Global Press

Georgia

Global PressGlobal PressGlobal PressGlobal Press

USD
2.8661
EUR
3.19
RUR
0.0454
GBP
3.7821

აჭარაში უპრეცედენტო მასშტაბის ევროპული ინვესტიცია ხორციელდება. ამის შესახებ „გლობალპრესს“ აჭარის მთავრობიდან აცნობეს.

 

მათი ინფორმაციით, ქობულეთში პროექტის პრეზენტაცია გაიმართა, რომელსაც პრემიერ-მინისტრი მამუკა ბახტაძე, აჭარის მთავრობის თავმჯდომარე თორნიკე რიჟვაძე, აღმასრულებელი და საკანონმდებლო ხელისუფლების წარმომადგენლები ესწრებოდნენ.

 

მულტიფუნქციური მწვანე ქალაქის მშენებლობა ქობულეთში ნახევარი მილიარდი ლარის ოდენობის ინვესტიციის განხორციელებას ითვალისწინებს.

 

პრემიერ-მინისტრმა განაცხადა, რომ პროექტი აჭარას და საქართველოს გადააქცევს მნიშვნელოვან ტურისტულ ცენტრად და ხაზი გაუსვა აჭარის მთავრობის წარმომადგენლების როლს პროექტის განხორციელებაში.

 

„ჩვენ ვსაუბრობთ ისეთ მასშტაბურ ინვესტიციაზე, რომელიც აჭარის ოთხსეზონიან კურორტად გადაქცევას უზრუნველყოფს. ვსაუბრობთ ისეთ მასშტაბურ პროექტზე, რომელიც იქნება ნამდვილი მარგალიტი მთელი შავი ზღვის აუზში, რომელიც უზრუნველყოფს იმას, რომ სწორედ საქართველო დაიმკვიდრებს ადგილს, როგორც ლიდერი ქვეყანა ტურიზმში“, - განაცხადა ბახტაძემ.

 

თორნიკე რიჟვაძემ ისაუბრა მსხვილი ინფრასტრუქტურული პროექტების მნიშვნელობაზე და აღნიშნა, რომ აჭარა ახალ მიმზიდველობას იძენს.

 

,,პროექტის განხორციელება ქობულეთში ახალ შესაძლებლობებს შექმნის და უზრუნველყოფს ადგილობრივი დასაქმების ხელშეწყობას. აჭარის ისტორიაში ეს პროექტი არის ერთ-ერთი ყველაზე მასშტაბური და უპრეცედენტო. განსაკუთრებით მახარებს ის ფაქტი, რომ სრულად ფინანსდება ევროპული კაპიტალით და ევროპული ინვესტიციით“, - განაცხადა მთავრობის თავმჯდომარემ.

 

„ტერიტორიაზე მშენებლობისას და შემდგომ ოპერირებისას დასაქმებული იქნება 500 ადამიანი. პროექტში გათვალისწინებულია გოლფის მოედანი, საფეხბურთო მოედნები, საჩოგბურთო კორტები, საცურაო აუზები, რეკრეაციული ზონები. ასევე, აშენდება 250-ნომრიანი მაღალი კლასის სასტუმრო და ერთ-ერთი ყველაზე დიდი სპა-ცენტრი ევროპაში.

 

პროექტში ასევე გათვალისწინებულია სავაჭრო ცენტრი, პარკირება 500 ავტომობილისთვის და ვერტმფრენის დასაჯდომი ადგილი. სასტუმროსა და გამაჯანსაღებელი ცენტრის მართვა განხორციელდება საერთაშორისო ბრენდის მიერ.

 

,,გრინ რეზორტის" მშენებლობისას გამოყენებული იქნება ენერგოეფექტური და ეკოლოგიურად სუფთა სამშენებლო მასალები. ტერიტორია აღჭურვილი იქნება ისეთი თანამედროვე ტექნოლოგიებით, როგორიცაა ელექტრომობილების დასამუხტი სადგურები და მზის ენერგიის პანელები“, - აღნიშნულია აჭარის მთავრობის მიერ გავრცელებულ ინფორმაციაში.

დღეიდან თითოეული მოქალაქე შეძლებს დიდთოვლობის ან ზვავსაშიშროების დროს კობი-გუდაურის ახალი საბაგირო გზით ისარგებლოს, - ამის შესახებ პრემიერ-მინისტრმა მამუკა ბახტაძემ კობი-გუდაურის ახალი, 7,5-კილომეტრიანი საბაგირო გზის გახსნაზე განაცხადა.

