Global Press

Georgia

Global PressGlobal PressGlobal PressGlobal Press

USD
3.0594
EUR
3.4507
RUR
0.043
GBP
3.835

ეკონომიკის საკითხებში ევროკომისარი, პაოლო ჯენტილონის განცხადებით, 2020 წელს ევროკავშირის ეკონომიკა უფრო ღრმა რეცესიაში ჩავარდება, ვიდრე მანამდე იყო პროგნოზირებული.

 

ევროკომისიაში აცხადებენ, რომ მიმდინარე წელს ევროკავშირის ეკონომიკა 8.3%-ით შემცირდება, ხოლო 2021 წელს კი 5.8%-იანი ზრდა დაფიქსირდება.

 

„ეკონომიკის აღდგენისკენ მიმავალი გზა ჯერ კიდევ გაურკვევლობით არის მოფენილი, რაც ძირითადად ეპიდემიოლოგიური სიტუაციიას გაურკვევლობას უკავშირდება“, - განაცხადა პაოლო ჯენტილონიმ.

 

აღსანიშნავია, რომ მაისში გამოქვეყნებული პროგნოზის თანახმად, 2020 წელს ევროკავშირის მშპ-ის 7.5%-ით შემცირება იყო პროგნოზირებული.

 

ევროკომისიაში აცხადებენ, რომ 2020 წელს ეკონომიკურ აქტივობაზე გავლენა მოსალოდნელზე უარესი იქნება, რადგან „საკარანტინო ზომების გაუქმება ნაკლებად სწრაფად მიმდინარეობს, ვიდრე საგაზაფხულო პროგნოზში იყო გათვალისწინებული“.

მსოფლიოში ადამიანის უფლებებისა და დემოკრატიის შესახებ ევროკავშირის ყოველწლიურ ანგარიშში ევროკავშირი შეშფოთებას გამოხატავს საქართველოს ოკუპირებულ ტერიტორიებზე ადამიანის უფლებების სერიოზული დარღვევების გამო.

 

„ევროკავშირირუსეთის ფედერაციის მიერ უკანონოდ ანექსირებულ ყირიმის ავტონომიურ რესპუბლიკასა და ქალაქ სევასტოპოლში ადამიანის უფლებებთან დაკავშირებით რთული მდგომარეობისა და არსებული დაუსჯელობის გამო, მათ შორის, ყირიმელი თათრებისა და უკრაინულენოვანი თემის წარმომადგენლების სისტემატიური დევნის გამო შეშფოთების გამოხატვას განაგრძობდა; ასევე, ადამიანის უფლებების სერიოზული დარღვევებს გამო აღმოსავლეთ უკრაინასა და საქართველოს აფხაზეთისა და ცხინვალის/სამხრეთ ოსეთის რეგიონებში, რომლებსაც შესაბამისი მთავრობები ვერ აკონტროლებენ. ევროკავშირი აქტიურად მოუწოდებდა მათ, ვინც ამ ტერიტორიების ეფექტურ კონტროლს ახორციელებდა, მიენიჭებინათ ადამიანის უფლებების სფეროში საერთაშორისო მექანიზმებისთვის შეუფერხებელი წვდომა უკრაინისა და საქართველოს ამ რეგიონებზე“, – ნათქვამია ანგარიშში.

ევროპარლამენტის წევრი პოლონეთიდან, ანდჟეი ჰალიცკი საქართველოს ხელისუფლებას მოუწოდებს, პოლიტიკური პატიმრები გაათავისუფლოს. მისი თქმით, მათი არგათავისუფლება ნიშნავს, რომ მარტის ხელშეკრულება დაირღვა და სამართლიანი არჩევნები არ ჩატარდება.

 

„ჩვენ, ევროპარლამენტში საქართველოს მეგობრები, მივესალმებით 8 მარტის ხელშეკრულებას, რომელიც ხელისუფლებასა და ოპოზიციას შორის გაფორმდა. პოლიტიკური პატიმრების პატიმრობაში დატოვება ნიშნავს, რომ შეთანხმება დაირღვა და სამართლიანი არჩევნები არ იქნება. გაათავისუფლეთ პოლიტიკური პატიმრები!“ - წერს ჰალიცკი „ტვიტერის“ საკუთარ გვერდზე.

