Global Press

Georgia

Global PressGlobal PressGlobal PressGlobal Press

USD
3.0532
EUR
3.4477
RUR
0.0425
GBP
3.8144

ანა დოლიძეს იუსტიციის უმაღლესი საბჭოს წევრის უფლებამოსილება შეუწყდა. პრეზიდენტის ადმინისტრაციის ინფორმაციით, შესაბამისი განცხადებით სალომე ზურაბიშვილს ანა დოლიძემ დღეს მიმართა.

 

„დღეს საქართველოს პრეზიდენტმა მიიღო ანა დოლიძის პირადი განცხადება საქართველოს იუსტიციის უმაღლესი საბჭოს წევრის თანამდებობის დატოვების შესახებ. აღნიშნული განცხადება არის იუსტიციის უმაღლესი საბჭოს წევრის უფლებამოსილების შეწყვეტის საფუძველი. „საერთო სასამართლოების შესახებ“ საქართველოს ორგანული კანონის 47-ე მუხლის 11 1 პუნქტის შესაბამისად, ცხადდება საქართველოს იუსტიციის უმაღლესი საბჭოს წევრის შესარჩევი კონკურსი, რომლის პირობებიც განსაზღვრულია საქართველოს პრეზიდენტის 2020 წლის 25 ივნისის N:25/06/01 განკარგულებით. შეგახსენებთ, რომ გასულ კვირას პრეზიდენტმა გაავრცელა განცხადება, რომლითაც განმარტა, რომ კონსტიტუცია პრეზიდენტს არ ანიჭებს იუსტიციის უმაღლესი საბჭოს წევრის გათავისუფლების უფლებამოსილებას“, - აღნიშნულია ინფორმაციაში.

 

ანა დოლიძემ, ალეკო ელისაშვილმა, ლევან კობერიძემ და ლევან იოსელიანმა პოლიტიკური პლატფორმის მემორანდუმს 18 ივნისს მოაწერეს ხელი.

სააპელაციო სასამართლოს თავმჯდომარისა და თავმჯდომარის მოადგილის, ასევე, საქალაქო სასამართლოს თავმჯდომარის დანიშვნისას, იუსტიციის უმაღლესი საბჭო ვალდებული იქნება, დაასაბუთოს კონკრეტულად რის საფუძველზე მიიღო მან გადაწყვეტილება.

 

2020 წლის 1 იანვრიდან ძალაში შედის სასამართლო რეფორმის მე-4 ტალღის ფარგლებში მომზადებული საკანონმდებლო ცვლილებათა პაკეტი.

 

„საერთო სასამართლოების შესახებ“ ორგანულ კანონში განხორციელებული ცვლილების მიხედვით, გარდა გადაწყვეტილების დასაბუთებისა, იუსტიციის უმაღლეს საბჭოს ეკისრება ვალდებულება, სააპელაციო სასამართლოს თავმჯდომარისა და თავმჯდომარის მოადგილის, აგრეთვე რაიონული (საქალაქო) სასამართლოს თავმჯდომარის თანამდებობაზე დანიშვნამდე, შესაბამისი კანდიდატის შერჩევის მიზნით, გაიაროს კონსულტაცია შესაბამისი სასამართლოს მოსამართლეებთან.

 

გარდა ამისა, ფართოვდება იმ საკითხთა წრე, რომლის თაობაზეც გადაწყვეტილების მიღების დროს გამოყენებული იქნება ინტერესთა კონფლიქტის მარეგულირებელი მუხლი. კერძოდ, ინტერესთა კონფლიქტის მარეგულირებელი მუხლი იმოქმედებს არა მხოლოდ მოსამართლეთა დანიშვნის თაობაზე გადაწყვეტილებების მიღების დროს, არამედ ასევე მოსამართლეთა დაწინაურების, მათი დისციპლინური პასუხისმგებლობის, აგრეთვე იუსტიციის უმაღლესი სკოლის დამოუკიდებელ საბჭოში და საპროკურორო საბჭოში იუსტიციის უმაღლესი საბჭოს წევრის არჩევის ან სხვა ინდივიდუალური აქტის გამოცემის შესახებ გადაწყვეტილების მიღებისას.

 

ამასთან, ორგანული კანონის პროექტით ცალსახად განისაზღვრება, რომ თუ საბჭოს წევრი არის მოსამართლეობის კანდიდატის ოჯახის წევრი, პირდაპირი აღმავალი ან დაღმავალი შტოს ნათესავი, და, ძმა, მშობლის ან შვილის გერი, მეუღლის და, ძმა, მშობელი, იგი არ მონაწილეობს მოსამართლის ვაკანტური თანამდებობის დასაკავებელი კონკურსის პროცედურაში.

 

„საერთო სასამართლოების შესახებ“ საქართველოს ორგანული კანონში შეტანილი ცვლილებების მიხედვით, იუსტიციის უმაღლესი საბჭო ვალდებული იქნება, სააპელაციო და/ან საქალაქო სასამართლოში მოსამართლის უვადოდ განწესების შესახებ დასაბუთება გამოაქვეყნოს.

 

აღნიშნული დასაბუთება უნდა შეიცავდეს პროცედურის აღწერასა და შესაბამისი პირის დახასიათებას, მათ შორის მის მიერ დაგროვებულ ქულებს და დასკვნას კეთილსინდისიერების თაობაზე. დასაბუთებას ადგენს იუსტიციის უმაღლესი საბჭოს მდივანი.