 

მისივე თქმით, ბოლო 6 წლის განმავლობაში ტურისტების რაოდენობა გუდაურში 500 პროცენტით გაიზარდა.

 

„ყველას გილოცავთ კობი-გუდაურის საბაგირო გზის გახსნას. ეს არის მართლაც უნიკალური პროექტი, მინდა გულწრფელად მივულოცო ტურისტებს. განსაკუთრებით მინდა მივულოცო კობის, გუდაურის და ყაზბეგის მოსახლეობას, ვინაიდან, ჩემი აზრით, სწორედ მათ ესმით ყველაზე კარგად ამ გზის პოტენციალი, შესაძლებლობები და სასიცოცხლო მნიშვნელობა. რამდენიმე დღის წინ ჩვენ აღვნიშნეთ გუდაურის როგორც კურორტის ჩამოყალიბების 30 წლის იუბილე. ბოლო 6 წლის განმავლობაში ტურისტების რაოდენობა გუდაურში 500 პროცენტით გაიზარდა. ეს მართლაც ძალიან დიდი წარმატებაა, მაგრამ ეს არ არის საკმარისი. ჩვენ გვსურს, რომ საქართველოში, სამთო-სათხილამურო კურორტები იყოს საუკეთესო მსოფლიოში. გუდაური ახალ სეზონს შეხვდა ძალიან ბევრი სიახლით, მაგრამ ეს პროექტი მართლაც უნიკალურია“, - განაცხადა ბახტაძემ.

 

მისივე თქმით, ეს არის ისტორიული მნიშვნელობის პროექტი, რომლის რეალიზაციის შედეგად შესაძლებელი იქნება კობის, გუდაურის და სტეფანწმინდის ერთ კლასტერად განვითარება.

 

„თუ ვნახავთ შვეიცარიისა და ავსტრიის საუკეთესო კურორტების წარმატებას, სწორედ აღნიშნული სტრატეგიის რეალიზაციის საშუალებით შეძლეს მათ საუკეთესო შედეგების მიღწევა. დარწმუნებული ვარ, რომ ჩვენს მივუახლოვდებით ჩვენი ევროპელი მეგობრების დონეს. მსურს განსაკუთრებული მადლობა გადავუხადო რეგიონალური განვითარებისა და ინფრასტრუქტურის სამინისტროს. განსაკუთრებული მადლობა კომპანიას, რომელმაც აღნიშნული პროექტის რეალიზაცია შეძლო. მადლობა კომპანია „პომას“, რომელიც არის წამყვანი ევროპული ბრენდი. მსურს განსაკუთრებული მადლობა გადავუხადო ყველა ინჟინერს თუ ტექნიკოსს, რომლებმაც ასე მოკლე ვადებში ყველაზე რთულ რელიეფში და რთულ კლიმატურ პირობებში შეძლეს აღნიშნული პროექტის რეალიზაცია. ტურისტული პოტენციალის ზრდასთან ერთად ეს პროექტი ჩვენ დაგვეხმარება, რომ გავუმკლავდეთ ძალიან მნიშვნელოვან გამოწვევას, რომელიც გვაქვს ყოველ ზამთარს, როდესაც კობი-გუდაურის საავტომობილო გზა იკეტება. დღეიდან თითოეული მოქალაქე შეძლებს დიდთოვლობის ან ზვავსაშიშროების დროს ისარგებლოს აღნიშნული საბაგირო გზით. შესაბამისად, ეს იქნება ძალიან მნიშვნელოვანი ნაბიჯი იმისთვის, რომ ერთხელ და სამუდამოდ, მოვაგვაროთ ეს პრობლემა. რა თქმა უნდა, ეს პრობლემა სისტემურად გადაწყდება 2023 წელს, როდესაც დავასრულებთ 9-კილომეტრიანი გვირაბის მშენებლობას, მაგრამ ამ წლების განმავლობაში ეს პროექტი დაგვეხმარება, რომ გავუმკლავდეთ ამ გამოწვევასაც. მე მწამს, რომ საქართველო აუცილებლად დაიმკვიდრებს ადგილს მსოფლიო რუკაზე, როგორც ყველაზე წარმატებული სამთო-სათხილამურო კურორტების მქონე ქვეყანა“, - აღნიშნა პრემიერმა.

