაწყვეტილების მიღებისას ვერ იქნება გათვალისწინებული პირადი, სოციალური, რელიგიური თუ პოლიტიკური ხასიათის ჩარევები.

 

შეწყალება გამორიცხავს იმასაც, რომ საზოგადოებას ან კონკრეტულ ადამიანებს განემარტოს რომელიმე კონკრეტულ საქმეზე შეწყალების მიღების, ან მასზე უარის თქმის, საფუძველი", - განაცხადა სალომე ზურაბიშვილმა.

ჩვენ არ ვეგუებით და არც შევეგუებით ტერიტორიების ოკუპაციას, გატაცებებს და მცოცავ ხაზებს, რომელიც ძალადობისა და შანტაჟის პოლიტიკის ნაწილია, - ეს განცხადება სალომე ზურაბიშვილმა პარლამენტში წლიური ანგარიშის წარდგენისას გააკეთა. '

 

ზურაბიშვილის თქმით, მნიშვნელოვანია მაღალი პოლიტიკური ფორმატის განახლება, რათა მოლაპარაკებების ფორმატი მხოლოდ ტექნიკურ დონეზე აღარ წარიმართოს.

 

„ხომ ნათელია, რომ რუსეთის მხრიდან მუქარის, აგრესიის, ზეწოლის, ომის, ოკუპაციის მიუხედავად, საქართველოს არ გადაუხვევია სახელმწიფოებრივი მშენებლობის დემოკრატიის გამყარების, ეკონომიკის გაძლიერების, დამოუკიდებლობის განმტკიცების გზიდან. ეს არის მშვიდობიანი პოლიტიკის გამარჯვება ძალადობისა და მუქარის პოლიტიკაზე.

 

ჩვენ არ ვეგუებით და არც შევეგუებით ტერიტორიების ოკუპაციას, გატაცებებს და მცოცავ ხაზებს, რომელიც ძალადობისა და შანტაჟის პოლიტიკის ნაწილია, არც იმას ვეგუებით, რომ მოლაპარაკებების ფორმატი დღეს მხოლოდ ტექნიკურ დონეზე მიმდინარეობს. ჩვენს პარტნიორებთან ვისაუბრე მაღალი პოლიტიკური ფორმატის განახლების აუცილებლობაზე, მათ უნდა გააგებინონ რუსეთს, რომ 21-ე საუკუნეში ნულოვანი ჯამის თამაში არავის ინტერესში აღარ არის და აგრესიული პოლიტიკა წარსულში ჩარჩენის გზაა“, - განაცხადა სალომე ზურაბიშვილმა.

საქართველოს პრეზიდენტმა პირველი საპარლამენტო გამოსვლისას დიასპორა, რეგიონებთან და კულტურასთან ერთად, მისი საქმიანობის პრიორიტეტად დაასახელა.

 

ზურაბიშვილის თქმით, მნიშვნელოვანია გამარტივდეს ორმაგი მოქალაქეობის მიღებისა და შენარჩუნების საკითხი, რათა ემიგრანტებმა შეინარჩუნონ კავშირი საქართველოსთან.

 

„საზღვარგარეთ ვიზიტების დროს შევხვდი ჩვენს სტუდენტებსა და ემიგრანტებს. ემიგრანტებისთვის, განსაკუთრებით საზღვარგარეთ დაბადებული თაობისთვის, სამშობლოსთან კავშირის შესანარჩუნებლად უდიდესი მნიშვნელობა აქვს საქართველოს მოქალაქის სტატუსს.

 

უნდა აღვნიშნო, რომ საკონსტიტუციო ცვლილება ორმაგ მოქალაქეობასთან დაკავშირებით პრაქტიკაში, სამწუხაროდ, ჯერ არ არის ისე გამარტივებული, როგორც ამას ელოდებოდნენ.

 

ახლა იუსტიციის სამინისტროსთან ვთანამშრომლობთ, რათა უფრო გამარტივდეს მოქალაქეობის აღდგენისა და შენარჩუნების პროცედურები,”- განაცხადა ზურაბიშვილმა.

 

საქართველოს პრეზიდენტის თქმით, სახელმწიფომ უნდა იზრუნოს საზღვარგარეთ მყოფ სტუდენტებზე და შეუქმნას მათ სამშობლოში დაბრუნებისთვის ყველა მნიშვნელოვანი პირობა.

 

„სტუდენტების სახით საზღვარგარეთის ქვეყნებში ჩვენ გვყავს დიდი ადამიანური კაპიტალი. მათ ვხვდები ყველა ვიზიტის ფარგლებში. ჩვენი მოვალეობაა, რომ მათ, ერთი მხრივ, შევუქმნათ სამშობლოში დაბრუნების ღირსეული პირობები, მეორე მხრივ კი, წასვლამდე მივაწოდოთ წინასწარი ინფორმაცია სამომავლოდ ქვეყანაში მოთხოვნადი სპეციალობების შესახებ, რათა არსებულ ბაზარზე ააწყონ თავიანთი პროფესიული გეგმები“, - განაცხადა სალომე ზურაბიშვილმა.

