არ ვიცი მომავალში „თიბისი ბანკის" საქმეზე კიდევ ვინ დაიკითხება. უკვე საკმაო რაოდენობის ადამიანი დაიკითხა, მგონი 8 თუ 9, - ამის შესახებ „თიბისი ბანკის" ერთ-ერთმა დამფუძნებელმა მამუკა ხაზარაძემ განაცხადა.

 

ხაზარაძემ იმედი გამოთქვა, რომ გამოძიება მალე დასრულდება.

 

„ძალიან დიდი იმედი გვაქვს,რომ ეს თემა მალე დაიხურება. ის, რაც იქნა გაჟღერებული, არანაირად არ არის კავშირში არც ბანკთან და არც მის თანამშრომლებთან, არც მენეჯმენტთან, არც ბადრისთან და მამუკასთან“, - განაცხადა ხაზარაძემ.

 

შეგახსენებთ, საქართველოს გენერალურ პროკურატურაში „თიბისი ბანკთან“ დაკავშირებით გამოძიება უკანონო შემოსავლის ლეგალიზაციის ფაქტზე მიმდინარეობს. როგორც პროკურატურაში განმარტავენ, 2008 წლის აპრილ-მაისში, კომპანიებმა შპს „სამგორი M-მა“ და „სამგორი თრეიდმა“ „თიბისი ბანკისგან“ საბრუნავი სახსრების შევსების მიზნობრიობით დაახლოებით 17 მილიონი აშშ დოლარის ოდენობით სესხი აიღეს, რაც იმავე დღეს სესხის სახით გაცემული იქნა ფიზიკურ პირებზე - ბადრი ჯაფარიძესა და მამუკა ხაზარაძეზე. როგორც პროკურატურაში განმარტავენ, მთელ ამ პერიოდში საგულისხმოა ის ფაქტი, რომ არც „სამგორი M-სა“ და არც „სამგორი თრეიდის“ მიერ სესხის სახით აღებული თანხის გაღება არ მომხდარა, ხოლო მოგვიანებით მათი ჩანაცვლება მოხდა ოფშორში რეგისტრირებული კომპანიით და დღემდე ეს თანხა ანაზღაურებული არ არის „თიბისი ბანკისთვის“.

ავტორი:Global Press
ელ-ფოსტა:ელ-ფოსტის ეს მისამართი დაცულია სპამ-ბოტებისგან. ნახვისთვის უნდა გქონდეთ ჩართული JavaScript.