Global Press

Georgia

Global PressGlobal PressGlobal PressGlobal Press

USD
3.2242
EUR
3.8094
RUR
0.0421
GBP
4.1992

საქართველოს გენერალურმა პროკურატურამ საქართველოს ტერიტორიის ნაწილის გადაცემისკენ მიმართული, ჩვენი ქვეყნის საწინააღმდეგო ქმედების ბრალდებით 2 პირი დააკავა. ინფორმაცია უწყებაში ჩატარებულ ბრიფინგზე გაჟღერდა. ამასთან, პროკურატურაში არ გამორიცხავენ, რომ გამოძიების მსვლელობისას ყოფილი ან მოქმედი თანამდებობის პირთა პასუხისმგებლობაც გამოიკვეთოს.

 

დაკავებულია საქართველოს საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ი.მ. და საქართველოს შინაგან საქმეთა სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნ.ი.

 

„როგორც საზოგადოებისათვის ცნობილია, მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე, საქართველოს სისხლის სამართლის კოდექსის 308-ე მუხლის პირველი ნაწილით გათვალისწინებული დანაშაულის ნიშნებით. გამოძიების დაწყებას საფუძვლად დაედო საქართველოს თავდაცვის სამინისტროდან მიღებული წერილობითი ინფორმაცია, რომლის თანახმადაც წლების განმავლობაში საგარეო საქმეთა სამინისტროსთან არსებული სახელმწიფო საზღვრის დელიმიტაცია-დემარკაციის კომისიის ექსპერტების მიერ, სახელმწიფო საზღვრის შეთანხმებისას მუდმივად ხდებოდა რელევანტური დოკუმენტაციის იგნორირება და მათთვის გვერდის ავლით საქართველოს საზიანო გადაწყვეტილებების მიღება. ამავე ინფორმაციის თანახმად, საქართველოს მოქალაქემ, სხვა ქვეყანებში მოიძია და თავდაცვის სამინისტროს გადასცა მნიშვნელოვანი საარქივო მასალა, მათ შორის ტოპოგრაფიული რუკები, რომლებიც წარმოდგენილი იქნა გამოძიების წინაშე.

 

მიღებული ინფორმაციის საფუძველზე, გამოძიებამ, სხვა საკითხებთან ერთად, საქართველოს სამთავრობო კომისიის ცალკეული ექსპერტების ქმედებების კანონიერების შესწავლა დაიწყო.

 

საქმეზე მოწმის სახით გამოიკითხა 60-მდე პირი, ჩატარდა ათეულობით საგამოძიებო და საპროცესო მოქმედება, მათ შორის საქართველოს ეროვნული არქივიდან, საჯარო რეესტრის, სასაზღვრო პოლიციის, ეროვნული უშიშროების საბჭოს და საგარეო საქმეთა სამინისტროს არქივებიდან, საქართველოს პრეზიდენტის ადმინისტრაციიდან, ეროვნული ბიბლიოთეკიდან, გარემოს დაცვის ეროვნული სააგენტოდან, კულტურული მემკვიდრეობის დაცვის ეროვნული სააგენტოდან ამოღებული იქნა მნიშვნელოვანი დოკუმენტაცია, მათ შორის კარტოგრაფიული მასალები, დაინიშნა შესაბამისი ექსპერტიზები, რის შედეგადაც დადგინდა შემდეგი:

 

საბჭოთა კავშირის არსებობის პერიოდში, საქართველოსა და აზერბაიჯანის რესპუბლიკებს შორის ადმინისტრაციული საზღვრის ხაზი რამოდენიმეჯერ შეიცვალა და საბოლოოდ 1938 წელს ორმხრივად შეთანხმდა.

 

კერძოდ, 1938 წლის მარტში, საქართველოს და აზერბაიჯანის უმაღლესმა მმართველობითმა ორგანოებმა დაამტკიცეს 1:500 000 მასშტაბის რუკაზე დატანილი ადმინისტრაციული საზღვრის ხაზი.

 

საბჭოთა კავშირის დაშლის შემდეგ, საქართველოსა და მის მეზობელ სახელმწიფოებს შორის წარმოიშვა სახელმწიფო საზღვრის ხაზის დადგენის აუცილებლობა, რა მიზნითაც 1994 წელს შეიქმნა საქართველოს სპეციალური სამთავრობო კომისია, რომლის ამოცანას წარმოადგენდა ქვეყნებს შორის საზღვრის დელიმიტაცია და დემარკაცია. 1996 წლის ივნისში, საქართველოს და აზერბაიჯანის სამთავრობო კომისიები ერთობლივ შეხვედრაზე შეთანხმდნენ, რომ სახელმწიფოებს შორის საზღვრის დადგენის საფუძველი იქნებოდა 1938 წელს მათ შორის ორმხრივად დამტკიცებული ადმინისტრაციული საზღვრის ხაზი.

 

საქართველოს სამთავრობო კომისიის ერთ-ერთ წევრი და ამავდროულად ექსპერტთა ჯგუფის ხელმძღვანელი იყო ი. მ. და მასთან ერთად ამ პროცესს წარმართავდა კომისიის ექსპერტ-კარტოგრაფი ნ. ი. ხსენებული პირები, საზღვრის დელიმიტაცია-დემარკაციის პროცესის განხორციელების მიზნებისათვის, ვალდებულნი იყვნენ ჩაეტარებინათ გეოდეზიური და კარტოგრაფიული სამუშაოები, მოეძიებინათ შესაბამისი რუკები და სხვა მასალები, მოეხდინათ მათი შეჯერება, ანალიზი და მათ საფუძველზე შეედგინათ საქართველოს საზღვრის ამსახველი რუკის ალბომები. აღნიშნულის საწინააღმდეგოდ, ბრალდებულებმა არ უზრუნველყვეს შესაბამისი აუცილებელი საექსპერტო კვლევების ჩატარება და ასევე აღნიშნულ პროცესში არ ჩართეს კარტოგრაფიის დარგის სპეციალისტები.