 

პრემიერ-მინისტრმა ახლად გახსნილი საბაგიროთი ვიცე-პრემიერთან, რეგიონული განვითარებისა და ინფრასტრუქტურის მინისტრ მაია ცქიტიშვილთან, ეკონომიკისა და მდგრადი განვითარების მინისტრ გიორგი ქობულიასთან, მრჩეველთან რეგიონული განვითარების საკითხებში სოზარ სუბართან, რეგიონის გუბერნატორ შალვა კერესელიძესთან და საბაგიროს მშენებლობაში ჩართული კომპანიების წარმომადგენლებთან ერთად იმგზავრა. 7.5 კმ სიგრძის კობი-გუდაურის საბაგირო გზა, რომლის მშენებლობაში 81 მილიონი ლარის ოდენობის ინვესტიცია განხორციელდა, გუდაურის საბაგიროების ერთიან სისტემაში ერთიანდება და მისი გამტარუნარიანობა საათში 2 800 მგზავრია.

2018 წელს საქართველოში შემოსული საერთაშორისო ვიზიტორების რაოდენობამ 8 679 544 ადამიანი შეადგინა, რაც ახალი რეკორდია საქართველოს ტურიზმის ისტორიაში, - ამის შესახებ 2018 წელს საქართველოში საერთაშორისო ვიზიტორების სტატისტიკის პრეზენტაციაზე პრემიერ-მინისტრმა მამუკა ბახტაძემ განაცხადა.

 

მისივე თქმით, ეს ნიშნავს იმას, რომ ცნობადობა და ინტერესი საქართველოს მიმართ ყოველდღე იზრდება.

 

„რიცხვი, რომელიც ახლა უნდა დავასახელო, ახალი რეკორდია საქართველოს ტურიზმის ისტორიაში. 2018 წელს საქართველოში შემოსული საერთაშორისო ვიზიტორების რაოდენობამ 8 679 544 ადამიანი შეადგინა. ჩვენი ზომის ქვეყნისთვის ეს მართლაც უნიკალური წარმატებაა. რას ნიშნავს ეს? პირველ რიგში ეს ნიშნავს იმას, რომ ცნობადობა და ინტერესი საქართველოს მიმართ ყოველდღე იზრდება, ვიზიტორები საქართველოში ეცნობიან ჩვენს უნიკალურ კულტურას და კიდევ ერთხელ ყველა რწმუნდება, რომ ჩვენი უნიკალური კულტურა არის საერთო ევროპული ცივილიზაციის ნაწილი. პირველ იანვარს ევროკავშირის უმაღლესმა წარმოამადგენელმა საგარეო და უსაფრთხოების პოლიტიკის საკითხებში და საქართველოს დიდმა მეგობარმა ფედერიკა მოგერინიმ თავის საახალწლო მიმართვაში წლის ერთ-ერთ ყველაზე მნიშვნელოვან მოვლენად სწორედ ფრანკფურტში მსოფლიოს წიგნის ყველაზე დიდ ბაზრობაზე საქართველოს საპატიო სტუმრობა დაასახელა. რაც ასევე ძალიან მნიშვნელოვანი და პოზიტიურია. 2018 წელს საქართველო უსაფრთხო და ტურისტულად მიმზიდველ ქვეყნად დასახელდა მსოფლიოს ყველაზე გავლენიანი ორგანიზაციებისა და გამოცემების რეიტინგებში. საერთაშორისო კვლევითი პორტალის - ნამბეოს მონაცემებით, 2018 წელს საქართველო მსოფლიოს 125 ქვეყანას შორის მეხუთე ადგილზე გავიდა. გაერო-ს მსოფლიო ტურიზმის ორგანიზაციის ანგარიშის მიხედვით, საქართველო მსოფლიოში ერთ-ერთ ყველაზე სწრაფად მზარდი ტურისტული მიმართულებაა და ის რეიტინგში მეოთხე ადგილს იკავებს მაშინ, როდესაც ევროპაში ჩვენ მეორე ადგილზე ვართ“, - განაცხადა ბახტაძემ.

გავლენიანმა ბრიტანულმა გამოცემა The telegraph-მა საქართველო 2019 წლის 10 საუკეთესო ტურისტულ მიმართულებას შორის დაასახელა. ამის შესახებ ინფორმაციას საქართველოს ტურიზმის ეროვნული ადმინისტრაცია ავრცელებს.