ადამიანის უფლებების დაცვის საკითხებზე საქართველო-ევროკავშირის ყოველწლიური დიალოგის მე-13 შეხვედრა გაიმართა.

 

„ევროკავშირი და საქართველო მიესალმებიან ადამიანის უფლებათა დაცვის კუთხით, საქართველოს მიერ მიღწეულ პროგრესს. ევროკავშირმა კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის მხარდაჭერა საერთაშორისო საზოგადოების მიერ აღიარებულ საზღვრებში და გამოთქვა შეშფოთება ადამიანის უფლებების მდგომარეობის გაუარესების შესახებ აფხაზეთსა და ცხინვალის რეგიონში. განსაკუთრებით, ეთნიკურად ქართველთა მიმართ დისკრიმინაციასთან დაკავშირებით, მათთვის გადაადგილების თავისუფლების შეზღუდვის, მათ შორის, ჯანდაცვისა და სოციალურ სერვისებზე წვდომის შეზღუდვის, მოქალაქეთა თვითნებურად დაკავების ფაქტების გამო“ - წერია ევროკავშირის მიერ გავრცელებულ განცხადებაში.

 

შეხვედრაზე კიდევ ერთხელ გაესვა ხაზი რუსეთის ფედერაციის მიერ 2008 წელს ცეცხლის შეწყვეტის შესახებ შეთანხმების შესრულების აუცილებლობას. ევროკავშირის წარმომადგენლებმა შეშფოთება გამოთქვეს ოკუპირებულ ტერიტორიაზე ე.წ. „საზღვრების“ დაკეტვის გამო და აღნიშნეს, რომ, განსაკუთრებით კოროვირუსის პანდემიის დროს, ამან ახალგორის რაიონში კრიტიკული ჰუმანიტარული შედეგები გამოიწვია.

 

ამასთან აღინიშნა, რომ უნდა დასრულდეს არჩილ ტატუნაშვილისა და გიგა ოთხოზორიას საქმეში მონაწილე პირთა დაუსჯელობა.

 

შეხვედრაზე კიდევ ერთხელ გაესვა ხაზი, რომ ევროკავშირი მიესალმება საკონსტიტუციო ცვლილებების მიღებას.

 

„ევროკავშირი მიესალმება იმ პროგრესს, რომელსაც საქართველომ ეთნიკური უმცირესობების წარმომადგენელთა დახმარებისა და სამოქალაქო ინტეგრაციის პროცესების უზრუნველყოფის კუთხით მიაღწია. ევროკავშირი მოუწოდებს საქართველოს, გააგრძელოს ძალისხმევა ქალთა წარმომადგენლობის გასაზრდელად, საზოგადოებრივი ცხოვრების ყველა სფეროში“ - აღნიშნულია განცხადებაში.

დღეიდან ბელგია, ხორვატია, შვეიცარია და გერმანია სასაზღვრო შეზღუდვებს ხსნიან. ამის შესახებ BBC წერს.

 

ასევე დღეიდან ჩეხეთი 26 ქვეყანასთან შეუზუდავ მიმოსვლას იწყებს, თუმცა ეს არ ეხება ბელგიელ, პორტუგალიელ, შვედ და ბრიტანელ ტურისტებს.

 

საბერძნეთი საზღვრებს ავსტრალიიდან, ახალი ზელანდიიდან, იაპონიიდან და სამხრეთ კორეიდან ჩასული მოქალაქეებითვის ხსნის. ავსტრია სასაზღვრო შეზღუდვების მოხსნას 16 ივნისიდან იწყებს, თუმცა ეს არ ეხება პორტუგალიიდან, ესპანეთიდან, შვედეთიდან და დიდი ბრიტანეთიდან ჩასულ მოგზაურებს.

 

ევროკავშირსა და შენგენის ზონაში თავისუფალი გადაადილების აღდგენისთვის საკუთარი წვლილი შეაქვს გერმანიას. ქვეყანამ საზღვრებზე კონტროლი გააუქმა, რომელიც მარტის შუა რიცხვებიდან მოქმედებდა.