 

აღსანიშნავია, რომ სწორედ ბრალდებულთა მიერ შედგენილ ალბომებში ხდებოდა მათ მიერვე შეთანხმებული საზღვრის ამსახველი მონაკვეთების დატანა, რომელიც თავის მხრივ წარმოადგენდა ორ სახელმწიფოს შორის, 2007 წლის ჩათვლით პერიოდში, საზღვარზე მოლაპარაკება-შეთანხმების პროცესის ძირითად სახელმძღვანელო მასალას. ბრალდებულებს ევალებოდათ შეექმნათ კონსტიტუციურ პრინციპებზე და რელევანტურ კარტოგრაფიულ მასალაზე დაფუძნებული რუკის ალბომები, სადაც დატანილი იქნებოდა საქართველოს რეალური, ისტორიული საზღვარი (1938 წ) რაც გახდებოდა ორ სახელმწიფოს შორის მოლაპარაკებისა და შეთანხმების საფუძველი.

 

მიუხედავად იმისა, რომ მათ მთელი საქმიანობის პერიოდში, გააჩნდათ 1937-1938 წლების 1:200 000-იანი მასშტაბის ტოპოგრაფიული რუკის დედანი, საქართველოს სამთავრობო კომისიის წევრებს უმალავდნენ ინფორმაციას აღნიშნულის თაობაზე, რათა არ მოეხდინათ მისი გამოყენება საზღვრების დელიმიტაციის პროცესში. ხსენებული რუკის დედანი გამოძიების მიერ სასამართლოს განჩინების საფუძველზე აღმოჩენილი იქნა ბრალდებულ ნ.ი-ს სამუშაო კაბინეტში.

 

აღსანიშნავია, რომ კომისიის წევრებისათვის ხელმისაწვდომი იყო დასახელებული რუკის მხოლოდ ასლი და მათ მიერ არაერთი მოთხოვნის მიუხედავად, რომ მომხდარიყო ამ რუკის გამოყენება საზღვრის დელიმიტაციის პროცესში, ბრალდებულები იმ მიზეზით რომ არ არსებობდა რუკის დედანი, მისი ასლი კი არ იყო ავთენტური დოკუმენტი, ეწინააღმდეგებოდნენ მის გამოყენებას.

 

ბრალდებულებმა რუკის ალბომებში სახელმწიფო საზღვრის გავლებისას განზრახ გამოიყენეს ისეთი კარტოგრაფიული მასალა, რომელიც ისტორიულად და სამართლებრივად არ ემყარებოდა და არ ასახავდა ჩვენი სახელმწიფოს რეალურ პოზიციას მის კუთვნილ ტერიტორიებთან დაკავშირებით.

 

კერძოდ: ი.მ.-მ და ნ.ი.-მ დელიმიტაციის პროცესში, სასაზღვრო ხაზზე შეთანხმებისას, ნაცვლად 1938 წლის კარტოგრაფიული მასალისა, მიზანმიმართულად გამოიყენეს 1970-80-იან წლებში გამოცემული 1:100 000-იანი და 1 : 50 000 მასშტაბის რუკებზე არსებული საზღვრის ხაზი, რომლებიც სახელმწიფოთაშორის ორმხრივად დამტკიცებული არასდროს ყოფილა და არსებით წინააღმდეგობაში მოდიოდა ჩვენს ისტორიულ საზღვრებთან. უნდა აღინიშნოს, რომ ბრალდებულმა ი.მ-მ გამოძიებას არ გადასცა მის ხელთ არსებული 1970-80-იან წლებში გამოცემული 1:100 000-იანი მასშტაბის რუკები, რომლებიც მან საზღვრების დელიმიტაციის პროცესში რეალურად გამოიყენა, ქვეყნის ინტერესების საწინააღმდეგოდ. აღნიშნული მასალების მოპოვება გამოძიებამ მხოლოდ ი.მ-ს კუთვნილ სამუშაო ოთახში ჩატარებული ჩხრეკის შედეგად შეძლო.

 

მას შემდეგ, რაც გამოძიებამ მოიპოვა 1937-1938 წლების 1:200 000-იანი მასშტაბის რუკა, მათი შესწავლისა და შეთანხმებულ საზღვრის ხაზთან დადარების მიზნით, ს.ს.ი.პ. ლევან სამხარაულის სახელობის სასამართლო ექსპერტიზის ეროვნულ ბიუროში დანიშნული იქნა კარტოგრაფიული ექსპერტიზა, რომელშიც ჩართული იქნენ ივანე ჯავახიშვილის სახელობის თბილისის სახელმწიფო უნივერსიტეტის, სოხუმის სახელმწიფო უნივერსიტეტისა და ტექნიკური უნივერსიტეტის პროფესორები და კარტოგრაფიული დარგის წამყვანი ექსპერტები.

 

მიღებული ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემული რუკებზე დატანილი საზღვრის ხაზებით, რაც როგორც აღინიშნა არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.

 

ჩატარებული ექსპერტიზით ასევე დადგინდა, რომ 1:500 000 მასშტაბში მომზადებული ამონახაზი, რომლითაც ბრალდებულების განმარტებით ხელმძღვანელობდნენ საზღვრების დელიმიტაციისას და ეს იყო მათი ძირითადი სახელმძღვანელო დოკუმენტი, როგორც კარტოგრაფიული პროდუქტი, ვერ გამოდგება შესასრულებელი კარტოგრაფიული სამუშაოს საფუძვლად, რადგან ასეთი ამონახაზები არ მოიცავს სრულფასოვან ტოპოგრაფიულ ინფორმაციას, მასზე არ არის დატანილი ადგილმდებარეობის გეოგრაფიული ობიექტები და ტოპოგრაფიული ელემენტები (მწვერვალები, მყარი წერტილები, სიმაღლითი ნიშნულები, გზათა გადაკვეთები, დასახლებული პუნქტები, და სხვა).

