შვედმა მოზარდმა, ეკოაქტივისტმა გრეტა ტუნბერგმა ქველმოქმედ გალუსტ გიულბენკიანის სახელობის პრემია მოიპოვა. გიულბენკიანის ფონდი მას ერთ მილიონ ევროს გამოუყოფს, - ინფორმაციას BBC ავრცელებს.
კონკურსის მიზანი იყო, გამოევლინათ ადამიანი, ადამიანთა ჯგუფები ან ორგანიზაცია მთელი მსოფლიოდან, რომელთაც წვლილი შეაქვთ კლიმატის ცვლილების შემცირებაში და გადმოირჩევიან ინოვაციური ხედვით.
კონკურსის ჟიურის წევრები აცხადებენ, რომ ის „თანამედროვეობის ერთ-ერთი თვალსაჩინო, ქარიზმატული და ინსპირირებული ფიგურაა, რომლიც დამაჯერებლად იბრძვის არსებული ვითარების შესაცვლელად.
გალუსტ გიულბენკიანის სახელობის პრემია 1956 წლიდან გაიცემა და მიზნად ხელოვნების, ქველმოქმედების, მეცნიერებისა და განათლების პოპულარიზაციას ისახავს.
გრეტა ტუნბერგი შვედი გარემოსდაცვითი და კლიმატის ცვლილების მოწინააღმდეგე აქტივისტია, რომლის მიერ წამოწყებულმა „სასკოლო გაფიცვებმა“ საერთაშორისო აღიარება მოიპოვა.
2019 წელს, ჟურნალმა „Time-მა“ ის წლის ადამიანად დაასახელა. ასევე 2019 და 2020 წლებში ნობელის პრემიაზე იყო ნომინირებული.
გარემოს ეროვნული სააგენტოს ინფორმაციით, 19 ივნისამდე საქართველოს ზოგიერთ რაიონში მაღალი ტემპერატურის ფონზე მოსალოდნელია ხანმოკლე წვიმა და ელჭექი, ზოგან შესაძლებელია სეტყვა.
ჰაერის ტემპერატურა დასავლეთ საქართველოს დაბლობში +28, +33, აღმოსავლეთ საქართველოს ბარში +31, +36 გრადუსია მოსალოდნელი. ამასთან, აღნიშნულ პერიოდში თბილისში ღამისა და საღამოს საათებში იწვიმებს.
ჰაერის ტემპერატურა +33, +35 გრადუსი დაფიქსირდება.
უამინდობა საქართველოში 27 აპრილამდე შენარჩუნდება.
გარემოს ეროვნული სააგენტოს ინფორმაციით, 27 აპრილამდე საქართველოს უმეტეს ტერიტორიაზე შენარჩუნდება ნალექი, მაღალმთაში თოვლი, ზოგან შესაძლებელია ძლიერი.
„მოსალოდნელმა ძლიერმა ნალექებმა საქართველოს მდინარეებზე შესაძლებელია წყლის დონის მნიშვნელოვანი მატება, ხოლო ქვეყნის მთიან ზონებში ზვავების ფორმირება და მეწყრული პროცესების ჩასახვა-გააქტიურება გამოიწვიოს“, - აცხადებენ სააგენტოში.
მეტეროლოგების პროგნოზით, საქართველოში უახლოეს დღეებში ტემპერატურის მკვეთრი მატებაა მოსალოდნელი და შესაძლოა, ნიშნულმა 42 გრადუსსაც გადააჭარბოს.
„ხვალაც, 8 ივლისსაც მაღალი ტემპერატურა იქნება. დღის ბოლოს იწყება ნალექი. განსაკუთრებით, დასავლეთ საქართველოში, აჭარისა და გურიის ტერიტორიაზე ველით შედარებით მნიშვნელოვან ნალექს. დღის მეორე ნახევრიდან, აღმოსავლეთ საქართველოში იწვიმებს“ - აცხადებს გარემოს ეროვნული სააგენტოს მეტეოროლოგი, დავით ლოლაძე.
