Global Press

Georgia

Global PressGlobal PressGlobal PressGlobal Press

USD
2.8265
EUR
3.0515
RUR
0.0443
GBP
3.6405

აშშ „სამი ზღვის ინიციატივაში“ შემავალ ევროპულ სახელმწიფოში ენერგეტიკის განვითარებაზე მილიარდ დოლარს გამოყოფს. ამის შესახებ Associated Press-ი წერს.

 

გამოცემის ინფორმაციით, შესაბამისი განცხადება მიუნხენის უსაფრთხოების კონფერენციაზე აშშ-ის სახელმწიფო მდივანმა მაიკ პომპეომ გააკეთა.

 

„ჩვენი მიზანია გავაცოცხლოთ კერძო სექტორების ინვესტიციები ამ სახელმწიფოების ენერგეტიკაში“, - განაცხადა პომპეომ და დასძინა, რომ ამგვარად ევროპის დამოკიდებულება რუსეთის ენერგომატარებლებზე შემცირდება.

 

„სამი ზღვის ინიციატივა“ ევროკავშირის 12 სახელმწიფოს აერთიანებს: ავსტრიას, ბულგარეთს, უნგრეთს, ლატვიას, ლიტვას, პოლონეთს, რუმინეთს, სლოვაკეთს, სლოვენიას, ხორვატიას, ჩეხეთს და ესტონეთს.

„ეიპიემ ტერმინალს ფოთი“ აგრძელებს ღრმაწყლოვანი პორტის მშენებლობის პროექტზე აქტიურ მუშაობას , - ამის შესახებ „ეიპიემ ტერმინალს ფოთის” მიერ გავრცელებულ განცხადებაშია აღნიშნული.

 

„ეიპიემ ტერმინალს ფოთში” იმედს გამოთქვამენ, რომ ყველა საჭირო ნებართვას დროულად მიიღებენ და 2022 წლის მეორე კვარტლის ბოლოს ღრმაწყლოვანი პორტის მშენებლობის პირველი ფაზა დასრულდება.

 

კომპანიის განცხადებით, “ეიპიემ ტერმინალსი“ მიჰყვება ახალი ღრმაწყლოვანი პორტის განვითარების გეგმას პირველ ფაზაში 250 მილიონ დოლარზე მეტი კერძო კაპიტალის და მეორე ფაზაში დამატებით სოლიდური მოცულობის თანხის ინვესტირებით, ნავსადგურის ინფრასტრუქტურისა და ტექნიკური ბაზის მასშტაბური განვითარებისათვის.

 

„აღნიშნული ინვესტიცია სტრატეგიულად მნიშვნელოვან ფოთის საზღვაო ნავსადგურში არის ნათელი მაგალითი ჩვენი ერთგულებისა და რწმენისა საქართველოს, როგორც ქვეყნისა და ცენტრალური აზიის მიმართულებით სატრანსპორტო კორიდორის განვითარების ძალისხმევისადმი. ნავსადგურის გაფართოების პროექტი, რომლის ხარჯიც უმნიშვნელოა ქართველი გადასახადების გადამხდელებისათვის, იქნება ქვეყნისა და რეგიონის ეკონომიკის განვითარების საწინდარი, შესთავაზებს რა ჩვენს მომხმარებლებს საუკეთესო ლოგისტიკურ მომსახურებებს და გამოიყენებს მსოფლიო დონის კომპანიის გამოცდილებასა და რესურსებს, ასევე, შექმნის ათასზე მეტ დამატებით სამუშაო ადგილს და სხვადასხვა ბიზნეს შესაძლებლობას ნავსადგურსა თუ მის გარეთ“, - განმარტავს კელდ ქრისტენსენი, „ეიპიემ ტერმინალს ფოთის“ გენერალური დირექტორი.