 

და რაც ყველაზე მნიშვნელოვანია, ჩატარებული ექსპერტიზით დადგინდა, რომ საქართველოსა და აზერბაიჯანს შორის, 2007 წლის ჩათვლით პერიოდში, შეთანხმებული საზღვრის რიგი მონაკვეთები არ შეესაბამება 1937-1938 წლებში გამოცემულ 1:200 000 მასშტაბის ტოპოგრაფიულ რუკებზე დატანილ საქართველოს საზღვრის ხაზს, სხვაობა საქართველოს საზიანოდ, შეადგენს 3500-მდე ჰა ფართობს. შესაბამისად, ბრალდებულთა დანაშაულებრივი ქმედების შედეგად საქართველოს ისტორიულად კუთვნილი ტერიტორიების დაკარგვის საფრთხე შეიქმნა.

 

ი.მ-ს და ნ.ი-ს მიმართ სისხლისსამართლებრივი დევნა დაიწყო საქართველოს სისხლის სამართლის კოდექსის 308-ე მუხლის პირველი ნაწილით, რაც სასჯელის სახედ და ზომად ითვალისწინებს თავისუფლების აღკვეთას ათიდან თხუთმეტ წლამდე. საგამოძიებო უწყება კანონით დადგენილ ვადაში მიმართავს სასამართლოს ბრალდებულთა მიმართ აღკვეთის ღონისძიების სახით პატიმრობის შეფარდების მოთხოვნით. საქმეზე გრძელდება გამოძიება.

 

მაღალი საჯარო ინტერესის გათვალისწინებით, საქართველოს პროკურატურა პერიოდულად მოახდენს საზოგადოების ინფორმირებას გამოძიების შედეგების თაობაზე“, - ნათქვამია პროკურატურის მიერ გავრცელებულ განცხადებაში.

გენერალურ პროკურატურაში დავით გარეჯის მონასტრის საკითხზე, არქიმანდრიტ კირიონის (ონიანი) დაკითხვა დასრულდა.

 

როგორც მან დაკითხვის დასრულების შემდეგ ჟურნალისტებთან განაცხადა, დაკითხვის დროს საუბარი დავით გარეჯის თაობაზე იყო.

 

„მე მგონი ჩემი მხრიდან უთქმელი არაფერი არ დარჩენილა. ყველაფერზე იყო საუბარი. ეს არის დახურული თემა. ვცხოვრობ დავით გარეჯში და საუბარი იყო დავით გარეჯზე“, - განაცხადა არქიმანდრიტმა.

თამარ ბაჩალიაშვილის დედა შიმშილობას აპირებს. ეს მას შემდეგ, რაც 3 დღის წინ, თეონა თამაზაშვილმა მიმართა მათავარ პროკურორს შეხვედრის თხოვნით, თუმცა, ირაკლი შოთაძისგან მას პასუხი ამ დრომდე არ მიუღია.

 

"ყურადღება გადაიტანეს ფურცხვანიძეზე... ალბათ, იმედი აქვთ, რომ გაიმარჯვებენ არჩევნებში და ჩაფარცხავენ ამ საქმეს და ბედნიერად იცხოვრებენ. მივმართავ უკიდურეს ფორმას, წავალ დავუჯდები იქ და აქციებსაც დავაანონსებ" - ამბობს თეონა თამაზაშვილი

 

ცნობილი ხდება, რომ პროგრამისტი გიორგი ლუბარეცი, თბილისის პროკურატურაში გამოკითხვაზე დაიბარეს - ლუბარეცი ამბობს, რომ ის ლოკაციებს ეძებდა, როგორც სხვა ყველა, ბაჩალიაშვილის დაკარგვის დღეებში, ხოლო პროკურატურაში გამოკითხვისას საუბარი "ვილა ალგეთს" შეეხო, რადგან ძიებისას ლუგარეცმა ეს ლოკაციაც ნახა.

 

აღსანიშანავია ისიც, რომ გამოძიებისგან აქამდე ჩატარებული ექსპერტიზის ყველა დასკვნას ითხოვენ ბაჩალიაშვილის ოჯახის ადვოკატებიც. ისინი ფიქრბენ, რომ დავით ფურცხვანიძის დაკავებით, პროკუტარას მკვლელობის საქმის ჩაფარცხვა უნდა.

 

 ბაჩალიაშვილის ადვოკატი მიხეილ რამიშვილი და მისი მხარდაჭერი კოლეგა ეკა კობესაშვილი ამ წუთებში პროკურატურაში იმყოფებიან.

 

აქვე შეგახსენებთ, რომ დღესვე ადვოკატების მხარდამჭერი აქცია გაიმართა პროკურატურასთან. ადვოკატები, რომლებიც რამიშვილის მხარდასაჭერას უკვე მეორედ გამოხატავენ, ფიქრობენ, რომ დავით ფურცხვანიძის შემდგომ, ოჯახის ადვოკატს, მიხეილ რამიშვილსაც დააკავებენ.

საქართველოს საპატრიარქო პროკურატურაში დაწყებულ გამოძიებას, დავით გარეჯის მიწებთან დაკავშირებით, ნდობას უცხადებს.