სპეციალისტების თქმით, სიცხე განსაკუთრებით საშიშია ბავშვებისთვის, მოხუცებისა და ქრონიკული დაავადების მქონე ადამიანებისთვის. ძლიერმა სიცხემ, შესაძლოა, გულისცემის გახშირება და სუნთქვის გაუარესება გამოიწვიოს. დაავადებათა კონტროლის ეროვნული ცენტრის განცხადებით, მაღალი ტემპერატურის დროს, აუცილებელია ბევრი სითხის მიღება და მზეზე გადაადგილებისგან თავის შეკავება.
„ასევე, თავი უნდა ავარიდოთ ფიზიკურ დატვირთვას. ან, თუ ფიზიკური დატვირთვა აუცილებელი და სასიცოცხლოდ მნიშვნელოვანია, ეს უნდა მოხდეს დილით, ძალიან ადრე. თავი უნდა ავარიდოთ ალკოჰოლიან, ტკბილ და გაზიან სასმელებს. აუცილებლად უნდა გვეხუროს ფართოფარფლებიანი ქუდი ან კეპი, უნდა ვატაროთ სათვალე“, - აცხადებს NCDC-ს არაგადამდებ დაავადებათა დეპარტამენტის უფროსი, ლელა სტურუა.
საქართველოს ტერიტორიაზე, კვირის ბოლოდან, შედარებით, აგრილდება. დროგამოშვებით იწვიმებს. ზოგან - ძლიერად. მოსალოდნელია ელჭექი და სეტყვაც.
7-8 ივნისს დასავლეთ საქართველოში ჰაერის ტემპერატურა 37 გრადუსი იქნება.
როგორც გარემოს ეროვნულ სააგენტოში აცხადებენ, 6-9 ივნისს საქართველოს ტერიტორიის უმეტეს ნაწილზე მოსალოდნელია ცხელი და უმეტესად უნალექო ამინდი, თუმცა, აღმოსავლეთ საქართველოს ცალკეულ რაიონში შესაძლოა ხანმოკლე წვიმა ელჭექით აღინიშნოს.
ჰაერის ტემპერატურა 7-8 ივნისს დასავლეთ საქართველოს დაბლობში +32, +37 გრადუსამდე მოიმატებს, ხოლო აღმოსავლეთ საქართველოს ბარში +27, +32 გრადუსია მოსალოდნელი.
ამასთან, თბილისში მოსალოდნელია თბილი და უნალექო ამინდი. ჰაერის ტემპერატურა +30, +32 გრადუსი დაფიქსირდება.
აშშ-ის პრეზიდენტის, დონალდ ტრამპის განცხადებით, გლობალური დათბობა სერიოზული საკითხია, თუმცა გარემოს დაცვა სამუშაო ადგილების შექმნას ხელს არ უნდა უშლიდეს. თეთრი სახლის ცნობით, ამის შესახებ ტრამპმა ჟურნალისტებთან საუბარში განაცხადა.
„გლობალური დათბობა აფიორა არაა, ეს ძალიან სერიოზული საკითხია. მე სუფთა ჰაერი და სუფთა წყალი მინდა. გარემოს დაცვა ჩემთვის ძალიან მნიშვნელოვანია. ვიღაცამ ჩემზე წიგნი დაწერა, სადაც გარემოსდამცველი მიწოდა. წიგნს ჰქვია „The Environmentalist“ („გარემოსდამცველი“). ეს წიგნი ჩემს ოფისში მაქვს, შემდეგ პრესკონფერენციაზე მოგიტანთ. დარწმუნებული ვარ, ძალიან გაგიკვირდებათ.