 

კომპანიის განცხადებით, ფოთის საზღვაო ნავსადგურის გაფართოების გეგმა, რომელიც საქართველოს მთავრობას წარედგინა, მოიცავს მშენებლობისა და განვითარების ორ ეტაპს. პირველი ეტაპი გულისხმობს 1,700 მეტრი სიგრძის მოლოსა და მრავალფუნქციური ნავმისადგომის მოწყობას ზომებით 400მ. [სიგრძე] - 13.5მ. [სიღრმე]. აღნიშნულ ნავმისადგომს შეეძლება 9,000 TEU-მდე მოცულობის გემების მიღება და ის შექმნის ნაყარი ტვირთებისა და დამატებით 150,000 TEU-ს დამუშავების შესაძლებლობას. მეორე ეტაპით გათვალისწინებულია 300 მეტრი სიგრძის საკონტეინერო ნავმისადგომის აშენება, რომელზეც 3 თანამედროვე STS (გემი-ნავმისადგომი) ტიპის ამწე განთავსდება. აღნიშნული ინფრასტრუქტურის წყალობით გაორმაგდება ფოთის საზღვაო ნავსადგურის საკონტეინერო გამტარუნარიანობა და გადააჭარბებს 1 მილიონ TEU-ს წელიწადში.

 

„დარწმუნებული ვართ მთავრობის მხარდაჭერაში და გავაგრძელებთ ჩვენს თანამშრომლობას ოფიციალურ სტრუქტურებთან, რათა ფოთის საზღვაო ნავსადგურმა შეინარჩუნოს კავკასიისა და მის მიღმა მდებარე რეგიონის სატრანსპორტო კარიბჭის სტატუსი“ ,- დასძინა კელდ ქრისტენსენმა.

 

მშენებლობის სავარაუდო ვადები განისაზღვრება 24-30 თვით, რაც მოითხოვს მჭიდრო თანამშრომლობას საქართველოს მთავრობასთან და მათ მხარდაჭერას, რათა ყველა საჭირო ნებართვა მიღებულ იქნას დროულად. და თუ ეს ასე იქნება, რისი მოლოდინიც გვაქვს, პროექტის პირველი ფაზა დასრულდება 2022 წლის მეორე კვარტლის ბოლოს.

 

მათივე ინფორმაციით, “ეიპიემ ტერმინალსი“, “ეი. პი. მოლერ–მერსკის“ ჯგუფის წევრი გლობალური კომპანიაა, რომელიც მსოფლიოში წარმოდგენილია 74 მოქმედი პორტების და ტერმინალების ქსელით და 117 სახმელეთო მომსახურების ოპერაციებით, რომელსაც 58 ქვეყანაში ახორციელებს. „მერსკი“ საქართველოში წარმოდგენილია 1994 წლიდან, როცა მისი შვილობილი კომპანია „სილენდი“ (SeaLand) პირველად ჩაერთო ფოთის საზღვაო ნავსადგურის გავლით ჰუმანიტარული ტვირთების გადაზიდვაში.

შოკოლადის მწარმოებელი ცნობილი შვეიცარიული კომპანია Camille Bloch-ი საქართველოში თხილის პლანტაციებს გააშენებს, ქართულ თხილს კი პროდუქტ “რაგუსას” წარმოებაში გამოიყენებს,. საინვესტიციო პროექტის განხორციელების დეტალებზე საქართველოს პრემიერ-მინისტრმა გიორგი გახარიამ და კომპანიის აღმასრულებელმა დირექტორმა დანიელ ბლოხმა დავოსში გამართული შეხვედრისას ისაუბრეს.

 

როგორც „გლობალპრესს“ საქართველოს მთავრობის პრესსამსახურიდან აცნობეს, Camille Bloch-მა უკვე დაარეგისტრირა კომპანია საქართველოში და მოიძია 651 ჰეტრამდე მიწის ნაკვეთი ლაგოდეხის მუნიციპალიტეტში. აღსანიშნავია, რომ კომპანიის მიზანია თხილის კულტივაცია ახალი ტექნოლოგიის გამოყენებით განახორციელოს, რასაც, კომპანიის ცნობით, გაზრდილი პროდუქტიულობა, მცენარის გამძლეობისა და მოსავლიანობის ზრდა მოჰყვება. ინვესტიციის ფარგლებში კომპანია 40-მდე ადამიანის დასაქმებას გეგმავს, ასევე აპირებს დასაქმებულთა გადამზადებას და ნოუ ჰაუს გავრცელებას თხილის სხვა მწარმოებლებისთვის.