 

განცხადება მამა ანდრია ჯაღმაძიმე გააკეთა და აღნიშნა, რომ საზღვრის სადემარკაციო-სადელიმიტაციო საკითხზე, წინა კომისია "ძალიან საეჭვოდ მუშაობდა" და როგორც ის ამბობს საპატრიარქოს ამ საკითხზე ბევრჯერ აქვს პოიზიცია დაფიქისირებული

 

,,ძველი კომისია, რომელიც მუშაობდა, მუშაობდა არაეფექტურად და ჩვენ ვამბობდით, რომ საეჭვო დასკვნები დადო იმ კომისიამ და როგორც იკვეთება პროკურატურის განცხადებიდან, სწორედ ამ საკითხს ეხება ეს ძიება. სანამ პროკურატურა გააკეთებდა განცხადებას, მთელი წელი ვამბობდით, რომ წინა კომისია რომელიც ახლა მადლობა ღმერთს შეცვლილია, მუშაობდა ძალიან საეჭვოდ" -  ამბობს საპატრიარქოს პრესსპიკერი.

 

შეგახსენებთ, რომ უცხო ქვეყნისათვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე საქართველოს პროკურატურამ გამოძიება დაიწყო. საგამოძიებო უწყება სავარაუდოდ მიხეილ სააკაშვილისთვის ახალი ბრალის წარდგენას გეგმავს.

 

"მთავარი არხის" ინფორმაციით, გამოძიების დაწყების საბაბი გახდა რუკები, რომელიც ქართულ მხარეს კრემლთან დაახლოებულმა, წარმოშობით ქართველმა ბიზნესმენმა, დავით ხიდაშელმა გადასცა.

საქართველოს გენერალური პროკურატურის საგამოძიებო ნაწილში სისხლის სამართლის საქმეზე, უცხო ქვეყნისათვის საქართველოს ტერიტორიის ნაწილის გადაცემისკენ მიმართული მოქმედების განხორციელების ფაქტზე საქართველოს სისხლის სამართლის კოდექსის 308-ე მუხლის პირველი ნაწილით გათვალისწინებული დანაშაულის ნიშნებით გამოძიება მიმდინარეობს.

 

უწყებს ცნობით, გამოძიების დაწყებას საფუძვლად დაედო 2020 წლის 17 აგვისტოს, საქართველოს თავდაცვის სამინისტროდან მიღებული წერილობითი ინფორმაცია, რომელიც შეეხებოდა საქართველოს სახელმწიფო საზღვრების დელიმიტაციისა და დემარკაციის სამთავრობო კომისიის საქმიანობას. თავდაცვის სამინისტროდან მიღებული ინფორმაციით, კომისიის მიერ საქართველო აზერბაიჯანის სახელმწიფო საზღვრის გარკვეული მონაკვეთები არამართლზომიერად, ჩვენი ქვეყნის ტერიტორიული ინტერესების საზიანოდ შეთანხმდა.

 

"მოცემული ეტაპისთვის გამოძიება, სხვა საკითხებთან ერთად, სწავლობს საქართველო-აზერბაიჯანის სახელმწიფო საზღვრის დელიმიტაციის პროცესში მონაწილე საქართველოს სამთავრობო კომისიის ცალკეული ექსპერტების ქმედებების კანონიერებას.

 

საგამოძიებო უწყების მიერ მიმდინარე წლის 9 სექტემბერს, ს.ს.ი.პ. ლევან სამხარაულის სახელობის სასამართლო ექსპერტიზის ეროვნულ ბიუროში დანიშნულ იქნა კარტოგრაფიული ექსპერტიზა, რომელშიც მოქმედ ექსპერტებთან ერთად ჩართული არიან აკადემიური სფეროს წარმომადგენელი მეცნიერები და გეოდეზიისა და კარტოგრაფიის დარგის წამყვანი სპეციალისტები. სისხლის სამართლის საქმეზე გამოიკითხა ათეულობით პირი.

 

მაღალი საჯარო ინტერესის გათვალისწინებით, საქართველოს პროკურატურა პერიოდულად მოახდენს საზოგადოების ინფორმირებას გამოძიების შედეგების თაობაზე,- ნათქვაამია ინფორმაციაში.

მიხეილ რამიშვილის მხარდასაჭერად, პროკურატურასტან ადვოკატები შეიკრიბნენ.

 

ისინი არ გამორიცხავენ, რომ დავით ფურცხვანიძის შემდგომ, ოჯახის ადვოკატს, მიხეილ რამიშვილსაც დააკავებენ.

 

ადვოკატები ასევე ფიქრობენ, რომ ხელისუფლება ახლა ფურცხვანიძის დადანაშაულებით ცდილობს ბაჩალიაშვილის მკვლელობის გადაფარვას. ადვოკატები ბაჩალიაშვილის საქმეზე, აქამდე ჩატარებული ყველა ექსპერიმენტისა და ექსპერტიზის მასალების შედეგებსა და ვილა ალგეთის ტერიტორიაზე დამატებითი ექსპერიმენტის ჩატარებასს მოიხოვენ.

 

შეგახსენებთ, თამარ ბაჩალიშვილის საქმის ერთერთ ფიგურანტსა და სატელიტური ფოტოების გამავრცელებელს, დავით ფურცხვანიძეს ბრალი ოფიციალურად 26 სექტემბერს წარედგინა. მას პროკურატურა ფალსიფიცირებული სატელიტური ფოტოების წარდგენას ედავება.

 

აქვე, ეს არ არის მიხეილ რამიშვილის მხარდასაჭერი პირველი აქცია. ადვოკატების საპროტესტო აქცია სამოქალაქო სასამართლოსთან 23 სექტემბერსაც გაიმართა. კოლეგეების აზრით, პროკურატურის მხრიდან ზეწოლა და მიზანი ემსახურება იმას, რომ იურისტებმა გახმაურებული საქმეები ვერ გამოიძიონ.

მარნეულში მომხდარ ინციდენტთან დაკავშირებით, სადაც დაშავდნენ „ნაციონალური მოძრაობის“ წარმომადგენლები, „მთავარი არხის“ ჟურნალისტი, ხოლო „პირველი არხის“ ოპერატორს კამერა დაუმტვრიეს და ფიზიკური შეურაცხყოფა მიაყენეს შინაგან საქმეთა სამინისტრომ გამოძიება დაიწყო.