 

“საქართველო მსოფლიოში ერთ-ერთი ყველაზე ლამაზი ადგილია. მაღალი მთებით, უძველესი მონასტრებით, სტუმართმოყვარე ხალხით ცნობილი საქართველო ღვინის სამშობლოა, სადაც შეგიძლიათ ტურისტულ ბილიკებს გაჰყვეთ და ისიამოვნოთ.

 

გასულ წელს საქართველოში 8 მილიონზე მეტი საერთაშორისო ვიზიტი შედგა. ლონდონსა და ქუთაისს შორის დანიშნული პირდაპირი ავიარეისის შედეგად 2019 წელს საქართველოს თოვლით დაფარულ მწვერვალებს, მდელოებზე ხალიჩასავით მოფენილ ვენახებს და ლამაზ ქალაქებს ბევრი სტუმარი გამოუჩნდება", - წერს ჟურნალისტი გევინ ჰაინესი.

 

ბრიტანელმა ჟურნალისტმა საქართველოში ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის საშუალებით იმოგზაურა.

ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ კომპანიას Wucher Helikopter Gmbh ზამთრის საკურორტო ზონებში ფრენების განხორციელების ნებართვა მისცა. ამის შესახებ „გლობალპრესს“ სამოქალაქო ავიაციის სააგენტოდან აცნობეს.

 

მათი ინფორმაციით, ავსტრიული კომპანია Wucher Helikopter Gmbh მიმდინარე წლის 15 იანვრიდან 15 აპრილამდე გუდაურის, მესტიისა და გოდერძის საკურორტო ზონებში განახორციელებს ოპერირებას.

 

„კომპანია Wucher Helikopter Gmbh 3 ერთეული AS 350 B3 Ecureuil-ის ტიპის თანამედროვე ვერტმფრენებით Heli-skiing ტურებს მოემსახურება, რაც ვერტმფრენებით მოთხილამურეებისა და სნოუბორდისტებისაგან წინასწარ დაკომპლექტებული ტურისტული ჯგუფების გაუკვალავ თოვლში გადასხმას და მათთვის თხილამურებით სრიალისა და სნოუბორდინგის ორგანიზებას გულისხმობს. ნებართვა Wucher Helikopter Gmbh“-ზე რომელიც საქართველოს ზამთრის საკურორტო ზონებში 2013 წლიდან ოპერირებს, 2019 წლის 4 იანვარს გაიცა.

 

ფრენები დაიშვება ხელსაყრელ მეტეოროლოგიურ პირობებში და ვიზუალური ფრენის წესებით (VFR).

 

კომპანიის ოპერირება ხელს შეუწყობს უცხოელი ტურისტების მოზიდვას საქართველოს სათხილამურო კურორტებზე და უზრუნველყოფს ზამთრის ტურიზმისათვის მაქსიმალურად კომფორტული გარემოს შექმნას.

 

ქართული კომპანიებისთვის ქვეყნის ტერიტორიაზე იგივე საქმიანობის განხორციელება დაშვებულია გამარტივებული პირობებით - ოპერირების დაწყებამდე ფრენის გეგმის (Flight Plan) მიწოდებით შპს „საქაერონავიგაციისთვის,“ - ნათქვამია სააგენტოს ინფორმაციაში.

ეკონომიკისა და მდგრადი განვითარების სამინისტროს „მთის კურორტების განვითარების კომპანიამ“ ბაკურიანში, დიდველის სათხილამურო არეალი ოფიციალურად გახსნა.

 

კომპანიის ინფორმაციით, დიდველზე სულ არის ოთხი საბაგირო: გონდოლას ტიპის, სკამებიანი (ბაბლი), ბიგელი და ფუნიკულიორი. კურორორტზე არის 16 კილომეტრიანი 8 სათხილამურო გზა, რომელიც გათვლილია ყველა კატეგორიის მოთხილამურისათვის.

 

კურორტზე სასრიალო გზების უსაფრთხოებას სამაშველო სამსახური და მოთხილამურე პატრულები უზრუნველჰყოფენ. საბაგიროები ყოველ დღე, 10:00-16.45 საათამდე იმუშავებს.

 

დიდველზე დამონტაჟებულია ხელოვნური გათოვლიანების სიტემა. 2000 მეტრიან სათხილამურო გზას 34 თოვლის საფრქვევი აპარატი და 2 ზარბაზანი ათოვლიანებს.