 

პრემიერმა აღნიშნა, რომ მთავრობა მზად არის, მხარი დაუჭიროს საქართველოში კომპანიის წარმომადგენლობის ან საწარმოს გახსნას, რაც ხელს შეუწყობს სოფლის მეურნეობის სექტორში მაღალტექნოლოგიური წარმოების განვითარებას.

 

შოკოლადის მწარმოებელი ცნობილი შვეიცარიული კომპანია Camille Bloch-ი, რომელსაც არსებობის 90-წლიანი ისტორია აქვს, წლიურად 3 700 ტონა შოკოლადს აწარმოებს, რომლის მეოთხედი ექსპორტზე გადის. კომპანიის წლიური შემოსავალი 45 მილიონ აშშ დოლარს აღემატება.

საქართველოს მთავრობის გადაწყვეტილებით, საჯარო სამართლის იურიდიული პირი (სსიპ) ანაკლიის ღრმაწყლოვანი ნავსადგურის განვითარების სააგენტო ეკონომიკისა და მდგრადი განვითარების სამინისტროს დაქვემდებარებაში გადადის. აღნიშნულ ინფორმაციას ინფრასტრუქტურის სამინისტრო ავრცელებს.

 

სააგენტო 2017 წლის 23 მარტს შეიქმნა და მისი ფუნქცია საქართველოს მთავრობასა და შპს „ანაკლიის განვითარების კონსორციუმს“ შორის 2016 წლის 3 ოქტომბერს გაფორმებული ანაკლიის ღრმაწყლოვანი ნავსადგურის მშენებლობის, ოპერირებისა და გადმოცემის (BOT) შესახებ საინვესტიციო ხელშეკრულების მონიტორინგი, ანუ ინვესტორის მიერ სახელმწიფოს წინაშე ხელშეკრულებით აღებული ვალდებულებების შესრულების ზედამხედველობა იყო.

 

„სააგენტო განიხილავდა და ათანხმებდა ინვესტორის სადამფუძნებლო სტრუქტურის ცვლილების საკითხებს, ინვესტორის კონტრაქტორების, ტერმინალის ოპერატორების, გამსესხებლების და მათთან დასადები ხელშეკრულებების პროექტებს, მონაწილეობდა მოლაპარაკებებში, სწავლობდა ინვესტორის მიერ წარმოდგენილი ანგარიშებისა და ვალდებულებების შესრულების დამადასტურებელ ინფორმაციას და სხვა.

 

საქართველოს მთავრობამ შპს „ანაკლიის განვითარების კონსორციუმთან“ გაფორმებული საინვესტიციო ხელშეკრულება, კონსორციუმის მიერ ვალდებულებების შეუსრულებლობის გამო, 2020 წლის 9 იანვარს შეწყვიტა. შესაბამისად, დღის წესრიგში დადგა ანაკლიის პორტის პროექტისათვის ახალი ინტერესთა გამოხატვის წინადადების შემუშავების საკითხი.

 

იმისათვის, რომ სსიპ ანაკლიის ღრმაწყლოვანი ნავსადგურის განვითარების სააგენტომ დაიწყოს მუშაობა ანაკლიის პორტის პროექტის საინვესტიციო წინადადების შემუშავებაზე, მის ძირითად საქმიანობად, საინვესტიციო ხელშეკრულების მონიტორინგის ნაცვლად, განისაზღვრა ანაკლიის ღრმაწყლოვანი ნავსადგურის განვითარების პროექტის განხორციელება და მასთან დაკავშირებული ღონისძიებების კოორდინაცია.

 

ახალი დებულების მიხედვით, სააგენტო იმუშავებს ანაკლიის ღრმაწყლოვანი ნავსადგურის განვითარების პროექტის ინტერესთა გამოხატვის პირობების შემუშავებასა და გამოცხადებაზე, პოტენციურ ინვესტორთა მოსაზიდად საჭირო კვლევების განახლებასა თუ ჩატარებაზე, პროექტის შესახებ ინფორმაციის გავრცელებაზე, საერთაშორისო საფინანსო ინსტიტუტებთან კოორდინაციასა და კანდიდატთა შერჩევაზე.