 

როგორც ჟურნალისტებს ქვემო ქართლის პოლიციის დეპარტამენტის დირექტორმა ლაშა გოგნიაშვილმა განუცხადა, გამოძიება დაიწყო ჯანმრთელობის დაზიანებისა და ჟურნალისტისთვის პროფესიულ საქმიანობაში უკანონოდ ხელის შეშლის მუხლებით.

 

შსს-ს წარმომადგენლის განმარტებით, მომხდართან დაკავშირებით სამართალდამცველებს ჯერჯერობით არავინ დაუკავებიათ.

 

მისვე განმარტებით, პოლიციას თავდამსხმელთა შესახებ ჯერჯერობით სრული ინფორმაცია არ აქვს და დამნაშავე პირთა დასადგენად მიმდინარეობს გამოძიება.

 

„გამოძიება მყისიერად დავიწყეთ გივი ქველაძის ჯანმრთელობის დაზიანების ფაქტზე 126-ე მუხლით. რაც შეეხება ჯეიჰუნ მუჰამედ ალის ცემის ფაქტს, გამოძიება დავიწყეთ სსკ-ის 154-ე მუხლით, რაც ჟურნალისტურ საქმიანობაზე ხელის შეშლას გულისხმობს. მიმდინარეობს აქტიური ოპერატიული სამძებრო და საგამოძიებო მოქმედებები დანაშაულის ჩამდენ პირთა დაკავების მიზნით. შსს- ყველაფერს აკეთებს, ვინაიდან დაცული იყოს საზოგადოებრივი წესრიგი, როგორც ქალაქ მარნეულში ასევე მთელ საქართველოში ყველანაირი საგამოძიებო მოქმედებები მყისიერად ჩატარდება“, - განაცხადა ლაშა გოგნიაშვილმა.

 

მისვე განმარტებით, მაშინ, როდესაც გივი ქველაძეზე თავდასხმის ფაქტი მოხდა, ადგილზე სამართალდამცველები არ იმყოფებოდნენ.

 

„პირველ თემას რაც შეეხება, მაშინ იქ შსს-ს წარმომადგენლები არ იყვნენ. შეტყობინების შესვლისთანავე ოპერატიული ჯგუფები მყისიერად გამოცხადნენ და დავიწყეთ შესაბამისი ღონისძიებები, როგორც საგამოძიებო, ისე სამძებრო“, - განაცხადა მან.

თბილისის საქალაქო სასამართლოში თამარ ბაჩალიაშვილის საქმეზე პროგრამისტი გიორგი ლუბარეცის მაგისტრი მოსამართლის წინაშე დაკითხვა დასრულდა.

 

როგორც აღნიშნული საქმის პროკურორმა, ლაშა კოტრიკაძემ დაკითხვის დასრულების შემდეგ განაცხადა, გიორგი ლუბარეცს „ვილა ალგეთის“ ტერიტორიის შესახებ ინფორმაცია ბაჩალიაშვილის გაუჩინარებიდან 4 დღის შემდეგ ჰქონდა გადამოწმებული, შესაბამისად, გამოძიებას აინტერესებდა თუ რა მიზნით გადაამოწმა მან ხსენებული ლოკაცია.

 

„,ლოკაცია, რომელსაც ჟურნალისტები „ვილა ალგეთს“ უწოდებთ, პირს, რომელიც მოწმედ დავკითხეთ, გადამოწმებული ჰქონდა 2020 წლის 22 ივლისს, შესაბამისად დაისვა კითხვები, რატომ, რა მოტივაციით და რისთვის გადაამოწმა ხსენებული ლოკაცია“, - განაცხადა ლაშა კოტრიკაძემ.

 

გიორგი ლუბარეცის უფლებადამცველის, ვანო ჩიტაშვილის განცხადებით, გამოძიება ფიქრობდა, რომ „ვილა ალგეთის“ შესახებ ინფორმაცია ჟურნალისტებს ლუბარეცმა მიაწოდა, რაც მისმა დაცვის ქვეშ მყოფმა უარყო.

 

„დღეს გიორგი დაიბარეს მოწმის სახით. ძირითადი შეკითხვები შეეხებოდა თუ რა კავშირი ჰქონდა თამარ ბაჩალიაშვილის საქმესთან, რა ინფორმაციას ფლობდა მის გარდაცვალებასთან დაკავშირებით და რა ახალი ინფორმაციის მიწოდება შეეძლო გამოძიებისთვის ამ საქმის ირგვლივ. გიორგი არის პროგრამისტი და როდესაც თამარ ბაჩალიაშვილი გაუჩინარდა, რუკებზე ეძებდა სხვადასხვა ლოკაციებს, გზებს სადაც შეიძლებოდა თამარის კვალი წასულიყო. ერთ-ერთი ასეთი ლოკაცია იყო „ვილა ალგეთის“ ტერიტორია და აინტერესებდათ ფლობდა თუ არა ინფორმაციას ამ კონკრეტული ადგილის შესახებ, თუ ეს იყო მხოლოდ შემთხვევითობა,“ - განაცხადა ვანო ჩიტაშვილმა.

 

მისივე ინფორმაციით, პროკურორის კითხვებზე გიორგიმ ლუბარეცმა ამომწურავი პასუხები გასცა, ამიტომ მისი ხელახალი დაბარება არ უნდა გახდეს საჭირო.

