Global Press

Georgia

Global PressGlobal PressGlobal PressGlobal Press

USD
2.6984
EUR
3.0246
RUR
0.0421
GBP
3.4912

ჩვენ გვესმის, რომ „თავისუფლების საზღვარი“ ვრცელდება მხოლოდ იქამდე, სადამდეც - დემოკრატიული მმართველობა და კანონის უზენაესობა, ამ მხრივ, ჩვენი ქვეყანა სამაგალითო გახდა რეგიონში ფუნდამენტური ინსტიტუციური რეფორმების განხორციელებისა და დემოკრატიული ტრანსფორმაციის კუთხით, - ამის შესახებ სერბეთის ეროვნული ასამბლეის პლენარულ სხდომაზე საქართველოს პარლამენტის თავმჯდომარემ ირაკლი კობახიძემ ქვეყანაში განხორციელებულ და მიმდინარე დემოკრატიულ რეფორმებზე საუბრისას განაცხადა.

 

პარლამენტის თავმჯდომარემ ხაზგასმით აღნიშნა, რომ საგარეო მიმართულებით წარმატება შიდა რეფორმების დღის წესრიგს ეფუძნება.

 

„დემოკრატიული რეფორმები, პირველ რიგში, უზრუნველყოფს ჩვენს სტაბილურობასა და კეთილდღეობას. ვახორციელებთ ამბიციური რეფორმების დღის წესრიგს რათა უზრუნველვყოთ ჩვენი ქვეყნის განვითარება, ჩვენი მოქალაქეების კეთილდღეობა, ყველა ასაკის, სქესის, ეთნიკური და რელიგიური წარმოშობის ადამიანისათვის თვითრეალიზების შესაძლებლობის მიცემა თავისუფალ და თანამედროვე საზოგადოებაში”,- განაცხადა ირაკლი კობახიძემ.

 

პარლამენტის თავმჯდომარის თქმით, საკონსტიტუციო ცვლილებებმა დაასრულა ხელისუფლების ორგანოთა დაბალანსებული სისტემის შექმნისა და ჩვენი ქვეყნის ევროპული ტიპის საპარლამენტო დემოკრატიად საბოლოოდ ჩამოყალიბების პროცესი.

 

„გვწამს, რომ პარლამენტი უნდა გახდეს ქართული პოლიტიკის ძლიერი ხმა, რაც თავიდან აგვარიდებს ავტორიტარიზმის განმეორების საფრთხეს გრძელვადიან პერსპექტივაში, მოახდენს პოლიტიკური პოლარიზაციის და რადიკალიზაციის პრევენციას, ხელს შეუწყობს პარტიული პოლიტიკის ინსტიტუციონალიზაციას და პოლიტიკური დიალოგის გაძლიერებას, ასევე, აღმასრულებელ ხელისუფლებაზე საკანონმდებლო ზედამხედველობის გაძლიერებას.

 

საქართველოს პარლამენტი ძალისხმევას არ იშურებს, რათა უკეთ ემსახუროს მოქალაქეებს პარლამენტის ღიაობის და ანგარიშვალდებულების გაუმჯობესების, მოქალაქეთა გადაწყვეტილებების მიღების პროცესში ჩართულობით და მათზე ორიენტირებული და ინოვაციებზე დაფუძნებული ეფექტური მმართველობის გაძლიერებით“,- განაცხადა ირაკლი კობახიძემ.

სერბეთისა და საქართველოს მომავალი ევროპულ ოჯახშია და გვწამს, რომ ჩვენი საერთო მისწრაფება ერთიანი, თავისუფალი და მშვიდობიანი ევროპისკენ, მალე რეალობად იქცევა, - ამის შესახებ საქართველოს პარლამენტის თავმჯდომარემ სერბეთის რესპუბლიკის ეროვნული ასამბლეის პლენარულ სხდომაზე განაცხადა.

 

საქართველოს პარლამენტის ინფორმაციით, სერბეთში ვიზიტის ფარგლებში, ირაკლი კობახიძემ მასპინძელი ქვეყნის პარლამენტის წევრებს სიტყვით მიმართა და სერბ კოლეგას, მაია გოიკოვიჩს გულთბილი მასპინძლობისთვის, ასევე, ორმხრივი ურთიერთობების გაღრმავებაში შეტანილი პერსონალური წვლილისთვის მადლობა გადაუხადა.

 

საქართველოს პარლამენტის თავმჯდომარის თქმით, ორ ქვეყანას შორის ურთიერთობები საერთო ღირებულებების - თავისუფლების, დემოკრატიისა და მშვიდობიანი განვითარების მიმართ ერთგულებას და ტერიტორიული მთლიანობისა და სუვერენიტეტის პრინციპებს ეფუძნება.

 

„გვწამს, რომ მიუღებელია საერთაშორისო სამართლის ამ ფუნდამენტური პრინციპების უგულებელყოფა ან მათით მანიპულირება“,- განაცხადა ირაკლი კობახიძემ.

 

ორმხრივ ურთიერთობებზე საუბრისას, პარლამენტის თავმჯდომარემ აღნიშნა, რომ არსებობს აუთვისებელი პოტენციალი მრავალი მიმართულებით.

 

მისივე შეფასებით, ქვეყნები პროდუქტიულად თანამშრომლობენ საჯარო ადმინისტრირების მიმართულებით, გარდა ამისა, უვიზო მიმოსვლა საქართველოსა და სერბეთის მოქალაქეებისთვის დამატებითი სტიმულია ტურიზმის სფეროში თანამშრომლობისთვის.

 

„ჩვენ მტკიცედ გვაქვს გადაწყვეტილი, შევინარჩუნოთ ეს დინამიზმი ჩვენს ურთიერთობაში“,- განაცხადა ირაკლი კობახიძემ.

საქართველოში ვიზიტის ფარგლებში, ვანუატუს საგარეო საქმეთა, საერთაშორიო თანამშრომლობის და საგარეო ვაჭრობის მინისტრმა, რალფ რეგენვანუმ საოკუპაციო ხაზის მიმდებარე სოფელი ოძისი მოინახულა. ამის შესახებ „გლობალპრესს“ საგარეო საქმეთა სამინისტროდან აცნობეს.

 

მათივე ცნობით, რალფ რეგენვანუ ადგილზე გაეცნო შექმნილ ვითარებას და კიდევ ერთხელ დაადასტურა ვანუატუს რესპუბლიკის მთავრობის მტკიცე მხარდაჭერა საქართველოს ტერიტორიული მთლიანობისა და სუვერენიტეტის მიმართ.

 

“მას შემდეგ, რაც ჩვენს ქვეყნებს შორის დიპლომატიური ურთიერთობები დამყარდა, ეს არის პირველი შემთხვევა, როცა ვანუატუ ხელისუფლების წარმომადგენლები სტუმრობენ საქართველოს. მთავარი მიზანი ამ ვიზიტისა გახლავთ ის, რომ, უკეთ გავეცნოთ საქართველოს წინაშე არსებულ საკითხებს, ხელი შევუწყოთ ვანუატუსა და საქართველოს შორის ურთიერთობების გაღრმავებას, არა მხოლოდ რეგიონულ, არამედ საერთაშორისო დონეზე.

 

საოკუპაციო ხაზის მონახულება დაგვეხმარება, გავაცნობიეროთ, თუ რა მდგომარეობაა საქართველოს ამ რეგიონში. ჩემთვის, როგორც ვანუატუს საგარეო საქმეთა მინისტრისთვის, ძალიან მნიშვნელოვანია აქ ყოფნა. როდესაც ამ საკითხზე საერთაშორისო დონეზე იქნება საუბარი, მე მექნება ზუსტი წარმოდგენა არსებული მდგომარეობის შესახებ. ვანუატუ ყოველთვის აღიარებდა საქართველოს ტერიტორიულ მთლიანობას. 2011 წელს გვყავდა მინისტრი, რომელმაც განსხვავებული პოზიცია გამოხატა. ჩემი აზრით, ის გარკვეული პირების ზეგავლენის ქვეშ მოექცა და აღიარა სამხრეთ ოსეთის და აფხაზეთის დამოუკიდებლობა. მისი ეს გადაწყვეტილება არ იყო სახელმწიფოს ოფიციალური პოზიცია.

 

ამ ფაქტის შემდეგ, ვანუატუმ ძალიან მალევე დაამყარა დიპლომატიური ურთიერთობები საქართველოსთან და აღიარება უკან გაიწვია“,- აღნიშნა რალფ რეგენვანუმ.