 

ესპანეთი ევროკავშირის ქვეყნებთან, პორტუგალიის გარდა, თავისუფალ მიმოსვლას 21 ივნისიდან დაიწყებს. პორტუგალიასთან საზღვარი კი 1-ელ ივლისამდე ჩაკეტილი დარჩება.

ევრონესტის საპარლამენტო ასამბლეაში ევროპარლამენტის დელეგაციის თავმჯდომარის ანდრიუს კუბილიუსის განცხადებით, ევროკავშირი და მისი საერთაშორისო პარტნიორები საქართველოს, რეფორმების განხორციელების, COVID-19-ის პანდემიასთან ბრძოლისა და მის სოციალურ- ეკონომიკურ შედეგებთან გამკლავებისთვის, 500 მილიონი ევროს ოდენობის თანხით ეხმარება. ამასთანავე, კუბილიუსმა აღნიშნა, რომ საქართველოს შემთხვევაში ამ დახმარების საკვანძო კომპონენტი დაკავშირებულია მის მიერ აღებული ვალდებულებების შესრულებასთან, განსაკუთრებით კანონის უზენაესობის, კორუფციასთან ბრძოლის, საარჩევნო რეფორმების, ეკონომიკური მმართველობისა და გამჭვირვალობის მიმართულებით.

 

„ჩვენ აქ ვართ, რათა დავეხმაროთ საქართველოს, რომ ჰქონდეს სასამართლოს სისტემის უმაღლესი სტანდარტი და გამჭვირვალე საარჩევნო პროცესი. ჩვენ გავაკეთებთ ყველაფერ აუცილებელს, რათა დავეხმაროთ საქართველოს და მის მოსახლეობას, რათა მაქსიმალური სარგებელი მიიღოს ღია დემოკრატიის, ადამიანის უფლებათა დაცვის ეკონომიკის ზრდისა და კეთილდღეობის შედეგად. 2020 წლის მარტის კრიზისის საწყის ეტაპზევე ევროკავშირი საქართველოს გვერდით იდგა. მან დაუყოვნებლივ დაიწყო გადაუდებელი სამედიცინო დახმარების მიწოდება, მოწყვლადი ჯგუფების დახმარება და მცირე და საშუალო წარმოების ლიკვიდურობის ზრდა ჯამში 90 მილიონი ევროს მოცულობით. გარდა ამისა, მიაწოდა სამედიცინო აღჭურვილობა, მათ შორის, ვენტილატორები, ლაბორატორიული ნაკრები, ნიღბები, დამცავი სათვალეები, სამედიცინო ხალათები და დამცავი კომბინიზონები ვირუსთან საბრძოლველად და ეს დახმარება საქართველოს იმ ტრენინგების პარალელურად გაეწია, რომელიც სამედიცინო და ლაბორატორიული სფეროს თანამშრომლებისთვის იყო ორგანიზებული ჯანდაცვის მსოფლიო ორგაიზაციასთან ერთად. მიზანმიმართული გრანტები დაეხმარება საქართველოს სოციალურ-ეკონომიკურ განვითარებას, სამოქალაქო საზოგადოებას, კონკრეტულად კი კრიზისის შედეგად ყველაზე მეტად დაზარალებულ ფენას, სოციალურ მეწარმეობას, სოციალურ სერვისებსა და ადამიანის უფლებების დაცვას,“- განაცხადა ანდრიუს კუბილიუსმა.

 

მან ამასთანავე აღნიშნა, რომ 2020 წლის აპრილში ევროკავშირმა საქართველოსთვის დახმარების პაკეტი გასცა 183 მილიონი ევროს ოდენობის გრანტის სახით, საქართველოს სოციალური და ეკონომიკური მდგომარეობის გაუმჯობესებისა და ფინანსური მდგომარეობის გაძლიერებისთვის.

