Global Press

Georgia

Global PressGlobal PressGlobal PressGlobal Press

USD
2.9336
EUR
3.2487
RUR
0.0447
GBP
3.5602

ჩვენი პოლიტიკური გუნდი მზადაა, მიმდინარე სასესიო კვირის დასრულებისთანავე, დაიწყოს ფართო კონსულტაციები, საპარლამენტო და არასაპარლამენტო პოლიტიკურ პარტიებთან. ყველასთნ, ვინც მზად არის კონსტიტუციისა და კანონის უპირობო პატივისცემის ფარგლებში ეწეოდეს აქტიურ პოლიტიკურ საქმიანობას, - ამის შესახებ „ქართული ოცნების“ თავმჯდომარე ბიძინა ივანიშვილმა პრესკონფერენციაზე განაცხადა.

 

მისი თქმით, თუ 2020 წლის საპარლამენტო არჩევნები შერეული სისტემით ჩატარდა, მაღალი ალბათობით, „ქართული ოცნება“ თითქმის ყველა მაჟორიტარულ ოლქს მოიგებს, რითაც უკიდურესად შეამცირებს მრავალპარტიული პარლამენტის ფორმირების რესურსს.

 

„ეს შესაძლოა ემსახურებოდეს ჩვენს პარტიულ ინტერესს, მაგრამ ვეღარ პასუხობს ქვეყნის წინაშე არსებულ გამოწვევებს. კიდევე ერთი მიზეზი, რაც საფუძვლად დაედო ჩვენს დღევანდელ გადაწყვეტილებას არის ის მზარდი, გლობალური თუ ლოკალური ხასიათის, პოლიტიკური და ეკონომიკური გამოწვევები, რომლის წინაშეც დგას ჩვენი ქვეყანა და რომლებთანაც გამკლავებას სულ უფრო ხშირად დასჭირდება ფართო საზოგადოებრივი და პოლიტიკური კონსენსუსი, ერთიანობა და პასუხისმგებლობის გაზიარება, რაც მხოლოდ მაქსიმალურად პლურალისტურ გარემოშია შესაძლებელი; ამიტომ, ჩვენ გთავაზობთ, პროპორციულ საარჩევნო სისტემაზე გადასვლას. იმავდროულად, ნულზე ჩამოგვყავს, ანუ სრულად ვაუქმებთ დღეს არსებულ პროცენტულ ბარიერს და იმედი გვაქვს, რომ ამ გზით, 2020 წელს მივიღებთ პარლამენტს, სადაც თითქმის ყველა პოლიტიკური აქტორი და ამ ქვეყნის მთელი ინტელექტუალური პოტენციალი იქნება წარმოდგენილი. არავის დასჭირდება ვინმესთან მიკედლება, ხელოვნური გაერთიანება და ხშირად საკუთარ პრინციპებზე უარის თქმა, რათა თავისი წვლილი შეიტანოს ქვეყნის განვითარებასა და წინსვლაში. ჩვენი პოლიტიკური გუნდი მზადაა, მიმდინარე სასესიო კვირის დასრულებისთანავე, დაიწყოს ფართო კონსულტაციები, საპარლამენტო და არასაპარლამენტო პოლიტიკურ პარტიებთან. ყველასთნ, ვინც მზად არის კონსტიტუციისა და კანონის უპირობო პატივისცემის ფარგლებში ეწეოდეს აქტიურ პოლიტიკურ საქმიანობას“, - განაცხადა ივანიშვილმა.

აბსოლუტურად გააზრებული მაქვს ის დიდი შეცდომა, რომელიც დაუშვა ჩვენმა გუნდმა, - აღნიშნული შინაარსის განცხადება თბილისის მერმა და პარტია „ქართული ოცნების“ გენერალურმა მდივანმა კახი კალაძემ გააკეთა. ვიდეო მიმართვაში, რომელიც კალაძემ გაავრცელა, მან მიმოიხილა ბოლო ორი დღის განმავლობაში ქვეყანაში განვითარებული მოვლენები.