საქართველოს პრეზიდენტის განცხადებით, საგარეო ურთიერთობებთან ერთად, პრეზიდენტის როლი საზოგადოების ახალ საფეხურზე აყვანის კუთხით არანაკლებად საჭიროა და ამისათვის მან რამდენიმე პრიორიტეტი დაასახელა - რეგიონები, კულტურა, დიასპორა, საზოგადოების დაუცველი ფენები. აღნიშნულის შესახებ საქართველოს პრეზიდენტმა სალომე ზურაბიშვილმა პარლამენტში ქვეყნის მდგომარეობის უმნიშვნელოვანეს საკითხებზე თავისი პირველი ყოველწლიური ანგარიშით გამოსვლისას განაცხადა.

 

,,რეგიონების განვითარება ქვეყნის მომავლის ქვაკუთხედია. მიმაჩნია, რომ რეგიონებში პრეზიდენტის ვიზიტები უნდა იყოს უცხოეთში ვიზიტებზე არანაკლებად ხშირი და შედეგიანი. თელავში ფიცის დადება ამ პრიორიტეტის ხაზგასმა იყო. ჩავედი ზუგდიდში, ქუთაისში, დაგეგმილი მაქვს ჩასვლა ქვემო ქართლში, სამცხე-ჯავახეთსა და გურიაში. უმუშევრობა, მწვავე სოციალური პრობლემები ძალიან დიდი ტვირთია ჩვენი მოქალაქეებისთვის, და ეს განსაკუთრებით საგრძნობია რეგიონებში. ადგილებზე ჩასვლით დავრწმუნდი, რომ ყველგან, ყველა მხარეში დევს მისი განვითარების სპეციფიკური გასაღები. მეღვინეობის განსაკუთრებულ და მზარდ პოტენციალთან ერთად, ვითარდება სოფლის მეურნეობის სხვა დარგები. მცირე და საშუალო მეწარმეები წარმატების მაგალითს იძლევიან. ისინი სახელმწიფო პროგრამების, სხვადასხვა დაფინანსების წყაროების გამოყენებით ახერხებენ ქართული ბაზრის დაუფლებას და ზოგჯერ - უცხოურ, ჩვენთვის უკვე ხელმისაწვდომ ბაზრებში შეღწევას. უცხოეთთან გახსნილი თავისუფალი სავაჭრო სივრცე და სატრანსპორტო ქსელის განვითარება დიდ შესაძლებლობებს გააჩენს, თუკი ქართული პროდუქციის ხარისხისა და რეკლამირების დონე აიწევს“, - აღნიშნა სალომე ზურაბიშვილმა და საგანგებოდ გავუსვა ხაზი ქალი ფერმერების საქმიანობას, რომელსაც უკვე უჭირავს თავისი ადგილი ეკონომიკაში და რომელსაც, მისი აზრით, მეტი მხარდაჭერა სჭირდება.

 

 

პრეზიდენტი მიიჩნევს, რომ რეგიონებში მიმდინარე მასშტაბურ ინფრასტრუქტურულ პროექტებთან ერთად ახალი პოტენციალის ამოქმედება გადამწყვეტია.

 

,,მაგალითად - ტურიზმის სფეროში სხვადასხვა სახეობის: სამედიცინო, ბალნეო, სამთო, არქეოლოგიური, რელიგიური ტურიზმის განვითარება. მისასალმებელია დაცული ტერიტორიების სიაში ახალი ობიექტების შეტანა. მათი ხარისხიანი დაცულობა რეგიონების განვითარების ერთ-ერთ სერიოზულ გზას გვისახავს და გარემოს დაცვას ემსახურება. კულტურა ჩემი უცვლელი პრიორიტეტია როგორც ქვეყანაში, ისე მის ფარგლებს გარეთ. ის არის აუცილებელი პირობა რეგიონების განვითარებისთვის, რამეთუ ეკონომიკა კულტურის გარეშე ვერ განვითარდება; ვერც ადგილზე დავაკავებთ ახალგაზრდობას, თუ მათ არ ჩავრთავთ კულტურულ ცხოვრებაში”, - განაცხადა სალომე ზურაბიშვილმა.

 

პრეზიდენტის აზრით, კულტურულ ცხოვრებაზე ხელმისაწვდომობა საზოგადოების ცხოვრების ხარისხის მთავარი საზომია.

 

,,ამ მიმართულებით ჩვენ დავიწყეთ კონცეფციაზე მუშაობა და ახლო მომავალში მას წარვუდგენთ ფართო საზოგადოებასა და კულტურის წრეებს. ადგილობრივი თეატრების გაცოცხლებით, მუზეუმების აღდგენით, მუსიკალური განათლების კერების გადარჩენითა და განვითარებით და ზოგადად, თანამედროვე ხელოვნების მიმართულებებზე ზრუნვით რეგიონებისა და მთლიანად, სახელმწიფოს კულტურულ ცხოვრებაში გარდატეხას შევიტანთ. როგორც პრეზიდენტი, მზად ვარ, ყველგან, სადაც საჭირო იქნება, მხარში დავუდგე ამგვარ წამოწყებებს”, - აღნიშნა სალომე ზურაბიშვილმა.