მე მჯერა გარემოს დაცვის, ჰაერი და წყალი სუფთა უნდა იყოს, მაგრამ სამუშაო ადგილების შექმნაც მინდა. არ მინდა ჩვენი ინდუსტრიის დახურვა მხოლოდ იმის გამო, რომ ვიღაცამ თქვა - „ქარი გამოიყენეთ“. ამით ჩვენ დასახულ მიზნებს ვერ მივაღწევთ. ჩვენ სამუშაო ადგილების შექმნის მხრივ უპრეცედენტო პროგრესი გვაქვს, ეს ძალიან მნიშვნელოვანია“, - განაცხადა ტრამპმა.
გასულ წელს ტრამპმა რამდენჯერმე გააკრიტიკა გარემოსდამცველები და განაცხადა, რომ გლობალური დათბობის შესახებ საუბრები აფიორაა.
2019 წლის 5 აგვისტოს აშშ-მა ოფიციალურად შეატყობინა გაეროს პარიზის კლიმატის შეთანხმების დატოვების შესახებ. მოგვიანებით, სექტემბერში ცნობილი გახდა, რომ აშშ კლიმატის ცვლილების შესახებ პარიზის შეთანხმებას აღარ დატოვებს, თუმცა მასში საკუთარ მონაწილეობასთან დაკავშირებით პირობების გადახედვას მოითხოვს.
გასული თვე ციმბირში დაკვირვების ისტორიაში ყველაზე ცხელი ივნისი იყო. ამის შესახებ BBC იტყობინება.
კოპერნიკის ატმოსფეროს მონიტორინგის სამსახურში აღნიშნავენ, რომ საშუალო ტემპერატურა რეგიონში წელს 5 გრადუსით მაღალია. 20 ივნისს კი ჰაერი 38 გრადუსამდე გათბა, რაც არქტიკისთვის ახალი რეკორდია.
ტყის ხანძრების გამო ატმოსფეროში 59 მეგატონა CO2 გამოიყო, რაც ბოლო 18 წლის განმავლობაში რუსეთის რეგიონისთვის ყველაზე მაღალი მაჩვენებელია. სიცხის ტალღამ არქტიკაში ყინულის დნობაც გამოიწვია.
ამასთან, ციმბირის დასავლეთ ნაწილში ტემპერატურა ჩვეულებრივზე დაბალია.
11 და 12 მაისს, საქართველოში უმეტესად უნალექო ამინდია მოსალოდნელი. როგორც „გლობალპრესს“ გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსმა სვეტლანა ნიორაძემ განუცხადა, 11 და 12 მაისს დასავლეთ საქართველოში +23-დან + 28 გრადუსამდე დათბება, ხოლო აღმოსავლეთ საქართველოში +19-დან +24 გრადუსამდე.
„საქართველოს მთელ ტერიტორიაზე დღეს უკვე გამოიდარებს და ნალექი ყველგან შეწყდება. ხვალიდან, საქართველოს ტერიტორიის უმეტეს ნაწილში უნალექო ამინდია მოსალოდნელი, ჰაერის ტემპერატურაც მოიმატებს. კერძოდ, 11 და 12 მაისს, დასავლეთ საქართველოში +23-დან + 28 გრადუსამდე დათბება, ხოლო აღმოსავლეთ საქართველოში +19-დან +24 გრადუსამდე. აღმოსავლეთ საქართველოში ზოგან შესაძლოა, ხანმოკლე წვიმა დაფიქსირდეს. თბილისში უნალექო ამინდია მოსალოდნელი.
13 მაისს, დღის მეორე ნახევრიდან დასავლეთ საქართველოში ისევ მოსალოდნელია შედარებით გრილი და ნოტიო ჰაერის მასების გავრცელება. დასავლეთ საქართველოში ყველგან იწვიმებს, ხოლო აღმოსავლეთ საქართველოში ზოგან ისევ გაძლიერდება დასავლეთის მიმართულების ქარი, ჰაერის ტემპერატურა +20 +25 გრადუსის ფარგლებში იქნება. 19 მაისს ისევ გამოიდარებს“,- განაცხადა სვეტლანა ნიორაძემ.