 

საოკუპაციო ხაზის მონახულების შემდეგ, რალფ რეგენვანუ შეხვედრებს გამართავს საქართველოს პრეზიდენტთან სალომე ზურაბიშვილთან და განათლების, მეცნიერების კულტურის და სპორტის მინისტრთან მიხეილ ბატიაშვილთან. დელეგაციის წევრები მოინახულებენ იუსტიციის სახლს, საგანგებო სიტუაციების კოორდინაციისა და გადაუდებელი დახმარების ცენტრ 112-ს და ადგილზე გაეცნობიან უწყებების საქმიანობის სპეციფიკას.

 

ვიზიტის ფარგლებში, 14 მარტს, ვანუატუს საგარეო საქმეთა, საერთაშორიო თანამშრომლობის და საგარეო ვაჭრობის მინისტრმა საგარეო საქმეთა სამინისტროში თავის ქართველ კოლეგასთან დავით ზალკალიანთან შეხვედრა გამართა.

საქართველოს პარლამენტის თავმჯდომარემ სერბეთის ეროვნული ასამბლეის პლენარულ სხდომაზე სიტყვით გამოსვლისას აღნიშნა, რომ საქართველო ამაყობს ევროკავშირთან ურთიერთობებში ბოლო წლების განმავლობაში მიღწეული ხელშესახები წინსვლით. ამ კონტექსტში, პარლამენტის თავმჯდომარემ უვიზო მიმოსვლის მნიშვნელობაზე გაამახვილა ყურადღება და აღნიშნა, რომ უვიზო მიმოსვლა ევროკავშირის მხრიდან ნდობისა და მხარდაჭერის გამოსახატ მტკიცე პოლიტიკურ გზავნილს წარმოადგენს.

 

„ასევე, ეს არის ჯილდო ჩვენი მუხლჩაუხრელი შრომისა და პარლამენტის, მთავრობის, სამოქალაქო საზოგადოებისა და მოქალაქეების ამ მიზნისადმი ერთგულებისათვის”,- განაცხადა ირაკლი კობახიძემ.

 

მისივე თქმით, საქართველოს ძალისხმევა ევროკავშირთან მეტი ინტეგრაციის მიღწევაზეა ფოკუსირებული. ირაკლი კობახიძის განცხადებით, ჩვენი ქვეყანა აფასებს სერბეთთან ამ მიმართულებით თანამშრომლობის შესაძლებლობას.

 

„ჩვენი ძალისხმევა ფოკუსირებულია ახალი შესაძლებლობების გამოვლენის გზით, ევროკავშირთან მეტი ინტეგრაციის მიღწევაზე. ამ კუთხით, ვმუშაობთ ამბიციური საგზაო რუკაზე ევროკავშირთან დასაახლოებლად. ასეთი მიდგომა და ინიციატივა უზრუნველყოფს, რომ საქართველო მზად იქნება, როდესაც შესაბამისი პოლიტიკური გადაწყვეტილების მიღების დრო დადგება”,- განაცხადა პარლამენტის თავმჯდომარემ.

ვენესუელა იმ ხუთ ქვეყანას შორის ერთ-ერთია, რომელმაც რუსეთის მიერ ოკუპირებული საქართველოს რეგიონები - აფხაზეთი და ცხინვალი ე.წ დამოუკიდებელ რესპუბლიკად 2009 წლის სექტემბერში სცნო. აქედან გამომდინარე ჩვენი ქვეყნისთვის განსაკუთრებით მნიშვნელოვანია ვენესუელაში განვითარებული მოვლენები.

 

ვენესუელაში მძიმე ეკონომიკურმა კრიზისმა და მადუროს რეჟიმის მზარდმა ავტორიტარიზმა მასობრივი სახალხო პროტესტი გამოიწვია. ოპოზიცია მადუროს ხელისუფლებას ქვეყნის ეკონომიკის ჩამოშლასა და ადამიანის უფლებათა დარღვევაში ადანაშაულებს. მთელი ქვეყნის მაშტაბით სახალხო დემონსტრაცია ძალადობაში გადაიზარდა, რომელსაც რამოდენიმე ადამიანის სიცოცხლე შეეწირა. ვენესუელას მოვლენებმა მკაფიო საგარეო განზომილება მას შემდეგ მიიღო, როცა 2019 წლის 23 იანვარს ვენესუელას საკანონმდებლო ორგანოს, ეროვნული ასამბლეის თავჯდომარემ, ხუან გუაიდომ თავი დროებით პრეზიდენტად გამოაცხადა, რასაც აშშ-ს მხრიდან მისი ლეგიტიმურობის აღიარება მოჰყვა, რის გამოც, მადუროს მთავრობამ შეერთებულ შტატებთან დიპლომატიური ურთიერთობა გაწყვიტა.

 

საქართველოს ხელისუფლებამ აშშ-თან ერთად ერთ-ერთმა პირველმა აღიარა დროებით პრეზიდენტად ოპოზიციონერი ლიდერი ხუან გუაიდო, სრული მხარდაჭერა გამოუცხადა და იმედი გამოთქვა, რომ ვენესუელას ახალ მთავრობასთან ოკუპირებული ცხინვალისა და აფხაზეთის დამოუკიდებლობის აღიარების გაუქმება მიღწეული იქნება.

 

როგორც ცნობილია, ვენესუელას დროებითი ხელისუფლება მზად არის, მისი წინამორბედი ხელმძღვანელის ნიკოლას მადუროს ბრძანება აფხაზეთის და ე.წ. სამხეთ ოსეთის დამოუკიდებლობის აღიარების შესახებ გააუქმოს, _ამის შესახებ ვენესუელას ეროვნულის ასამბლეის მიერ ამერიკის სახელმწიფოთა ორგანიზაციებში დანიშნულმა სპეციალურმა წარმომადგენელმა გუსტავო ტარემ ,,რუსთავი 2“ - თან საუბარში განაცხადა.

 

,,არც კი უნდა დამისვათ ეს შეკითხვა, არ ვაპირებთ მადუროს ადმინისტრაციის პოლიტიკის წარმოებას. ჩვენ რუსეთის ფედერაციის არ გვეშინია“, -  განაცხადა ტარემ.

 

აღსანიშნავია, ბრაზილიაში საქართველოს ელჩის და ვენესუელას დროებით პრეზიდენტის ხუან გუაიდოს შეხვდრა კოლუმბიის დედაქალაქ ბოგოტაში.

 

ელჩის განცხადებით, შეხვედრაზე ხუან გუაიდომ მადლიერება გამოხატა საქართველოს მთავრობის მიმართ ვენესუელელი ხალხის დემოკრატიული მისწრაფებებისა და თავისუფლების მხარდაჭერისათვის.

 

გუაიდომ, ასევე აღნიშნა რომ საერთაშორისო მხარდაჭერით ჰუმანიტარული კატასტროფა უახლოეს პერიოდში დაიძლევა და გამოთქვა იმედი, რომ პოლიტიკური კრიზისი, რომელშიც მადუროს რეჟიმი ამყოფებს ქვეყანას დემოკრატიული ტრანზიციის შედეგად დასრულდება.

 

აღნიშნულ საკითხთან დაკავშირებით ,,გლობალ პრესი“ რონდელის ფონდის მკვლევარს ზურაბ ბატიაშვილს ესაუბრა.

 

მისი შეფასებით ვენესუელაში ხელისუფლების სრული კოლაფსია, რაც დიდ ცვლილებებს გამოიწვევეს.

 

ბატიაშვილის განცხადებით, გუიადოს ხელისუფლებაში მოსვლის შემთხვევაში, რომც არ უნდოდეს, იძულებული იქნება საქართველოს სეპარატისტული რეგიონების ე.წ. დამოუკიდებლობის აღიარების შესახებ მხარდაჭერა გააუქმოს, რადგან მისთვის სასიცოცხლოდ მნიშვნელოვანია ამერიკის ჰუმანიტარული დახმარება, რომ საკუთარი მოსახლეობა გამოკვებოს და გადაარჩინოს.

 

„ვენესუელა არის მაგალითი, იმისა თუ რა შეილება მოიტანოს რადიკალურად განწყობილი ძალების ხელისუფლებაში ყოფნამ და იმ თავგადასავლებმა, რაც შეძლება ამ რეჟიმების მართველობას ახლდეს.