 

„ის, რაც ვნახეთ პარლამენტში, იყო ძალიან ცუდი სანახავი ყველასთვის. ჩვენი მხრიდან მაშინვე გაკეთდა რეაგირება, გაკეთდა ძალიან მკაფიო განცხადებები. თქვენ იცით ასევე, რომ პარლამენტის თავმჯდომარე ირაკლი კობახიძე იმყოფებოდა აზერბაიჯანში ოფიციალური ვიზიტით, მან ეს ვიზიტი შეწყვიტა და მეორე დღეს დაბრუნდა საქართველოში. თვითონ ფაქტი ძალიან მძიმე იყო და ამაზე სრული პასუხისმგებლობა ეკისრება ხელისუფლებას. მეც ვიზიარებ ამ პასუხისმგებლობას, რადგან ვარ იმ გუნდის წევრი, რომელიც დღეს ქეყნის სათავეშია და პარტია „ქართული ოცნება“ ჰქვია და აბსოლუტურად გააზრებული მაქვს ის დიდი შეცდომა, რომელიც დაუშვა ჩვენმა გუნდმა. მე ახლა არ დავიწყებ ახსნა - განმარტებების გაკეთებას, თუ ვისი ბრალი იყო, რატომ მოხდა, რატომ ჩატარდა სხდომათა დარბაზში ის სესია, რატომ იჯდა იმ კონკრეტულ სკამზე რუსი დეპუტატი. არ დავიწყებ არავისზე გადაბრალებას. ფაქტი, რომელიც მოხდა იყო ძალიან ცუდი და ჩვენი მხრიდან ჰქონდა ძალიან მკაცრი რეაგირება. პარლამენტის თავმჯდომარე დაბრუნდა თუ არა საქართველოში, მან მიიღო ღირსეული გადაწყვეტილება, გადადგა ღირსეული ნაბიჯი და დატოვა თანამდებობა. ასევე დატოვა დეპუტატის მანდატი იმან, ვინც უშუალოდ ორგანიზატორი იყო ამ ღონისძიების, ზაქარია ქუცნაშვილმა“, - განაცხადა კახა კალაძემ.

 

შეგახსენებთ, თბილისში მართლმადიდებლობის საპარლამენტთაშორისო ასამბლეის სესიის გამართვით გამოწვეული მოვლენების გამო, ირაკლი კობახიძემ პარლამენტის თავმჯდომარის თანამდებობა დატოვა, ხოლო ზაქარია ქუცნაშვილმა პარლამენტიდან წასვლის გადაწყვეტილება მიიღო.

რუსეთის პრეზიდენტმა ვლადიმირ პუტინმა მთავრობას დაავალა, მიიღოს ზომები საქართველოდან რუსეთის მოქალაქეების სამშობლოში დაბრუნების უზრუნველსაყოფად. ამის შესახებ პუტინის ბრძანებაშია ნათქვამი, რომელიც კრემლის საიტზე გამოქვეყნდა. ამავე ბრძანების თანახმად, საქართველოსთან ავიაგადაზიდვები 8 ივლისიდან დროებით იკრძალება. ბრძანების მიზანის რუსეთის მოქალაქეების უსაფრთხოების დაცვა.

 

ასევე, ბრძანების თანახმდა, ტუროპერატორებს ეძლევათ რეკომენდაცია, რომ აკრძალვის მოქმედების პერიოდში თავი შეიკავონ საქართველოსთან დაკავშირებით ტურისტული პროდუქტის რეალიზაციისგან.

ცხოვრებას თავისი კორექტივები შეაქვს ყველაფერში და ნებისმიერი პასუხისმგებლიანი მმართველი პოლიტიკური ძალის ვალია, იყოს ადეკვატური ქვეყნის წინაშე მდგარი გამოწვევებისა და რაც მთავარია, ესმოდეს საზოგადოების მაჯისცემა, - ამის შეასხებ პარტია „ქართული ოცნება დემოკრატიული საქართველოს“ თავმჯდომარემ, ბიძინა ივანიშვილმა გამართულ ბრიფინგზე განაცხადა.

 

როგორც ბიძინა ივანიშვილმა აღნიშნა, 2020 წლის საპარლამენტო არჩევნები, ჩატარდება პროპორციული სისტემით, ნულოვანი საარჩევნო ბარიერის პირობებში.