კანონით არის გაწერილი იმგვარი ღია და გამჭვირვალე პროცედურა, რომელიც, საბოლოო ჯამში, შედეგად მოგვცემს კეთილსინდისიერი და მაღალკვალიფიციური უზენაესი სასამართლოს მოსამართლეების განწესებას საკუთარ პოზიციებზე,- ამის შესახებ საქართველოს პარლამენტის თავმჯდომარემ სახალხო დამცველის მასპინძლობით გამართული მრგვალი მაგიდის ფორმატის შეხვედრაზე, სიტყვით გამოსვლისას განაცხადა.

 

როგორც „გლობალპრესს“ საქართველოს პარლამენტიდან აცნობეს, ღონისძიებაზე შეკრებილებმა უზენაესი სასამართლოს მოსამართლეების შერჩევასთან დაკავშირებულ კანონპროექტზე ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) მოსაზრებები განიხილეს.

 

სიტყვით გამოსვლისას, ირაკლი კობახიძემ მართლმსაჯულების დამოუკიდებლობისა და ეფექტიანობის შესახებ მსჯელობის გაგრძელების მნიშვნელობაზე გაამახვილა ყურადღება. პარლამენტის თავმჯდომარემ სახალხო დამცველს OSCE/ODIHR-ში შესაბამისი მოთხოვნის გაგზავნისთვის, ხოლო ეუთოს დემოკრატიული ინსტიტუტებისა და ადამიანის უფლებების ოფისს რეკომენდაციების მომზადებისთვის მადლობა გადაუხადა. მისი თქმით, სახალხო დამცველის მოთხოვნის საფუძველზე, უზენაესი სასამართლოს მოსამართლეების შერჩევასთან დაკავშირებით, მომზადდა რეკომენდაციები, რაც უმრავლესობას კანონპროექტის საბოლოო ვარიანტის დამუშავებაში დაეხმარა.

 

ირაკლი კობახიძემ კანონპროექტზე მუშაობის პროცესისა და კონტექსტის შესახებ ისაუბრა. მისი თქმით, პარლამენტმა პირობა შეასრულა - მოსამართლეთა ათკაციანი სიის განხილვა შეაჩერა და იანვარში კანონპროექტზე მუშაობა დაიწყო. მისივე შეფასებით, შედეგი მიღწეულ იქნა და გაიწერა ღია და გამჭვირვალე პროცედურა.

 

„დაახლოებით, ოთხი თვე მოვანდომეთ სამუშაო ჯგუფის ფორმატში კანონპროექტის განხილვას და შემდეგ უკვე საპარლამენტო ფორმატში მის განხილვას და დამტკიცებას. ეს იყო ძალიან საინტერესო, ინკლუზიური პროცესი. პროცესში ჩართული იყვნენ არასამთავრობო სექტორის წარმომადგენლები, ჩვენი საერთაშორისო პარტნიორები, ადვოკატთა ასოციაციის და სახალხო დამცველის წარმომადგენლები, სხვა დაინტერესებული მხარეები და ამის საფუძველზე შემუშავდა, საბოლოო ჯამში, კანონპროექტი, რომელიც იქნა წარდგენილი საქართველოს პარლამენტში. რაც შეეხება საბოლოო შედეგს, ამოცანა იყო ღია და გამჭვირვალე პროცედურის გაწერა და ვფიქრობ, რომ ამ შედეგს მივაღწიეთ. კანონით გაწერილია იმგვარი ღია და გამჭვირვალე პროცედურა, რომელიც, საბოლოო ჯამში, შედეგად მოგვცემს კეთილსინდისიერი და მაღალკვალიფიციური უზენაესი სასამართლოს მოსამართლეების განწესებას საკუთარ პოზიციებზე”,- განაცხადა საქართველოს პარლამენტის თავმჯდომარემ.

 

ირაკლი კობახიძემ პროცედურის შესახებ დეტალურად ისაუბრა. პარლამენტის თავმჯდომარის თქმით, მკაცრ და რამდენიმე საფეხურისგან შემდგარ პროცედურაზე დაკვირვების საშუალება ექნება საზოგადოებას, რაც, მისივე შეფასებით, ერთ-ერთი გარანტიაა იმისა, რომ უზენაეს სასამართლოში კვალიფიციური და კეთილსინდისიერი მოსამართლეები განწესდებიან.

 

„პროცედურა არის გამჭვირვალე და ღია. ღიაობაში ვგულისხმობ, პირველ რიგში იმას, რომ ნებისმიერ ადამიანს შეუძლია პროცედურაში მონაწილეობა, საკუთარი კანდიდატურის შეთავაზება საბჭოსთვის და რაც შეეხება გამჭვირვალობას, თითოეულ საფეხურზე გათვალისწინებული იქნა გამჭვირვალობის მაღალი სტანდარტი. ყველა ინფორმაცია, რომელიც არის დაკავშირებული პროცედურასთან, არის ღია, არის გამჭვირვალე და უზრუნველყოფილია მათი გამოქვეყნება იუსტიციის საბჭოს ვებ-გვერდზე და უზრუნველყოფილია მათი წარდგენა საქართველოს პარლამენტისათვის. არ რჩება ინფორმაციის არც ერთი ელემენტი, გარდა ჯანმრთელობასთან დაკავშირებული ინფორმაციებისა, რომლებიც არ არის ღია საზოგადოებისთვის და საქართველოს პარლამენტისთვის”,- განმარტა მან.