 

ვენესუელა არის ქვეყანა, რომელსაც გამოცხადებული აქვს, რომ აშენებს სოციალიზმს, ამან არცერთ ქვეყანაში არ გაამრთალა. სოციალიზმის იდეის დამცველები ამბობენ, რომ აქ არ გაამართალა, რადგან არასწორად დაიგეგმა ეს მოდელი, მაგრამ სხვაგან გაამართლებს. ჩვენ ვხედავთ, რომ სოციალიზმი არსად ამართლებს. მსოფლიოს მე-20, 21-ე საუკუნის ისტორიის მანძლიზე, ძალიან ბევრი მაგალითი ვნახეთ, რომ არსად არ ამართლებს ეს რადიკალური სოციალიზმი.

 

მემარცხენეობა სხვა არის და ევროპაში ნაკლებად დარჩა მემეარცხენეობა-მემარჯვენეობა, სადღაც შუაში შეჯერდენ, მაგრამ არის მთელი რიგი ქვეყნებისა, სადაც სამწუხაროდ ამ ექსპერიმენტებს აგრძელებენ და აგრძელებენ საკუთარი ხალხის, საკუთარი ადამიანების, ხშირ შემთხვევაში არამარტო კეთილდღეობის, არამედ სიცოცხლის ფასად, ამის ყველაზე ნათელი მაგალითია ვენესუელა, სადაც უკვე ჰუმანიტარული კატასტროფაა.

 

მოსახლეობას სამედიცინო მომსახურეობის, განათლების და ა.შ. მიღების საშუალება უკვე აღარ აქვთ, ასევე აღარ აქვთ საკვები.

 

ჰუმანიტარულ დახმარებასთან დაკავშირებული კრიზისი გრძელდება, ხელისუფლება არ უშვებს უცხოეთიდან დახმარებას, რაც სასიცოცხლოდ მნიშვნელოვანია იქ მცხოვრები ადამიანების გადასარჩენად.

 

ბოლო დღეებში, ეს სიტუაცია კიდევ უფრო გაუარესდა, მერამდენე დღეა უკვე, რომ ვენესუელაში ელექტრო ენერგია არ აქვთ. ელექტრო ენერგიის არ არსებობის გამო, წყალიც აღარ არის, წყალი რომ არ არის ადამიანებმა დაბიძურებული წყლის დალევა დაიწყეს, რადგან სხვა ალტერნატივა არ არის. აქედან გამომდინარე, ვენესუელაში ხელისუფლების კოლაფსი შეიქმნა.

 

იმედია, რომ ქვეყანა არ მივა სამოქალაქო დაპირისპირების ცხელ ფაზამდე. ისედაც არის დაპირისპირება, არის გამოსვლები, რომლის დარბევა ხდება, რასაც მსხვერპლი მოჰყვა, მაგრამ დიდი მაშტაბის სამოქალაქო დაპირსპირება არ არის და იმედია ასეთი დაპირისპირების გარეშე შეძლებენ კონფლიქტის მოგვარებას, თუმცა გამომდინარე იქიდან, რომ ხელისუფლება არაფრის დათმობას არ აპირებს, მათშორის არ აპირებს ვადამდელი არჩვენების ჩატარებას, ძალიან ძნელი წარმოსადგენია როგორ შეიძლება ეს მოხდეს“.

 

ვენესუელის კრიზისში რამდენად დიდია აშშ-ს და რუსეთის გავლენა? 

 

„რა თქმა უნდა დიდია, ოპოზიციას მხარს უჭერს აშშ, ხოლო ხელისუფლებას რუსეთი. რუსეთი, როგორც წესი ყოველთვის წაგებულ და არაპოპულარულ მხარეს იჭერს.

 

ცხადია, მადუროს ხელისუფლება, ესეთ ქაოსში ვერ შენარჩუნდება. ვენესუელაში ცვლილებები იქნება, მაგრამ მთავარია, რამდენად მშვიდობიანი იქნება ეს ცვლილება, რამდენად სისხლით თუ უსისხლოდ შეძლებენ ამის შეცვლას“.

 

არის თუ არა შესაძლებელი ვენესუელის კრიზისში აშშ-ის მხრიდან სამხედრო ჩარევა ?

 

„აშშ-მ გააფრხილა მადურო, იმ შემთხვევაში, თუ გუაიდოს და მის ოჯახის წევრებს შეექმნება საფრთხე მაშინ შესაძლებელია მოხდეს სამხედრო ჩარევა, რაც არაა გამორიცხული, თუ ოპოზიციონერი ლიდერის გუაიდოს დაკავება მოხდება მადუროს რეჟიმის მხრიდან“.

 

ვენესუელაში თუ გახორციელდება ხელისუფლების ცვლილება, ამ შემთხვევაში რამდენად არის შესაძლებელი, რომ ოფიციალურმა კარაკასმა საქართველოს ოკუპირებული ტერიტორიების ე.წ. დამოუკიდებლობის აღიარება გააუქმოს?

 

„თუ ხელისუფლების სათავეში ყოფნას მართლა მოიპოვებს გუაიდო, რა თქმა უნდა ვენესუელა უკან წაიღებს ამ აღიარებას. კონგრესის მიერ მიღებული კანონის მიხედვით, ამერიკას არ შეუძლია დაეხმაროს იმ ქვეყნებს, რომლებიც აღიარებენ ჩვენი სეპარატისტული რეჟიმების ეგრეთ წოდებულ დამოუკიდებლობას, შესაბამისად ვენესუელას ინტერესში იქნება, რომც არ უნდოდეს იძულებული იქნება, უკან წაიღოს ეს აღიარება, იმისთვის რომ ჰუმანიტარული დახმარება მიიღოს. კარაკასისთვის, რათქმაუნდა ნომერი პირველი პრიორიტეტი საქართველო კი არ არის, არამედ საკუთარი ხალხის გამოკვება და გადარჩენაა.

 

ეს პრობლემატური საკითხი არამხოლოდ ვენესუელასთან მიმართებაში დგას. არც თუ კარგი სიტუაციაა ნიკარაგუაში, რომელსაც ასევე აქვს აღიარებული ჩვენი სეპარატისტული რეგიონების ეგრეთწოდებული დამოუკიდებლობა, შემდეგი ნაბიჯი უნდა იყოს, რაც ნათლად ჩანს, რომ ვენესუელას შემდეგ იქნება ნიკარაგუა. ეს კი ჩვენთვის რა თქმა უნდა კარგია.

 

ნიკარაგუაშიც დიდი მონდომებით ვუგულშემატკივრებთ ოპოზიციის ხელისუფლებაში მოსვლას, არა იმიტომ რომ ძალიან ინტესიური კავშირები გვაქვს ამ ქვეყნებთან, არამედ ჩვენი ეროვნული ინტერესია უმთავრესი. უპირველეს ყოვლისა ეს არის ჩვენი ტერიტორიული მთლიანობა, საიდანაც ამოდის ყველა ჩვენი ინტერესი, განსაკუთრებით ამ შორეულ ქვეყნებში, რომელთანაც შეიძლება ინტესიური ურთიერთობა გვქონდეს, ამიტომ ჩვენს ინტერესში შედის, რომ მსგავსი პროცესები, ასევე ნიკარაგუაში განვითარდეს, რაზეც შეერთებულმა შტატებმა უკვე გააკეთა მნიშნება“.

 

აღიარების უკან წაღების პროცესში, როგორი იქნება რუსეთის ფაქტორი?

 

„რუსეთი უწევს წინააღმდეგობას, თუმცა, არ აქვს როგორც ფინანსური, ისე მორალური რესურსი, რომ სიტუაცია შეატრიალოს.