საქართველოს მთავრობა 70 მილიონი დოლარის ღირებულების შვიდწლიანი პროგრამის განხორციელებას იწყებს, რომლის მიზანია მოსახლეობის დაცვა კლიმატის ცვლილებით განპირობებული ბუნებრივი კატასტროფებისაგან.
კლიმატის ცვლილებასთან ადაპტაციის პროგრამა დღეს გარემოს დაცვისა და სოფლის მეურნეობის სამინისტრომ წარმოადგინა. ღონისძიება საქართველოს პრემიერ-მინისტრმა მამუკა ბახტაძემ გახსნა. პრემიერმა ხაზი გაუსვა, რომ ახალი პროგრამის განხორცილების შედეგად, საქართველოში შეიცვლება ეროვნული მიდგომები კლიმატის ცვლილებისა და მასთან დაკავშირებული საფრთხეების მიმართ.
„თუ ადრე ჩვენ უკვე მომხდარ კატასტროფებზე რეაგირება გვიწევდა, ახალი ინიციატივის განხორციელების შედეგად გაიზრდება ქვეყნის ეროვნული შესაძლებლობები კლიმატური ინფორმაციის ანალიზისა და ბუნებრივი კატასტროფების პროგნოზის მიმართულებით“, - განაცხადა საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა.
მისივე თქმით, გარდა ამისა, შეიქმნება ადრეული შეტყობინების თანამედროვე სისტემები, რაც საქართველოს 11 დიდი მდინარის აუზების 1.7 მილიონიან მოსახლეობას დაიცავს.
ამასთან, გაერო-ს განვითარების პროგრამის ხელმძღვანელის ლუიზა ვინტონის განცხადებით, აღნიშნული პროგრამის განხორციელების შემდეგ, ექსტრემალური ამინდი ბუნებრივ კატასტროფაში აღარ გადაიზრდება.
"ვიწყებთ 70 მილიონი დოლარის ღირებულების 7 წლიან პროგრამას, რომელიც ემსახურება საქართველოს უკეთესად დაცვას კლიმატის ცვლილებით გამოწვეული ბუნებრივი კატასტროფებისგან. უკანასკნელ წლებში ძალიან გახშირდა ბუნებრივი კატასტროფების რიცხვი, როგორც საქართველოში, ისე მთელ მსოფლიოში. ამ პროგრამით ჩვენ დავამტკიცებთ, რომ ნამდვილად შესაძლებელია ადამიანები უკეთესად იყვნენ დაცულნი იმ ცვლილებებისგან, რომელიც ახლა მიმდინარეობს და არაფერი არ არის გარდაუვალი, ყველაფრის დაბრუნება შესაძლებელია. შესაძლებელია ისეთი ზომების გატარება, რომელიც გაცილებით შეარბილებს ამ ნეგატიურ ეფექტებს,"- განაცხადა გაერო-ს განვითარების პროგრამის (UNDP) ხელმძღვანელმა საქართველოში ლუიზა ვინტონმა.
შვეიცარიის ელჩმა საქართველოში პატრიკ ფრანცენმა ისაუბრა საქართველოსა და შვეიცარიის ერთობლივი ძალისხმევის შესახებ კლიმატის ცვლილებების მიმართ ადაპტაციისა და მთის მდგრადი განვითარების საქმეში. მან ხაზი გაუსვა ამ პარტნიორობის მნიშვნელობას შვეიცარიისათვის.
„საქართველო და შვეიცარია მთაგორიანი ქვეყნებია და კლიმატის ცვლილებებმა მათზე შესაძლებელია, უარყოფითი გავლენა მოახდინოს. კლიმატური ცვლილებების მიმართ ადაპტაცია დაეხმარება ადგილობრივ მოსახლეობას გაუმკლავდნენ შედეგებს. მნიშვნელოვანია, რომ ყველა ამ ძალისხმევას ზურგს შესაბამისი პოლიტიკა უმაგრებდეს. ამ მხრივ, ჩვენი მიზანია გავაზიაროთ ჩვენი ცოდნა და გამოცდილება, რომელიც აისახება ეფექტურ პოლიტიკასა და კონკრეტულ ქმედებებში“, - აღნიშნა შვეიცარიის ელჩმა.