 

„სახსრების ნაწილი წავა ქართული ბიზნესისთვის ლარის კრედიტზე წვდომის გასამარტივებად, ასევე ბიზნესის სტიმულირებისა და ხელახლა ამუშავებისთვის. აღნიშნული დახმარება გეწეული იქნება ჩვენს საერთაშორისო ფინანსურ ინსტიტუტებთან ერთად, რომლელიც მუშაობენ ადგილობრივ ბანკებთან და საკრედიტო ინსტიტუტებთან. მოგვიანებით, აპრილში ევროკავშირმა ასევე, დაამტკიცა დამატებითი დახმარება 150 მილიონი ევროს ოდენობის სესხის სახით საქართველოში მაკროეკონომიკური სტაბილურების მიზნით, რაც ქვეყანას მოსახლეობის დაცვასა და კრიზისის სოციო-ეკონომიკური შედეგების შერბილებაში დაეხმარება. მნიშვნელოვანია აღინიშნოს, რომ ბიუჯეტის დახმარების ხარჯების ნაწილი დაკავშირებული იქნება განსაკუთრებულ პირობებთან საქართველოსთვის, კონკრეტულად მიმდინარე რეფორმების დანერგვასთან კანონის უზენაესობის, სასამართლო სისტემისა და საარჩევნო რეფორმის მიმართულებით,“- განაცხადა ანდრიუს კუბილიუსმა.

 

მან ასევე განაცხადა, რომ დამატებით საერთაშორისო სავალუტო ფონდმა გადაწყვეტილება მიიღი, რომ საქართველოსთვის განკუთვნილი პროგრამა 345 მილიონი ევროთი გაზარდოს, საიდანაც 280 მილიონზე მეტი 2020 წელს გამოიყოფა.

ევროკავშირის საბჭომ ოფიციალურად დაამტკიცა იმ ქვეყნების სია, რომელთა მოქალაქეებსაც ევროკავშირის ტერიტორიაზე პირველი ივლისიდან შესვლა შეეძლებათ.

 

14 ქვეყანას შორის, რომელთა მოქალაქეებს ევროკავშირის ტერიტორიაზე შესვლა შეეძლებათ, საქართველოც არის.

 

ევროკავშირის განცხადებაში ხაზგასმულია, რომ აღნიშნული სია ყოველ ორ კვირაში გადაიხედება და გარემოებების მიხედვით განახლდება.

 

სიაში შემდეგი ქვეყნები მოხვდნენ: საქართველო, ავსტრალია, კანადა, იაპონია, მონტენეგრო, მაროკო, სერბეთი, ურუგვაი, ალჟირი, ტუნისი, რუანდა, ახალი ზელანდია, სამხრეთ კორეა, ტაილანდი.

 

რაც შეეხება ჩინეთს, ევროკავშირი საზღვარს იმ პირობით გახსნის, თუ ჩინეთიც ასევე გაუხსნის საზღვარს ევროკავშირის მოქალაქეებს.

ევროპარლამენტმა ევროკავშირის მეზობელი და პარტნიორი ქვეყნებისთვის, მათ შორის საქართველოსთვის კორონავირუსის პანდემიით გამოწვეული შედეგებთან აღმოსაფხვრელად 3 მილიარდი ევროს ოდენობის სესხის გამოყოფას მხარი დაუჭირა. ინფორმაციას ამის შესახებ ევროპარლამენტის პრესსამსახური ავრცელებს.

 

სესხები 10 ქვეყანაზე გაიცემა. კერძოდ საქართველო 150 მილიონ ევროს, ალბანეთი - 180 მილიონ ევროს, ბოსნია ჰერცეგოვინა - 250 მილიონ ევროს, იორდანია - 200 მილიონ ევროს, კოსოვო - 100 მილიონ ევროს, მოლდოვა - 100 მილიონ ევროს, მონტენეგრო - 60 მილიონ ევროს, ჩრდილოეთ მაკედონია - 160 მილიონ ევროს, ტუნისი - 600 მილიონ ევროს, უკრაინა კი 1,2 მილიარდ ევროს მიიღებს.

 

ინიციატივას მხარი 547-მა დეპუტატმა დაუჭირა, 93-მა წინააღმდეგ მისცა ხმა, 47-მა კანონმდებელმა კი თავი შეიკავა. სავარაუდოდ, პირველ ტრანშს ქვეყნები მიმდინარე წლის შემოდგომაზე, მეორე ტრანშს კი 2021 წლის დასაწყისში მიიღებენ.

ევროკომისიის პრეზიდენტმა ევროკავშირის ეკონომიკის კორონავირუსის პანდემიისგან აღდგენის გეგმა წარადგინა და აღნიშნა, რომ ცხოვრების ჩვეული რიტმისკენ დაბრუნება მალე არ მოხდება.