 

„პოლიტიკური გაერთიანება „ქართული ოცნება - დემოკრატიული საქართველო“, ფართომასშტაბიანი პოლიტიკური რეფორმის ინიციატივით გამოდის: 2020 წლის საპარლამენტო არჩევნები, ჩატარდეს პროპორციული სისტემით, ნულოვანი, ვიმეორებ, ნულოვანი საარჩევნო ბარიერის პირობებში. საზოგადოებას მოეხსენება, რომ სწორედ „ქართული ოცნება“ იყო იმ საკონსტიტუციო რეფორმის ინიციატორი, რომლის ფარგლებშიც გადაწყდა, რომ საპარლამენტო დემოკრატიის პირობებში, არჩევნების პროპორციული სისტემა, უკეთ პასუხობს ხელისუფლებაში მრავალპარტიული, და შესაბამისად, პლურალისტური პოლიტიკური წარმომადგენლობის ევროპულ სტანდარტს. თუმცა, იქვე დადგინდა, რომ ამ საარჩევნო სისტემაზე გადასვლა უფრო სწორი, 2024 წელს იქნებოდა, რადგან პარტიების გაძლიერებას, მათ კრისტალიზაციას ღირებულებების გარშემო, მეტ კონსოლიდაციას და კონკურენტუნარიანობის გაზრდას გარკვეული წლები კიდევ სჭირდებოდა. სწორედ ამიტომ განისაზღვრა, კონსტიტუციით გარანტირებული საარჩევნო რეფორმის ოპტიმალურ ვადად 2024 წელი, მითუმეტეს იმ პირობებში, როდესაც დღეს მოქმედი შერეული საარჩევნო სისტემა არის აბსოლუტურად დემოკრატიული, გამართული და აპრობირებულია არაერთ ტრადიციული დემოკრატიის ქვეყანაში. მაგრამ ცხოვრებას თავისი კორექტივები შეაქვს ყველაფერში და ნებისმიერი პასუხისმგებლიანი მმართველი პოლიტიკური ძალის ვალია, იყოს ადეკვატური ქვეყნის წინაშე მდგარი გამოწვევებისა და რაც მთავარია, ესმოდეს საზოგადოების მაჯისცემა“, - განაცხადა ბიძინა ივანიშვილმა.

ვცდილობ და ჩემი სიცოცხლის ბოლომდე ვეცდები, თქვენს გვერდით ვიდგე, - ასე მიმართა მალხაზ მაჩალიკაშვიმა პარლამენტის წინ მიმდინარე აქციაზე შეკრებილ ახალგაზრდებს.

 

როგორც მაჩალიკაშვილმა აღნიშნა, ის დღეს პარლამენტის წინ მებრძოლ ახალგაზრდებს, სულით გაუტეხავ ადამიანებს ხედავს.

 

„ძალიან მიყვარხართ ასეთები. თქვენი ყველა მოთხოვნა უნდა იყოს დაკმაყოფილებული. ამ ქვეყნის მომავალი თაობა ხართ, თქვენზე დგას საქართველო და არავის აქვს უფლება, თქვენ გადაგაბიჯონ! სახელმწიფოც, ხელისუფლებაც, მთავრობაც თქვენ ხართ. თქვენ ირჩევთ ხელისუფლებას, თქვენ ირჩევთ მთავრობას. შეგიძლიათ, გამოთქვათ თქვენი აზრი, სწორი და მართალი აზრი და ის უნდა იყოს გათვალისწინებული ყველგან და ყველაფერში. მეათე თვეა, ვებრძვი ამ უსამართლობას, აქ, კარვებში. წელიწადნახევარია, ჩემთვის დღევანდელ ხელისუფლებას არანაირი პასუხი არ აქვს. იმას ცდილობენ, რაღაც სიბინძურით, ტყუილით ადამიანებს რაღაც დააჯერონ. ამას მე არ დავუშვებ, თქვენთან და მხოლოდ თქვენთან ერთად! ამიტომ მე ყოველთვის მჯერა თქვენი გვერდში დგომის. ვცდილობ და ჩემი სიცოცხლის ბოლომდე ვეცდები, ვიდგე თქვენ გვერდით. ღმერთმა დაგლოცოთ და გაგაძლიეროთ, გააძლიეროს მთელი ქვეყანა და ერი. მადლობა ყველას გულით, რომ ხართ ასეთ სულით გაუტეხავი და მებრძოლი ადამიანები!“, - მიმართა მაჩალიკაშვილმა პარლამენტის წინ შეკრებილებს.