 

ახალი ფუნქციის სათანადოდ შესრულების მიზნით, სახელმწიფო კონტროლს ანაკლიის განვითარების სააგენტოს საქართველოს ეკონომიკისა და მდგრადი განვითარების სამინისტრო გაუწევს, რომელიც საინვესტიციო წინადადებების შემუშავების, ინვესტიციების მოზიდვისა და დაინტერესების მიმართულებით ყველაზე მაღალი კომპეტენციისა და გამოცდილების მქონე უწყებაა“, - ნათქვამია სამინისტროს მიერ გავრცელებულ ინფორმაციაში.

საქართველოს პრემიერ-მინისტრი გიორგი გახარია დავოსის მსოფლიო ეკონომიკური ფორუმის ფარგლებში, ეკონომიკური თანამშრომლობისა და განვითარების ორგანიზაციის (OECD) გენერალურ მდივან ანხელ გურიას შეხვდა. ამის შესახებ „გლობალპრესს“ საქართველოს პრემიერ-მინისტრის პრესსამსახურიდან აცნობეს.

 

მათივე ინფორმაციით, საუბრისას აღინიშნა, რომ საქართველოს ორგანიზაციასთან შესანიშნავი თანამშრომლობა აკავშირებს.

 

პრემიერმა განაცხადა, რომ მთავრობა აფასებს OECD-ის წვლილს რეფორმების დღის წესრიგში, მცირე და საშუალო საწარმოების მხარდაჭერის, საინვესტიციო პოლიტიკის, საგადასახადო, გარემოსდაცვითი საკითხების მიმართულებით.

 

გიორგი გახარია ასევე მიესალმა ორგანიზაციის მიერ საქართველოს ეკონომიკისა და მდგრადი განვითარების სამინისტროსადმი 2016-2020 წლებისთვის მცირე და საშუალო საწარმოები განვითარების სტრატეგიის შექმნის პროცესში მხარდაჭერას და აღნიშნა, რომ იგეგმება მცირე და საშუალო საწარმოების ახალი სტრატეგიის შემუშავება 2021-2025 წლებისთვის, რომელიც ევროკავშირის პრინციპებთან სრულ შესაბამისობაში იქნება.

 

OECD-ის გენერალურმა მდივანმა დადებითად შეაფასა საქართველოში მიმდინარე რეფორმები და აღნიშნა, რომ საქართველოს აქვს შესაძლებლობა, გახდეს სხვადასხვა კომიტეტის წევრი და თავად მიიღოს მონაწილეობა პოლიტიკის სხვადასხვა მიმართულებით სტანდარტების შემუშავებისა და დადგენის პროცესში.

 

ანხელ გურიას განცხადებით, OECD-ი მხარს დაუჭერს საქართველოს საექსპორტო საკრედიტო რეიტინგის გაუმჯობესების პროცესში. მისი განმარტებით, ორგანიზაცია მზადაა, შექმნას პლატფორმა, რომელიც საქართველოს დაეხმარება, უკეთ გააცნოს გადაწყვეტილების მიმღებ მხარეებს ქვეყანაში მიმდინარე იმ რეფორმების პოზიტიური შედეგები, რომელიც მნიშვნელოვანწილად იქნება გათვალისწინებული რეიტინგის შეფასების პროცესში.

 

“ეკონომიკური თანამშრომლობისა და განვითარების ორგანიზაციასა და საქართველოს შორის არსებული თანამშრომლობა საკმაოდ ძლიერია. ჩვენ ვთანამშრომლობთ მცირე და საშუალო ზომის საწარმოების, საინვესტიციო, მწვანე ეკონომიკის, მდგრადობის, პროდუქტიულობის გაზრდის საკითხებზე. ძალიან გვახარებს ეს ყველაფერი. საქართველო მეტად აპირებს ჩვენი უწყების პროგრამებში და კომიტეტების მუშაობაში მონაწილეობას. საგადასახადო საკითხებზეც ვისაუბრეთ. ჩვენ ერთობლივად ვახორციელებთ საერთაშორისო დაბეგვრის ინიციატივას, განსაკუთრებით კი გაციფრულებული დაბეგვრისა და კონტროლის საერთაშორისო პროგრამას. აქამდე საქართველო ძალიან აქტიურად მონაწილეობს ყველა ამ ინიციატივაში, როგორც სამუშაო ჯგუფების, ასევე მმართველი საბჭოს ფორმატში. საერთო ჯამში, საქართველოსთან ძალიან აქტიურად ვთანამშრომლობთ და მზად ვართ უფრო მეტი ვაკეთოთ ერთად”, - აღნიშნა ანხელ გურიამ.