 

რუსეთს არ შეუძლია მთელი ვენესუელა გამოკვებოს, მას საკუთარი თავი გასჭირვებია. ახლა რუსეთმა ვენესუელა რომ გამოკვებოს და შეინახოს, არცთუ ისე ადვილი იქნება. ვხედავთ, რომ რუსეთი რა ეკონომიკურ სირთულეებს განიცდის, იმის გამო, რომ დაწესებული არის მთელი რიგი შეზღუდვები დასავლეთის მხრიდან, თან აკიდებული აქვს ძალიან ბევრი სიმძიმეები, ვალდებულებები, რომელიც რუსეთს უკან ექაჩება, იგივე ყირიმის რჩენა, იმიტომ რომ იქ არავინ ჩადის და იქ ეკონომიკური სირთულეებია, ამას ასევე დავუმატოთ დომბასში მიმდინარე ომი და იქ მოსახლეობის რჩენა, რაც, მისი ვალდებულებაა. იგივეს აკეთებს აფხაზეთის და ცხინვალის რეგიონში, სადაც ბიუჯეტის უმრავლეობას ავსებს, სწორედ რუსეთი. რუსეთის ეს ვალდებულებები თავის ტკივილად არის ქცეული, ფაქტიურად ეს წყალში გადაყრილი ფულია. ამას, ასევე დავამატოთ სირიაში მიმდინარე ომი, რომელიც ასევე დიდი ფული ღირს. აქედან გამომდინარე რუსეთის რესურსები ვერ წვდება, ასე რომ ვენესუელას ტვირთვის აკიდება აღარ შეუძლია, აქ ჩანს ნამდვილი ძალა ვინ არის, არა მოხლოდ გნცხადებების დონეზე, არამედ ეკონიმიკური თვალსაზრისითაც.

 

აშშ-მ ჰუმანიტარული დახმარება ჩაიტანა და მეზობელ ქვეყნებში განათავსა, რომ შეიტანოს ვენესუელაში, ეს კი აჩვენებს, იმას რომ ვის აქვს ეკონიმიური სიძლიერე, რომელიც ძალიან მნშვნელოვანია იქ ადგილობრივი ადამიანისთვის, რომელსაც შია. გუაიდოსთვის მნიშვნელობა არ აქვს რუსეთი დაეხმარება თუ აშშ, მთავარია მისთვის ხალხი გამოიკვებოს. ახლა რეალურად ვენესუელაში შიმშილია. ვენესულაში უნდათ თავი გადაირჩინონ და შეერთებული შთატების მხარეს იჭერენ ეს კვანძი კი უახლეს მომავალში, ვფიქრობ, გაიხსნება“. 

 

საქართველოს ვენესუელასთან დიპლომატიური ურთიერთობები არ აქვს, როგორ ფიქრობთ საქართველოს ხელისუფლება როგორ შეძლებს მოლაპარაკებებს, რომ ვენესუელამ აღიარება უკან წაიღოს, ამისთვის რა უნდა გააკეთოს ქართულმა დიპლომატიამ?

 

„მართალია პირდაპირი დიპლომატიური ურთიერთობა არ გვაქვს, იმიტომ რომ ვწყვეტთ ხოლმე დიპლომატიურ ურთიერთობას, რომელსაც ცნობილი აქვს ჩვენი რეგიონების ეგრეთ წოდებული დამოუკიდებლობა, თუმცა, ჩვენი ელჩი ბრაზილიაში, რომელიც ვენესუელას მეზობელი ქვეყანაშია შეხვდა გუაიდოს, მათ სწორედ ამ საკითხებზე ისაუბრეს, ეს აჩვენებს, იმას რომ ორივე მხარე საქართველოც და ვენესუელაც არის მსგავსი დიალოგისთვის მზად და შესაბამისი პირობების და შესაბამისი სიტუაციის დადგომის შემთხვევაში მოსალოდნელია აღიარების უკან წაღებაც და დიპლომატიური ურთიერთობების აღდგენაც“.

სომხეთის რესპუბლიკაში ვიზიტის დროს, საქართველოს პრეზიდენტმა სალომე ზურაბიშვილმა სომხური სამოციქულო ეკლესიის კათოლიკოსთან, მის უწმინდესობა გარეგინ II-სთან შეხვედრაზე საქართველოს ოკუპირებულ ტერიტორიებზე შექმნილ მძიმე ჰუმანიტარულ მდგომარეობაზე და რამდენიმე დღის წინ, ოკუპირებული გალის რაიონში მომხდარ ტრაგედიაზე, კერძოდ გაურკვეველ ვითარებაში ირაკლი კვარაცხელიას გარდაცვალებაზე ისაუბრა. ამის შესახებ ინფორმაციას პრეზიდენტის ადმინისტრაცია ავრცელებს.

 

მათივე ცნობით, პრეზიდენტმა მშვიდობიანი მოსახლეობის გახშირებული გატაცებების ფაქტებზე და საოკუპაციო რეჟიმის მიერ მოსახლეობის გადაადგილების თავისუფლების შეზღუდვაზე ისაუბრა.

 

„რაც ეხება ჩვენს ორ ოკუპირებულ ტერიტორიას, აქაც ჩვენი პოლიტიკა სრულიად მშვიდობიანია და ხელისუფლების მიერ ჩამოყალიბებული ახალი პოლიტიკა, მშვიდობიანი ნაბიჯებისგან შედგება ოკუპირებულ ტერიტორიაზე მცხოვრები მოსახლეობის მიმართ, რომ მათ გავუწოდოთ ხელი და დავეხმაროთ ყველა კუთხით - განათლების, ჯანდაცვისა თუ ეკონომიკური წამოწყებებით.

 

სამწუხაროდ, ის მოსახლეობა, რომელიც ცხოვრობს ოკუპირებული ხაზის იქით, აფხაზეთში და ცხინვალის რეგიონში, აყვანილნი არიან მძევლად და ბოლო პერიოდში, შეიძლება ეს არის პასუხი ჩვენს მშვიდობიან ნაბიჯებზე - ძალიან შეზღუდულია ამ მოსახლეობისათვის გადმოსვლის საშუალება.

 

დიდი ხნის განმავლობაში ჩაკეტილი იყო გადმოსასვლელი პუნქტები, რამაც შექმნა საკმაოდ მძიმე ჰუმანიტარული მდგომარეობა.

 

ასევე, იცით რომ ოკუპაციის ხაზზე ძალიან დაძაბული მდგომარეობაა, სადაც გატაცებები გახშირდა, რაც ზოგჯერ ტრაგიკულდ მთავრდება, როგორც რამდენიმე დღის წინ, ახალგაზრდა ბიჭი გარდაიცვალა, რაც ოკუპაციის ხაზის ჩვენს მხარეს ძალიან რთულ მდგომარეობას ქმნის, თუნდაც იმ მოსახლეობისათვის, რომელიც აგრძელებს ცხოვრებას ამ ძალიან მძიმე პირობებში.

 

რაც ეხება მეორე მხარეს, პრაქტიკულად აკრძალულია ქართული ენის სწავლა, რომ არაფერი ვთქვათ, იმაზე, რომ წირვა ქართულ ენაზე საერთოდ არ აღევლინება", - აღნიშნა საქართველოს პრეზიდენტმა შეხვედრისას.

ჩვენ მხარს ვუჭერთ რეგიონალურ თანამშრომლობას ორმხრივ და მრავალმხრივ ფორმატში, - ამის შესახებ საქართველოს პარლამენტის თავმჯდომარემ სერბეთის ეროვნული ასამბლეის პლენარულ სხდომაზე სიტყვით გამოსვლისას განაცხადა. ირაკლი კობახიძემ გამოსვლისას საქართველოს გეოპოლიტიკურ მნიშვნელობასა და იმ როლზე ისაუბრა, რომელსაც საქართველო რეგიონში ასრულებს.

 

მისი თქმით, ჩვენი ქვეყნის უნიკალური მდებარეობა არის შესანიშნავი შესაძლებლობა და იმავდროულად, პასუხისმგებლობაც. პარლამენტის თავმჯდომარემ ხაზგასმით აღნიშნა, რომ საქართველო სრულად აცნობიერებს საკუთარ როლს რეგიონში და გამოცდილებაც ადასტურებს, რომ ჩვენი ქვეყანა მზადაა, ეს როლი შემართებითა და პასუხისმგებლობით იტვირთოს.

 

„მჭიდრო პარტნიორობა გვაკავშირებს უკრაინასთან, მოლდოვასთან, თურქეთთან, აზერბაიჯანსა და სომხეთთან. მეტიც, ქართველი სამხედროები, რომლებიც გმირულად დაეცნენ მსოფლიოს სხვადასხვა ცხელ წერტილებში, ყველაზე მტკივნეული წვლილია, რომელიც საქართველოს შეაქვს გლობალურ მშვიდობასა და უსაფრთხოებაში, რაც ადასტურებს ჩვენს მზაობას”,- განაცხადა პარლამენტის თავმჯდომარემ და ხაზგასმით აღნიშნა, რომ საქართველო მოწადინებულია, გააგრძელოს წვლილის შეტანა უკეთესი და მშვიდობიანი მომავლის შექმნაში.