 

ირაკლი კობახიძემ პროცედურაში პარლამენტის მნიშვნელოვან როლს გაუსვა ხაზი და ამ კონტექსტში, OSCE/ODIHR-ის რეკომენდაციებზე ისაუბრა.

 

„ერთ-ერთი რეკომენდაცია იყო ის, რომ აქცენტი უნდა გადატანილი ყოფილიყო არსებითად, საბჭოზე და პარლამენტს უნდა შეესრულებინა, არსებითად, ფორმალისტური როლი. რა თქმა უნდა, შეიძლება ამ რეკომენდაციის მხედველობაში მიღება, მაგრამ როგორც არ უნდა იყოს, პარლამენტის როლი არის, ბუნებრივია, მნიშვნელოვანი უზენაესი სასამართლოს მოსამართლეების არჩევის პროცესში და ამის შესაბამისად, არის უზრუნველყოფილი ძალიან გამჭვირვალე პროცედურა საქართველოს პარლამენტში. სახალხო დამცველმაც აღნიშნა, რომ კომიტეტში უზრუნველყოფილია ღია, ინკლუზიური პროცედურა, საშუალება ექნება ყველა პარლამენტის წევრს, რომ დაესწრონ კომიტეტის სხდომას, ასევე სხვა დაინტერესებულ სუბიექტებს, არასამთავრობო სექტორს, საერთაშორისო პარტნიორებს, ადვოკატთა ასოციაციას და ა.შ. მათ შეუძლიათ, არა მხოლოდ დაესწრონ სხდომებს, არამედ კითხვებიც დაუსვან წარმოდგენილ კანდიდატებს. თითოეული გასაუბრება ჩატარდება სათითაოდ. ეს ყველაფერი, ქულებით შეფასებასთან ერთად, სხვა ელემენტებთან ერთად, არის იმის გარანტია, რომ შედეგი დადგება და შედეგი არის ის, რომ მაღალკვალიფიციური და კეთილსინდისიერი, საუკეთესო კანდიდატები უნდა იყვნენ არჩეული უზენაესი სასამართლოს მოსამართლის პოზიციაზე”,- განაცხადა სიტყვით გამოსვლისას პარლამენტის თავმჯდომარემ.

 

მისივე თქმით, სასამართლო რეფორმაზე მუშაობა გრძელდება და მეოთხე ტალღა, რომელიც ჯერ კიდევ შარშან დაანონსდა, უნდა დასრულდეს.

 

„ წარიმართება სამუშაო პროცესი, დიდი იმედი გვაქვს, რომ უკვე მომავალ კვირაში, კონსენსუსით დასრულდება დისკუსია რეფორმის მეოთხე ტალღასთან დაკავშირებით და ამის შემდეგ გაგრძელდება უკვე რეფორმის საპარლამენტო განხილვა”,- აღნიშნა საქართველოს პარლამენტის თავმჯდომარემ სიტყვით გამოსვლისას.

 

ღონისძიებაზე შეკრებილებს სიტყვით საქართველოს სახალხო დამცველმა, ნინო ლომჯარიამ, ეუთო-ს დემოკრატიული ინსტიტუტებისა და ადამიანის უფლებების ოფისის დემოკრატიზაციის დეპარტამენტის უფროსის მოადგილე მეგან ფიცჯერალდმა, საკანონმდებლო მხარდაჭერის ოფიცერმა, ანა-ლიზა შატელენმა, ცენტრალური ევროპის უნივერსიტეტის პროფესორმა და ადამიანის უფლებათა ევროპული სასამართლოს ყოფილმა მოსამართლემ, OSCE/ODIHR-ის ექსპერტმა, ანდრაშ შაიომ და იურისტების საერთაშორისო კომისიის საპატიო წევრმა და ყოფილმა ვიცე-პრეზიდენტმა, კუებეკის ადამიანის უფლებათა ტრიბუნალის ყოფილმა პრეზიდენტმა, OSCE/ODIHR-ის ექსპერტმა, მიშელ რივემ მიმართეს.

საკონსტიტუციო სასამართლოს თავმჯდომარედ მერაბ ტურავა აირჩიეს.

 

პლენუმი, რომელიც 9 მოსამართლისგან შედგება, 15:00 საათზე შეიკრიბა. მათ არჩევანი ორ კანდიდატს - მერაბ ტურავასა და ირინა იმერლიშვილს შორის უნდა გაეკეთებინათ.

 

ტურავა ხუთმა მოსამართლემ წარადგინა, ირინა იმერლიშვილი კი ოთხმა. თავმჯდომარე ხდება ის, ვისაც მინიმუმ 5 მოსამართლე უჭერს მხარს. კენჭისყრაში თავად კანდიდატებიც მონაწილეობდნენ.

სასამართლო პროცესები წინ არის. ვნახოთ, პროკურატურა როგორ დაამტკიცებს იმ ბრალეულობას, რომელიც წარუდგინა მიხეილ კალანდიას, - ამის შესახებ ხორავას ქუჩაზე მოკლული მოზარდის, დათო სარალიძის მამამ, ზაზა სარალიძემ ჟურნალისტებს ზესტაფონში, მიხეილ კალანდიას დაკავების საკითხზე კომენტირებისას განუცხადა.