გლობალური კომუნიკაციების სფეროში ერთ-ერთი უმსხვილესი ბრიტანული სტარტაპ კომპანია OneWeb-ი საქართველოში სატელიტური ქსელის მომსახურებისთვის სპეციალური სადგურის მოწყობით არის დაინტერესებული, რომლითაც რეგიონს დაფარავს, - ამის შესახებ საქართველოს პრემიერ-მინისტრ გიორგი გახარიას და OneWeb-ის აღმასრულებელი დირექტორის ადრიან სტეკელის შეხვედრისას აღინიშნა, რომელიც დავოსის მსოფლიო ეკონომიკური ფორუმის ფარგლებში გაიმართა.

 

საქართველოს მთავრობის ადმინისტრაციის ინფორმაციით, კომპანიის საქმიანობის ძირითადი სფეროა ფართოზოლოვანი ინტერნეტ ქსელის ოპერირება გლობალური კოსმოსური სატელიტური ქსელის საშუალებით.

 

„ შეხვედრაზე განიხილეს საქართველოსა და OneWeb-ს შორის თანამშრომლობის შესაძლებლობები კომპანიის ძირითადი პროექტის პირველი ფაზის ფარგლებში, რომელიც მიზნად ისახავს სხვადასხვა ქვეყანაში სატელიტური ქსელის მოსახურებისთვის სპეციალური სადგურის მოწყობას, რაც უწყვეტი და ყველასთვის ხელმისაწვდომი ინტერნეტის ერთ-ერთი ძირითადი კომპონენტია.

 

 

კომპანიის წარმომადგენლების მხრიდან დაფიქსირდა მნიშვნელოვანი ინტერესი საქართველოს ტერიტორიაზე მსგავსი სადგურის მოწყობასთან დაკავშირებით, რაც, მათი შეფასებით მნიშვნელოვანწილად განაპირობა ქვეყანაში არსებულმა კარგმა საინვესტიციო გარემომ, ქვეყნის სტრატეგიულმა მდებარეობამ, რაც საქართველოს ხელს უწყობს, იყოს რეგიონული ჰაბი. კომპანიამ გამოთქვა მზაობა საქართველოს მთავრობასთან უფრო აქტიური თანამშრომლობისთვის, რომლის შედეგადაც ქვეყანაში განახორციელებს ინვესტიციას სადგურის მოწყობისა და შესაბამისი თანამედროვე ტექნოლოგიების დანერგვისთვის.

 

გლობალური სტარტაპი უკვე თანამშრომლობს საქართველოს კერძო სექტორთან, კერძოდ, კომპანია “სილქნეტთან”. შესაბამისი მემორანდუმი OneWeb-სა და “სილქნეტს” შორის საქართველოს პრემიერ-მინისტრთან შეხვედრის შემდეგ გაფორმდა.

 

ბრიტანული კომპანია OneWeb-ის საწყისი კაპიტალი შეადგენს 6 მილიარდ აშშ დოლარს და იგი ოპერირებს ევროპისა და აშშ-ის ბაზრებზე. კომპანია ორიენტირებულია, განახორციელოს სატელიტური ქსელის სწრაფი გაფართოება და შესაბამისი სადგურების მშენებლობა ევროპისა და აზიის სხვადასხვა ქვეყანაში”,-აღნიშნულია მთავრობის ადმინისტრაციის მიერ გავრცელებულ ინფორმაციაში.

აშშ-ი მზად არის ბელარუსი ნავთობით მოამარაგოს, - ამის შესახებ მინსკში ვიზიტით ყოფნისას შეერთებული შტატების მდივანმა მაიკ პომპეომ ქვეყნის საგარეო საქმეთა მინისტრთან ვლადიმერ მაკეისთან შეხვედრის დროს განაცხადა. ინფორმაციას Reuters-ი ავრცელებს.

 

„შეერთებულ შტატებს ბელარუსის სუვერენული სახელმწიფოს აშენებაში დახმარება სურს. ენერგიის ჩვენი მწარმოებლები მზად არიან 100%-ით მოგამარაგოთ საჭირო ნავთობით კონკურენტულ ფასად. თქვენი ქვეყნის აყვავება და უსაფრთხოება მხოლოდ ერთ პარტნიორზე არ უნდა იყოს დამოკიდებული“, - განაცხადა პომპეომ.