 

აქციის მონაწილეები მალხაზ მაჩალიკაშვილს მთელი გამოსვლის დროს ტაშს უკრავდნენ.

რუსეთის პრეზიდენტმა ვლადიმირ პუტინმა ხელი მოაწერა ბრძანებას, რომლის მიხედვითაც, საქართველოსთან ავიაგადაზიდვები 8 ივლისიდან იკრძალება. შესაბამისი ბრძანება კრემლის საიტზეა გამოქვეყნებული.

 

პუტინმა მინისტრთა კაბინეტს დაავალა, სამშობლოში დააბრუნონ რუსეთის ის მოქალაქეები, რომლებიც საქართველოში დროებით არიან. ასევე, დოკუმენტში არის რეკომენდაციები რუსულ ტუროპერატოებისთვის, რომლის მიხედვითაც, მათ საქართველოში ტურების გაყიდვისგან თავი უნდა შეიკავონ.

„დღეს, ყველა ვხედავთ, რომ საზოგადოება ცვლილებებს ითხოვს. ჩვენი ინიციატივა კი სწორედ ფართომასშტაბიანი პოლიტიკური ცვლილების საფუძველს იძლევა,” - ამის შესახებ პარტია „ქართული ოცნება - დემოკრატიული საქართველოს“ თავმჯდომარე ბიძინა ივანიშვილმა ბრიფინგზე განაცხადა. ამავდროულად, პარტიის თავმჯდომარე დარწმუნებულია, რომ დაისჯება ყველა, ვინც 20-21 ივნისს განვითარებული მოვლენებისას ძალას გადაამეტა.

 

„დღეს, ყველა ვხედავთ, რომ საზოგადოება ცვლილებებს ითხოვს. ჩვენი ინციატივა კი სწორედ ფართომასშტაბიანი პოლიტიკური ცვლილების საფუძველს იძლევა. იმავდროულად, საზოგადოებრივ მოთხოვნას უნდა მოჰყვეს, და დარწმუნებული ვარ მოჰყვება კიდეც, სამართლებრივი შედეგებიც. უნდა დაისაჯოს ის, ვინც მასობრივი ძალადობის ორგანიზება მოახდინა და ისიც, ვინც ძალას გადაამეტა. რაც შეეხება დღევანდელ პოლიტიკურ გადაწყვეტილებას, უპირველესი მიზეზი, რამაც ამისკენ გვიბიძგა, არის ჩვენი საზოგადოების და განსაკუთრებით, ახალგაზრდობის სურვილი და მზაობა, აქტიურად ჩაერთოს ქვეყნის მართვაში, და საკუთარ თავზე აიღოს პასუხისმგებლობა. საზოგადოების ამ სულისკვეთებასთან თანხვედრაშია ჩვენი პოლიტიკური გუნდის სურვილიც, ნებაყოფლობით ვთქვათ უარი იმ სასტარტო უპირატესობაზე, რაც შერეული საარჩევნო სისტემის პირობებში ბუნებრივად გააჩნია „ქართულ ოცნებას“, - განაცხადა ივანიშვილმა.

მინდა შეგახსენოთ, რომ გროზნოდან თბილისამდე სულ 200 კილომეტრია, - ჩეჩნეთის ხელმძღვანელის რამზან კადიროვის ტელეგრამში კომენტარს „რია ნოვოსტი“ ავრცელებს.

 

ჩეჩნეთის ხელმძღვანელი რამზან კადიროვი აცხადებს, რომ შეშფოთებით ადევნებს თვალს თბილისში მიმდინარე მოვლენებს.

 

„მინდა შეგახსენოთ, რომ გროზნოდან თბილისამდე სულ 200 კილომეტრია. რუსეთში, არაოფიციალური მონაცემებით, თითქმის მილიონი ქართველია. ჩვენ ხალხებს მეგობრობის და ერთიანობის საუკუნეობრივი კავშირი აქვთ“, - აცხადებს რამზან კადიროვი.