 

სარალიძის თქმით, დანაშაულში კიდევ სხვა პირებიც მონაწილეობდნენ, რომლებიც აუცილებლად უნდა იყვნენ პასუხისგებაში მიცემული.

 

მისივე თქმით, თვლის, რომ სამართალი აღდგენილია და ჭეშმარიტებამ იზეიმა.

 

„ვნახოთ, როგორ დაასაბუთებს პროკურატურა მიხეილ კალანდიას ბრალეულობას, შეეცდება თუ არა ისევ მის „გაპრავებას“, დაველოდოთ“,- აცხადებს ზაზა სარალიძე.

 

მისივე თქმით, ყოველთვის ჰქონდა მოლოდინი, რომ მიხეილ კალანდიას დააკავებდნენ, რადგან მისი დანაშაულში მონაწილეობა თავიდანვე ცხადი იყო.

 

ამასთან, ზაზა სარალიძის განმარტებით, ის ასევე ელოდება, რომ გამოძიებამ დაასაბუთოს, რატომ გაჭიანურდა გამოძიების პროცესი. რაც შეეხება მის შემდგომ ნაბიჯებს, სარალიძის თქმით, ის ბრძოლას აგრძელებს.

 

„მადლობა მინდა გადავუხადო ყველა იმ ადამიანს, ვინც ჩემთან ერთად იბრძოდა და ყველა იმ ადამიანს, ვინც გადაწყვიტა, რომ სამართალმა უნდა იზეიმოს. მივესალმები ამ ნაბიჯის გადადგმას, მაგრამ სასამართლო პროცესები წინ არის. ვნახოთ, პროკურატურა როგორ დაამტკიცებს იმ ბრალეულობას, რა ბრალიც წარუდგინეს კალანდიას. იქ არაერთ პიროვნებას ჰქონდა კიდევ ჩადენილი დანაშაული და აუცილებლად ყველა უნდა იყოს პასუხისგებაში მიცემული. ბრძოლა გრძელდება და ეს არ სჭირდება მარტო ზაზა სარალიძეს და ზაზა სარალიძის შვილს, არამედ სჭირდება ჩემი შვილის მეგობრებს“, - განაცხადა ზაზა სარალიძემ.

ძალიან დაგვეხმარა ოდირის რეკომენდაციები კანონპროექტის სრულყოფაში, - ამის შესახებ პარლამენტის თავმჯდომარემ ჟურნალისტებს უზენაესი სასამართლოს მოსამართლეთა შერჩევასთან დაკავშირებულ კანონზე განუცხადა.

 

მან ომბუდსმენსა და ეუთოს დემოკრატიული ინსტიტუტებისა და ადამიანის უფლებების ოფისს მადლობა გადაუხადა.

 

"მინდა, მადლობა გადავუხადო დღევანდელი შეხვედრის ორგანიზატორებს. ასევე მადლობა მინდა გადავუხადო ომბუდსმენს იმისთვის, რომ სწორედ მისი ინიციატივით მივიღეთ ჩვენ ოდირის დასკვნა. ოდირს რა თქმა უნდა, მადლობა. ძალიან დაგვეხმარა მათი რეკომენდაციები კანონპროექტის სრულყოფაში. არაერთი რეკომენდაცია იქნა გათვალისწინებული, მათ შორის კრიტერიუმებიდან გამოცდის მოხსნა, ინტერესთა კონფლიქტთან დაკავშირებული რეგულაციების დახვეწა. საბოლოო ჯამში, ჩვენ მივიღეთ ღია და გამჭვირვალე პროცედურა, რომელიც უზენაესი სასამართლოს კეთილსინდისიერი და მაღალკვალიფიციური მოსამართლეებით დაკომპლექტებას უზრუნველყოფს,"- განაცხადა ირაკლი კობახიძემ.

 

სახალხო დამცველმა ნინო ლომჯარიამ მრგვალი მაგიდა გამართა, სადაც საქართველოს უზენაესი სასამართლოს მოსამართლეების შერჩევასთან დაკავშირებულ კანონზე ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) მოსაზრებები განიხილეს. შეხვედრას ესწრებოდნენ ხელისუფლების, ოპოზიციის და არასამთავრობო ორგანიზაციების წარმომადგენლები.

შსს-მ საგანგებო მდგომარეობის რეჟიმის დარღვევის 321 ფაქტი გამოავლინა. პოლიცია, საქართველოს მთავრობის მიერ საგანგებო მდგომარეობის ფარგლებში ზომების მნიშვნელოვანი გამკაცრების შესახებ მიღებული გადაწყვეტილების მოთხოვნების აღსრულების და ე.წ. კომენდანტის საათის ფარგლებში დაწესებული შეზღუდვების დამრღვევი პირების გამოვლენის მიზნით, 24-საათიან რეჟიმში მუშაობას განაგრძობს, - ამის შესახებ ინფორმაციას საქართველოს შინაგან საქმეთა სამინისტრო ავრცელებს.