 

„სერბეთის რესპუბლიკა ასეთივე პოზიტიურ როლს ასრულებს ბალკანეთის რეგიონში, ამრიგად, შეგვიძლია გავაერთიანოთ ჩვენი ძალისხმევა და გავაუმჯობესოთ ჩვენ ორ რეგიონს შორის კავშირები, მათ შორის შავი ზღვის ეკონომიკური თანამშრომლობის ორგანიზაციის ფორმატში”,- განაცხადა ირაკლი კობახიძემ.

 

საქართველოს ევროპული ინტეგრაციის პროცესსა და მიღწეულ პროგრესზე საუბრისას, პარლამენტის თავმჯდომარემ ხაზგასმით აღნიშნა, რომ ჩვენი ქვეყნის ევროპული მისწრაფება აისახა კონსტიტუციაშიც, რითაც ხაზი გაესვა საქართველოსთვის ევროინტეგრაციის მნიშვნელობას.

 

„დასავლეთში ვეძებთ საქართველოს სტაბილურ მომავალს თავისუფალ და დემოკრატიულ სახელმწიფოებს შორის, რადგან დემოკრატიულ საზოგადოებას ძალუძს შექმნას გაცილებით უფრო მტკიცე სტაბილურობა, უსაფრთხოება და კეთილდღეობა თითოეული მოქალაქისა და მთელი ქვეყნისათვის“,-განაცხადა ირაკლი კობახიძემ.

საქართველოს პრემიერ-მინისტრმა მამუკა ბახტაძემ და სომხეთის მთავრობის ხელმძღვანელმა ნიკოლ ფაშინიანმა სომხეთში, სოფელ ენოქავანში არაფორმალური შეხვედრა გამართეს. ამის შესახებ ინფორმაციას სომხეთის მთავრობის პრესსამსახური ავრცელებს.

 

მხარეებმა ქართულ-სომხურ ურთიერთობასთან დაკავშირებული საკითხები განიხილეს. მამუკა ბახტაძემ და ნიკოლ ფაშინიანმა ხაზი გაუსვეს ყველა სფეროში ქართულ-სომხური ურთიერთობის მნიშვნელობას და გამოთქვეს იმედი, რომ ორმხრივი თანამშრომლობა ხელს შეუწყებს ურთიერთობების განვითარებას რიგ სფეროებში.

 

ამ კონტექსტში მხარეებმა ხაზი გაუსვეს ხშირი ორმხრივი შეხვედრების მნიშვნელობას როგორც ოფიციალურ, ისე არაოფიციალურ დონეზე.

საქართველოს პრეზიდენტი სალომე ზურაბიშვილი, სომხეთის რესპუბლიკაში ორდღიანი ოფიციალური ვიზიტის ფარგლებში, სომხური ეკლესიის მეთაურს გარეგინ II-ს შეხვდა. ამის შესახებ ინფორმაციას პრეზიდენტის ადმინისტრაცია ავრცელებს.

 

მათი ცნობით, სომხური ეკლესიის მეთაურმა საქართველოს პრეზიდენტთან შეხვედრისას საქართველოში არსებული ისტორიული ძეგლების შესახებ ისაუბრა.

 

პრეზიდენტის განცხადებით, საქართველო პასუხისმგებელია მის ტერიტორიაზე არსებული ძეგლების აღდგენაზე და ეს უნდა გაკეთდეს ნაბიჯ-ნაბიჯ, რადგან ყველა ეკლესიის აღდგენა ერთდროულად ვერ მოხერხდება.

 

,,ჩვენ შეგვიძლია მეცნიერულად შევისწავლოთ თითოეული ეკლესია, რომელიც მიგაჩნიათ საჭიროდ, რადგან ეს არის საკითხის ერთადერთი გადაწყვეტა.

 

კონკრეტული ტაძრების წარმომავლობის იდენტიფიკაციის მიზნით საჭიროა არქეოლოგების ჯგუფების ჩართვა", - აღნიშნა სალომე ზურაბიშვილმა.

 

პრეზიდენტის ადმინისტრაციის ინფორმაციით, ხანგრძლივი საუბარი შედგა ოკუპირებული აფხაზეთის შესახებ.

 

გარეგინ II -ის განცხადებით, აფხაზეთი არის სომხეთის სამოციქულო ეკლესიის საქართველოს ეპარქიის კანონიკური ტერიტორია, ეს არის ფაქტი, რაც წერილობითი ფორმით არის დადასტურებული.

 

პრეზიდენტის ადმინისტრაციის ინფორმაციით, საქართველოს პრეზიდენტმა სომხური ეკლესიის მეთაურთან დააფიქსირა მისი მკვეთრი პოზიცია აფხაზეთში მდებარე სომხური ეკლესიის სომხეთის სამოციქულო ეკლესიის სამხრეთ რუსეთის ეპარქიისთვის დაქვემდებარებასთან დაკავშირებით.

 

საქართველოს პრეზიდენტის განცხადებით, ეს გადაწყვეტილება აღიქმება სომხეთის სამოციქულო ეკლესიის მხრიდან საქართველოს ტერიტორიული მთლიანობის აღიარების დარღვევად და მოსთხოვა კათოლიკოსს, გადაწყვეტილების დროულად შეცვლა და აღნიშნული ეკლესიის და სამრევლოს წინამძღვრის სომხეთის ეკლესიის საქართველოს ეპარქიის იურისდიქციის ქვეშ დაქვემდებარება, როგორც ეს ისტორიულად იყო.

 

სომხური ეკლესიის მეთაურმა დასძინა, რომ ,,ამ დროებითი ზომის მიუხედავად, სომხეთის სამოციქულო ეკლესია აფხაზეთის ტერიტორიაზე არსებულ სომხურ სამრევლოებს აღიარებს სომხური ეკლესიის საქართველოს ეპარქიის დაქვემდებარებაში“.

 

საქართველოს პრეზიდენტი ამ განცხადებას მიესალმა და აღნიშნა, რომ დროებით ზომას შეთანხმებული გამოსავალი უნდა მოეძებნოს.

 

სალომე ზურაბიშვილმა შეხვედრისას ოკუპირებული გალის რაიონში, რამდენიმე დღის წინ მომხდარ ტრაგედიაზე და საქართველოს ევროკავშირთან სამომავლო ურთიერთობებზე გაამახვილა ყურადღება.

 

,,ჩემთვის დიდი პატივია აქ ყოფნა. ეს ჩემი მეორედ ჩამოსვლაა ეჩმიაძინში, ადრე გესტუმრეთ, როცა საქართველოს საგარეო საქმეთა მინისტრი ვიყავი, ახლა კი, როგორც პრეზიდენტისთვის, დიდი პატივია აქ ყოფნა.

 

ჩვენი მხრიდანაც მინდა გადმოგცეთ ჩვენი პატრიარქის მოკითხვა, მისი მეგობრული და სულიერი სალამი და მისი ურყევი მეგობრობის გამოხატულება, რაც არსებობს ჩვენს ორ ეკლესიასა და ქვეყნებს შორის.

 

დღევანდელ მსოფლიოში კიდევ უფრო მნიშვნელოვანია, რომ ჩვენი ორი ქვეყანა, კავკასიის რთულ რეგიონში, ორ ეკლესიაზე და ამ ეკლესიის ქრისტიანულ რელიგიაზეა დაფუძნებული.

 

დარწმუნებული ვარ, რომ ეს ღირებულებები ძალიან მნიშვნელოვანია ჩვენი ხალხისთვის, ქვეყნებისა და რეგიონებისთვის, მაგრამ არანაკლებ, დანარჩენი მსოფლიოსთვის, სადაც იკარგება ეს სულიერი მხარე და სადაც უფრო ძლიერდება მატერიალური მხარე. საქართველოსათვის ევროკავშირთან დაახლოება და ინტეგრირება ერთ-ერთი მთავარი მიმართულებაა, თუმცა, როცა საუბარია ევროკავშირის ხელმძღვანელო

 

ბასთან ჩვენს მომავალ გეგმებზე, მე ყოველთვის ხაზს ვუსვამ, რომ საქართველოც საჭიროა ევროკავშირისათვის და არა მხოლოდ ევროკავშირი საქართველოსათვის. საჭიროა სწორედ იმიტომ, რომ ამ ღირებულებების მატარებელი ქვეყანაა და ერთგვარი კონსერვაციაა ამ ქვეყნებში და ასევე აქ, იმ ღირებულებების, რაზეც დგას მსოფლიო ცივილიზაცია.