 

მისივე თქმით, უახლოეს დროში ვაშინგტონი ბელარუსში ახალ ელჩს დანიშნავს.

 

მანამდე კი სახელმწიფო მდივანი ბელარუსის პრეზიდენტ ალექსანდრ ლუკაშენკოს შეხვდა, რომელმაც ვიზიტისთვის მადლობა გადაუხადა.

 

„ძალიან კარგია, რომ ბელარუსის და აშშ-ის ურთიერთობაში არსებული სხვადასხვა უსაფუძვლო გაუგებრობის მიუხედავად, მინსკში ჩამოსვლა და ჩევნი ქვეყნის დათვალიერება გადაწყვიტეთ“, - თქვა ლუკაშენკომ. მან ასევე ბელარუსში დიქტატურის შესახებ იხუმრა: „ჩვენი დიქტატურა განსხვავებულა, შაბათ-კვირას ყველა ისვენებს, პრეზიდენტი კი მუშაობს“.

 

მაიკ პომპეო ბელარუსში 1-ელ თებერვალს ჩავიდა და ქვეყანას დღის ბოლომდე დატოვებს.

ქუთაისის ელექტრომობილების ქარხანა პირველ ელექტრომობილს მიმდინარე წლის აგვისტოში გამოუშვებს, - ამის შესახებ სახელმწიფო რწმუნებულმა იმერეთში ზვიად შალამბერიძემ განაცხადა.

 

მისი თქმით, ადგილზე უნდა მოხდეს სათადარიგო ნაწილების წარმოებაც.

 

"ელექტრომობილები, რომელსაც ქუთაისის ქარხანა აწარმოებს, გავა ექსპორტზე, ასევე მოემსახურება ადგილობრივ ბაზარს და დარწმუნებული ვარ, ძალიან პოპულარული იქნება. წარმოება იქნება ისეთი, რომ ქართული ბაზარი არ ეყოფა, დასრულებიდან პირველ ეტაპზე წარმოებული იქნება 5000 ელექტრომობილი, თუმცა შემდეგ ეტაპზე ეს რიცხვი უკვე 40 ათასამდე უნდა გაიზარდოს. ჩვენ აქ მხოლოდ აწყობას არ ვგეგმავთ, ადგილზე უნდა მოხდეს სათადარიგო ნაწილების წარმოებაც. ეს არის ჩინური ბრენდი და გამოვუშვებთ იგივე მანქანებს იგივე სტანდარტებით. ძალიან დიდი მოლოდინები გვაქვს, რადგან ამ ეტაპზე დასაქმებულია 300 ადამიანი, თუმცა ეს გაიზრდება 3000-მდე. ამ ქარხნის მშენებლობის დასრულებას რეგიონის მოსახლეობა ელოდება, იმიტომ, რომ დასაქმდნენ. ვფიქრობთ, რომ პირველი ელექტრომობილი გამოვუშვათ აგვისტოში, გარდა ამისა, ცალკე იქნება აკუმულატორების ქარხანა, ცალკე იქნება ყველა ელექტროობის წარმოების ხაზები, რომელიც მოგვცემს საშუალებას, რომ მთლიანად ავაწყოთ ქუთაისში ელექტრომობილი. ეს ყველაფერი რა თქმა უნდა, დიდ მოგებას მოუტანს არა მარტო ქუთაისს, არამედ მთელ საქართველოს და ყველაზე დიდი პლუსი არის ის, რომ ეკოლოგიურად იქნება ძალიან მომგებიანი", - განაცხადა შალამბერიძემ.

ჩვენი ერთ-ერთი მთავარი მიმართულებაა, ხელი შევუწყოთ ახალი გენერაციის ობიექტების მშენებლობას. დღეს ჩვენს ენერგეტიკულ სისტემას შეემატება კიდევ ერთი მასშტაბური ობიექტი, ესაა „გარდაბანი 2“, კომბინირებული ციკლის 230 მეგავატიანი თბოსადგური, - ამის შესახებ ეკონომიკისა და მდგრადი განვითარების მინისტრმა ნათია თურნავამ „გარდაბნის თბოელექტროსადგური 2“-ის ოფიციალური გახსნის ცერემონიალზე განაცხადა.