საქართველოს კლიმატის ცვლილებისადმი ფართომასშტაბიანი პროგრამის დაფინანსებაში გაერთიანებულია კლიმატის მწვანე ფონდის (GCF) გრანტი (27 მილიონი აშშ დოლარი), საქართველოს მთავრობის წვლილი (38 მილიონი აშშ დოლარი) და შვეიცარიის მთავრობის გრანტი (5 მილიონი აშშ დოლარი). პროგრამა შესრულდება გაერო-ს განვითარების პროგრამის (UNDP) ხელშეწყობით, ხოლო მისი უშუალო განმახორციელებელი საქართველოს გარემოს დაცვისა და სოფლის მეურნეობის სამინისტროა სხვა სამთავრობო უწყებებთან მჭიდრო თანამშრომლობით.
გარემოს დაცვის და სოფლის მეურნეობის სამინისტროს ინფორმაციით, კლიმატის ცვლილებისადმი ადაპტაციის პროგრამა ასევე პირდაპირ შეუწყობს ხელს საქართველოს მდგრადი განვითარების ეროვნული მიზნების მიღწევას. პროგრამის შედეგებს შორისაა კლიმატის ცვლილების გავლენის შემცირება, მდგრადი ურბანული განვითარება და ათასობით ადამიანის დაცვა მაღალი რისკის მქონე რეგიონებში, მათ შორის მაღალ მთაში და მჭიდროდ დასახლებულ ქალაქებში.
გარემოს ეროვნული სააგენტოს ინფორმაციით, 20 ივნისამდე საქართველოს უმეტეს რაიონში მოსალოდნელია წვიმა ელჭექით, ზოგან ძლიერი, შესაძლებელია სეტყვა.
ამასთან, საქართველოს მთიან და მაღალმთიან რაიონებში მოსალოდნელმა ძლიერმა წვიმებმა, ასევე მაღალი ტემპერატურის ფონზე მყინვარების ინტენსიურმა დნობამ, შესაძლებელია საქართველოს მდინარეებზე წყლის დონის მნიშვნელოვანი მატება, პატარა მდინარეებზე წყალმოვარდნები, ხოლო ქვეყნის მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს.
The Guardian-ის ინფორმაციით, მეცნიერები მიიჩნევენ, რომ 2020 წელი გასულ წლებთან შედარებით ცხელი იქნება და 4 წლის წინ დაფიქსირებულ რეკორდს მოხსნის.
მიუხედავად იმისა, რომ კორონავირუსის მიერ გამოწვეულმა შეზღუდვებმა დროებით გაასუფთავა ცა, კლიმატის გასაგრილებლად საკმარისი არ არის და უფრო ღრმა, გრძელვადიანი ზომების მიღებაა საჭირო.
გავრცელებული ინფორმაციით, ანტარქტიდიდან გრელანდიამდე მაღალი ტემპერატურა იანვრიდან უკვე ფიქსირდება.
ამერიკის შეერთებული შტატების ოკეანის და ატმოსფეროს ეროვნული ადმინისტრაციის გამოთვლებით, 75% არის შანსი იმისა, რომ 2020 წელი ყველაზე ცხელი წელი იყოს.
სააგენტომ განაცხადა, რომ მიმდინარე მონაცემები ძალიან ახლოსაა 2016 წლის მონაცემებთან, როდესაც წლის დასაწყისში ტემპერატურა უჩვეულოდ გაიზარდა.
სააგენტოს ცნობით, 99% არის ალბათობა იმისა, რომ 2020 წელი ყველაზე ცხელი წლების ტოპ ხუთეულში მოხვდება.