 

ამ კუთხით ჩვენ გვაქვს ძალიან დიდი პოტენციალი, მაგრამ ამავე დროს ვცხოვრობთ ძალიან რთულ რეგიონში და ვიცით, რომ ამ რეგიონში არსებული გამოწვევებიდან გამოსავალი და სხვა ალტერნატივა არ არის, თუ არა ის, რასაც ქრისტიანობა ამბობს - ანუ მშვიდობიანი გზა. საქართველო იქცევა, როგორც ქრისტიანული ქვეყანა, მშვიდობიანია თავის ყველა მეზობელთან და ამის გარდა აქვს ღია კარის პოლიტიკა და ამის მაჩვენებელია ის კომპაქტურად დასახლებული აზერბაიჯანული და სომხური წარმოშობის მოსახლეობა, რომლებიც თავისუფლად და სრულიად დაცულად ცხოვრობს საქართველოში.

 

რაც ეხება ჩვენს ორ ოკუპირებულ ტერიტორიას, აქაც ჩვენი პოლიტიკა სრულიად მშვიდობიანია და ხელისუფლების მიერ ჩამოყალიბებული ახალი პოლიტიკა მშვიდობიანი ნაბიჯებისგან შედგება ოკუპირებულ ტერიტორიაზე მცხოვრები მოსახლეობის მიმართ, რომ მათ გავუწოდოთ ხელი და დავეხმაროთ ყველა კუთხით - განათლების, ჯანდაცვისა თუ ეკონომიკური წამოწყებებით.

 

სამწუხაროდ, ის მოსახლეობა, რომელიც ცხოვრობს ოკუპირებული ხაზის იქით, აფხაზეთში და ცხინვალის რეგიონში, აყვანილნი არიან მძევლად და ბოლო პერიოდში, შეიძლება ეს არის პასუხი ჩვენს მშვიდობიან ნაბიჯებზე - ძალიან შეზღუდულია ამ მოსახლეობისათვის გადმოსვლის საშუალება.

 

დიდი ხნის განმავლობაში ჩაკეტილი იყო გადმოსასვლელი პუნქტები, რამაც შექმნა საკმაოდ მძიმე ჰუმანიტარული მდგომარეობა.

 

ასევე, იცით რომ ოკუპაციის ხაზზე ძალიან დაძაბული მდგომარეობაა, სადაც გატაცებები გახშირდა, რაც ზოგჯერ ტრაგიკულად მთავრდება, როგორც რამდენიმე დღის წინ, ახალგაზრდა ბიჭი გარდაიცვალა, რაც ოკუპაციის ხაზის ჩვენს მხარეს ძალიან რთულ მდგომარეობას ქმნის, თუნდაც იმ მოსახლეობისათვის, რომელიც აგრძელებს ცხოვრებას ამ ძალიან მძიმე პირობებში.

 

რაც ეხება მეორე მხარეს, პრაქტიკულად აკრძალულია ქართული ენის სწავლა, რომ არაფერი ვთქვათ იმაზე, რომ წირვა ქართულ ენაზე საერთოდ არ აღევლინება.

 

ერთი საკითხი, რომელიც უნდა გადმოგცეთ პატრიარქისგან, ეხება სომხურ ეკლესიებს აფხაზეთში, ეს არის არსებული ეკლესიები და ახალი აშენებული ეკლესიები, რომლებიც ექვემდებარებიან მიტროპოლიტს რუსეთში. პატრიარქის სიტყვებია, რომ ეს არის ძალიან დიდი გულისტკივილი, რომ არ დაირღვეს სწორედ ჩვენი სუვერენიტეტი ჩვენს ტერიტორიაზე უფრო სასურველი იქნება, რომ დაექვემდებარონ საქართველოს ეპარქიას, ან თუნდაც თქვენ, თქვენო უწმინდესობავ",- აღნიშნა ზურაბიშვილმა.

 

სომხური ეკლესიის მეთაურის განცხადებით, მსოფლიოში გაფანტული სომეხი ერისთვის ძალიან მნიშვნელოვანია ამ სულიერი ღირებულებებისა და ფასეულობების შენარჩუნება.

 

,,ჩვენ არ გვინდა ვისაუბროთ ჩვენს მეზობელ ქვეყნებთან სომხეთის ურთიერთობაზე, ამის შესახებ თქვენთვის ყველაფერი ცნობილია, კერძოდ ყარაბაღის პრობლემა და ჩვენი სიძნელეები, რასაც ჩვენ ვაწყდებით.

 

ჩვენ იმედი გვაქვს, რომ საერთაშორისო თანამეგობრობით და მინსკის ჯგუფის ძალისხმევით მშვიდობიანად მოგვარდება ყველაფერი, უზრუნველყოთ მშვიდობიანი სიცოცხლე ყარაბაღში, ჩვენი შვილებისთვის.

 

მოხარული ვარ ვთქვა, რომ ჩვენი ხელისუფლება ყოველთვის მზად არის კონფლიქტები მოაგვაროს მშვიდობიანი გზით", - აღნიშნა გარეგინ II-მ.

საქართველომ შექმნა ერთ-ერთი საუკეთესო საინვესტიციო კლიმატი - ეფექტური საჯარო მომსახურება, კორუფციისაგან თავისუფალი მთავრობა, და თავისუფალი და გამჭვირვალე ბიზნესგარემო, რამაც უკვე მოგვიტანა ხელშესახები შედეგი და ჰპოვა ფართო საერთაშორისო აღიარება,- ამის შესახებ საქართველოს პარლამენტის თავმჯდომარემ სერბეთის ეროვნული ასამბლეის პლენარულ სხდომაზე განაცხადა.

 

როგორც „გლობალპრესს“ საქართველოს პარლამენტიდან აცნობეს, სერბეთში ვიზიტის ფარგლებში, ირაკლი კობახიძემ ასამბლეის წევრებს მიმართა და ქვეყნის ეკონომიკური პოლიტიკის, მიღწეული წარმატებებისა და პრიორიტეტების შესახებ ისაუბრა.

 

„წინასწარი შეფასების საფუძველზე, მთლიანი შიდა პროდუქტის ზრდა 2018 წელს შეადგენდა 4.7%, ხოლო საშუალო მშპ ზრდა ბოლო სამი წლის განმავლობაში შეადგენდა 4.1%. ბიზნესის კეთების 2019 წლის რეიტინგის მიხედვით, რომელიც მსოფლიო ბანკმა გამოაქვეყნა, საქართველო მე-6 ადგილზეა ბიზნესის კეთების სიმარტივის მხრივ. 2019 წლის ეკონომიკური თავისუფლების ინდექსის მიხედვით, რომელსაც „ჰერიტიჯ ფაუნდეიშენი“ აქვეყნებს, საქართველო მე-8 ადგილზეა ევროპაში”,- აღნიშნა პარლამენტის თავმჯდომარემ.

 

მისივე თქმით, საქართველო განსაკუთრებულ ყურადღებას ანიჭებს მომსახურების გაუმჯობესებას, რაც მიზნად ისახავს ქვეყნის მასშტაბით უფრო მაღალი ხარისხის, მარტივად ხელმისაწვდომი და ეფექტურად ადმინისტრირებული მომსახურების მიღებას. მისივე თქმით, საქართველოს მთავრობის მიერ მომსახურების განხორციელება აღიარებულ იქნა გაეროსა და სხვა საერთაშორისო ორგანიზაციების მიერ.

 

„იუსტიციის სამინისტრო გახდა „საჯარო მომსახურების განხორციელების გაუმჯობესების“ კატეგორიის ჯილდოს მფლობელი „იუსტიციის სახლების“ დაარსებისათვის. სახელმწიფო შესყიდვების სააგენტო გახდა გამარჯვებული კატეგორიისა - „კორუფციის პრევენცია და კორუფციასთან ბრძოლა საჯარო სექტორში“ ონლაინ სამთავრობო შესყიდვების სისტემის დამსახურებით. აღნიშნული ციფრები და ეს აღიარება ბევრს მეტყველებს ეფექტურ ბიზნეს და საინვესტიციო კლიმატზე და ასევე მმართველობის სისტემაზე საქართველოში”,- განაცხადა ირაკლი კობახიძემ.