 

„შინაგან საქმეთა სამინისტროს შესაბამისი დანაყოფების თანამშრომლები, ქვეყანაში კორონავირუსის გავრცელების აღკვეთისა და პრევენციის მიზნით, სამართალდარღვევის ყველა ფაქტზე ოპერატიულად რეაგირებენ. ბოლო 24 საათის განმავლობაში, სამართალდამცველების მიერ განხორციელებული მონიტორინგის შედეგად, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 321 ახალი ფაქტი გამოვლინდა.

 

პოლიციამ, 17 აპრილის 21 საათიდან 18 აპრილის დილის 6 საათამდე, ე.წ. კომენდანტის საათის დარღვევის ფაქტზე, მთელი ქვეყნის მასშტაბით 85 მოქალაქე დააჯარიმა. გარდა ამისა, შინაგან საქმეთა სამინისტროს თანამშრომლებმა, საჯარო სივრცეში 3-ზე მეტი პირის შეკრების შეზღუდვის და 2-მეტრიანი სოციალური დისტანციის დაუცველობის გამო, სულ 140 მოქალაქე დააჯარიმა. სამართალდამცველებმა მგზავრთა გადაყვანისა და ავტომობილით გადაადგილების წესის დარღვევის ფაქტზე კიდევ 96 პირი დააჯარიმეს.

 

შინაგან საქმეთა სამინისტრო კვლავ მოუწოდებს მოქალაქეებს, დაიცვან საგანგებო მდგომარეობის ფარგლებში დაწესებული შეზღუდვები, წინააღმდეგ შემთხვევაში, გამოყენებული იქნება კანონით გათვალისწინებული, შესაბამისი ზომები. საქართველოს ტერიტორიაზე მყოფი ყველა პირი ვალდებულია, დაიცვას საგანგებო რეჟიმი და დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს. საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას – ფიზიკური პირის დაჯარიმებას 3 000 ლარით, ხოლო იურიდიული პირის – 15 000 ლარით“, - ნათქვამია განცხადებაში.

იუსტიციის უმაღლეს საბჭოში, მოსამართლეობის მსურველი კანდიდატების შესარჩევი კონკურსის კენჭისყრა დასრულდა. 43 ვაკანტურ ადგილზე განაცხადი 78 კანდიდატს ჰქონდა შეტანილი. კანდიდატებს შორის იყვნენ, იუსტიციის საბჭოს მოქმედი წევრები: გიორგი მიქაუტაძე, ვასილ მშვენიერაძე, ირაკლი ბონდარენკო და რევაზ ნადარაია. მშვენიერაძემ,ბონდარენკომ და ნადარაიმ კანდიდატურები მოხსნეს.

 

იუსტიციის უმაღლესი საბჭოს მიერ გამწესებული მოსამართლეების სრული სია ასეთია:

 

თბილისის სააპელაციო სასამართლოს ადმინისტრაციულ საქმეთა პალატაში გამწესდნენ ხატია არდაზიშვილი და ნინო ყანჩაველი. აღსანიშნავია, რომ თბილისის სააპელაციო სასამართლოს ადმინისტრაციულ საქმეთა პალატაში სამი ვაკანსიიდან მხოლოდ ორი შეივსო. მოსამართლის ერთი ადგილი ისევ ვაკანტურია, რადგან კანდიდატებმა ხმების საჭირო რაოდენობა,მინიმუმ 10 ხმა ვერ მიიღეს.

 

თბილისის სააპელაციო სასამართლოს სამოქალაქო საქმეთა პალატაში გამწესდნენ დავით ახალბედაშვილი და მიხეილ გოგიშვილი. აღნიშნულ პალატაში ერთი ადგილი ისევ ვაკანტურია, რადგან კანდიდატებმა ვერ მიიღეს იუსტიციის საბჭოს წევრების ხმების საჭირო ოდენობა.

 

თბილისის სააპელაციო სასამართლოს სისხლის სამართლის საქმეთა პალატაში გამწესდნენ ბესიკ ბუგიანიშვილი და ვახტანგ მრელაშვილი. აღნიშნულ პალატაში ერთი ადგილი ისევ ვაკანტურია, რადგან კანდიდატებმა ვერ მიიღეს იუსტიციის საბჭოს წევრების ხმების საკმარისი ოდენობა. თბილისის სააპელაციო სასამართლოს საგამოძიებო კოლეგიაში დაინიშნა- პაატა სილაგაძე. აღნიშნულ კოლეგიაში ერთი ადგილი ისევ ვაკანტური რჩება.

 

რაც შეეხება ქუთაისის სააპელაციო სასამართლოს ადმინისტრაციულ საქმეთა პალატას, აქ ერთ ვაკანტურ თანამდებობაზე ვერც ერთი მოსამართლეობის კანდიდატი ვერ გამწესდა. მიზეზი ისაა, რომ კანდიდატებმა იუსტიციის საბჭოს წევრების ხმათა საკმარისი რაოდენობა, მინიმუმ 10 ხმა ვერ მიიღეს.  ადგილი ისევ ვაკანტურია და კონკურსი თავიდან უნდა გამოცხადდეს. ქუთაისის სააპელაციო სასამართლოს სამოქალაქო საქმეთა პალატაში: ამ პალატაშიც ადმინისტრაციულ საქმეთა პალატის მსგავსად ერთ ვაკანტურ თანამდებობაზე ვერც ერთი მოსამართლეობის კანდიდატი ვერ გამწესდა. მათ იუსტიციის საბჭოს წევრების ხმების საკმარისი ოდენობა, მინიმუმ 10 ხმა ვერ მიიღეს.