პრეზიდენტის განცხადებით, საფრანგეთში ვიზიტმა საშუალება მისცა, საქართველოს სახელით მადლობა ეთქვა საფრანგეთისთვის იმისათვის, რომ 1921 წლის შემდეგ მან შეიფარა საქართველოს პოლიტიკური ემიგრაცია, ხელი შეუწყო საგანძურის დაბრუნებას, 2008 წელს კი, ჩვენს ქვეყანას ცეცხლის შეწყვეტის პროცესში დახმარება აღმოუჩინა. აღნიშნული განცხადება სალომე ზურაბიშვილმა პარლამენტის წინაშე წლიური ანგარიშით გამოსვლისას გააკეთა.

 

„მეტად სიმბოლურია პრეზიდენტების ხელმოწერით დიმიტრი ამილახვრის დიალოგის დაფუძნება, რომლის ფარგლებშიც საქართველო და საფრანგეთი თანხმდებიან, გააძლიერონ თანამშრომლობა პოლიტიკურ, კულტურულ, ეკონომიკურ, უსაფრთხოებისა და თავდაცვის სფეროებში.

 

ნიშანდობლივია, რომ საფრანგეთი, ამერიკასთან ერთად, გახდა ჩვენი ერთ-ერთი მთავარი პარტნიორი თავდაცვისუნარიანობის გაძლიერებაში და არის საჰაერო თავდაცვის აღჭურვილობის მომწოდებელი. კულტურის დარგში კი გვაქვს შემოთავაზება - ვუმასპინძლოთ პარიზის 2020 წლის წიგნის ბაზრობას”, - აღნიშნა სალომე ზურბიშვილმა.

საქართველოს პრეზიდენტის სალომე ზურაბიშვილის განცხადებით, ნატო-ს დამოკიდებულება საქართველოს მიმართ უაღრესად დადებითია და ბრიუსელში ვიზიტისას ნატო-ს წევრი ქვეყნებისგან, გენერალური მდივნისა და სამხედრო ხელმძღვანელობისგან საქართველოს მიღწევებთან, მის მიერ დაკმაყოფილებელ სტანდარტებსა და შესრულებულ მოთხოვნებთან დაკავშირებით მხოლოდ მაღალი შეფასებები მოისმინა. ამის შესახებ სალომე ზურაბიშვილმა პარლამენტში ქვეყნის მდგომარეობის უმნიშვნელოვანეს საკითხებზე თავისი პირველი ყოველწლიური ანგარიშით გამოსვლისას განაცხადა.

 

„საქართველოში ჩატარებულმა სამხედრო თუ პოლიტიკურმა რეფორმებმა მაღალი შეფასება მიიღო. ამის პირდაპირი ნიშანია 2019 წელს დაგეგმილი მთელი რიგი ღონისძიებები, ნატო-ს გენერალური მდივნის, სამხედრო კომიტეტის, ჩრდილოატლანტიკური საბჭოს სტუმრობა და მასშტაბური წვრთნების ჩატარება; შავი ზღვის უსაფრთხოებისა და კიბერუსაფრთხოების საკითხების მიმართ გაზრდილი ინტერესი და თანამშრომლობის გაღრმავება”, - განაცხადა სალომე ზურაბიშვილმა.

 

როგორც საქართველოს პრეზიდენტმა აღნიშნა, საქართველოს სვლა ნატო-სა და ევროკავშირისკენ არავის წინააღმდეგ არ არის მიმართული და არც რაიმე აგრესიულ მიზნებს ისახავს. მისი თქმით, სუვერენული ქვეყნის სუვერენული უფლებაა, საკუთარი უსაფრთხოებისა და თავდაცვის გამყარებისათვის მოკავშირეები თავისუფლად აირჩიოს.

 

,,ეს არჩევანი ვერ იქნება გამოყენებული მუქარის საფუძვლად და გათვალისწინებულ შედეგს - ჩვენს დაშინებასა და გეზის შეცვლას - ვერ გამოიღებს. ხომ ნათელია, რომ რუსეთის მხრიდან მუქარის, აგრესიის, ზეწოლის, ომის, ოკუპაციის მიუხედავად, საქართველოს არ გადაუხვევია სახელმწიფოებრივი მშენებლობის, დემოკრატიის გამყარების, ეკონომიკის გაძლიერების, დამოუკიდებლობის განმტკიცების გზიდან. ეს არის მშვიდობიანი პოლიტიკის გამარჯვება ძალადობისა და მუქარის პოლიტიკაზე“, - განაცხადა საქართველოს პრეზიდენტმა.

ექსკლუზიური

არქივი

« « » » მაისი 2019
ორშ სამ ოთხ ხუთ პარ შაბ კვი
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31

ამინდი

Clear

0°C

თბილისი

Clear

სინესტე: 65%

ქარი: 9.66 km/h

  • 04 იანვარი 2019

    ნაწილობრივ ღრუბლიანი 7°C 0°C

  • 05 იანვარი 2019

    უმეტესად ღრუბლიანი 7°C 0°C

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?