 

„ჩვენ ადრეც გვქონდა ეკონომიკური კრიზისები, მაგრამ არასდროს გვქონია ისეთი ეკონომიკური ვარდნა, როგორც ბოლო სამი თვის განმავლობაში“, - განაცხადა ურსულა ფონ დერ ლაიენმა ევროპარლამენტში სიტყვით გამოსვლისას.

 

ევროკომისიის პრეზიდენტის განმარტებით, ეკონომიკის აღდგენის გეგმა იმ წევრ სახელმწიფოებზე იქნება ფოკუსირებული, რომლებიც ყველაზე მეტად დაზარალდნენ კორონავირუსის პანდემიის გამო.

ევროკავშირის საგარეო საქმეთა მინისტრებმა აშშ-ის სახელმწიფო მდივანთან, მაიკ პომპეოსთან მოლაპარაკებებზე ვაშინგტონს მოუწოდებს, ჯანმოსთან ურთიერთობების გაწყვეტის შესახებ გადაწყვეტილებას გადახედოს. ამის შესახებ ევროკავშირის საგარეო პოლიტიკისა და უსაფრთხოების საკითხებში უმაღლესმა კომისარმა, ჟოზეფ ბორელმა განაცხადა.

 

„ჩვენ განვიხილეთ აშშ-ის განცხადება ჯანმოსთან ურთიერთობების გაწყვეტის განზრახვის შესახებ და აშშ-ს მოვუწოდეთ, გადახედონ ამ გადაწყვეტილებას, ვინაიდან გლობალურ პრობლემებს გლობალური გადაწყვეტა სჭირდებათ მრავალმხრივი ინსტრუმენტების გამოყენებით. ახლა, როგორც არასოდეს, მრავალმხრივი მიდგომა გვჭირდება“, - განაცხადა ჟოზეფ ბორელმა.

 

შეგახსენებთ, რომ 29 მაისს დონალდ ტრამპმა განაცხადა, რომ აშშ წყვეტს ურთიერთობებს ჯანდაცვის მსოფლიო ორგანიზაციასთან და თანხებს ჯანდაცვის სფეროში ჩართულ სხვა ორგანიზაციებს გადაუნაწილებს.

 

დონალდ ტრამპის თქმით, ჯანდაცვის მსოფლიო ორგანიზაციის ხელმძღვანელობამ უარი განაცხადა რეფორმების გატარებაზე, რომელსაც აშშ-ის ადმინისტრაცია ითხოვდა.

 

„ადრე განვაცხადეთ, თუ რა რეფორმები უნდა ჩაეტარებინა ჯანდაცვის მსოფლიო ორგანიზაციას. მათ უარი განაცხადეს. დღეს აშშ ყველა ურთიერთობას წყვეტს ჯანდაცვის მსოფლიო ორგანიზაციასთან. ჯანდაცვის მსოფლიო ორგანიზაციისთვის გამოყოფილი წლიური 450 მილიონი დოლარი სხვა საჭიროებებს მოხმარდება“, - აღნიშნა დონალდ ტრამპმა.

 

15 აპრილს აშშ-მა ჯანდაცვის მსოფლიო ორგანიზაციის დაფინანსება შეაჩერა. დონალდ ტრამპის თქმით, ჯანდაცვის მსოფლიო ორგანიზაციამ კორონავირუსის საფრთხის შესახებ დროული და სათანადო ინფორმაცია არ გაავრცელა.

ევროკავშირის ინსტიტუციებმა უნდა გააგრძელონ იმის უზრუნველყოფა, რომ პროევროპული ქვეყნები, როგორიც არის საქართველო, ხედავდნენ ევროკავშირს, როგორც თავიანთ საბოლოო მიზანს, - წერს ევროკავშირის ყოფილი ელჩი ხორვატიაში და ევროკავშირის მოქმედი ელჩი რუსეთის ფედერაციაში პოლ ვანდორენი.