 

ქუთაისის სააპელაციო სასამართლოს სისხლის სამართლის საქმეთა პალატაში დაინიშნა ლერი თედორაძე.

 

თბილისის საქალაქო სასამართლოს ადმინისტრაციულ საქმეთა კოლეგიაში გამწესდნენ ნიკოლოზ მარსაგიშვილი და გიორგი მიქაუტაძე.

 

თბილისის საქალაქო სასამართლოს სამოქალაქო საქმეთა კოლეგიაში გამწესდნენ: ზაზა მარტიაშვილი, ბესარიონ ტაბაღუა, ელისო ტუკვაძე.

 

თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიაში გამწესდნენ: გიორგი არევაძე, ეკატერინე გაბრიჩიძე, ლიანა ორკოდაშვილი.

 

ბათუმის საქალაქო სასამართლოს ადმინისტრაციულ საქმეთა კოლეგიაში გამწესდა ჯუმბერ ბეჟანიძე.

 

ბათუმის საქალაქო სასამართლოს მაგისტრი მოსამართლე ქობულეთის მუნიციპალიტეტში დაინიშნა - კობა გოცირიძე.

 

ქუთაისის საქალაქო სასამართლოს ადმინისტრაციულ საქმეთა კოლეგიის მოსამართლედ დაინიშნა ნიკოლოზ მარგველაშვილი.

 

ახალციხის რაიონული სასამართლოში მარიკა ჩიტაშვილი გამწესდა.

 

გალი-გულრიფშისა და ოჩამჩირე-ტყვარჩელის რაიონული სასამართლოში დაინიშნა-დავით კეკენაძე.

 

ზესტაფონის რაიონული სასამართლოს მაგისტრი მოსამართლე თერჯოლის მუნიციპალიტეტში დაინიშნა - ლელა ჭინჭარაული.

 

ზუგდიდის რაიონული სასამართლოში გამწესდნენ ირაკლი აბშილავა და ფატი ფურცხვანიძე.

 

თელავის რაიონული სასამართლოს მაგისტრანტ მოსამართლედ ახმეტის მუნიციპალიტეტში დაინიშნა - მარინე ცერცვაძე.

 

მცხეთის რაიონული სასამართლოს სამოქალაქო საქმეთა კოლეგიაში ხათუნა ნადიბაიძე გამწესდა.

 

რუსთავის საქალაქო სასამართლოს სამოქლაქო საქმეთა კოლეგიაში დაინიშნა -მამუკა ნოზაძე

 

სამტრედიის რაიონული სასამართლოს მაგისტრატ მოსამართლედ ვანის მუნიციპალიტეტში დაინიშნა - როინ კახიძე.

 

სენაკში ვერც ერთმა კანდიდატმა ვერ მოაგროვა ხმების საჭირო რაოდენობა და ერთი ვაკანტური ადგილი რჩება.

 

სიღნაღის რაიონული სასამართლოს მოსამართლედ - ალექსანდრე ლომიძე 11 ხმით დაინიშნა.

 

ფოთის საქალაქო სასამართლო - ხმა ვერც ერთმა კანდიდატმა მოაგროვა. ხელახალი კენჭისყრითაც, ვერც ერთმა გადალახა ბარიერი.აქაც 1 ვაკანტური ადგილი დარჩა.

 

ცაგერის რაიონული სასამართლოში - ლეილა გურგუჩიანი 11 ხმით დაინიშნა.

 

ხაშურის რაიონული სასამართლოს მაგისტრატი მოსამართლე ქარელის მუნიციპალიტეტში - გიგიტაშვილი ნაირა 11 ხმით გამწესდა.

 

ხელვაჩაურის რაიონული სასამართლოს მაგისტრატი მოსამართლე შუახევის მუნიციპალიტეტში - ხმა ვერც ერთმა ვერ დააგროვა. პოზიცია ვაკანტურია.

უკვე თვალშისაცემია, რომ სწორედ ქართული არასამთავრობო ორგანიზაციები მოქმედებენ კლანური პრინციპით", - აღნიშნული შინაარსის პოსტი სოციალურ ქსელში ქუთაისის სააპელაციო სასამართლოს თავმჯდომარემ დიმიტრი გვრიტიშვილმა გამოაქვეყნა.

 

როგორც გვრიტიშვილი წერს, არასამთავრობო ორგანიზაციები საზოგადოებას „თვალში ნაცარს აყრიან“ და არასწორ ინფორმაციას ავრცელებენ, თითქოს მოსამართლეთა კორპუსმა აშშ-ს სახელმწიფო დეპარტამენტი გააკრიტიკა.

 

დიმიტრი გვრიტიშვილის განცხადებას „გლობალპრესი“ უცვლელად გთავაზობთ:

 

„რიგში ჩადგნენ არასამთავრობოები (განსაკუთრებით ეკა გიგაური და გიორგი მშვენიერაძე) და მათი მეგობრები, რუპორები ანა დოლიძე და ნაზი ჯანეზაშვილი, რომ მორიგ ჯერზე შეაყარონ „თვალში ნაცარი“ საზოგადოებას, თითქოს ჩვენ აშშ-ს სახელმწიფო დეპარტამენტი გავაკრიტიკეთ. საუბარია დეპარტამენტის მიერ გამოქვეყნებულ ყოველწლიურ ანგარიშზე ჩვენ მიერ გამოთქმულ მოსაზრებებზე.