 

„კითხვები ასევე შეეხებოდა, მიაწოდა თუ არა „ვილა ალგეთის“ შესახებ ინფორმაცია ჟურნალისტებს - ნოდარ მელაძეს ან ელისო კილაძეს. ამასთან დაკავშირებით მან ასევე დაადასტურა, რომ არც ჟურნალისტებთან და არც სხვა გარეშე პირებთან შემხებლობა არ ჰქონდა. პროკურორის კითხვებზე გიორგიმ ამომწურავი პასუხი გასცა, მას რომელიმე კითხვა პასუხგაუცემელი არ დაუტოვებია, შესაბამისად, არ მგონია, რომ მისი ხელახალი დაბარება გახდეს საჭირო. სავარაუდოდ, პროკურატურა ფიქრობდა, რომ „ვილა ალგეთზე“ ჟურნალისტებს ინფორმაცია მიაწოდა გიორგიმ და უნდოდათ ამის უარყოფა ან დადასტურება, რაც გიორგი ლუგარეცმა უარყო,“ - აღნიშნა ვანო ჩიტაშვილმა.

 

ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.

"ქრონიკა +"-ის მთავარი რედაქტორი და ჟურნალისტი, ელისო კილაძე პროკურატურას სთხოვს თამარ ბაჩალიაშვილის ვიდეო-დღიურების ნახვის საშუალება მისცენ. ამ თემაზე განცხადება მან გადაცემა "დღის სტუმარში" გააკეთა.

 

,,შერჩევით რომ დაგყავთ მანდ ჟურნალისტები და თამარ ბაჩალიაშვილის ვიდეო-დღიურებს ასმენინებთ, მე ვითხოვ, რომ მომეცეს თამარ ბაჩალიაშვილის ვიდო-დღუურების გაცნობის საშუალება და ველოდები შეხვედრის დროს და თარიღს, თუ არ გაქვთ შერჩევითი მიდგომა, - თქვა ელისკო კილაძემ.

 

კილაძემ საგამოძიებო უწყებას მიმართა კითხვით, რა ეტაპზეა "ვილა ალგეთთან" დაკავშირებით გამოძიება. მან აღნიშნა, რომ უწყებას შესაბამისი ინფორმაცია 4 სექტემბერს გადასცა და ამის შემდეგ საკმაოდ დიდი დროა გასული.

 

კილაძე ვარაუდობს, რომ უწყებამ ყალბი ფოტოების თემა სპეციალურად ამ ვერსიის გადასაფარად "შემოაგდო". მის განცხადებით, ეჭვი არ ეპარება, რომ ფურცხვანიძის მიერ მიწოდებული ფოტოები ყალბია.

 

შეგახსენებთ, რომ პროკურატურამ ფურცხვანიძე მტკიცებულებათა ფალსიფიკაციისა და პირადი მოტივით მართლმსაჯულებისათვის ხელის შეშლის მიზნით ცრუ ინფორმაციის მიწოდების ფაქტზე დღეს, 25 სექტემბერს დააკავა.

 

გამოძიების ინფორმაციით, ფურცხვანიძემ ე.წ. სატელიტის ფოტოების დამუშავება გაყალბების მიზნით საკუთარ შვილს სთხოვა, უკვე ფალსიფიცირებული სურათები კი ბაჩალიაშვილების ოჯახის ადვოკატს, მიხეილ რამიშვილს გაუგზავნა.

 

პროკურატურა აცხადებს, რომ საქმეზე გამოძიება გრძელდება და თუ სხვა პირების ბრალეულობა გამოიკვეთა მათ მიმართ შესაბამისი მოქმედებები განხორციელდება.

 

ცნობისთვის, დავით ფურცხვანიძეს ბრალი საქართველოს სისხლის სამართლის კოდექსის 369-ე პრიმა მუხლის პირველი ნაწილით და ამავე კოდექსის 370-ე მუხლის მეორე ნაწილით წარედგინა, რაც მტკიცებულებათა ფალსიფიკაციასა და პირადი მოტივით მართლმსაჯულებისათვის ხელის შეშლას გულისხმობს. დანაშაული 2-დან 6 წლამდე პატიმორობას ითვალისწინებს.

 

შეგახსენებთ, რომ საქმე ეხება სატელიტის ფოტოებს, რომლებზეც პროკურატურა აცხადებს, რომ დამონტაჟებული და ყალბია. ბაჩალიაშვილების ოჯახის ადვოკატს, მიხეილ რამიშვილს ფოტოები დავით ფურცხვანიძემ მიაწოდა. ფურცხვანიძე აცხადებს, რომ ბაჩალიაშვილის საქმე დიდი საერთაშორისო აფიორის ნაწილია და ის "შორს შეტოპვის" გამო მოიშორეს.

 

ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი თეთრიწყაროს ტყეში, საკუთარ მანქანაში გარდაცვლილი იპოვეს.

"მთავარი არხის"ინფორმაციით, ქართულ-აზერბაიჯანული საზღვრის რუკები საქართველოს ამჟამინდელ ხელისუფლებას ვინმე დავით ხიდაშელმა გადასცა, რომელმაც დოკუმენტაცია მოსკოვის არქივებიდან ჩამოიტანა.

 

აღსანიშნავია, რომ საქართველოს პროკურატურა დღეს ავრცელებს განცხადებას, რომლის მიხედვითაც, სახელმწიფო საზღვრების დელიმიტაციისა და დემარკაციის სამთავრობო კომისიამ შეთანხმება ჩვენი ქვეყნის ტერიტორიული ინტერესების საზიანოდ გააფორმა, თუმცა განცხადებაში არ არის დაკონკრეტებული რომელ პერიოდზეა საუბარი.

 

თუ კი დადასტურდება, რომ კომისია და მიხეილ სააკაშვილი ქვეყნის ინტერესების საწინააღმდეგოდ მოქმედებდნენ, საქართველოს ტერიტორიების გასხვისების მიზნით, მაშინ გამოდის, რომ გარიგებაში ჩართული იყო არა მხოლოდ ნაციონალური მოძრაობის დროინდელი ან შევარდნაძის დროინდელი ხელისუფლება, არამედ აზერბაიჯანული მხარეც.