 

კურორტზე ღამეც შესაძლებელია სრიალი, ფუნქციონირებს მაღალტექნოლოგიური ფერადი განათებები, ე.წ „ლედ განათებები“.

 

დიდველზე დამონტაჟებულია სამთო-სათხილამურო კურორტების დამატებითი ატრაქცია „ტობოგანი“, ანუ მთის ციგა. „ტობოგანის“ მშენებლობა სლოვაკურმა კომპანია „Tatralift”-მა განახორციელა. ტრასის სიგრძე 960 მეტრია.

 

ბაკურიანში არის თანამედროვე ტექნოლოგიებით აღჭურვილი კინოთეატრი „ბაკურიანი“. გასულ წელს შეიქმნა საინფორმაციო ცენტრი, რომელიც საერთაშორისო და ადგილობრივ ტურისტებს ინფორმაციით უზრუნველყოფს. ცენტრი დამსვენებლებს აძლევს საშუალებას შეიძინოს სასურველი აბონემენტი რიგში დგომის გარეშე და დეტალური ინფორმაცია მიიღოს ამინდისა და სასრიალო გზების შესახებ, ასევე კვების ობიექტების, სატრანსპორტო საშუალებებისა და საზოგადოებრივი ტრანსპორტის მიმოსვლის განრიგს.

ესპანეთში ვიზიტის ფარგლებში, საქართველოს საგარეო საქმეთა მინისტრი დავით ზალკალიანი ქალაქ მადრიდში არგენტინის რესპუბლიკის მიერ ორგანიზებულ ღონისძიებაში მონაწილეობდა.

 

როგორც „გლობალპრესს“ საქართველოს საგარეო საქმეთა სამინისტროდან აცნობეს, შეხვედრა გამართა არგენტინის რესპუბლიკის ტურიზმის მინისტრთან გუსტავო სანტოსთან. ღონისძიებას ასევე გაერო-ს მსოფლიო ტურიზმის ორგანიზაციის გენერალური მდივანი ზურაბ პოლოლიკაშვილი ესწრებოდა.

 

დავით ზალკალიანმა გუსტავო სანტოსთან მიმოიხილა საქართველო-არგენტინის ორმხრივი ურთიერთობების დღის წესრიგში არსებული საკითხები და ხაზი გაუსვა საქართველოსთვის ლათინური ამერიკის ქვეყნებთან თანამშრომლობის განვითარების პრიორიტეტულობას. საუბარი ასევე შეეხო ტურიზმის სფეროში თანამშრომლობის დიდ პოტენციალს. მინისტრებმა კმაყოფილებით აღნიშნეს, რომ მიმდინარე წელს დაგეგმილია საქართველოსა და არგენტინას შორის ტურიზმის სფეროში თანამშრომლობის მემორანდუმის გაფორმება.

 

სამინისტროს ინფორმაციით, როგორც გაერო-ს მსოფლიო ტურიზმის ორგანიზაციის გენერალური მდივნის, ასევე არგენტინის რესპუბლიკის ტურიზმის მინისტრის მხრიდან უაღრესად დადებითად შეფასდა საქართველოს ტურისტული პოტენციალი და ის მზარდი დაინტერესება, რასაც საქართველო, როგორც ტურისტული დანიშნულების ქვეყანა, იძენს საერთაშორისო ვიზიტორების, მათ შორის, ესპანელი ტურისტების მხრიდან.

 

სამინისტროში აცხადებენ, რომ ვიზიტის ფარგლებში მინისტრი ესტუმრება ტურიზმის საერთაშორისო გამოფენას “FITUR”, რომელიც ესპანეთის მეფემ გახსნა და სადაც საქართველო სხვადასხვა რეგიონის პავილიონითაა წარმოდგენილი. გამოფენის გახსნის ცერემონიაზეა მსოფლიოში ტურიზმის განვითარებაში შეტანილი წვლილისთვის გაერო-ს ტურიზმის მსოფლიო ორგანიზაციის გენერალურმა მდივანმა ესპანეთის მეფეს ორგანიზაციის სიგელი გადასცა.

 

არგენტინის მიღებაზე მინისტრებმა ასევე ისაუბრეს საქართველოს საგარეო საქმეთა მინისტრის დაგეგმილ ვიზიტზე არგენტინასა და ლათინური ამერიკის ქვეყნებში.

ქუთაისის ტურიზმის საინფორმაციო ცენტრმა მედიის წარმომადგენლებს ანგარიში ჩააბარა.