 

ვინც კარგად მოგვისმინა გუშინ, ძალიან ადვილად მიხვდებოდა ჩვენი კრიტიკის ადრესატს.

 

ჩვენ ყურადღება გავამახვილეთ იმ გარემოებაზე, რომ ანგარიში ძირითადად ეფუძნება ქართული „ობიექტური“, „მიუკერძოებელი“ არასამთავრობო ორგანიზაციების „კვლევებს“ და „ანგარიშებს“.

 

ანუ, დეპარტამენტი პრობლემად აღიქვამს თავად იმ ფაქტს, რომ არასამთავრობო სექტორი საუბრობს სისტემური პრობლემების არსებობაზე სასამართლოში.

 

ჩვენ აბსოლუტურად ვაცნობიერებთ საქართველოს სტრატეგიული პარტნიორი ქვეყნის - აშშ-ის სამთავრობო უწყების სტატუსს და მადლიერებით ვაფასებთ აშშ-ის როლს საქართველოს დემოკრატიული განვითარების და უსაფრთხოების დაცვის უწყვეტ პროცესში.

 

თუმცა, ეს არ გვიკრძალავს - აზრი გამოვთქვათ ანგარიშში ასახული ინფორმაციის წყაროზე და ეს არავინ უნდა აღიქვას შეურაცხყოფად, რადგან აზრის გამოხატვის თავისუფლება სწორედ დემოკრატიული საზოგადოების ფუნდამენტური ღირებულებაა.

 

და ჩვენ შევაფასეთ სწორედ ეს წყარო - ქართული არასამთავრობო ორგანიზაციები, როგორც აბსოლუტურად პოლიტიზირებული და საკუთარ მანდატს გაცდენილი, მიკერძოებული სუბიექტები. უკვე თვალშისაცემია, რომ სწორედ ქართული არასამთავრობო ორგანიზაციები მოქმედებენ კლანური პრინციპით: აბა ბოლოს როდის გახსოვთ, რომ მათგან რომელიმე ორგანიზაციამ განსხვავებული პოზიცია დააფიქსირა? ვერ გაიხსენებთ, იმიტომ, რომ ქართული არასამთავრობო სექტორი ფაქტობრივად წარმოდგენილია რამდენიმე ადამიანით, რომლებიც ყოველთვის ერთ აზრზე არიან და ერთ ხმაში საუბრობენ.

 

მეტიც: მათი ლექსიკა ერთი-ერთში ემთხვევა გარკვეული პოლიტიკური ჯგუფების ლექსიკას!

 

ეს არიან ადამიანები, რომლებიც სასამართლო სისტემაში არსებულ ყოველგვარ დადებით დინამიკას ჩქმალავენ; უგულებელყოფენ მსოფლიოში მე-3 ადგილზე მყოფი კვლევითი ორგანიზაცია „Ipsos France“-ის კვლევას და სამაგიეროდ, უდავო მტკიცებულებით ძალას და კვლევის სტატუსს ანიჭებენ კაპიტანი გიგაურის მიერ დაქირავებული ოლიკო შერმადინის მიერ შედგენილი ჭორების კრებულს ვითომდა კორუფციის არსებობის თაობაზე, რომელიც 7 ადამიანის გამოკითხვას ეფუძნება. ამ 7-დან 5 ადამიანი ინკოგნიტოა და განაწყენებული სასამართლოს დღევანდელი მენეჯმენტის მიმართ!

 

ესენი არიან ადამიანები, რომლებიც არაფრად აგდებენ სასამართლო კორპუსის - 300-მდე მოსამართლის ნებას, როცა იუსტიციის უმაღლესი საბჭოს წევრებს გვიწოდებენ „კლანს“, რადგან ამ კორპუსმა აბსოლუტურად ლეგიტიმურად გადმოგვცა წარმომადგენლობის მანდატი 2017 წელს. და როცა მოსამართლეებმა 2019 წლის 26 იანვრის კონფერენციაზე კვლავ დაგვიდასტურეს ამ მანდატის ლეგიტიმაცია, სულ „კომუნისტები“ ეძახეს მოქმედ მოსამართლეებს ჯანეზაშვილმა და მისმა მეგობარმა არასამთავრობოებმა!

 

და რაღა გასაკვირია, რომ ჩვენ გავაკრიტიკოთ ასეთი არასამთავრობო ორგანიზაციები და არ ვირწმუნოთ მათ მიერ გაცემული ინფორმაციის სისწორე?

 

ამიტომ, არასამთავრობოების და ჯანეზაშვილ-დოლიძის დღევანდელი გამოხტომებიც არის უსინდისო პროვოკაცია, მცდელობა იმისა, რომ შეცდომაში შეიყვანონ საზოგადოება და როგორმე შუღლი ჩამოაგდონ აშშ-ის მთავრობასა და საქართველოს მოსამართლეებს შორის!

 

ვერ ეღირსებიან! ჩვენ გავაგრძელებთ ნაყოფიერ თანამშრომლობას ჩვენს ამერიკელ პარტნიორებთან“, - წერს სოციალურ ქსელში დიმიტრი გვრიტიშვილი.