 

კარტორგრაფიულ რუკებზე კომენტარს ნიკა გვარამია აკეთებს, რომელიც ჯერ კიდევ გასულ კვირას, გადაცემაში "მთავარი აქცენტები" ამბობდა, რომ საგამოძიებო უწყება მიხეილ სააკაშვილის წინააღმდეგ ახალ ბრალს ამზადებდა. ნიკა გვარამია ასევე იმ პირზე საუბრობს, ვინც ხელისუფლების წყარო გახდა და მიაწოდა რუკები. აქვე გვარამია ამბობს, რომ ხელისუფლება ამ ინფორმაციის გასაჯაროვებას არჩევნებამდე რამდენიმე დღით ადრე აპირებდა, მაგრამ "ჩვენ დავასწარით. ვთქვით, რომ ეს ინფორმაცია ვიცით".

 

"ჩვენ ვიცით როგორ შეიფუთა ეს საქმე და საიდან მოდის. ეს არის 1920-იანი წლების, ე.წ. „ერთა ლიგის“ რუკა, მაშინდელი სადელიმიტაციო რუკა, რომელიც ინახებოდა რუსეთში, რომელიც თვენახევრის წინ ჩამოიტანა და ფული გადაიხადა ამაში და ჩამოუტანა ბიძინა ივანიშვილს მისმა მეგობარმა, რუსმა ოლიგარქმა, ეთნიკურად ქართველმა, ეს არის დავით ხიდაშელი, რომელიც AFK სისტემის, სახელმწიფო რუსული კომპანიის, ერთ-ერთი მეწილეა და მას აქვს დაახლოებით 2 მილიარდი. ეს არის თვენახევრის წინ აქ მოხვედრილი რუკა და მოხვდა იმიტომ, რომ არა იმისთვის გამოეყენებინათ, რომ საქართველოს ინტერესები დაეცვათ და დელიმიტაცია აზერბაიჯანთან იმ სადავო ტერიტორიის მომხდარიყო ისე, როგორც იმ რუკების მიხედვითაა. არა, ეს რუკები საქართველოდან დიდი ხნის გამქრალია. ჩვენ ვიკვლევთ, როდის გაქრა ეს - შევარდნაძის დროს წაიღო ერთმა კონკრეტულმა პიროვნებამ თუ არა და ამაზე გვაქვს ეჭვი, მაგრამ ჯერ არ ვიტყვით. თუ თავის დროზე რუსეთმა გაიტანა საბჭოთა კავშირის დაშლის დროს.

 

ნებისმიერ შემთხვევაში, ეს რუკები არ არსებობდა აქ. თვენახევრის წინ დავით ხიდაშელმა ჩამოიტანა ერთადერთი მიზეზით, რომ თქვან, რომ სადღაც მიფუჩეჩებული იყო და სააკაშვილს ეს ჰქონდა სადღაც შეკუჭული და სინამდვილეში „ყიდდა“ საქართველოს ტერიტორიას აზერბაიჯანზე. ეს რუკები საქართველოს არ ჰქონია არასდროს. ეს კეთდება ოპოზიციის და კერძოდ სააკაშვილის წინააღმდეგ. ეს არის ბოდვა. მე არ ვიძახი რუკების ნამდვილობა-არა ნამდვილობაზე. ეს რუკები არის საქმის შესათხზველად აქ ჩამოტანილი და არა საქართველოს ინტერესების დასაცავად. ეს კეთდება სააკაშვილის წინააღმდეგ, ჩვენ ამაზე ვთქვით რამდენიმე დღის წინ და პროკურატურა იძულებული აღმოჩნდა, ეს დაეჩქარებინა, თორემ გეგმავდა არჩევნებამდე 1 კვირით ან რამდენიმე დღით ადრე ამის გაკეთებას." - თქვა ნიკა გვარამიამ.

 

დავით ხიდაშელი, რომელმაც თვეზე მეტი ხნის წინ ეს რუკები ჩამოიტანა საქართველოში - პირველად მაშინ გამოჩნდა საქართველოში, როცა მილიარდ 200 მილიონი ევრო საქართველოს ხელისუფლებას ჩაურიცხა კოვიდთან ბრძოლის სახელით.

 

ხიდაშელი კი, სატელეკომუნიკაციო კომპანია "ინტრაკომ ტელეკომ სოლუშენის" თავმჯდომარეა, რომელიც სხვადასხვა რადიო მოწყობილობების რეალიზატორია. "მთავარი არხი" დაუკავშირდა ხიდაშელს, თუმცა მან სატელეფონზე კომენტარზე უარი თქვა და გვითხრა, რომ ქვეყანაში არ იმყოფება.

თამარ ბაჩალიაშვილის ოჯახის ადვოკატის მიხეილ რამიშვილის განცხადებით, გარდაცვლილის დედას, თეონა თამაზაშვილს, რომელიც გენერალურ პროკურორ ირაკლი შოთაძესთან შეხვედრას ითხოვდა, ჯერჯერობით პასუხი არ მიუღია.

 

როგორც მან ჟურნალისტებს განუცხადა, აღნიშნულის გამო, თეონა თამაზაშვილი მკაცრი ნაბიჯების გადადგმას გეგმავს.

 

მიხეილ რამიშვილი არ გამორიცხავს, რომ თეონა თამაზაშვილმა შიმშილობაც დაიწყოს.

 

„როგორც ჩემთვის არის ცნობილი, აღნიშნულთან დაკავშირებით მისი მხრიდან იქნება ძალიან მკაცრი ნაბიჯი. არ გამოვრიცხავ, რომ შიმშილობა გამოაცხადოს , - განაცხადა რამიშვილმა.

 

ადვოკატის თქმით, საქმის „ჩაფარცხვა“ და ოჯახის მოთხოვნების იგნორირება, ემსახურება იმას, რომ საქმეზე ობიექტური ჭეშმარიტება არ დადგინდეს.