 

ცენტრის ხელმძღვანელის, ტატო ლილუაშვილის თქმით, ქუთაისში ტურისტების რაოდენობა 85%- ით გაიზარდა. ამის მიზეზად ქუთაისის დავით აღმაშენებლის საერთაშორისო აეროპორტი სახელდება, სადაც დაბალბიუჯეტიანი ავიაკომპანიები ევროპის მიმართულებით რეგულარულ რეისებს ახორციელებენ.

 

ლილუაშვილის თქმით, გასულ წელს ქუთაისში ყველაზე მეტი ტურისტი გერმანიიდან ჩამოვიდა. მეორე და მესამე ადგილზე კი პოლონელი და რუსი ვიზიტორები არიან.

ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ ესპანეთში, საქმიანი ტურიზმის გამოფენა IBTM World-ში მიიღო მონაწილეობა. ინფორმაციას ამის შესახებ ეკონომიკისა და მდგრადი განვითარების სამინისტრო ავრცელებს.

 

გამოფენის ფარგლებში საქართველოს სტენდზე 500-მდე შეხვედრა და 10-მდე პრეზენტაცია გაიმართა.

 

ბარსელონაში გამართული გამოფენის ფარგლებში შეხვედრები გაიმართა საერთაშორისო კონგრესებისა და კონვენციების ასოციაციის ახალ პრეზიდენტთან ჯეიმს რისთან და ორგანიზაციის მაღალი რანგის წარმომადგენლებთან.

 

ბარსელონაში გამართულ გამოფენას მსოფლიოს 141 ქვეყნიდან ტურისტული ინდუსტრიის 15 ათასზე მეტი წარმომადგენელი დაესწრო.

გაერო-ს მსოფლიო ტურიზმის ორგანიზაციის გენერალურმა მდივანმა ზურაბ პოლოლიკაშვილმა ესპანეთის მეფეს, მის სამეფო უმაღლესობას ფელიპე VI-ს ტურიზმის სფეროს განვითარებისა და 2030 წლამდე მდგრადი განვითარების მსოფლიო დღის წესრიგის პოპულარიზაციის საქმეში შეტანილი განსაკუთრებული წვლილისათვის, გაერო-ს უმაღლესი ჯილდო გადასცა.

 

საზეიმო ღონისძიების ცერემონია ქალაქ მადრიდში, მსოფლიოს ერთ-ერთი მასშტაბური ტურისტული გამოფენის FITUR-ის ოფიციალური გახსნის ფარგლებში გაიმართა და მას 120-ზე მეტი ქვეყნის ტურიზმის მინისტრი და მსხვილი კორპორაციების პრეზიდენტები დაესწრნენ.

 

სიტყვით გამოსვლისას გენერალურმა მდივანმა იმ განსაკუთრებულ როლსა და მხარდაჭერაზე ისაუბრა, რომელსაც მისი სამეფო უმაღლესობა ფელიპე VI ტურიზმის დარგისადმი იჩენს და ხაზი გაუსვა ესპანეთის, როგორც მსოფლიოს ლიდერი ტურისტული ქვეყნის მნიშვნელობას.

 

ღონისძიების ორგანიზატორების ინფორმაციით, ესპანეთის მეფემ გენერალურ მდივანს მაღალი ჯილდოს გადაცემისათვის მადლობა გადაუხადა.

 

ფელიპე VI-მ ზურაბ პოლოლიკაშვილის ხელმძღვანელობით წამოწყებულ უმნიშვნელოვანეს პროექტებსა და მიმართულებებზე ისაუბრა, რაც სხვადასხვა სახელმწიფოს მთავრობასა და კერძო სექტორს ეკონომიკის დაჩქარებულ ტემპში განვითარებასა და ინვესტიციების მოზიდვაში, ახალი სამუშაო ადგილების შექმნასა და უსაფრთხოების უზრუნველყოფაში დაეხმარება.

 

ცნობისთვის, გამოფენის გახსნაზე გაერო-ს მსოფლიო ტურიზმის ორგანიზაციის გენერალურმა მდივანმა და ესპანეთის პრემიერ-მინისტრმა პედრო სანჩესმა უცხოელი სტუმრებისათვის პრადოს მუზეუმში საზეიმო მიღება გამართეს.