 

თურნავა აცხადებს, რომ თბოსადგური ძალიან მნიშვნელოვანი ობიექტია, რომელიც უზრუნველყოფს საქართველოს ენერგოუსაფრთხოებას მოსახლეობის, ბიზნესის უწყვეტი ენერგომომარაგებით.

 

„ეს არის ახალი ტექნოლოგიით შესრულებული თბოსადგური და არის ორჯერ უფრო ეფექტური ვიდრე ძველი, ე.წ. ღია ციკლის თბოსადგურები. იცით, რომ ენერგეტიკა არის ჩვენი ეკონომიკური პოლიტიკის ერთ-ერთი პრიორიტეტი. გვაქვს მაღალი ეკონომიკური ზრდა, რაც დღის წესრიგში აყენებს ენერგეტიკული რეფორმის და ამ დარგის ძირეული გარდაქმნის აუცილებლობას. საქართველოს პრემიერ-მინისტრის თაოსნობით და დავალებით, ჩვენ ეს რეფორმა 2019 წელს დავიწყეთ. შევიმუშავეთ და დავამტკიცეთ ახალი, ევროპული ტიპის კანონმდებლობა. შევქმენით ღია, კონკურენტული ენერგეტიკული ბაზარი, დავაფუძნეთ ენერგეტიკული ბირჟა“, - აღნიშნა თურნავამ.

 

მინისტრის თქმით, პრიორიტეტად რჩება განახლებადი ენერგიის ათვისება და 2020 წელი ამ მხრივ გამორჩეულია.

 

მან ასევე ხაზი გაუსვა ახალი თბოსადგურების მშენებლობის მნიშვნელობას, რაც თურნავას თქმით, სისტემის მდგრადობას უზრუნველყოფს.

 

„ესაა ჩვენი რეზერვი, რაც სისტემის მდგრადობას უზრუნველყოფს. მაგალითისთვის, მხოლოდ ამ თბოსადგურს, შეუძლია თბილისის საშუალო თვიური მოხმარების 70%-ის დაფარვა“,-განაცხადა თურნავამ.

 

ცნობისთვის, გარდაბანში, უკვე არსებული თბოელექტროსადგურების კომპლექსის ტერიტორიაზე განლაგებული 230 მგვტ დადგმული სიმძლავრის მქონე თბოელექტროსადგურის მშენებლობაში საქართველოს ნავთობისა და გაზის კორპორაციამ 185 მილიონამდე აშშ დოლარის ინვესტიცია განახორციელა.

 

თბოსადგურის მშენებლობა 2018 წლის თებერვალში დაიწყო.

Brent-ის მარკის ნავთობი რეკორდულად გაიაფდა. ლონდონის საფონდო ბირჟაზე ბარელზე ფასი ბოლო ვაჭრობისას $33,93-მდე დაეცა. ნავთობზე ფასი ერთ დღეში 2,45%-ით შემცირდა. ბოლოს ნავთობის ფასი მინიმუმზე 2019 წლის აგვისტოში დაფიქსირდა და ბარელზე $56 შეადგინა.

 

მანამდე 2020 წლის იანვარში ცნობილი გახდა, რომ OPEK-ი სხდომის მოწვევას გეგმავდა, სადაც ნავთობის ექსპორტიორი ქვეყნების ორგანიზაცია ნავთობის ფასზე კორონავირუსის გავლენის საკითხის განხილვას გეგმავდა.

 

იანვარში ნავთობზე ფასი 10%-ით შემცირდა.

 

Brent-ის ტიპის ნავთობზე, 27 იანვარს ლონდონის ბირჟაზე ვაჭრობისას, ბარელზე ფასი $60 2019 წლის 1-ლი ნოემბრის შემდეგ პირველად ჩამოსცდა.