 

„ერთი საკითხი არის გასარკვევი, რომელი პროკურორის დახმარებით ან როგორ მოხდა, რომ გამოძიების საქმეში არსებული მტკიცებულებები გასაჯაროვდა, რომლითაც ცდილობს გამოძიება დაადასტუროს, თითქოს თითმკვლელობასთან გვაქვს შემხებლობა. ბოლომდე უნდა დადგინდეს აღნიშნულის შემხებლობა. ასევე, Google-ის „თაიმლაინი“, რომელიც არასწორად არის გასაჯაროებული. თუ მარტო ერთია აღმოჩენილი და გახსნილი, Google-დან დანარჩენ რა ინფორმაციასაც ვითხოვთ და რაზეც არის წერილი გაგზავნილი, მას რა რეაგირება მოჰყვა? რა პასუხი გაგვცეს? არ შეიძლება ნაწილ ნაწილ გასაჯაროვდეს, რადგან Google-დან უნდა იყოს ძირითადი ინფორმაცია გამოთხოვილი. ეს არის ის ძირითადი საკითხები, რაც არსებითი მნიშვნელობისაა. უნდა გაირკვეს საერთოდ რას ემსახურება ეს ყველაფერი. ჩემი შეფასებით და რეალურად, ეს ემსახურება იმას, რაც 23 ივლისს იყო დაგეგმილი, რომ კვალიფიკაცია თვითმკვლელობით დაესრულებინათ, რაც არ მოხდება, ვიდრე ყველა კითხვას პასუხი არ გაეცემა. მთავარი და ძირითადი, ექსპერტიზების პასუხები, რაც კიდევ დასასრულებელია, ამ კითხვებზე დეტალურად იქნება პასუხი მოთხოვნილი. „ფეისბუქის“, „ვოთსაფის“ , ყველაფერ ამის გადაფარვა არანაირად არ მოხდება, რადგან ეს არის ძირითადი, რაზეც პასუხი უნდა იყოს გაცემული“,-განაცხადა ადვოკატმა.

 

მიხეილ რამიშვილის თქმით, პროკურატურის მიმართ მათი მოთხოვნები უპასუხოდ არ დარჩება.

 

„მცდელობაა, რომ არჩევნების პერიოდში რაღაც გარკვეულ ვერსიებზე იმუშაონ. ვერსიები მრავალია, მაგრამ არაფერი გაკეთებულა. ისევ და ისევ დასადგენია და ექსპერიმენტებია ჩასატარებელი. ამის გადაფარვა ემსახურება მხოლოდ და მხოლოდ ერთს, რომ მოხდეს „ჩაფარცხვა“ და იმ მოთხოვნების იგნორირება, რაც ოჯახს აქვს, რაც ობიექტური შეჭმარიტების დადგენას სჭირდება. დანარჩენი არის ფარსი, რაც რეაგირების, პასუხისმგებლობის და პასუხის მოთხოვნის გარეშე არ დარჩება პროკურატურის მიმართ“,-განაცხადა რამიშვილმა.

 

ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.

ბაჩალიაშვილების ოჯახის ადვოკატი, მიხეილ რამიშვილი ამბობს, რომ დავით ფურცხვანიძის მიერ მიწოდებული ფოტოები მან პროკურატურას გადასცა, არა მტკიცებულების, არამედ, ინფორმაციის სახით.

 

გარდა ამისა, რამიშვილი ფიქრობს, რომ საქმესთან დაკავშირებული წყაროს დაკავება მიუღებელია, რადგან ყველას აქვს უფლება, პროკურატურას გადასცეს ინფორმაცია - თუნდაც ის გაყალბებული იყოს.

 

,,სამართლებრივად ფურცვანიძეს მტკიცებულება არ გაუყალბებია. მე გამოძიებას მხოლოდ ინფორმაცია მივაწოდე სატელიტური ფოტოების სახით. გაყალბების შემთხვევაშიც კი, მასალებს გამოძიებისთვის ხელი არ შეუშლია. პროკურატურა ცრუობს, - ამბობს ადვოკატი "მთავარი არხის" გადაცემაში "დღის სტუმარი"

 

ამასთან, მიხეილ რამიშვილმა "მთავარი არხის" საშუალებით პროკურატურას მოუწოდა, ნუ იქნებიან მკვლელების მფარველები და "ობიექტურად გამოიძიონ მხოლოდ ის, რაც ევალებათ".

 

შეგახსენებთ, რომ დღეს დავით ფურცვანიძეს ბრალი საქართველოს სისხლის სამართლის კოდექსის 369-ე პრიმა მუხლის პირველი ნაწილით და ამავე კოდექსის 370-ე მუხლის მეორე ნაწილით წარედგინა, რაც მტკიცებულებათა ფალსიფიკაციასა და პირადი მოტივით მართლმსაჯულებისათვის ხელის შეშლას გულისხმობს. დანაშაული 2-დან 6 წლამდე პატიმორობას ითვალისწინებს.

 

ცნობისთვის, საქმე ეხება სატელიტის ფოტოებს, რომლებზეც პროკურატურა აცხადებს, რომ დამონტაჟებული და ყალბია. ბაჩალიაშვილების ოჯახის ადვოკატს, მიხეილ რამიშვილს ფოტოები დავით ფურცხვანიძემ მიაწოდა. ფურცხვანიძე აცხადებს, რომ ბაჩალიაშვილის საქმე დიდი საერთაშორისო აფიორის ნაწილია და ის "შორს შეტოპვის" გამო მოიშორეს.

 

ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი თეთრიწყაროს ტყეში, საკუთარ მანქანაში გარდაცვლილი იპოვეს.

ექსკლუზიური

არქივი

« « » » ოქტომბერი 2019
ორშ სამ ოთხ ხუთ პარ შაბ კვი
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31

ამინდი

Tbilisi

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?