2020 წლის ბოლომდე საქართველოში 230-ზე მეტი ახალი სასტუმრო და სხვა ტურისტული განთავსების ობიექტი, 22 600 საწოლი ადგილით გაიხსნება, - აცხადებს ეკონომიკისა და მდგრადი განვითარების მინისტრი გიორგი ქობულია.

 

მისი თქმით, მნიშვნელოვანია, რომ ტურისტების განთავსების ობიექტები არა მხოლოდ თბილისსა და ბათუმში, არამედ ქვეყნის სხვა რეგიონებშიც აშენდება, რაც ადგილებზე გაზრდის ეკონომიკურ აქტივობას და შექმნის ახალ სამუშაო ადგილებს.

 

„სწორედ ამიტომ ჩვენ უკვე აქტიურად ვმუშაობთ ტურიზმის სფეროში უკვე დასაქმებულთა ან მომავალში ამ სექტორში დასაქმებით დაინტერესებულთა სწავლებებისა და კვალიფიკაციის ამაღლების პროგრამებზე. ჩვენ ვგეგმავთ ოთხსეზონიანი ტურისტული ცენტრების განვითარებას, რომელიც მუშახელს დაასაქმებს არა მხოლოდ სეზონურად და ადგილებზე მომიჯნავე დარგებისთვის ყოველწლიური შემოსავლების მიღების წყარო გახდება", - განაცხადა ეკონომიკისა და მდგრადი განვითარების მინისტრმა.

 

სამინისტროს ცნობით, 230 ტურისტული ობიექტიდან, 32 მაღალი კლასის ბრენდული სასტუმრო აშენდება, საიდანაც 14 ამოქმედდება თბილისში, დანარჩენი სასტუმროები განთავსდება ბათუმში, მწვანე კონცხზე, ქუთაისში, თელავში, აგრეთვე საქართველოს სამთო კურორტებზე - გუდაურში, ბაკურიანსა და გოდერძიზე.

კონომიკისა და მდგრადი განვითარების სამინისტროს “საქართველოს აეროპორტების გაერთიანების“ ინფორმაციით, 2018 წლის ნოემბრის მონაცემებით, ქუთაისის დავით აღმაშენებლის სახელობის აეროპორტი ნოემბრის თვეში 47, 868 მგზავრს მოემსახურა, რაც გასული წლის ანალოგიურ პერიოდთან შედარებით 132 %-ით მეტია (2017 წლის ნოემბერი - 20,591 მგზავრი).

 

როგორც „გლობალ პრეს“ “საქართველოს აეროპორტების გაერთიანებიდან“ აცნობეს, ზრდა ფიქსირდება შესრულებული რეისების მიხედვით, გასულ თვეებთან შედარებით. 2018 წლის ნოემბერში ქუთაისის საერთაშორისო აეროპორტში 178 რეისი შესრულდა, რაც წინა წლის ანალოგიურ პერიოდზე 85 %-ით მეტია (2017 წლის ნოემბერი - 96 რეისი).

 

2018 წლის 11 თვის მონაცემებით, ჯამში ქუთაისის საერთაშორისო აეროპორტი 560, 254 მგზავრს მოემსახურა, რაც წინა წლის ანალოგიურ პერიოდთან შედარებით 47 %-ით მეტია (2017 წელი 11 თვე - 380, 552 მგზავრი).

 

რაც შეეხება შესრულებულ რეისებს, 2018 წლის იანვარ-ნოემბერში ჯამში 1,969 რეისი განხორციელდა, რაც 29 % მეტია გასული წლის ანალოგიურ პერიოდზე ( 2017 წლის 11 თვე -1,529 რეისი).

 

“საქართველოს აეროპორტების გაერთიანების“ ინფორმაციით, მგზავრთნაკადის ზრდის კუთხით მოლოდინი წლის ბოლომდე პოზიტიურია.

ექსკლუზიური

არქივი

« « » » დეკემბერი 2019
ორშ სამ ოთხ ხუთ პარ შაბ კვი
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31

ამინდი

თბილისი

ბლოგერები

Global Press
ვალოდია ჯინჭარაძე
ბლოგერი
იხილეთ ბლოგი
Global Press
გიორგი გიორგაძე
ბლოგერი
იხილეთ ბლოგი
Global Press
მერაბ ცაავა
ბლოგერი
იხილეთ ბლოგი

ყველა ბლოგერი

ჟურნალისტური გამოძიება

გამოკითხვა

საქართველოში, პროსტიტუციის ლეგალიზაცია უნდა მოხდეს თუ არა?