ნასას კოსმოსური კვლევების ინსტიტუტის დირექტორის, გავინ შმიდტის ცალკეული გამოთვლით, 60 %-ია შანსი, რომ ეს წელი ცხელი იყოს.
დიდი ბრიტანეთის ინსტიტუტში ამბობენ, რომ 2015 წლის შემდეგ ეს წელი რეკორდულად ცხელი პერიოდია.
პათოლოგიური ამინდი უფრო და უფრო ნორმა ხდება.
იანვარი ყველაზე ცხელი იყო, რამაც მრავალი არქტიკული ერი თოვლის გარეშე დატოვა. თებერვალში ანტარქტიდაში ჩატარებულმა კვლევამ დაადგინა, რომ სამხრეთ კონტინენტზე 20 გრადუსზე მეტი ტემპერატურა პირველად დაფიქსირდა.
წლის პირველ კვარტალში დასავლეთ ევროპასა და აზიაში ტემპერატურა საშუალოზე 3 გრადუსით მაღალი იყო.
რაც შეეხება ბოლო დღეებს, გასულ პარასკევს, ლოს -ანჯელესში 34 გრადუსი დაფიქსირდა, რეკორდული სითბო დაფიქსირდა ავსტრალიაში.
დიდ ბრიტანეთში ტენდენცია ნაკლებად გამოხატულია. აპრილისთვის დამახასიათებელი დღიური ტემერატურა საშუალოზე 3.1 გრადუსით მეტია.
ოქსფორდის უნივერსიტეტის მეცნიერის, კარსტენ ჰაუსტეინის თქმით, გლობალური დათბობა ინდუსტრიულ დონეზე 1.2 გრადუსს უახლოვდება.
მიუხედავად იმისა, რომ პანდემიამ დროებით შეამცირა გამონაბოლქვის რაოდენობა, ატმოსფეროში სათბურის გაზების კონცენტრაცია დიდ შეშფოთებას იწვევს.
„კლიმატის კრიზისი დაუოკებლად გრძელდება. წელს ემისიები შემცირდება, მაგრამ კონცენტრაცია იზრდება. ახლა გვაქვს უნიკალური შესაძლებლობა გადავხედოთ ჩვენს არჩევანს და კორონას კრიზისი გამოვიყენოთ, როგორც კატალიზატორი უფრო მდგრადი სატრანსპორტო საშუალებებისა და ენერგიის წარმოებისთვის“,_ განცხადა ჰაუსტეინმა.
ჩვენი განსაკუთრებული მდებარეობის და მრავალფეროვანი კლიმატური პირობების გამო, საქართველოს განსაკუთრებული სიფრთხილე მართებს კლიმატური ცვლილებებისა და მომდინარე საფრთხეებისგან, - ამის შესახებ პრემიერ-მინისტრმა მამუკა ბახტაძემ კლიმატის ცვლილებასთან ადაპტაციის ფართომასშტაბიანი პრეზენტაციის წარდგენისას განაცხადა. პრემიერმა სიტყვით გამოსვლისას კლიმატის ცვლილებით გამოწვეული ბუნებრივი კატასტროფებისა და მისი პრევენციის გზებზე ისაუბრა.