 

„ეს არაჩვეულებრივი დროა დიპლომატიურ და საგარეო საქმეთა სამყაროში დასამკვიდრებლად. როგორც ყველაფერი დანარჩენი, ჩვენი სამყაროც მოიცვა კორონავირუსის პანდემიამ. ურთიერთობებს სახელმწიფოებში თითქმის ექსკლუზიურად განაგებს ამ ლეტალური ვირუსის სამწუხარო გავლენა. მედიკამენტებისა და აღჭურვილობის ექსპორტი, სამოგზაურო აკრძალვები, რეპატრიაციები და რა თქმა უნდა, გადაბრალების თამაში და დეზინფორმაციის უპრეცედენტო დონე.

 

ამ სათაურების ქვეშ, ძირითადად (და გასაგებად) უგულებელყოფილი, საერთაშორისო ურთიერთობების ბიზნესი გრძელდება. ბოლო მნიშვნელოვანი მოვლენა იყო ჩრდილოეთ მაკედონიის ნატოში გაწევრიანება: უზარმაზარი მიღწევა პატარა, ახალგაზრდა ქვეყნისთვის (დიდი ისტორიის მიუხედავად) და კიდევ ერთი მნიშვნელოვანი ეტაპი მსოფლიოს ყველაზე ძლიერი და წარმატებული სამხედრო ალიანსის გაფართოებისთვის. იმავე დღეებში, ევროკავშირის ლიდერები შეთანხმდნენ, რომ ოფიციალურად დაიწყონ გაერთიანების მოლაპარაკებები ჩრდილოეთ მაკედონიასა და ალბანეთთან: კიდევ ერთი მნიშვნელოვანი მომენტი ორივე ქვეყნისთვის და პირველი ნაბიჯი ურსულა ვონ დერ ლეინის პრეზიდენტობის პერიოდში თვითგამოცხადებული „გეოპოლიტიკური“ კომისიის მხრიდან.

 

როგორც ევროკავშირის პირველ და უკანასკნელ ელჩს ხორვატიაში, (ჩემი სამსახური გაუქმდა, როდესაც 2013 წელს ხორვატია ევროკავშირში გაწევრიანდა), მე გამომიცდია, პირველ რიგში, სიხარული და იმედი, რომელიც ასეთ მომენტებს მოაქვს, მაგრამ ასევე - თავდაუზოგავი შრომაც ასეთი მომენტების მისაღწევად.

 

ეს პროცესი მოითხოვს საზოგადოების ყველა ფენის მობილიზებას და დიდ ძალისხმევას კანონის უზენაესობის დანერგვისა და განხორციელებისთვის, სასამართლო სისტემის განახლებისთვის, კორუფციის წინააღმდეგ ბრძოლისთვის, ადამიანის უფლებების დაცვისა და ახალი კანონმდებლობის ათასობით გვერდის მიღებისთვის. ყველა ეს ძალისხმევა მიმართულია სტაბილურობის უზრუნველყოფისა და დასავლეთ ბალკანეთის ამ ქვეყნების ევროინტეგრაციისკენ.

 

სამხრეთ კავკასია კიდევ ერთი მნიშვნელოვანი რეგიონია ევროკავშირის გაფართოებისთვის. საქართველოს მთავრობა ცალსახად პრო-ევროპულია (და ასევე პრო-ჩრდილოატლანტიკური), რომლის ლიდერებსაც არ დაუმალავთ ორივე ექსკლუზიურ დასავლურ კლუბში გაწევრიანების სურვილი. მთავრობის გეგმები - რაც მთავარია - ფართო პოპულარობით სარგებლობს, ქართველთა 80% მხარს უჭერს ევროკავშირსა და ნატოში გაწევრიანების იდეას. ევროკავშირი არის საქართველოს ყველაზე დიდი დონორი და ძლიერი პარტნიორი. 2016 წელს, ევროკავშირსა და საქართველოს შორის ამოქმედდა ასოცირების ამბიციური ხელშეკრულება.

 

ეს არის გეოპოლიტიკური მნიშვნელობის აქტი საქართველოსთვის, რომელიც ამტკიცებს მის ევროპულ იდენტობას და მისი სტრატეგიული საგარეო პოლიტიკის პრიორიტეტს, რომ ევროკავშირთან მჭიდრო კავშირი ჩამოაყალიბოს.