 

მან ივარაუდა, რომ ანტირუსი რადიკალების გამო ქართული პლაჟები, რესტორნები, კაფეები და სასტუმროები დაცარიელდება. კადიროვის აზრით, რუსებს და ქართველებს „ათასობით მიზეზი აქვთ მშვიდობიანი თანაცხოვრებისთვის და არც ერთი მიზეზი ერთმანეთის სიძულვილისათვის“.

ეუთოს წარმომადგენელი მედიის თავისუფლების საკითხებში ჰარლემ დეზირი გმობს თბილისში 20-21 ივნისს განვითარებული მოვლენებისას ძალადობის შემცველი ინციდენტებსა და არასათანადო მოპყრობას მედიის წარმომადგენლების მიმართ. მისი განცხადებით, ჟურნალისტების უსაფრთხოება ყოველთვის უზრუნველყოფილი უნდა იყოს.

 

ეუთოს ანგარიშის მიხედვით, 20 ივნისს, მედიის 30-ზე მეტმა წარმომადგენელმა „როიტერსიდან“, „რადიო თავისუფლების“ საქართველოს ბიუროდან, ტელეკომპანია „რუსთავი 2“-დან, Civil.ge-დან, ტელეკომპანია პირველი არხიდან, ტელეკომპანია TV Pirvelli-დან, Kavkazsky Uzel-იდან, Netgazeti.ge-დან, OC Media-დან, Maestro TV-დან, Adjara TV-დან და Interpressnews.ge-დან მიიღეს სერიოზული დაზიანებები, ძირითადად, სპეცრაზმის მიერ ნასროლი რეზინის ტყვიებისგან. მათ თავს დაესხნენ, დააკავეს ან მათი აღჭურვილობა დააზიანეს მაშინ, როცა ისინი აშუქებდნენ თბილისში მიმდინარე დემონსტრაციას.

 

„ვგმობ გუშინ ღამით თბილისში მიმდინარე დემონსტრაციისას მედია წარმომადგენლებზე ყველა სახის ძალადობასა და თავდასხმას, როგორც სერიოზულ დაბრკოლებას პლურალიზმისა და მედიის თავისუფლებისთვის. მედიას აქვს უფლება, გააშუქოს საჯარო ღონისძიებები და სამართალდამცავებმა პატივი უნდა სცენ ჟურნალისტების უფლებას, ყოველთვის თავისუფლად და უსაფრთხოდ გააშუქონ მოვლენები“, - განაცხადა დეზირმა.

 

მან აღნიშნა, რომ Civil.ge-ს ფოტოგრაფმა გურამ მურადოვმა რეზინის ტყვიებისგან ზურგში 11 ჭრილობა მიიღო, „რუსთავი 2“-ის რეპორტიორმა თამარ ბაღაშვილმა ძვლის მოტეხილობა მიიღო, გიორგი სულაშვილმა, რომელიც „რუსთავი 2“-ის გუნდისთვის უსაფრთხოებას უზრუნველყოფდა, თვალი დაკარგა და ყბის მოტეხილობა მიიღო.

 

„მოვუწოდებ საქართველოს ხელისუფლებას, დაუყოვნებლივ გამოიძიოს ჟურნალისტებთან მიმართებით ყველა ინციდენტი და კანონის ფარგლებში ყველა დამნაშავემ პასუხი აგოს. ასევე, მოვუწოდებ, მიიღონ ყველა სასწრაფო ზომა იმისათვის, რომ მომავალში ასეთი ინციდენტები არ განმეორდეს და ხელისუფლებამ მედია ორგანიზაციებთან ითანამშრომლოს საუკეთესო პრაქტიკაზე დაყრდნობით, რათა დემონსტრაციებისას ჟურნალისტების უსაფრთხოება უზრუნველყოფილი იყოს“, - აღნიშნულია განცხადებაში.

ხელისუფლება თანახმაა, საქართველოში 2020 წელს საპარლამენტო არჩევნები პროპორციული სისტემით გაიმართოს. ამის შესახებ „ქართული ოცნების“ ოფისში გამართულ ბრიფინგზე ბიძინა ივანიშვილმა განაცხადა.

 

პარლამენტთან მიმდინარე აქციის მონაწილეების ერთ-ერთი მთავარი მოთხოვნა სწორედ პროპორციული სისტემით 2020 წლის საპარლამენტო არჩევნების ჩატარება იყო.