უზენაესი სასამართლოს თავმჯდომარე ნინო ქადაგიძე გახდა. შესაბამისი დადგენილების პროექტი პარლამენტმა 82 ხმით არცერთის წინააღმდეგ დაამტკიცა.

 

უზენაესი სასამართლოს თავმჯდომარის კანდიდატის დამტკიცების შემდეგ სხდომათა დარბაზში საქართველოს ჰიმნი შესრულდა. ამის შემდეგ კი პარლამენტის თავმჯდომარე არჩილ თალაკვაძემ ნინო ქადაგიძეს საპასუხისმგებლო თანამდებობაზე არჩევა მიულოცა და წარმატება უსურვა.

 

შეგახსენებთ, რომ იუსტიციის უმაღლესმა საბჭომ პარლამენტს ნინო ქადაგიძის კანდიდატურა 2020 წლის 11 მარტს წარუდგინა.

უზენაესი სასამართლოს მოსამართლეობის კანდიდატების შესარჩევ კონკურსში ამ ეტაპზე განაცხადი 6 პირს აქვს შეტანილი. ამის შესახებ იუსტიციის უმაღლესი საბჭოს მდივანმა გიორგი მიქაუტაძემ განაცხადა.

 

მისი თქმით, არის მოლოდინი, რომ განაცხადების და კანდიდატების რაოდენობა ვადის ამოწურვის ბოლო კვირაში გაიზრდება.

 

"გუშინ იყო ექვსი კანდიდატი დარეგისტრირებული. საბუთების მიღება გაგრძელდება მომდევნო კვირის ბოლომდე. ჩვენ ველოდებით, რომ აქტივობა იქნება მაღალი უფრო ბოლო კვირაში და ბოლო ეტაპზე, რადგან კონკურსებიც ამის პრაქტიკას გვაჩვენებს, რომ ბოლო პერიოდი საბუთების მიღების, უფრო აქტიური არის ხოლმე და უფრო არის მაღალი დაინტერესება კანდიდატების მხრიდან", - განაცხადა მიქაუტაძემ.

 

რაც შეეხება კანდიდატების ვინაობას, როგორც იუსტიციის უმაღლესი საბჭოს მდივანმა აღნიშნა, კანონმდებლობიდან გამომდინარე კანდიდატების ვინაობის დასახელების უფლება არ აქვს და მას შემდეგ, რაც განაცხადების მიღება დასრულდება, კანდიდატების ვინაობა საჯარო გახდება.

ვიდრე სასამართლო სისტემიდან „კლანი“ არ წავა, სისტემა ვერ გაჯანსაღდება, - ამის შესახებ „ინტერპრესნიუსს“ ახალგაზრდა იურისტთა ასოციაციის იურისტმა ვახუშტი მენაბდემ განუცხადა, რომელიც არასამთავრობო ორგანიზაციების სხვა წარმომადგენლებთან ერთად პარლამენტში დაგეგმილ საკომიტეტო განხილვაში მონაწილეობს.

 

კოალიციაში გაერთიანებული არასამთავრობო ორგანიზაციების წევრები საპროცედურო საკითხთა კომიტეტზე მივიდნენ მაისურებით, რომელსაც აწერია „კლანი უნდა წავიდეს“.

 

„ეკა ბესელიას მიერ შემუშავებული საკანონმდებლო პროექტი მისაღებია, რადგან მასში ასახულია შენიშვნები, რომელიც არასამთავრობო ორგანიზაციათა კოალიციამ წარმოადგინა. თუმცა, ჩვენი მთავარი სათქმელი არის ის, რომ არსებული იუსტიციის უმაღლესი საბჭოს პირობებში, არანაირ საკანონმდებლო ცვლილებებს და რეფორმას აზრი არ აქვს, ვიდრე სასამართლო სისტემიდან „კლანი“ არ წავა, სისტემა ვერ გაჯანსაღდება. თუკი მსჯელობა მიდის იმასთან დაკავშირებით, თუ როგორი უნდა იყოს უზენაესი სასამართლოს მოსამართლეების არჩევის მოდელი, ჩვენ ვამბობთ, რომ საბჭო უნდა გადადგეს და კარგი პროცედურები ახალმა საბჭომ გამოიყენოს“, - განაცხადა ვახუშტი მენაბდემ.

 

მისივე შეფასებით, უმრავლესობის ფარგლებში შემუშავებული კანონპროექტი ადასტურებს, რომ რეალურად რეფორმის სურვილი არ არსებობს და ენერგია ისეთი წესების შექმნაზე დაიხარჯა, რაც „კლანის“ ძალაუფლების შენარჩუნებას უზრუნველყოფს.

 

საპროცედურო საკითხთა და წესების კომიტეტი დღეს პირველი მოსმენით უზენაესი სასამართლოს მოსამართლეების არჩევის წესთან დაკავშირებით ინიცირებულ კანონპროექტებს იხილავს. აღნიშნულ საკითხზე პარლამენტში სამი საკანონმდებლო ინიციატივაა წარდგენილი.

ექსკლუზიური

არქივი

« « » » ივლისი 2019
ორშ სამ ოთხ ხუთ პარ შაბ კვი
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ამინდი

Tbilisi

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?