 

პარლამენტის თავმჯდომარემ ხაზგასმით აღნიშნა, რომ ტრანსპორტის სფეროში კავშირების გაუმჯობესება ჩვენი ქვეყნისა და რეგიონისთვის სტრატეგიული მნიშვნელობისაა.

 

ირაკლი კობახიძის თქმით, საქართველო ახალ აბრეშუმის გზაზე ისტორიული როლის აღდგენას ცდილობს.

 

„ურთიერთკავშირების და განსაკუთრებით, ტრანსპორტის სფეროში კიდევ უფრო გაუმჯობესება სტრატეგიული მნიშვნელობისაა საქართველოსა და რეგიონისათვის. ვცდილობთ, აღვადგინოთ ჩვენი ისტორიული როლი ახალ აბრეშუმის გზაზე. საქართველო ერთადერთი ქვეყანაა, რომელსაც გაფორმებული აქვს თავისუფალი ვაჭრობის ხელშეკრულება ევროკავშირთან, დსთ-ს ქვეყნებთან და ევროპის თავისუფალი ვაჭრობის ასოციაციის წევრ სახელმწიფოებთან, თურქეთთან და ჩინეთთან. მაშასადამე, საქართველო წარმოადგენს საიმედო სატრანზიტო პარტნიორსა და საკვანძო მოთამაშეს ტრანსპორტის სფეროში და კვლავ აგრძელებს აქტიურ მონაწილეობას ძირითად სტრატეგიულ პროექტებსა და ინიციატივებში”,- განაცხადა პარლამენტის თავმჯდომარემ.

 

მისივე თქმით, საქართველოს ეკონომიკაში სწრაფად მზარდი სექტორია ტურიზმი, რომელიც უდიდეს საინვესტიციო შესაძლებლობებს იძლევა.

 

„ტურიზმი სწრაფად მზარდი სექტორია საქართველოს ეკონომიკაში, რაც უდიდეს საინვესტიციო შესაძლებლობებს იძლევა, კონკრეტულად კი საზღვაო, სამთო და ალპური სათხილამურო კურორტების მხრივ. გასულ წელს, საქართველომ 8.5 მილიონი ტურისტი მიიღო მაშინ, როდესაც თავად საქართველოს მოსახლეობა 3.7 მილიონია. ჩვენ მივესალმებით ტურისტებს, ხოლო ქართული სული და სტუმართმოყვარეობა განთქმულია საუკუნეების მანძილზე, რაც ეფუძნება ძველ გამოთქმას, რომ სტუმარი ღვთისაა”,- განაცხადა სიტყვით გამოსვლისას საქართველოს პარლამენტის თავმჯდომარემ.

ევროკავშირთან თავისუფალი ვაჭრობის შეთანხმების ამოქმედებიდან დღემდე მიღწეული კონკრეტული შედეგები და საქართველოს ექსპორტის განვითარების სტრატეგია განიხილეს საქართველოს პრემიერ-მინისტრმა მამუკა ბახტაძემ და ვაჭრობის საკითხებში ევროკომისარმა სესილია მალმსტრომმა შეხვედრაზე, რომელიც დღეს მთავრობის ადმინისტრაციაში გაიმართა, - ამის შესახებ ,,გლობალპრესს“ პრემიერ-მინისტრის პრესსამსახურიდან აცნობეს.

 

მათივე ინფორმაციით, საუბრისას, პოზიტიურად შეფასდა საქართველოს მთავრობის ინიციატივები ქვეყანაში ბიზნესგარემოს გაუმჯობესების, ეკონომიკური მოდერნიზაციის, ადამიანური კაპიტალის განვითარებისა და პროფესიული განათლების რეფორმის მიმართულებით, ასევე მცირე და საშუალო საწარმოთა მხარდაჭერის კუთხით.

 

აღინიშნა, რომ ევროკავშირთან თავისუფალი ვაჭრობის შეთანხმების ამოქმედებამ ხელშესახები შედეგები მოიტანა და სულ უფრო იზრდება იმ კომპანიების რიცხვი, რომლებიც ევროკავშირის ბაზარზე საკუთარი პროდუქციის ექსპორტს ახორციელებენ.

 

საუბარი შეეხო პოტენციურ საექსპორტო პროდუქტებს, რომელთა გატანა ევროკავშირის ხარისხის მაღალი სტანდარტების დაკმაყოფილების შემდეგ გახდება შესაძლებელი.

 

შეხვედრისას, იმსჯელეს ევროკომისიის მხარდაჭერით შემუშავებულ საქართველოს ექსპორტის განვითარების სტრატეგიაზე, რომელიც კონკრეტული პროდუქტების ევროკავშირის ბაზარზე განთავსების სამოქმედო გეგმას მოიცავს.

 

პრემიერ-მინისტრმა ევროკავშირს განსაკუთრებული მადლობა გადაუხადა მადლობა იმ დახმარებისათვის, რომელსაც საქართველო იღებს ღრმა და ყოვლისმომცველი თავისუფალი ვაჭრობის სივრცის შეთანხმების განხორციელების პროცესში, ასევე მცირე და საშუალო ბიზნესის განვითარების ხელშეწყობისთვის. მამუკა ბახტაძემ ამ კუთხით გამოყო საფინანსო შეთანხმებები „უნარების განვითარების მხარდაჭერა“ და „ეკონომიკური განვითარებისა და ბიზნესის მხარდაჭერა საქართველოში“, რომლის ფარგლებშიც საქართველოსთვის გათვალისწინებულია სოლიდური დახმარება.

სომხეთში ოფიციალური ვიზიტით მყოფმა საქართველოს პრეზიდენტმა სალომე ზურაბიშვილმა სომხეთის რესპუბლიკის ეროვნული ასამბლეის პრეზიდენტთან ორი ქვეყნის საკანონმდებლო ორგანოებს შორის თანამშრომლობის გააქტიურების საკითხები განიხილა. როგორც „გლობალპრესს“ საქართველოს პრეზიდენტის ადმინისტრაციიდან აცნობეს, საუბარი შეეხო პარლამენტებს შორის თანამშრომლობას როგორც რეგიონულ, ასევე საერთაშორისო დონეზე.

 

სომხეთის რესპუბლიკის ეროვნული ასამბლეის პრეზიდენტის არარატ მირზოიანის განცხადებით, მსგავსი ვიზიტები მნიშვნელოვანია, რადგან ეს ურთიერთობები განსაკუთრებულია ორივე ქვეყნისათვის და დაფუძნებულია საერთო ისტორიაზე, სულიერ ღირებულებებზე და ძალიან აქტიურია ყველა სფეროში.

 

,,ტრადიციულად, ჩვენ გვქონდა მჭიდრო საპარლამენტო ურთიერთობები და დღესაც ვავითარებთ მას. ამ ეტაპზე ჩვენს ასამბლეაში ყალიბდება საქართველოს პარლამენტთან ურთიერთობის ჯგუფი, რომლის ხელმძღვანელიც ქალბატონი აზარიანი იქნება, ასამბლეის ვიცე-სპიკერი. ჩვენი მყარი და მდგრადი კავშირები შესაძლებლობას გვაძლევს ვითანამშრომლოთ საერთაშორისო ასპარეზზე, სადაც ჩვენი მოსაზრებები უამრავ საკითხებში თანხვედრაშია და მხარს ვუჭერთ ერთმანეთს. მაგალითად, სომხური დელეგაცია თავს იკავებს ხმის მიცემისგან, ისეთ საკითხში, რომელიც საქართველოს ინტერესების დაზიანებას ეხება. მთიანი ყარაბახის კონფლიქტი მხოლოდ მშვიდობიანი მოლაპარაკებების გზით უნდა გადაწყდეს. ეს მომდინარეობს ყველას ინტერესიდან", - აღნიშნა მირზოიანმა.

 

საქართველოს პრეზიდენტის განცხადებით კი, ძალიან მნიშვნელოვანია ორი ქვეყნის პარლამენტების ურთიერთთანამშრომლობა.