 

"ქართული ოცნების" ოფისში დილიდან ჯერ პოლიტსაბჭოს წევრები შეიკრიბნენ, შემდეგ კი გაფართოებულ ფორმატში საპარლამენტო უმრავლესობის სხდომა გაიმართა.

 

უმრავლესობის სხდომაზე აქციის მონაწილეების მიერ წამოყენებული მოთხოვნები განიხილეს.

ბოდბელი ეპისკოპოსის იაკობ იაკობიშვილის განცხადებით, აპირებს, რომ სპეცრაზმელს, რომელიც ტყვიებს დამიზნებით ისროდა 20 ივნისის აქციაზე, პასუხი აგებინოს. როგორც მეუფე იაკობმა განაცხადა, ბევრი ადამიანისგან იცის, რომ სამივე დაშავებულს, რომლებმაც თვალი დაკარგეს, მხედველობა ამ სპეცრაზმელმა წაართვა.

 

„ეტყობა სპეციალური დანიშნულების რაზმი როცაა, დიდი ხანი ითმენდნენ და ეტყობა რაღაც პერიოდში ვეღარ მოითმინეს და ის რაღაცეებიც გააკეთეს, რისი ბრძანებაც არ ჰქონდათ. მე არავის გამოყვანა და „გაპრავება“ არ მინდა. მაგრამ ერთ რამეს ვუყურებდი. ის ადამიანი უნდა გადმოგვცენ ქართველებს, რომელიც ჟინით ესროდა. რაც დაფიქსირებულია. თავისიანმაც აუკრა თუ გახსოვთ. არ შეიძლება სახელმწიფომ ის ადამიანი დაიცვას. მე როგორც ვიცი, ის ადამიანი იყო „ნაციონალური მოძრაობის“ დროსაც სპეცდანიშნულების რაზმის წევრი, დიდი გადაცდომა მოუვიდა და ჩვენს პერიოდში, 1-ელი ოქტომბრის შემდეგ აღადგინეს და კი ვნახეთ, ისე ისროდა, თითქოს ირმებს ესროდა. ეს არ უნდა შერჩეს არავის. ეს არ არის არც მინისტრის, არც ვიღაცის დანაშაული. ყველგან არიან მანიაკები საერთოდ. მე მაგას მანიაკად მოვიხსენიებ. მოვძებნი და ვნახავ მაგას, თავისას მიიღებს. ვერ უშველის ის, რომ რაღაც სტრუქტურაშია გაწევრიანებული. მიპოვნიან და მომიყვანენ. თვალგამოთხრილი გოგო რასაც იტყვის, იმას მიიღებს თავიდან ბოლომდე. აცდეს სამართლებრივ ჩარჩოებს. სიტკბოებით ისროდა მაგ იარაღს. ბევრისგან ვიცი, რომ სამივეს მაგან წაართვა თვალის ჩინი. შეიძლება ეგ მსახურებდეს? სჯობს მე დავისაჯო და მაგან თავისი მიიღოს“, - განაცხადა მეუფე იაკობმა.

 

მისივე განცხადებით, მას ესმის ახალგაზრდების პროტესტი.

 

„ყველას ვუხდი დიდ ბოდიშს, იმ ადამიანებს, რომლებიც დაზარალდნენ რეზინის და კაუჩუკის ტყვიებისგან. რამდენიმემ დაკარგა მხედველობა და ბევრს ჯანმრთელობის პრობლემა შეექმნა. ვფიქრობ, უფრო ადვილად შეიძლებოდა დაშლა, თუნდაც წყლის ჭავლით და ცრემლსადენი გაზით და არ იქნებოდა საჭირო იმ რაღაცის გამოყენება, რომელიც ნებისმიერ ქართველს სინათლეს წაართმევდა. გუშინ რომ ვუყურებდი, შეიძლება რომ შეგეხედა ადამიანისთვის, კრიმინალად მოგენათლა, მაგრამ ჩემი ახალგაზრდობა მახსენდებოდა და ჩემი მეგობრების ახალგაზრდობა. ალბათ, უარესს ვიზამდი მე თვითონ და ჩემი მეგობრები. ძალის გადაჭარბების განცდა არ მაქვს. დაშლა შეიძლებოდა ადვილად და აღარ მობრუნდებოდნენ. რომ დასველდებოდნენ და თვალებიც აცრემლიანებული ექნებოდათ, ამდენჯერ აღარ მობრუნდებოდნენ საჩხუბრად. მე ახალგაზრდებს არ ვამტყუნებ, არც პოლიციას ვამტყუნებ, მაგრამ ვერასდროს ვერ გავიგებ იმას, რატომ ვესროლეთ რეზინის და კაუჩუკის ტყვიები, ამას ვერასდროს გავიგებ“, - განუცხადა ბოდბელმა ეპისკოპოსმა „ტვ პირველს“.