ამერიკული მულტინაციონალური საინვესტიციო ბანკი Citigroup-ი დაინტერესებულია საქართველოს ფინანსური ბაზრის განვითარების პროცესში ინვესტირებით და გამოთქვამს სურვილს, შეიძინოს საქართველოს ხაზინის მიერ გამოშვებული გარკვეული მოცულობის ფასიანი ქაღალდები, - ამის შესახებ კომპანიის ვიცე-თავმჯდომარე ჯეი კოლინსმა საქართველოს პრემიერ-მინისტრ გიორგი გახარიასთან შეხვედრისას განაცხადა, რომელიც დავოსის მსოფლიო ეკონომიკური ფორუმის ფარგლებში გაიმართა.

 

როგორც „გლობალპრესს“ საქართველოს პრემიერ-მინისტრის პრესსამსახურიდან აცნობეს, Citigroup-ი საქართველოს მთავრობასთან ერთად განიხილავს, ჩაერთოს საბიუჯეტო ხარჯების სააღრიცხვო და საანგარიშსწორებო სისტემის და საგადახდო სისტემის თანამედროვე ტექნოლოგიების გამოყენებით გაციფრულების პროცესში და ქართულ მხარეს საკუთარი გამოცდილება გაუზიაროს. კომპანიამ ასევე გამოთქვა სურვილი, მონაწილეობა მიიღოს 2021 წელს საქართველოს მთავრობის ევროში დენომინირებული ფასიანი ქაღალდების (500 მლნ ევროობლიგაციების) რეფინანსირების პროცესში.

 

“შესანიშნავი საუბარი შედგა საქართველოს პრემიერ-მინისტრთან. ეკონომიკაზე და ტექნოლოგიებზე, კონკრეტულად კი სამთავრობო სექტორში ოპერატიულობისა და ეფექტურობის მიზნით გამოყენებულ ტექნოლოგიებზე ვისაუბრეთ.

 

ასევე განვიხილეთ ინვესტიციები და ის გზები, რომლითაც საქართველოს შეეძლება მეტი კაპიტალდაბანდების მოზიდვა.

 

ვისაუბრეთ ასევე დაფინანსების სტრატეგიაზე და გლობალურ ბაზრებზე მიმდინარე პროცესების დაფინანსების საკითხებზე. საერთო ჯამში ბრწყინვალე შეხვედრა იყო. გვახარებს ყველაფერი, რაც საქართველოში ხდება”, - აღნიშნა ჯეი კოლინსმა პრემიერთან შეხვედრის შემდეგ.

 

საქართველოს პრემიერ-მინისტრის პრესსამსახურის ინფორმაციით, Citigroup-ი არის ამერიკული მულტინაციონალური საინვესტიციო ბანკი და ფინანსური სერვისების კორპორაცია, რომლის სათავო ოფისი ნიუ იორკში მდებარეობს. აშშ-ის უდიდეს ბანკებს შორის მესამე ადგილზეა. 200 მილიონზე მეტი მომხმარებელი ჰყავს და 160 ქვეყანაში ოპერირებს და კორპორაციებს, მთავრობებს, მომხმარებლებსა და ინსტიტუტებს ფინანსური სერვისების ფართო სპექტრს სთავაზობს. წლიური შემოსავალი 73 მილიარდ აშშ დოლარს აღწევს, 204 000 ადამიანი ჰყავს დასაქმებული.

აშშ-ს უსაფრთხოების ეროვნულმა სააგენტომ (NSA) Windows 10-ში მნიშვნელოვანი ხარვეზი აღმოაჩინა. ამის შესახებ ინფორმაციას BBC ავრცელებს.

 

ხარვეზის გამოყენებით სავარაუდოდ ჰაკერებს შეეძლოთ ისეთი მავნე პროგრამების შექმნა, რომლებიც ერთი შეხედვით შეიძლება ნორმალურ პროგრამებად იყოს აღქმული.

 

Microsoft-მა განაცხადა, რომ მათ უკვე იციან ის ხარვეზი, რომელსაც ჰაკერები იყენებდნენ. ამ ხარვეზის შესახებ დამატებითი ინფორმაცია აშშ-ს უსაფრთხოების ეროვნულმა სააგენტოს პრესკონფერენციაზე გაჟღერდა.

 

ჯერჯერობით უცნობია, თუ რამდენი ხნით ადრე იცოდა Microsoft-მა ამ პრობლემის შესახებ.

ევროკავშირი

არქივი

« « » » თებერვალი 2019
ორშ სამ ოთხ ხუთ პარ შაბ კვი
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?