 

რა თქმა უნდა, არსებობს ერთი მნიშვნელოვანი დამაფიქრებელი ფაქტორი. სპილო (ან, უფრო სწორად, დათვი) ოთახში. ამჟამად, საქართველოს ტერიტორიის 20% ოკუპირებულია რუსეთის მიერ, 2008 წლის ხანმოკლე ომის შემდეგ, (რომლის დროსაც, როგორც დიპლომატი, მე გამგზავნეს მოსკოვის ევროკავშირის საელჩოში) საქართველოს წინა მმართველი გუნდის პერიოდში.

 

ორ ქვეყანას ჯერ კიდევ არ აქვთ დიპლომატიური ურთიერთობა, ხოლო რუსეთის მხრიდან მუდმივი კიბერ-თავდასხმები და დეზინფორმაციული კამპანიები მიზანმიმართულად არის შექმნილი იმისთვის, რომ ხელი შეუშალოს საქართველოს მთავრობას ევროპასთან უფრო დაახლოებაში.

 

ეს კიდევ უფრო მნიშვნელოვანი მიზეზია ევროკავშირის დაუყოვნებლივი და მიზანმიმართული ჩართულობისთვის. ევროკავშირის გეოპოლიტიკური გავლენა და ძალა არსებითად არის დაფუძნებული მის შესაძლებლობებზე ფართო ევროპულ რეგიონში, რომ იმოქმედოს როგორც მაგნიტმა იმ ქვეყნებისთვის, რომელთაც სურთ თავიანთი პრობლემური წარსულიდან გაქცევა (განსაკუთრებით, საბჭოთა კავშირის მიერ დაზარალებული ქვეყნები).

 

ბრიუსელმა უნდა გააგრძელოს იმის უზრუნველყოფა, რომ ისეთი ქვეყნები, როგორიცაა საქართველო, ხედავდნენ ევროკავშირს, როგორც საბოლოო მიზანს. თუმცა როგორ უნდა მივაღწიოთ ამას პრაქტიკაში სამხრეთ კავკასიაში არსებული სირთულეების ფონზე?

 

პირველი წესი უნდა იყოს წახალისება და საზოგადოების აღიარება.

 

თბილისში არსებული ქართული ოცნების ამჟამინდელმა მთავრობამ უხელმძღვანელა ეკონომიკურ რენესანსს: საქართველო ამჟამად მე -7 ადგილზეა „ბიზნესის კეთების სიმარტივის” ყოველწლიურ რეიტინგში (ევროკავშირის 27 წევრი ქვეყნიდან 26-ზე წინ); ეკონომიკური თავისუფლების მემკვიდრეობის გლობალური ინდექსით - მე -12 ადგილზე; მთავრობამ კი შეამცირა სიღარიბე 50%-ით, რადგან ,,ღარიბებმა მნიშვნელოვნად ისარგებლეს მთავრობის სოციალური პოლიტიკით“ და ,,ახალი ეკონომიკური შესაძლებლობებით“ (მსოფლიო ბანკის თანახმად).

 

ეს ჩანაწერი იმსახურებს საზოგადოებრივ აღიარებას.

 

ევროკავშირის ლიდერები მნიშვნელოვან მონაწილეობას იღებდნენ საქართველოს ბოლოდროინდელ რეფორმებში: ევროკავშირის ელჩმა თბილისში, აშშ-სთან, გერმანიასა და ევროსაბჭოსთან ერთად ხელი შეუწყო ბოლო საარჩევნო რეფორმების პაკეტის ჩამოყალიბებას, რათა საქართველოს სისტემა შეესაბამებოდეს ევროკავშირის საპარლამენტო არჩევნებში გამოყენებულ სისტემას.

 

რეფორმა ზრდის პროპორციული ადგილების რაოდენობას და ადგენს პროპორციული არჩევნების საარჩევნო ბარიერს. მთავრობამ და ოპოზიციამ ასევე ხელი მოაწერეს განცხადებას, სადაც ხაზგასმულია იმ ქმედებების თავიდან აცილების აუცილებლობა, რომლებიც შეიძლება შეფასდეს, როგორც არასათანადო საარჩევნო პროცესი და სასამართლო სისტემის პოლიტიზაცია.