ყოფილი პრემიერ-მინისტრი გიორგი კვირიკაშვილი „ქართული ოცნების“ თავმჯდომარეს ბიძინა ივანიშვილს ვადამდელი საპარლამენტო არჩევნების ჩატარებას ურჩევს. საჯარო წერილში, რომელიც კვირიკაშვილმა სოციალურ ქსელში გამოაქვეყნა, ბიძინა ივანიშვილისადმი რჩევების ის პუნქტებია გამოყოფილი, რომელთა განხორციელების შემთხვევაში „ქართული ოცნება“ ქართველი ხალხის ნდობას შეინარჩუნებს. რჩევების ერთ-ერთ პუნქტში კვირიკაშვილი ივანიშვილს შინაგან საქმეთა მინისტრის გიორგი გახარიას თანამდებობიდან გადაყენებას სთავაზობს.

 

„შინაგან საქმეთა მინისტრმა უნდა ასევე აიღოს პასუხისმგებლობა გუშინ დაზიანებული ჩვენი შვილების და საზოგადოების წინაშე და დატოვოს თანამდებობა“, - ნათქვამია განცხადებაში.

 

ყოფილი პრემიერის მოსაზრებით პოლიტიკური კრიზისიდან გამოსასვლელად საჭიროა, საკონსტიტუციო ცვლილებების შემდეგ საპარლამენტო არჩევნების პროპორციული წესით ჩატარება. წერილში ასევე აღნიშნულია, რომ თავად გრძობს პასუხისმგებლობას და წუხს, რომ ეს ცვლილება მისი პრემიერობის დროს არ განხორციელდა.

 

„საკანონმდებლო (ან საკონსტიტუციო) ცვლილება, რომელიც სხვა დანარჩენ ვალდებულებებთან ერთად, როგორიცაა გადასახადების გადახდა და ა.შ., სავალდებულოს გახდის საქართველოს მოქალაქის არჩევნებში მონაწილეობას (ადამიანის უფლებების ზოგიერთი დამცველი, შესაძლოა, ეწინააღმდეგებოდეს ამ იდეას, თუმცა ეს კონცეფცია მუშაობს არაერთ დემოკრატიულ ქვეყანაში, და არ შეიძლება, 3.7 მილიონი მოსახლეობის ნახევარი ან უფრო ნაკლები ირჩევდეს ხელისუფლებას და განსაზღვრავდეს ქვეყნის მომავალს). ეს ცვლილება ასევე დაასრულებს გაუთავებელ საუბარს მმართველი ძალის პარტიული კოორდინატორების არაპროპორციულ გავლენაზე საარჩევნო პროცესზე და შედეგად პოლიტიკურ სპექტრს გაამრავალფეროვნებს“, - ნათქვამია გიორგი კვირიკაშვილის განცხადებაში.

 

წერილის ბოლოს კვირიკაშვილი ხაზგასმით აღნიშნავს, რომ ზემოთქმული რეკომენდაციების გათავლისწინებით ქართული ოცნება შეძლებს შეინარჩუნოს მოსახლეობის ნდობა არა მხოლოდ პოლიტიკური პროცესებისადმი, არამედ დაიტოვოს შანსი, იყოს პროცესის წარმმართველი და რაც უმთავრესია, ქვეყანას შეუნარჩუნოს შესაძლებლობა, დარჩეს დასავლურ ორბიტაზე რეგიონის ლიდერად.

არქივი

« « » » აგვისტო 2019
ორშ სამ ოთხ ხუთ პარ შაბ კვი
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?