„ყველამ კარგად ვიცით როგორ გავლენას ახდენს კლიმატის ცვლილება ეკოლოგიაზე, როგორ ემუქრება ადამიანების სიცოცხლეს და მათ კეთილდღეობას და რა მასშტაბის ზარალს აყენებს ეს ეკონომიკას. ცხადია, ამ გამოწვევას ვერც ერთი ქვეყანა მარტო ვერ გაუმკლავდება და შესაბამისად, საჭიროა საერთო ძალისხმევის გაერთიანება. ჩვენი განსაკუთრებული მდებარეობის და მრავალფეროვანი კლიმატური პირობების გამო, საქართველოს განსაკუთრებული სიფრთხილე მართებს კლიმატური ცვლილებებისა და მომდინარე საფრთხეებისგან. შესაბამისად, საქართველო დგამს ნაბიჯებს, რათა კლიმატური რისკები და მათგან დაცულობის უზრუნველყოფა გათვალისწინებული იყოს ჩვენი განვითარების დაგეგმარებასა და განხორციელებაში. ამ კონტექსტში ძალიან მნიშვნელოვანია, რომ დღეს ოფიციალურად ვხსნით კლიმატის მწვანე ფონდისა და შვეიცარიის მთავრობის მიერ დაფინანსებულ პროექტს, რომელიც მიზნად ისახავს ქვეყანაში ადრეული გაფრთხილების სისტემის გაფართოებას, რომ უკეთ შევძლოთ კლიმატის ცვლილებებით გამოწვეულ ბუნებრივ საფრთხეებთან გამკლავება. კლიმატის ცვლილება დღითიდღე უფრო ინტენსიურად იჭრება ჩვენს ყოველდღიურ ცხოვრებაში და არღვევს ჩვეულ რიტმს. შესაბამისად, კლიმატის ცვლილებასთან გამკლავების პოლიტიკა უნდა პასუხობდეს არსებულ გამოწვევებს,"- განაცხადა ბახტაძემ.
პრემიერმა თავის გამოსვლაში იმ მიზნებზეც ისაუბრა, რასაც საქართველო აღნიშნული პროგრამის განხორციელებით მიაღწევს. ეს მიზნებია: ბუნებრივი კატასტროფების პროგნოზის შესაძლებლობა, სტიქიებით გამოწვეული კატასტროფების თავიდან აცილება, ეკონომიკური ზარალის თავიდან აცილება და ა. შ.
"ამ ფართომასშტაბიანი პროგრამის განხორციელებით საქართველოს უკვე მიეცემა კლიმატური ინფორმაციის ანალიზისა და ბუნებრივი კატასტროფების პროგნოზის შესაძლებლობა. ამ პროგრამის განხორციელება მინიმუმამდე დაიყვანს ბუნებრივი კატასტროფების გარდაუვალობას, შეიქმნება ინფრასტრუქტურა, რომელიც საშუალებას მოგვცემს თავიდან ავიცილოთ სტიქიებით გამოწვეული კატასტროფები, დავიცვათ ათასობით ადამიანი მაღალი რისკის რეგიონებში, მათ შორის მაღალ მთაში და მჭიდროდ დასახლებულ ქალაქებში, შევამციროთ ეკონომიკური ზარალი. გარდა ამისა, პირდაპირ ხელს შეუწყობს საქართველოს მდგრადი განვითარების ეროვნული მიზნების მიღწევას.
საქართველოს მთავრობის ძალისხმევით 2017 წლიდან ჩვენი ქვეყნისთვის ძალაში შევიდა პარიზის შეთანხმება, რითაც ჩვენ შევუერთდით გლობალურ ძალისხმევას კლიმატის ცვლილებასთან ბრძოლის მიმართულებით. ჩვენ ავიღეთ პასუხისმგებლობა და მთავრობა აქტიურად მუშაობს პარიზის შეთანხმებით ნაკისრი ვალდებულებების შესასრულებლად. დარწმუნებული ვარ, საერთაშორისო პარტნიორებთან თანამშრომლობით შევძლებთ დავეხმაროთ ჩვენს მოსახლეობას და შევამციროთ კლიმატის ცვლილებით გამოწვეული ბუნებრივი კატასტროფებით მიყენებული ზიანი. კლიმატის ცვლილებასთან გამკლავება კომპლექსური თემაა და გარკვეულწილად დიდი ფინანსური ტვირთის მატარებელი. საერთაშორისო მხარდაჭერა და საუკეთესო გამოცდილების გაზიარება განსაკუთრებით მნიშვნელოვანია ჩვენთვის,"- განაცხადა ბახტაძემ.