 

ევროკომისიამ ეს შეთანხმება აღწერა, როგორც ,,ყველა მხრიდან პოლიტიკური ხელმძღვანელობის ძალიან მისასალმებელი, მნიშვნელოვანი და თვალსაჩინო ნიშანი, რაც ასახავს საქართველოში არაჯანსაღი პოლიტიკური პოლარიზაციის შემცირების სურვილს”.

 

ევროკავშირის ელჩმა თბილისში, კარლ ჰარცელმა, ძლიერი პრეცედენტი ჩამოაყალიბა ამ „დაპირისპირების ფაქტორების“ მიდგომასთან დაკავშირებით და შეაქო საქართველოს მთავრობის კორორონავირუსთან დაკავშირებით ნაადრევი და გადამწყვეტი ნაბიჯებისთვის (ქვეყანას აქვს საკმაოდ მცირე რაოდენობის შემთხვა - ვირუსით 11 ადამიანია გარდაცვლილი. საქართველოში მოგზაურობა დროულად აიკრძალა, დაწესდა შეზღუდვები. აღსანიშნავია კარგი რესურსების მქონე ჯანდაცვის სისტემა.

 

ევროკავშირმა უკვე გამოუყო საქართველოს დახმარების პაკეტი 20 მილიონი ევროს ოდენობით კორონას კრიზისთან გასამკლავებლად; დიდი ალბათობით, მომავალში კიდევ იქნება მათი მხრიდან დახმარება.

 

საქართველოსთვის ეს მხარდაჭერა უნდა გაგრძელდეს არსებული კრიზისის დასრულების შემდეგაც“ - აღნიშნავს პოლ ვანდორენი.

კიდევ ერთი გატეხილი დაპირება საბოლოოდ აქცევს „ქართულ ოცნებას“ არასაიმედო და უპასუხისმგებლო პარტნიორად, -ამის შესახებ ევროპარლამენტარი, დემოკრატიისა მხარდაჭერისა და არჩევნების კოორდინაციის ჯგუფის წევრი, ვიოლა ფონ კრამონი საქართველოში განვითარებულ მოვლენებთან დაკავშირებით აცხადებს.

 

მისი თქმით, სამწუხაროა „ქართული ოცნების“ მცდელობა, გამოიყენოს პანდემია იარაღად და კითხვის ნიშნის ქვეშ დააყენოს მარტში მიღწეული შეთანხმება.

 

„უაღრესად მნიშვნელოვანია, რომ სავარაუდო კანონდარღვევები გამოძიებული და შესწავლილი იქნას დამოუკიდებელი სასამართლო სისტემის მიერ. სამწუხაროდ, Freedom House-ის უახლესმა ანგარიშმაც დაადასტურა, რომ სასამართლო სისტემა საქართველოში არ არის პოლიტიკური მოტივაციებისგან თავისუფალი.

 

დაუშვებელია და უბრალოდ ცუდი ტონია „ქართული ოცნების“ მიერ ფასილიტატორი დიპლომატების შიდა პოლიტიკურ კონფრონტაციაში ჩათრევის მცდელობა. დიპლომატებმა, საქართველოს ინტერესებიდან გამომდინარე, გასწიეს უდიდესი სამსახური იშუამდგომლეს რა მხარეებს შორის 8 მარტის შეთანხმების მისაღწევად“, - განაცხადა ვიოლა ფონ კრამონმა.

 

კრამონის თქმით, ევროკავშირი თვალს ვერ დახუჭავს საქართველოს მიერ უკან გადადგმულ ნაბიჯებზე.

 

„ორივე პოლიტიკურ მხარეს, განსაკუთრებით მეტი ძალაუფლების მქონეს უნდა ახსოვდეს, რომ საარჩევნო რეფორმა და კანონის უზენაესობა უმნიშვნელოვანესი საფეხურია უფრო დემოკრატიული, უფრო ევროპული საქართველოსთვის. ევროკავშირს არ შეუძლია და თვალს ვერ დახუჭავს ამ ორ სფეროში უკან დახეულ ნაბიჯებზე“,- წერია კრამონის განცხადებაში, რომელიც მის გვერდზეა გამოქვეყნებული.

არქივი

« « » » ივლისი 2019
ორშ სამ ოთხ ხუთ პარ შაბ კვი
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

ამინდი

Tbilisi

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?