 

,,თქვენ ასევე ახსენეთ ჩვენი თანამშრომლობა კონფლიქტების საკითხში და ეს ძალიან მნიშვნელოვანია. ეს კონფლიქტები, ალბათ, ჩვენი რეგიონისთვის არის ის, რაც ყველაზე მეტად აფერხებს ჩვენს ერთობლივ წინსვლას. როგორც იცით, საქართველოში არის ორი ოკუპირებული ტერიტორია და ჩვენთვის, თუ ვსაუბრობთ ქვეყნის ინტერესებზე, მთავარი და ერთადერთი ინტერესია, რომ ეს ჩვენი სუვერენიტეტი და ტერიტორიული მთლიანობა იყოს აღიარებული, და აღიარებული არა მხოლოდ სიტყვიერად, არამედ ფაქტობრივად. ამ მხრივ ძალიან სამწუხაროა, როცა მთიანი ყარაბახიდან დელეგაციები ჩამოდიან აფხაზეთსა და სამხრეთ ოსეთში და თავად აყენებენ საკითხს, თითქოსდა ეს არის ერთი და იგივე ტიპის კონფლიქტები და რაღაც სიმეტრიას ეძებენ, ეს ჩვენთვის ძალიან სამწუხარო და მტკივნეულია. ჩვენ ვთვლით, რომ აქ არ არის ის კეთილგანწყობა, რაც ჩვენი ქვეყნის მიმართ უნდა არსებობდეს",- აღნიშნა სალომე ზურაბიშვილმა.

 

საქართველოს პრეზიდენტი აფხაზეთში სომხური ეკლესიების საკითხსაც შეეხო, რომელიც რუსეთის მიტროპოლიტის დაქვემდებარებაში არის გადაცემული, რაც ქვეყნის პრეზიდენტის თქმით, კანონის შესაბამისად, ჩვენი ტერიტორიული სუვერენობის ძალიან დიდი დარღვევაა.

 

,,ჩვენც თქვენსავით ვთვლით და ეს ჩვენი ურყევი პოზიციაა, რომ ამ კონფლიქტების გადაწყვეტა შეიძლება მოხდეს მხოლოდ და მხოლოდ მშვიდობიანი გზით. ჩვენ ამ პოლიტიკის ურყევი მიმდევრები ვართ, არ ვცვლით მას და არ გვგონია, რომ არსებობდეს სხვა ალტერნატივა ამ რეგიონში. ყველაფერი, რაც ამძაფრებს ამ კონფლიქტებს და უფრო რთულს ხდის მათ გადაწყვეტას ჩვენი რეგიონის ინტერესების წინააღმდეგ მიდის. ამ კონფლიქტების გადაწყვეტის ერთადერთი გზა, ჩვენი პარტნიორების უფრო მაღალი დონის პოლიტიკური ჩარევაა. სამწუხაროდ, ახსენეთ თქვენ მინსკის ჯგუფი და ასევე, ჩვენთან მიმართებაში არსებობს ჟენევის ფორმატი, რომლებიც მეტნაკლებად გადასულები არიან რაღაც ტექნიკურ საკითხებზე და არ არიან იმ პოლიტიკური დონის გადაწყვეტილებების მიმღები, რომლებმაც დღეს შეიძლება რამე გარდატეხა შემოიტანონ ამ სიტუაციაში.

 

მგონია, რომ ერთობლივად უნდა ვიმუშაოთ, რომ საერთაშორისო ნორმებზე დაყრდნობით, ამ კონფლიქტების გადაწყვეტის ახალ ეტაპს მივაღწიოთ. თუ არა, მაშინ ყველაფერი რაზეც ვსაუბრობთ: ეკონომიკური წინსვლა, სტაბილურობა, უფრო მეტი ურთიერთობა და მათი გაღრმავება, სატრანსპორტო და ლოგისტიკის ქსელების განვითარება ევროკავშირთან და სხვა ქვეყნებთან მხოლოდ სიტყვიერი განცხადებებია. საქართველოს ტერიტორიაზე ცხოვრობენ წარმოშობით სომხები და აზერბაიჯანელები და ჩვენთვის შეიძლება ისევე მტკივნეული იყოს ეს კონფლიქტი, როგორც თქვენთვისაა, რადგან კონფლიქტი რომ გადმოვიდეს ჩვენს ტერიტორიაზე, ეს საქართველოსთვის დამანგრეველი იქნება. ასე რომ, ამ კუთხით, მე მგონია, ჩვენი ინტერესები ძალიან ნათელია და არავისთვის არაფრის ახსნა გვჭირდება, რომ ეს არის საქართველოსთვის უალტერნატივო პოლიტიკა, რომ მისი კონფლიქტები, მის ტერიტორიაზე არსებული ოკუპირებული ტერიტორიების საკითხი გადაწყდეს მშვიდობიანად და ასევე, ის კონფლიქტი, რომელიც საქართველოს ტერიტორიაზე არაა, მაგრამ, რომლის გადმოტანა შეიძლება იყოს დამანგრეველი საქართველოსთვის, ისიც უნდა გადაწყდეს მშვიდობიანი გზით და საერთაშორისო ნორმებზე დაყრდნობით", - აღნიშნა საქართველოს პრეზიდენტმა ეროვნულ ასამბლეაში შეხვედრაზე.

ექსკლუზიური
01 ივნისი 2018
მაკა ჩიჩუა მთავარ პროკურატურასთან მიმდინარე აქციაზე მივიდა

მე ვარ იმ ადამიანების გვერდით ვინც ამხელა ტრაგედიის მსხვერპლია, - ამის შესახებ საქართველოს...

01 ივნისი 2018
ზაზა სარალიძე და მისი მხარდამჭერები უკვე რუსთაველის გამზირზე იმყოფებიან

ზაზა სარალიძე და მისი მხარდამჭერები უკვე რუსთაველის გამზირზე იმყოფებიან ზაზა სარალიძე და მ...

01 ივნისი 2018
ზაზა სარალიძის მხარდასაჭერი აქცია ქუთაისში, პარლამენტთან მიმდინარეობს

ზაზა სარალიძის მხარდასაჭერი აქცია ქუთაისში, პარლამენტთან მიმდინარეობს ქუთაისში ზაზა სარალი...

01 ივნისი 2018
მინდა, თხოვნით მივმართო ბატონ გიორგი მარგველაშვილს, თუ შეუძლია, გამოვიდეს და დაგვიდგეს გვერდით

ზაზა სარალიძე - მინდა, თხოვნით მივმართო ბატონ გიორგი მარგველაშვილს, თუ შეუძლია, გამოვიდეს...

01 ივნისი 2018
პარლამენტთან მიმდინარე საპროტესტო აქციაზე პრემიერ–მინისტრი გიორგი კვირიკაშვილი მივიდა

საქართველოს პრემიერ მინისტრი გიორგი კვირიკაშვილი პარლამენტის წინ აქციაზე მივიდა. პრემიერს...

01 ივნისი 2018
გარდაცვლილი მოზარდების მშობლებს შეეძლებათ გამოძიებიდან ინფორმაცია ყოველდღიურად მიიღონ

გამოძიებაში, რომელსაც შსს დაიწყებს, გარდაცვლილი მოზარდების მშობლებს შეეძლებათ გამოძიებიდან...

12 ივნისი 2018
ალბათ, დასაკავებელთა სია ჰქონდათ და ავტომატურად წაიკითხეს, ჩემი დაკავების მცდელობაც არ იყო

ცოტა ხნის წინ შსს-მ გააკეთა განცხადება რომ დაკავებულია "ნაციონალური მოძრაობის წევრი ლევან...

10 დეკემბერი 2018
ირაკლი კობახიძე - პარლამენტი ყოველთვის იქნება მოწინავე პოზიციაზე, რასაც ჰქვია ადამიანის უფლებების განუხრელი დაცვა

საქართველოს პარლამენტი ყოველთვის იქნება მოწინავე პოზიციაზე, რასაც ჰქვია ადამიანის უფლებები...

10 დეკემბერი 2018
კარლ ჰარცელი - ევროკავშირს ძალიან დიდი მოლოდინი აქვს საქართველოსთან დაკავშირებით ადამიანის უფლებათა დაცვის სფეროში

საქართველოში ევროკავშირის ელჩმა, კარლ ჰარცელიმ განაცხადებით, ევროკავშირს ძალიან დიდი მოლოდ...

არქივი

« « » » აპრილი 2019
ორშ სამ ოთხ ხუთ პარ შაბ კვი
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ამინდი

Clear

0°C

თბილისი

Clear

სინესტე: 65%

ქარი: 9.66 km/h

  • 04 იანვარი 2019

    ნაწილობრივ ღრუბლიანი 7°C 0°C

  • 05 იანვარი 2019

    უმეტესად ღრუბლიანი 7°C 0°C

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

ყველა გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?